Juswa 3

Maŋgaɗam Urdun pul harra

1 Juswa ɗage digi cya̰wak vḛ. Na sḛ poseya ne Israyela vya ma mwaɗak a ɗage ne Sitim go, a mbo maŋgaɗam Urdun wak ya, a dwam swaga mbe go ɓya, a ba ɗage harra gale. 2 Naa ge ndil temel ma her dam ataa anna swaga katɗa go, 3 ndwara hon ɓase ma wak go: «Swaga ge aŋ ne kwa naa ge ke tuwaleya, Levi vya ma ya in sandu wak tuli ge Bage ɗiŋnedin, Dok ge aŋ ne, aŋ ɗage ne aŋ swaga katɗa go, aŋ kare nama pe. 4 Aŋ ne nama buwal mbo kat tok pyaso ŋgayya dudubu azi. Na kaage aŋ ndá ta ya nama ta zi gwa to. A go no, aŋ ba kwa viya̰ ge herra, ago aŋ be her viya̰ mbe no zaŋgal to.»

5 Juswa jan ɓase ma go: «Mbege me ta, ago Bage ɗiŋnedin kwap ke kaŋ ge ajab ma aŋ buwal zi.» 6 Juswa jan naa ge ke tuwaleya ma go: «He me sandu wak tuli, mbo me ɓase ma ndwara zḛ.» A her sandu wak tuli, a mbo ɓase ma ndwara zḛ.

7 Bage ɗiŋnedin jan Juswa go: «Ma̰ no mbi e pe ŋgay ga̰l ge mo ne Israyela vya ma ndwara go mwaɗak, ne da pe, nama kwa go, mbi da ne mo, dimma ne mbi dḛ ne ka ne Musa go. 8 Mo ɗe, ho̰ naa ge ke tuwaleya ge ne in sandu wak tuli ma wak go: ‹Swaga ge aŋ ne mbo det ja maŋgaɗam Urdun wak go, mbo me mam wak se ya, aŋ mḛ go›.» 9 Uwale, Juswa jan Israyela vya ma go: «Nda me ta ya zi, za̰ me fare ge Bage ɗiŋnedin Dok ge aŋ ne.» 10 Juswa jan nama go: «Ne no ta, aŋ mbo kwa go Dok ge ndwara ya go aŋ buwal zi, na sḛ mbo yan Kanan ma, ne Hittitiya ma, ne Feresi ma, ne Girgasiya ma, ne Amoriya ma, ne Yebus ma aŋ ndwara zḛ.

11 Ndi sandu wak tuli ge Bageyal ge ne suwar pal pet ne, na mbo aŋ ndwara zḛ Urdun pul se ya. 12 Se no, tá me naa wol para azi ne hir ge Israyela ne ma buwal zi, ndu ɗu ɗu ne hir ge daage zi. 13 Swaga ge naa ge ke tuwaleya ge ne in sandu wak tuli ge Bage ɗiŋnedin, Bageyal ge ne suwar pal pet ne, ma ne mbo watɗa maŋgaɗam Urdun pul se ɗe, Urdun mbo varse se, mam wak mbo mḛ sogeya swaga ge ɗu go.»

14 Swaga ge ɓase ma ne ɗage ne bama gúr ma zi ndwara mbo har maŋgaɗam Urdun ɗe, naa ge ke tuwaleya ge ne ka in sandu wak tuli ma ka mborra nama ndwara zḛ. 15 Swaga ge naa ge ne in sandu wak tuli ma ne dé ya Urdun wak go, nama koo ne ndá mam wak ɗe, ago Urdun ka emeya birtu, ne da pe, swaga siyal go, maŋgaɗam Urdun eme digi birtu. 16 Mam ge ne so so̰o̰l ne digi ya, gá mḛ sogeya swaga ge ɗu go, uzi ya kaal, ge suwal Adam na ge ne suwal Sartan ziyar go gwa ta ya, na ge ne so mbo det maŋgaɗam ga̰l ge yuwam pul se ya fya̰ digi. Ɓase ma gá mborra fiya̰l pal ne Jeriko ndwara ŋga. 17 Naa ge ke tuwaleya ge ne in sandu wak tuli ge Bage ɗiŋnedin ne ma mḛ fiya̰l pal, ge Urdun wak go, pehir ge Israyela ne ma pet a kale fiya̰l pal mbo le may ya.