Debora ma ne Barak
4
1 Go̰r siya ge Ehud ne go, Israyela vya ma gwan ke kaŋ ge sone Bage ɗiŋnedin ndwara se. 2 Bage ɗiŋnedin ɓyan nama Yabin, gan ge Kanan ma ne, ge ne ká muluk suwal Hasor pal tok go. Na asagar ma ga̰l dḭl Sisera, ká suwal Harochet-Goyim go.3 Yabin ka da ne pus pore ge walam ma kikis lamaɗo, ka ke Israyela vya ma yál ɗiŋ del wara azi. Israyela vya ma fyal Bage ɗiŋnedin pal. 4 Swaga mbe go a anabi Debora ge Lappidot gwale ka bage kun sarya suwal Israyela go ne. 5 Ka kat tumur ge Debora ne pe zi ke sarya. Tumur ge Debora ne mbe ka suwal Rama ma ne Betel buwal zi, swaga njal ma ge Efrayim ne go. Israyela vya ma ka mbo na ta ya ne bama fare ma.
6 Dam a̰me ɗu, Debora tol Barak ge Abinowam vya ne Kedes-Neftali ya, jan na go: «Bage ɗiŋnedin, Dok ge Israyela ne ho̰ wak go, mo mbo, mo abe naa dudubu wol ne pehir ge Neftali ma ne Zabulon ne zi, aŋ mbo njal Tabor pal ya. 7 Mbi ma̰ é Sisera ga̰l ge asagar ge Yabin ne mbo ya mam so̰o̰l ge Kichon ne wak go, ne na pus pore ma, ne na naa ge mbal pore ma, mbi ma̰ ɓyan na mo tok go.» 8 Barak jan na go: «Kadɗa mo mbo dagre ne mbi, mbi ma̰ mbo, kadɗa mo mbo ne mbi to, mbi mbo to me.» 9 Debora jan na go: «Mbi vinna mbo ne mo, amma mo ɓol uwareya pore mbe zi to. Ago Bage ɗiŋnedin mbo ɓyan Sisera ge ndu gwale tok go.» Debora ma ne Barak ɓan mbo Kedes ya. 10 Barak kote pehir ge Zabulon ne ma ne Neftali ne ya se Kedes go, naa mbo kaŋ ge dudubu wol go, a vin mbo na pe go. Debora mbo dagre ne Barak me.
11 Heber ge keniya, caɗe tene ne keniya ge may ma buwal zi ya mbo ya ɗur na gur uwara Chen ge ne Saananim go, na ge gwa ne Kedes pe go. Ago keniya ma Hobab ge Musa tisi vya Keni vya ma ne.
12 A waage Sisera go Barak ge Abinowam vya ndé ja njal ge Tabor ne pala digi. 13 Sisera kote na pus pore ma ya pet, pus pore ge walam ma kikis lamaɗo, ɓanna ne na asagar ma mwaɗak ne Harochet-Goyim ya, a mbo ya mam-so̰o̰l Kichon ne wak go. 14 Debora jan Barak go: «Ɗage digi, ago ma̰ no Bage ɗiŋnedin ɓyan Sisera ya mo tok go. A Bage ɗiŋnedin sḛ mbal pore mo ndwara zḛ ne.» Barak kan na koo ne njal Tabor pala digi ya se, ne naa dudubu wol na pe go. 15 Bage ɗiŋnedin kan vo Sisera ma ne na naa ma zi. Barak hun na naa ge pus pore ma ne na naa ge koo ma uzi mwaɗak. Sisera kan na koo ne na pus pore digi ya se, syat na pe só. 16 Barak yan naa ge ne pus pore ma ne naa ge koo ma pe ɗiŋ mbo Harochet-Goyim ya. Asagar ge Sisera ne ma pet a su, ndu a̰me ɗu kikit puy be gá to.
17 Sisera so ne na koo mbo wat gúr ge Yahel ge Heber gwale, ndu ge keniya ne zi. Ago Yabin, gan ge suwal Hasor ma ne Heber, ndu ge keniya ne buwal ka halas. 18 Yahel wat ya Sisera ndwara zum, tol na, jan na go: «Wá ya diŋ, mbi bageyal, wá ya mbi diŋ, sya vo to.» Sisera wat na gúr zi, lar na se. 19 Sisera jan na go: «Mbi kaɗe mo, ho̰ mbi mam njotɗa nde, mam-njuwal ke mbi ya go.» Yahel hage na faal ge pam ne wak, hon na njotɗa, gwan lar na se. 20 Sisera gwan jan na go: «Mḛ gúr wak go, kadɗa ndu a̰me mbo ja ele mo go ndu a̰me ya go de ɗe, jya̰ na go, ndu ne go to.» 21 Yahel ge Heber gwale her walam wak zwabal ge gúr ne, her ɗuuri na tok go, tar na ya, ne jo̰ lwagre zi, só̰ dam vop, pel na, na keleŋ pṵṵl zi, ne walam wak zwabal ge gúr ne mbe, al suwar zi ya cal. A go no, Sisera su no. 22 Ne jo̰ Barak ka yan Sisera pe, Yahel wat ya na ndwara zum, jan na go: «Mbo ya, mbi ba ŋgay mo ndu ge mo ne ɓyare na pe.» Na sḛ watɗa na diŋ, kwa Sisera siya dolla ne se, walam wak zwabal ge gúr ne, ne na keleŋ pṵṵl zi.