Isiya Ma 8

Ɗuli kal nṵsiya

1 Bage ɗiŋnedin jan Musa go: 2 «Jya̰ Aaron go: Swaga ge mo ne ɗage e ɗuli ma ol digi go, nṵsi ɗuli ge ɓyalar mbe ma nama zḛ́ kwaya̰l ɗuli kal ndwara zḛ ya, dimma ne Bage ɗiŋnedin ne ho̰ Musa na wak go.» 3 Aaron ke go no me, nṵsi ɗuli ma eya ndwara na zḛ́ kwaya̰l ɗuli kal ndwara zḛ ya, dimma ne Bage ɗiŋnedin ne ho̰ Musa na wak go. 4 Ɗuli kal mbe a ɗeere na da ne dinar. Ne na koo se ɗiŋ mbo na tok ma digi, a ɗeere nama digi wak dagre ɗu ne dinar. A ɗeere ɗuli kal mbe dimma ne Bage ɗiŋnedin ne ŋgay Musa na go.

Mbegeya ge Levi vya ma ne

5 Bage ɗiŋnedin jan Musa go: 6 «Caɗe Levi vya ma ne Israyela vya ma buwal zi uzi, ha nama harcal. 7 No a viya̰ ge mo ba mbo hat nama harcal ne: Cigi mam ge ne tuwaleya ge ne sone pe nama ta, nama só nama susu ma uzi mwaɗak, nama usi nama ba̰r ma uzi, nama ha ta harcal. 8 Nama wa̰ nday dalu ɗu poseya ne na bobo ge kaŋ kyarga ne, ndwara go swáma peɗem watɗa ne num, mo mbo wan nday dalu ge ɗogle ne tuwaleya ge sone ne pe. 9 Mo mbo mbo ne Levi vya ma ya ge gúr swaga ɓol ta viya̰ wak pal, mo kote ɓase ge Israyela vya ma ne ya se pet. 10 Mo mbo mbo ne Levi vya ma ya Bage ɗiŋnedin ndwara se, Israyela vya ma me, a mbo e bama tok ma Levi vya ma pal. 11 Aaron mbo tyare Levi vya ma hon Bage ɗiŋnedin dimma ne bobo ge Israyela vya ma ne tyare na go, a mbo ga ne temel ge Bage ɗiŋnedin ne pe. 12 Levi vya ma mbo e bama tok nday dalu mbe ma pal, mo mbo tyare ge ɗu ne tuwaleya ge sone ne pe, ge may ne tuwaleya ge tilla uzi ne Bage ɗiŋnedin pe, ne pore Levi vya ma pe. 13 Mo mbo e Levi vya ma mḛya digi Aaron ma ne na vya ma ndwara se, mo mbo tyare nama hon Bage ɗiŋnedin. 14 Mo mbo caɗe Levi vya ma ne Israyela vya ma buwal zi ya uzi, ago Levi vya ma mbo gá ge mbi ne. 15 Go̰r go no, Levi vya ma mbo mbo ya ke temel gúr swaga ɓol ta zi, mo mbo hat nama harcal, mo mbo tyare nama hon Bage ɗiŋnedin. 16 Ago nama sḛ ma mwaɗak ne Israyela vya ma buwal zi a mbege mbege ne mbi pe, mbi abe nama ne mbi pe ge Israyela vya ma, vya pul soy ma byalam go. 17 Ago Israyela vya ma vya pul soy ma pet a mbi ne ma ne, ko ndu dasana, ko kavaar. Ne dam ge mbi ne hṵ Masar ma vya pul soy ma ge suwal Masar go ya day, mbi mbege Israyela vya ma vya pul soy ma mbege ne mbi pe. 18 Mbi abe Levi vya ma ge Israyela vya ma vya pul soy ma byalam go. 19 Mbi ho̰ Levi vya ma, Aaron ma ne na vya ma, ne Israyela vya ma buwal zi, ne temel ge Israyela vya ma ne pe, ne da pe nama ke temel ne Israyela vya ma pe ge gúr ge mbegeya zi, nama ka hat na yaɗat me, go no a ɓol mḛreya ne mbogom a̰me to swaga ge a ne ndar ta ya gúr ge mbegeya ta go.»

20 Musa ma ne Aaron ɓanna ne ɓase ge Israyela vya ma ne ma mwaɗak a ke Levi vya ma kaŋ ma ge Bage ɗiŋnedin ne ho̰ Musa na wak nama pal ma pet. 21 Levi vya ma hat ta harcal, a usi bama ba̰r ma uzi, Aaron tyare nama hon Bage ɗiŋnedin, ke tuwaleya ne pore nama pe ndwara go, nama ha harcal. 22 Go̰r go no, Levi vya ma mbo ke bama temel ge gúr swaga ɓol ta zi, Aaron ma ne na vya ma, a ka ɗame nama temel zi dimma ne Bage ɗiŋnedin ne ho̰ Musa na wak nama pal go.

Del ge Levi vya ma ne mbya ke temel

23 Bage ɗiŋnedin jan Musa go: 24 «Ne del wara azi go mbo digi, Levi vya ge daage mbo wan temel kerra gúr swaga ɓol ta zi. 25 Swaga ge a ne kerra del wara anuwa̰y, a gwan ke temel to bat. 26 A mbo ka mbar bama ná vya ma swaga ker temel gúr swaga ɓol ta zi go, amma a mbo hon nama temel a̰me kerra to. Mo mbo ke ne Levi vya ma go no, nama temel kerra ma zi.»