Juswa 4

Njal ma wol para azi ne sin kaŋ dwat pala pe

1 Swaga ge pehir ge Israyela ne ma mwaɗak ne kale Urdun le may ya ɗe, Bage ɗiŋnedin jan Juswa go: 2 «Tá me naa wol para azi ne ɓase ma buwal zi, ndu ɗu ɗu ne pehir ge daage go. 3 Ho̰ me nama wak go, nama abe njal ma wol para azi ne swaga ge naa ge ke tuwaleya ma koo ne mḛ ne go. Nama gene nama nama tok ya mbo kanna ge swaga ge aŋ ma katɗa se dwamma go.»

4 Juswa tol naa ge wol para azi, ge a ne tá nama ne Israyela vya ma buwal zi ma ya, ndwara go ndu ɗu ɗu ne hir ge daage zi. 5 jan nama go: «Kale me sandu ge Bage ɗiŋnedin, Dok ge aŋ ne ndwara zḛ, mbo Urdun tuŋsi ya, ndu ge daage na he njal ɗu ɗu na ganwak pal, isiya ge pehir ge Israyela vya ma ne pal, 6 ne da pe, na gá aŋ kaŋ dwat pala. Swaga ge aŋ vya ma ne mbo ele aŋ dḛ ya go: ‹Njal mbe ma ŋgay da ne aŋ pe ɗaa?› 7 Aŋ mbo gwan ne nama janna go: ‹Maŋgaɗam Urdun caɗe tene se sandu wak tuli ge Bage ɗiŋnedin ne ndwara zḛ. Swaga ge sandu wak tuli ne ka kale Urdun pul, Urdun caɗe tene se. Ago njal mbe ma no, a kaŋ dwat pala ne ne Israyela vya ma pe ɗiŋnedin›.»

8 Israyela vya ma ke dimma ne Juswa ne ho̰ bama wak go. A abe njal ma wol para azi ne Urdun tuŋsi ge ŋga ya, dimma ne Bage ɗiŋnedin ne jya̰ Juswa go, isiya pehir ge Israyela vya ma ne pal. A gene nama mbo kanna bama swaga katɗa ya. 9 Juswa gwan kote njal ma digi nṵsiya wol para azi ge Urdun pul go, swaga ge naa ge ke tuwaleya ge ne in sandu wak tuli ma, koo ne mḛ ne go. A gá ya go ɗiŋ ma̰ no.

10 Naa ge ke tuwaleya ge ne ka in sandu ma gá mḛya Urdun pul go, ɗiŋ fare ge Bage ɗiŋnedin ne ya̰ na wak ne ɓase pe Juswa ta go wi mwaɗak, dimma ne fare ge Musa ne ya̰ na wak hon Juswa go. Ɓase ma har ta digi kaleya.

11 Swaga ge ɓase ma ne kale pet ɗe, sandu ge Bage ɗiŋnedin ne, poseya ne naa ge ke tuwaleya ma a kale mbo ɓase ndwara zḛ. 12 Pehir ge Ruben ne ma, ne ge Gad ne ma, poseya ne pehir ge Manasa ne le ɗu, ne bama kaŋ pore ma a kale Israyela vya ma ndwara zḛ, dimma ne Musa dḛ ne jya̰ nama go. 13 Naa ge mbal pore ma, mbo kaŋ ge naa dudubu wara anda go, a mbo Bage ɗiŋnedin ndwara zḛ le babur pul ge Jeriko ne ya.

14 Dam mbe go, Bage ɗiŋnedin pate Juswa Israyela vya ma ndwara go pet. Dam ge na sḛ ne ka ne ndwara ma zi mwaɗak, a gá sya na vo dimma ne a ne ka sya Musa vo go.

15 Bage ɗiŋnedin jan Juswa go: 16 «Ho̰ naa ge ke tuwaleya ge ne in sandu wak tuli ma wak go nama ndé ne Urdun se ya digi.» 17 Juswa hon naa ge ke tuwaleya ma wak go: «Ndé me ne Urdun se ya digi.» 18 Swaga ge naa ge ke tuwaleya ge ne in sandu wak tuli ge Bage ɗiŋnedin ne ma ne ndé ne Urdun pul se ya digi, nama koo ne ndá wakal wak ɗe, maŋgaɗam Urdun gwan’a na byalam go emeya, ka so so̰o̰l dimma ne ge dḛ zaŋgal go.

19 Ɓase ma ndé ne Urdun pul se ya digi dam wol ge saba ge zḛ ge ne go, a mbo kat ge Gilgal go, Jeriko le ge ham ge go.

20 Njal ge wol para azi ge a ne abe nama ne Urdun pul se ya mbe ma, Juswa kote nama nṵsiya ta pal ge Gilgal go. 21 Jan Israyela vya ma go: «Kwap, swaga ge aŋ vya ma dḛ ne mbo ele aŋ ya go: ‹Njal mbe ma sḭ gyana ɗaa?› 22 Aŋ mbo wan aŋ vya ma pe go: ‹Israyela vya ma kale maŋgaɗam Urdun pul fiya̰l pal›. 23 Ago Bage ɗiŋnedin Dok ge aŋ ne fya̰ maŋgaɗam Urdun aŋ ndwara zḛ ɗiŋ aŋ kale mbo le may ya no dimma ne Bage ɗiŋnedin Dok ge aŋ ne, ne ke ne maŋgaɗam ga̰l yuwam ge teer go, fya̰ na nee ndwara zḛ, ɗiŋ nee kale le may ya no. 24 Ne da pe, ɓase ge ne suwar pal ma pet, nama kwa go Bage ɗiŋnedin na pool waɗe waɗe, ne da pe, aŋ ka sya Bage ɗiŋnedin Dok ge aŋ ne vo ɗaɗak me.»