Wat Zum 18

Yetro mbo ɓol na tisi Musa

1 Yetro ge Musa tisi, bage tuwaleya ge suwal Madiyan ne, za̰ kaŋ ma ge Dok ne ke ne Musa ma ne Israyela vya ma, ɓase ge na ne ma, za̰ viya̰ ge Bage ɗiŋnedin ne ke ne zurra ge Israyela vya ma ne suwal Masar diŋ ya zum pe. 2 Yetro ge Musa tisi, wan Sefora ge Musa gwale, na ge ne ya̰ na mborra dḛ, 3 wan na vya ma azi jwak me. Ge ɗu dḭl Gerson, ndwara go mbay, jya̰ go: «Mbi mbay ge suwal ge ɗogle go.» 4 Ge may dḭl Eliyezer, ndwara go, mbi Dok a bage ne sya mbi ko̰r ne, jya̰ go: «Dok ge mbi bá ma ne sya mbi ko̰r ne, zu mbi ne Faraon tok go no.»

5 Yetro ge Musa tisi, poseya ne na vya ma jwak, ne na gwale me, a mbo ya ɓol Musa ful pul zi, ge nama swaga ge a ne ka njal ge Dok ne pe go. 6 Jan Musa go: «Mbi Yetro ge mo tisi, mbi gene mo ya mo gwale ma ne mo vya ma azi jwak.» 7 Musa mbo kun na tisi Yetro, gur na koo na ndwara se, bur na na sḛ zi, a ele ta fare ma pe. Go̰r go a wat gur zi. 8 Musa wan na tisi kaŋ ma ge Bage ɗiŋnedin ne ke ne Faraon ma ne Masar ma ne Israyela vya ma pe, ne yál ge bama ne ɓó nama viya̰ zi ma, ne zurra ge Bage ɗiŋnedin ne zu bama ma. 9 Yetro ke laar saal ne kaŋ ma ge Bage ɗiŋnedin ne ke ne Israyela vya ma pe, ne zurra ge ne zu nama ne Masar ma tok go pe me. 10 Yetro jan go: «Uwareya hon Bage ɗiŋnedin, na ge ne zu aŋ ne Masar ma tok go, ne Faraon tok zi ya me! 11 Ne se no, mbi kwa ya go go, a Bage ɗiŋnedin waɗe dok ma ne ga̰l ne pet, da ne pe no, Masar ma ka ke Israyela vya ma yál no.»

12 Yetro ge Musa tisi tyare tuwaleya ge tilla uzi ma, ne tuwaleya ge ba̰a̰n ne ma hon Dok. Aaron ma ne naa ge gaŋlaŋ ge Israyela vya ma ne ma a mbo ya zam kaŋzam dagre ne Musa tisi Dok ndwara se.

Yuwaleya ge Yetro ne

13 Dam ge kwap ge go, Musa kat se ndwara nṵsi Israyela vya ma fare. Ɓase ma mḛ digi ne koo Musa ndwara se ne cya̰wak tek mbo gasamal. 14 Musa tisi kwar kaŋ ge Musa ne ka ke ne ɓase ma pe, jan na go: «Mo te ke ma kaŋ go ne ɓase ma ɗaa? Mo te ka gyana hini go ɗu kikit ɗaa? Kyaɗa ɓase ma ba kat mḛya digi ne koo mo ndwara se ne cya̰wak tek diŋ mbo gasamal ɗaa?» 15 Musa gwan ne na tisi Yetro janna go: «Ɓase ma mbo ya mbi ta, ndwara ele fare ne Dok ta. 16 Swaga ge a ne kat ne fare a̰me ta buwal zi, a mbo ya mbi ndwara se, mbi ba ka nṵsi nama fare, mbi ka ŋgay nama njaŋgeya ge Dok ne ma ne eya ma me.»

17 Musa tisi jan na go: «Kaŋ ge mo ne ke no, a kwaɗa to. 18 Aŋ ne ɓase ma, aŋ lwage ta baŋ. Ago temel dṵṵl ne mo pal, mo mbyat ge ke na hini ɗu to. 19 Se no, za̰ yuwaleya ge mbi ne, Dok me na ka ne mo! Ka ɓase ma ndwara zḛ Dok ndwara se, mo ba ka gene nama fare ma ya Dok ndwara se. 20 Wá̰ nama njaŋgeya ma ne eya ma pe, ŋgay nama nama ke mborra ge ne na viya̰ go, ne kaŋ ge a ba mbo kerra ma me. 21 Tá naa ge mbyatɗa ma, naa ge ne sya Dok vo ma, naa ge jwap ma, naa ge be vin wak lwaɗeya ma, é nama ga̰l ge naa ge dubu ma ne, ne ga̰l ge naa ge kis ma ne, ne ga̰l ge naa ge wara anuwa̰y ma ne, ne ga̰l ge naa ge wol ma ne me. 22 Nama ka nṵsi ɓase ma fare ɗaɗak, nama ka gene ya fare ge dṵṵl ma mo ndwara se. Fare ge fogor ma ɗe, nama sḛ ma ka nṵsi na. Foge tene, nama sḛ ma ḭ dṵṵl dagre ne mo me. 23 Kadɗa mo kerra mbe go, kadɗa na Dok sḛ ho̰ mo na wak ne ɗe, mo mbo lwage tene to, ɓase ma me a mbo det swaga mbe ya halas zi.»

24 Musa za̰ yuwaleya ge na tisi ne. Ker dimma ne na ne jya̰ na go. 25 Musa tal naa ge mbyatɗa ma, ne Israyela vya ma buwal zi, é nama ga̰l ge naa ge dubu ma ne, ne ga̰l ge naa ge kis ma ne, ne ga̰l ge naa ge wara anuwa̰y ma ne, ne ga̰l ge naa ge wol ma ne me. 26 A ka nṵsi ɓase ma fare ma ɗaɗak, fare ge dṵṵl ma a gene nama ya Musa ndwara se, amma fare ge fogor ma, nama sḛ ma ka nṵsi nama ta buwal zi.

27 Musa e na tisi viya̰ go, Yetro gwan mbo na suwal ya.