Dam ge vḛso Paska ne kerra
9
1 Del ge azi, na saba ge zḛ ge go, go̰r ge a ne ɗage ne suwal Masar ya, Bage ɗiŋnedin jan Musa fare ful pul ge Sinay ne zi go: 2 «Israyela vya ma ke vḛso ge Paska na dam kerra pal tem. 3 Dam ge wol para anda ge saba mbe no ne go, na gasamal ndwara pisil, aŋ mbo ke vḛso Paska na go, na eya ma ne na wak honna ma pal tetem.»4 Musa jan Israyela vya ma go nama ke vḛso Paska. 5 A ke vḛso Paska dam wol para anda ge saba ge zḛ ge ne go, gasamal ndwara pisil ge ful pul ge Sinay ne zi, dimma ne Bage ɗiŋnedin ne ho̰ Musa na wak go.
6 Swaga mbe go no, naa a̰me ma, ne a ne tá bama tok siya ta pe, a há seŋgre, a be ke vḛso Paska dam mbe go to. Dam mbe go juju, a mbo ya Musa ma ne Aaron ta. 7 A jan Musa go: «Ne tatɗa ge i ne tá siya pe, i há seŋgre. Be ke kwaɗa ge i tyare i bobo ma hon Bage ɗiŋnedin dimma ne Israyela vya ge may ma go dam mbe go tem to’a?» 8 Musa jan nama go: «Da̰re me mbi za̰ fare ge Bage ɗiŋnedin ma̰ hon na wak ya na pal gale ɓya.»
9 Bage ɗiŋnedin jan Musa go: 10 «Jya̰ Israyela vya ma go: Kadɗa ndu a̰me ne aŋ buwal zi, ko ɗiŋ mbo aŋ vya kon ma, hat tene ya seŋgre ne na ne tá siya pe, ko mbo gwasal ya swaga kaal ya, mbo ke vḛso Paska ne Bage ɗiŋnedin pe. 11 Saba ge azi, dam wol para anda go, gasamal ndwara pisil, a mbo zam tame vya duur poseya ne katugum ge be jiya̰l hore ma ne sugur ge zwala babak ma. 12 A mbo ya̰ a̰me dwaabeya digi ɗiŋ mbo cya̰wak to, a mbo hal na kal a̰me to me. A mbo ke na eya ge Paska ne pal. 13 Kadɗa ndu a̰me ge harcal ge ne mbo gwasal to ya̰ vḛso Paska ya be kerra, a mbo ban na ne na kaam buwal zi uzi, ne na ne tyare bobo hon Bage ɗiŋnedin dam mbe pal tem to pe. Ndu mbe no mbo in dṵṵl ge na sone ne. 14 Kadɗa vya gwasal ge ne ka ne aŋ buwal zi ke vḛso Paska ɗe, na ke na eya ma ne wak honna ma ge Paska ne pal tem. Eya ge ɗu mbe no mbo kat ne naa pe pet, ko a vya gwasal, ko vya twala.»
Pḭr sogeya kulbi gúr ge mbegeya pala se
15 Dam ge a ne ɗu gúr ge mbegeya go ɗe, pḭr kulbi gúr swaga ɓol ta na ge sandu wak tuli ne na zi se. Ne gasamal pe go ɗiŋ mbo cya̰wak, kat dimma ne ol go. 16 Ga ke go mbe no ɗaɗak, pḭr mbe ka kulbi na se, ɗaal zi, ka kat dimma ne ol go. 17 Swaga ge pḭr ne abe tene digi ne gúr swaga ɓol ta pal ɗe, Israyela vya ma ka ɗage mborra me, swaga ge pḭr ne mḛ go me ɗe, Israyela vya ma ka kat se me. 18 Ge wak honna ge Bage ɗiŋnedin ne pal, Israyela vya ma ka ɗage mborra, ge na wak honna pal me, a ka gwan kat seɗe. Dam ma mwaɗak ge pḭr ne kat gúr ge mbegeya pal, Israyela vya ma ya go katɗa swaga ge ɗu go me. 19 Swaga ge pḭr ne kat dam ma kaal gúr ge mbegeya pal, Israyela vya ma ka gwan ne bama pala eya ge Bage ɗiŋnedin ne pe se, a ɗage mbo zḛ to. 20 Swaga ge pḭr ne kat gúr ge mbegeya pal dam ma ŋgeɗo, a ga katɗa, ko ɗage mborra wak honna ge Bage ɗiŋnedin ne pal me. 21 Kadɗa pḭr katɗa na pal ne gasamal pe ɗiŋ mbo cya̰wak, ko kadɗa na abe tene ya digi cya̰wak ɗe, nama sḛ ma ɗage mborra. Ko kadɗa pḭr mḛ ya swaga ge ɗu go gyala ɗu ne ɗaal ɗu, swaga ge ne abe tene digi, nama sḛ ma ɗage mborra me. 22 Kadɗa pḭr mḛ ya gúr ge mbegeya pal dam azi, ko saba ɗu, ko del ɗu, Israyela vya ma ga katɗa swaga ge ɗu ge go, a gwan mbo zḛ to, amma kadɗa pḭr abe tene ya digi, nama sḛ ma ɗage mborra me. 23 A ka kat swaga ge ɗu ge go ne mbo zḛ wak honna ge Bage ɗiŋnedin ne pal. A ka ke bama temel ma eya ge Bage ɗiŋnedin ne ho̰ Musa ma pal tetem.