Gwanna ge Abram ne ya suwal Kanan go
13
1 Abram ɗage ne suwal Masar ya, poseya ne na gwale, ne na kaŋ gan ma, mbo ndwara le mbii ya. Lot kat dagre ne na me.2 Abram ka ndu ge tok pool gḛ, ka da ne kavaar ma, ne fool kaal ma, ne dinar ma gḛ ge be to. 3 Ne le ge mbii ge go, ka mbyareya zḛ zḛ ɗiŋ det suwal Betel ya, ge swaga ge na dḛ ne ɗù na gur go, suwal Betel ma ne Ay buwal zi, 4 ge swaga ge na dḛ ne sḭ twal tuwaleya go. Swaga mbe go, Abram gá kaɗeya ne dḭl ge Bage ɗiŋnedin ne.
Caɗeya ge Abram ma ne Lot ne
5 Lot ge ne ka mbo dagre ne Abram, ka da ne gii ma, ne nday ma, ne gur ma me. 6 Swaga katɗa woɗege nama, ne da pe, nama kavaar ma ka gḛ ge be ge a kat swaga ge ɗu go dagre to. 7 Gool ɗage digi naa ge koy kavaar ge Abram ne ma, ne naa ge koy kavaar ge Lot ne ma buwal zi. Ago Kanan ma ne Feresi ma ne katɗa suwal mbe go. 8 Abram jan Lot go: «Mbi kaɗe mo, na kaage gaage wá ya nee buwal zi to, ko mbi naa ge ne koy mbi kavaar ma ne naa ge ne koy mo kavaar ma buwal zi to me, ago nee hir ge ɗu ne. 9 Swaga fiyal ne mo ndwara zḛ, caɗe nee ta se. Kadɗa mo mbo le tok magul pal, mbi mbo le tok matoson pal, kadɗa mo mbo le tok matoson pal, mbi mbo le tok magul pal me.»
10 Lot her na ndwara digi, kwa go babur pul ge ne maŋgaɗam Urdun wak go ɗiŋ mbo suwal Sowar ya na dareya tutub. Swaga ge Bage ɗiŋnedin gale ne be ge vḛne suwal Sodom ma ne Gomor ɗe, swaga mbe ka dimma ne gaaso ge Bage ɗiŋnedin ne go, ko dimma ne suwal Masar go me. 11 Lot tal babur pul ge maŋgaɗam Urdun ne, mbyare mbo kat le ham ge ya. A go no, ge a ne caɗe ta se. 12 Abram ga katɗa suwal Kanan go, Lot me mbo kat ge suwal ge ne maŋgaɗam Urdun wak go ma ya, mbo ɗiŋ mbo ɗur na gur suwal Sodom ya. 13 Naa ge ne suwal Sodom go ma a ka naa ge ya̰l ma, a ka ke sone gḛ ge be to Bage ɗiŋnedin ndwara se.
Bage ɗiŋnedin gwan ke Abram wak tuli
14 Go̰r go ge Lot ne caɗe tene ne Abram, Bage ɗiŋnedin jan Abram go: «He mo ndwara digi, ne swaga ge mo ne ka ne go no, ndi le kuu ne le mbii, le sya ne le ham. 15 Suwal ge mo ndwara ne ndil na mbe no pet, mbi mbo hon aŋ ne mo pehir ma na ɗiŋnedin. 16 Mbi mbo ser mo pehir ma se la̰y dimma ne kuci ne suwar pal go. Dimma ne ndu ne mbyat isi kuci ne suwar pal to go, go no me, ndu mbo mbyat isi mo pehir ma to me. 17 Ɗage digi, a̰ suwal go pet, na fiyal ne na twala pe go, ago mbi mbo hon mo na.» 18 Abram zwagre mbo kat uwara Chen ge ne suwal Mamre go pe zi, na ge ne suwal Hebron ziyar go. Sin twal tuwaleya ne Bage ɗiŋnedin pe swaga mbe go.