Naa Ge Kun Sarya Ma 3

1 Bage ɗiŋnedin ya̰ pehir ge ɗogle mbe ma ndwara kugi Israyela vya ma, nama ge a ne kwa pore mballa ge suwal Kanan ne to ma pet. 2 Ya̰ nama ndwara hate doŋ pe ge Israyela vya ma ne ge a ne kwa pore to ma, nama hate pore kerra. 3 Naa ge Bage ɗiŋnedin ne ya̰ nama no: Filistiya ma gan ma anuwa̰y, Kanan ma mwaɗak, Sidon ma ne Heviya ma ge a ne ka ne njal ge Liban ne go ma, ne njal Baal-Hermon ya ɗiŋ mbo Lebo-Hamat ya. 4 Bage ɗiŋnedin ya̰ nama ndwara kugi Israyela vya ma, ndwara kwa pe go, nama ma̰ gwan ne nama pala na eya ma ge na ne ho̰ nama na ne Musa wak zi pe se ko ɓa de. 5 A go no, Israyela vya ma gá katɗa Kanan ma, Hittitiya ma, Amoriya ma, Pereziya ma, Heviya ma ne Yebus ma buwal zi no. 6 A gá san nama vya ge gwale ma no, a gá hon nama bama vya ge gwale ma kat yàl no me. A gá uware nama dok ma no.

MAANA GE NAA GE KUN SARYA MA NE

(3:7—16:31)

Otniyel

7 Israyela vya ma gá ke kaŋ ge sone Bage ɗiŋnedin ndwara se. A vyale Bage ɗiŋnedin Dok ge bama ne, a gá uware dok Baal ma ne dok Achera ma. 8 Bage ɗiŋnedin saŋge pore Israyela vya ma pal, sot nama Kuchan-Richatayim gan ge Mesopotami ne tok go. Israyela vya ma gá ke Kuchan-Richatayim temel mo̰r diŋ del tiimal.

9 Israyela vya ma fyal Bage ɗiŋnedin pal, Bage ɗiŋnedin hon nama Otniyel ge Kaleb ná vya ge jyale Kenaz vya ndwara zur nama. 10 O̰yom ge Bage ɗiŋnedin ne kat ne na, saŋge garlaŋ pore ge Israyela vya ma ne. Na sḛ zut pore, Bage ɗiŋnedin ɓyan Kuchan-Richatayim gan ge Mesopotami ma ne na tok go. Hál Kuchan-Richatayim pal. 11 Suwal gá halas del wara anda, go̰r go Otniyel ge Kenaz vya su.

Ehud

12 Uwale, Israyela vya ma gwan ke kaŋ ge sone Bage ɗiŋnedin ndwara se. Bage ɗiŋnedin hon Eglon, gan ge Mowab ne pool Israyela vya ma pal, ne da pe, a ka ke kaŋ ge sone Bage ɗiŋnedin ndwara se. 13 Eglon ɓan na pe ne Ammon ma, ne Amalek ma, a mbo det Israyela vya ma, a ame suwal ge tumur ma ne. 14 Israyela vya ma gá ke Eglon, gan ge Mowab ma ne temel mo̰r ɗiŋ del wol para tiimal.

15 Israyela vya ma fyal Bage ɗiŋnedin pal, Bage ɗiŋnedin hon nama Ehud ge Gera vya, na ge ne pehir ge Bayami ne zi. Ago Ehud ka magul. Israyela vya ma teme na ne kaŋ siyal ma mbo hon Eglon, gan ge Mowab ne. 16 Ehud sol tene kasagar ge ɗel ma zwama jwak, na twala tok-pyaso ŋgayya ɗu, vwal na na swaga pe zi, na tok matoson pal, kan ba̰r na pal. 17 Na sḛ mbo ne kaŋ siyal ma ya hon Eglon, gan ge Mowab ne. Eglon ka ndu ge so̰o̰l gḛ ge be to. 18 Swaga ge ne ho̰ na kaŋ siyal mbe ma ɗe, ya̰ naa ge a ne ḭ kaŋ mbe ma ya ma gwanna. 19 Kare nama pe ya, swaga ge ne dé ya kaŋ sḭḭm ge ne Gilgal ta gwa go, gwan’a gan ta, jan na go: «O gan, mbi da ne fare sele a̰me jan mo.» Gan jan go: «Zane me!» Naa ge ne ka ne na ta ma mwaɗak a wat zum. 20 Ehud ndar tene ya na ta gwa, ago na sḛ ká na zok pul ge iyalam zi, na ge ne zok pala digi go. Ehud jan na go: «Fare ge mbi ne ɓyare jan mo no mbo da ne Dok ta ya.» Eglon ɗage digi ne na swaga katɗa go. 21 Ehud par na tok magul, pwat na kasagar ne na le matoson go, gor na na laar zi ya. 22 Kasagar pala wat zi ya tarap, num fegem so̰me kasagar pala zi ya, ago be ndage kasagar ya zum to, zú na go̰r zum ya. 23 Ehud fet zok wak na pal, ɓur go̰r zum ya. 24 Swaga ge ne mbo ɗe, naa ge ne gan yapul go ma mbo ya ndil swaga, a ɓol go zok wak ma fé fet. A jan ta go: «Tamekyala gan ɓar ne zi bagay.» 25 A da̰re ɗiŋ a lwage, ne jo̰ gan be hage zok wak ma se to ɗe, a her kerle, a hage zok wak ma se, a ɓol gan ne zenna suwar zi, siya. 26 Swaga ge a gale ne ka da̰reya go ɗe, Ehud ɓurra swaga, kale kaŋ sḭḭm ya ya, detɗa suwal Seyira ya. 27 Swaga ge ne de ya, sun tṵ digi ge swaga njal ge Efrayim ne go. Israyela vya ma kan bama koo ne njal pala digi ya se, na sḛ dol tene nama ndwara zḛ. 28 Jan nama go: «Mbo me ya mbi pe go, ago Bage ɗiŋnedin ɓyan Mowab ma, aŋ naa ge ho̰l ma ya aŋ tok go.» A kan bama koo ya se na pe go, a ame maŋgaɗam Urdun swaga totɗa ma ne Mowab ma tok go, a ya̰ ndu a̰me ɗu totɗa to. 29 Swaga mbe go, a hun Mowab ma naa mbo kaŋ ge dudubu wol go, pet naa ge so̰o̰l ma, naa ge pool ma. A be ya̰ ndu a̰me ɗu ɓurra to. 30 Swaga mbe go, Israyela vya ma gwan ne Mowab ma pala se. Suwal gá halas ɗiŋ del wara tiimal.

Chamgar

31 Na go̰r go, Chamgar ge Anat vya pate, hun Filistiya ma naa kikis myanaŋgal ne walam tun nday pe. Na sḛ zú Israyela vya ma me.