झूठे शिक्षक
2
1 ज़ासु साबे तया लोका में झूठे ज्योत्षी , तेहू साबे तमा में भी झूठे उपदेशक हूँणे ,ज़ोह नाश कर्ण आल़े पाखंडा रा उद्घाटन गोझी करे करणे ,होर तेऊ स्वामी रा जूणी तया लई दे साहा नांई करणे ,होर आपणे आपु छेकअ बिनाशा में पाऊणे । 2 बहू ज़े तया बराबर लुचपन करणे ज़ासके कारण सच्चाई री बाता री निन्दा करणी । 3 तया लोभा बे गला करी करे तमेें आपणे फायदे रे कारण बणाउणे होर ज़ोह दण्डा री आज्ञा पहिले का होई छेकी दी साहा । तेऊरे ईहंणे में किछे भी देरी नांई , होर तया रा बिनाश ऊँघता नांई । 4 किबेकि ज़ेबा दईब तया दूता बे जूणी पाप करू दा नांई छाढू , पर नरका में भेजी करे निहारे कुण्डा में पाई ताकि न्याय री ध्याड़ी तणी बन्दी रही ; 5 होर प्रचीन युगा रा संसारीा भी नांई छाढू पर भक्तिहीन संसारीा पैंदे महा जल प्रलय भेजू , पर धर्मा रे प्रचारक नूहा समेत आठ मणश बचाई ; 6 होर सदोम होर अमोरा रे नगरा बे बिनाशा रा एढा दण्ड कि तया भस्म करी करे छारा में मिलाई ताकि तया ईंहंण आल़े भक्तिहीन लोका री शिक्षा बे एक दृष्टान्त बणे , 7 होर धर्मी लूता बे ज़ोह अधर्मी रे अशुद्ध चाल चलना का बहू दुखी , छुटकारा दिंना । 8 ( किबेकि तया धर्मी त्याह मझे रही करे होर तया रे अधर्मी रे काम हेरी करे होर शुणी करे ,हर एक ध्याड़ आपणे सचे मना दुखी करा तिही ) 9 तेबा दईब भक्ता परीक्षा मेज़ा का काढ़ने होर अधर्मी न्याय री ध्याड़ी तणी दण्डा री दशा में डाहंणा भी ज़ाणा , 10 बिशेष करी करे तया ज़ोह अशुद्ध अभिलाषा रे पीछे शरीरा रे साबे चला होर दईबा बे तुच्छ ज़ाणा । तया ढीट होर हठी साहा होर उछटे पद आल़े बे बुरा भला बोलणाे का नांई डरदे , 11 तेबा भी स्वर्गदूत ज़ोह शक्ति होर सामर्थ्य में तया का बड़ेे साहा , दईब रे बराबर तया बे भला बुरा बोली करे दोष नांई लाउंदे । 12 पर या लोका निर्बुधि पशु रे बराबर साहा , ज़ोह ढाकणे होर नाश हूँणे बे उत्पन होई दे साहा ; होर ज़ासु गला बे ज़ाणदे ही नांई तया रे सड़ाहटा में आपे ही सड़ने । 13 दूजे रा बुरा करणे रे बदले त्याह ही रा बुरा हूँणा । तया ध्याड़ी दपहरे भोग बिलास(खाणा पिणा) करणा ठीक लागा । यह कलंक होर दोष साहा ;जेबा तया तमेे संघा खांदा होर झुटा , तेबा आपणी तरफा का प्रेम भोग करी करे भोग बिलास करा । 14 तया री आछी में ब्यभिचार बसु दा साहा , होर तया पाप करी बिना रुकी नांई सकते ।तया चंचल मना आल़े फिसलाउंदा । तया रे मना लोभ करणे रा अभ्यास होऊ ; तया सन्तापा रे शोहरू साहा । 15 तया सीधी बाता छाड़ी करे भटकी , होर बओरे रे शोहरू बिलामा री बाता में चली ,जूणी अधर्मी री मजदूरी प्रिय ज़ाणी ; 16 पर तेऊ रे अपराधा रे बारे में उलाहना दिंना ,अखे तणी कि अबोल गद्दी री बोली का तेऊ ज़ोह द्शी तेऊ रे बाबलेपना का रोकू । 17 या लोका शुके कुंएँ , होर आँधी(बागुरी) रे उड़ाई दे बादल साहा; तया बे अनन्त निहारा ठहराऊ। 18 तया ब्यर्था घमण्डा री गला करी करे लुचपना रे कामा रे दुआरा , तया लोका शरीरिक अभिलाषा में फसाउंदा ज़ोह भटकी दे मेंज़ा का एब्रे निखलदे ही लागे दे साहा । 19 तया त्याह ह आज़ाद करणे री प्रतिज्ञा त करा पर आपु ही सड़ाहटा रे दास साहा ;किबेकि ज़ोह मणश ज़ासु का हारू द साहा , सह तेऊ र दास बणा । 20 ज़ेबा दईब उदारकर्ता यीशु मसीहा री पछेणा रे दुआरा संसारीा री हर प्रकारा री अशुधता का बची करी निकते , होर तेउकी त्या में फसी करे हारी , तेबा तया री पिछली दशा पहिली का भी बुरी होई दी साहा । 21 किबेकि धार्मिकता री बाता नांई ज़ाणना ही तया बे भला हूँदा कि तेऊ ज़ाणी करे ,तेसा पबित्र आज्ञा का न्याय मिले ज़ोह तया बे सोंपी दी तिही । 22 तया पैंदे यह कहाबत ठीक बेशा तिही कि कुतअ आपणी छांटा री ओर होर न्हेंई दी सुरनी चिचा में पेशणे बे भी नाहंदा ।