Pe aya ge mam yḛreya ne
8
1 Dok dwat ne Nuhu ma ne kavaar ga̰l ma ne ge jabso ma ge a ne ka poseya ne na fak ga̰l zi ma pet, é saam kwalla suwar pal, mam ɗage bwat se. 2 Mam ge ne fú ne suwar se digi ma wak dibi digi, ndwala ge digi ge ma dibi digi me. Mam swarra abe. 3 Mam ɗage ɓorra ne suwar pal ŋgeŋgeɗo. Dam kis ne wara anuwa̰y pul zi, mam sore. 4 Dam wol para ɓyalar ge saba ge ɓyalar ne go, fak ga̰l mbo yabe ge njal Ararat pal. 5 Mam ka ɓorra ɗiŋ mbo saba ge wol go. Dam ge zḛ ge ge saba ge wol ne go, njal ma pala ɗage ndwarra digi.6 Dam ge wara-anda go, Nuhu hage fak ga̰l ndwala ge na ne ya̰ na uzi. 7 Na sḛ ya̰ ga̰a̰ wat zum, ka ɗage ya, ka gwanna ya, ɗiŋ mam fya̰ ne suwar pal. 8 Na sḛ gwan sot maale digi, ndwara mbo ndil swaga, ko mam fya̰ ya ne suwar pal de. 9 Amma maale ɓol swaga a̰me ge katɗa to, ne da pe mam gale ga̰l ne suwar pal. Gwan’a na ta, na sḛ par na tok, wan na ya na ta fak ga̰l zi. 10 Na sḛ da̰re ta dam ɓyalar, gwan ya̰ maale wat ya zum ne fak ga̰l zi ya. 11 Maale gwan’a na ta gasamal ne uwara olive gaar wanna na wak zi. Ne no ta ɗe, Nuhu kwar go mam gá ya woɗege ne suwar pal. 12 Na sḛ gwan da̰re ta dam ɓyalar, dol maale ya zum, amma maale gwan gwan’a na ta to bat.
Watɗa ge Nuhu ne ne fak ga̰l zi ya zum
13 Swaga ge Nuhu ne ke del kikis myanaŋgal para ɗu go, ge dam ge zḛ ge ge saba ge zḛ ge ne go, mam fya̰ ne suwar pal. Nuhu hage fak ga̰l pala uzi, ndil swaga, kwar go, mam fya̰ ya ne suwar pal uzi. 14 Dam wara azi para ɓyalar ge saba ge azi ne go, mam fya̰ ne suwar pal uzi pet. 15 Dok jan Nuhu go: 16 «Aŋ ne mo gwale, ne mo vya ma, ne mo tisi ma, Ka̰ me aŋ koo ne fak ga̰l zi ya se. 17 Ka̰ kavaar hir ge daage pet ge ne mo ta fak ga̰l zi ya zum: Kavaar ga̰l ma ne ge jabso ma, ne njoole ma, ne kaŋ ge ne sar ma, ko ge a ne kḛ ma pet. Nama tó ta, nama zuli ta se la̰y suwar pal.» 18 Nuhu ma ne na gwale, ne na vya ma, ne na tisi ma, a kan bama koo ne fak ga̰l zi ya se. 19 Kavaar ma ne njoole ma ne kaŋ ge ne kḛ ma pet, a wat ya zum ne bama hir ma go.
20 Nuhu sin twal tuwaleya ne Bage ɗiŋnedin pe, wan kavaar ge harcal ma, ne njoole ge harcal ma ɗu ɗu ne bama kaam buwal zi, tyare nama tilla uzi hon Bage ɗiŋnedin twal tuwaleya pal. 21 Bage ɗiŋnedin za̰ kaŋ hurra ge tuli, jan na dulwak zi go: «Ne gá ne zḛ no, mbi mbo gwan vḛne mbi wak suwar pal ne ndu dasana pe to bat. Ago, ne tolla ge nama ne ya day, ndu dasana dulwak sone. Ago mbi mbo gwan pur kaŋ ge ne o̰y ma uzi dimma ne mbi ne ke no go to bat.
22 Tek ge suwar gale ne go,
zareya ne syatɗa,
iyalam ne zaleya,
somor ne watuwak,
ɗaal ne gyala,
a mbo kat mbe go no ɗiŋ.»