इब्रानियों रे ना पत्री
दईब र बचनतिही शोहरू
1
1 पूर्ब (पिछले) युगा में दईबे बापू दादू का थोडा-थोडा करी करे होर भंति- भंति का ज़ोह ज्योत्षी रे दुआरा गला कर, 2 याह लास्ट ध्याड़ी में हामे संघा शोहरू रे दुआरा गला करी, ज़ोह तेऊ सारीी बस्तु र बारिस (मालक) ठहराऊ होर तेहू रे दुआरा तेऊ सारीी सृष्टि री रचना करी । 3 सह दईब री महिमा रा प्रकाश होर तेऊ रे तत्बा री छाप साहा, होर सब बस्तु आपणी सामर्थ्य रे बचना का संभाल़ा । सह पापा धहोई करे उछटी जागहा पैंदे(सरगे) महामहिमना रे धुरा नाहीं करे बेठअ ; 4 होर स्वर्गदूत का तेतरअ ही उतम (बढ़अ )ठहरू तिही जेतरा तेऊ तया का बड़ेे पदा का बारिस होई करे उतम ना पाऊ ।दईब रे शोहरू री श्रेष्टता
5 किबेकि स्वर्गदूत मेंज़ा का दईब केभरे कासु बे बोलू , “ तूह मेरअ शोहरू साहा ,आझ तूह मांह का होऊ ?” होर भी यह, “ हाँऊं तेऊ र बापू साहा तिही होर सह मेरअ शोहरू हूँणअं ?” 6 होर जेबा पहिलौठे जगता में भी आँणा, तेबा बोला,“ दईब रे सब स्वर्गदूत तेऊ दण्डबत करे ।” 7 होर स्वर्गदूत रे बारे में यह बोला “सह आपणे दूता बागुर, होर आपणे सेबका ज़ल़दी आघ बणाउंदा ।” 8 पर शोहरू रे बारे में बोला, “ हे दईब, तेरा सिंहासन जुगा-जुगा तणी रहंणा : तेरे राज्य रा राजदण्ड न्याय रा राजदण्ड साहा । 9 तांईं धर्मा का प्रेम होर अधर्मा का बइर डाहू ; एउ कारण दईब, तेरे दईबे, तेरे सा का बढ़ी करे हर्षरूपी तेले संघा तेरा अभिषेक करू ।” 10 होर यह कि, “ हे दईब आदि में तांईं पृथ्बी री नींब पाई, होर सर्ग तेरे हाथा री कारीगिरी साहा । 11 तया त नष्ट हूँणे, पर तूह बणी रहंणअं ; होर सब झिकड़े साही पूराणे हूँणे 12 होर ताह तया चादरा साही पल़ेटणे, होर तय झिकड़े साही बदल़ने : पर तूह सहे साहा होर तेरे बर्षा रा अन्त नांई हूँणा ।” 13 होर स्वर्गदूत मेंज़ा का तेऊ कासु बे केभरे बोलू, “ तूह मांह धूरअ बेश, जेबरे तणी कि हाँऊं तेरे बइरी तेरी जांघा री थंईली पीढ़ी नांई करू ?” 14 कैह तया सब सेबा ठहिल कर्ण आल़ी आत्मा नांई, ज़ोह उद्धार पाउण आल़े री तणी सेबा करणे बे भेज़ा ?