इफिसियों 3

अन्यजाति में पौलुस री सेबा

1 एउ कारण* हाँऊं पौलुस ज़ोह तमे अन्यजाति री तणी मसीहे यीशु र बन्दी साहा 2 अगर तमे दईबा रे तेऊ अनुग्रहा रे प्रबन्धा रा समाचार शुणु ,ज़ोह थारी तणी हाँऊं दिनअं । 3 पर यह कि सह भेद मांह पेंदे प्र्याशे रे दुआरा प्रगट होऊ , जेढा माँईं पहिले संक्षेपा में लिखी छेकू दा । 4 ज़ासु का पढ़ी करे तमे ज़ाणी सका कि हाँऊं मसीहा र सह भेद कंईं तणी समझाउंदा । 5 ज़ोह होरी टाइमे मणशा रे शोहरु वै एढा नांईं खोजू तिही ,जेढा कि आत्मा रे दुआरा एबा तेऊ रे पबित्र प्रेरित होर ज़ोद्शी पेंदे प्रगट करू तिही । 6 अर्थात यह कि मसीह यीशु में सुसमाचारा रे दुआरा अन्यजाति रे लोका विरासता में साझी, होर एकु ही देहा रे होर प्रतिज्ञा रे भागी साहा । 7 हाँऊं दईबा रे अनुग्रहा रे तेऊ दाना रे साबे , ज़ोहे तेऊ री सामर्थ्य रे प्रभाबा रे साबे मांह बे दिन्ना , तेऊ सुसमाचारा र सेबक बणु । 8 मांह पेंदे ज़ोह पबित्र लोका मेंज़ा का होच्छे का भी होच्छअ *साहा , यह अनुग्रह होऊ कि हाँऊं अन्यजाति वै मसीह रे आगम्य धना रा सुसमाचार शुणऊं , 9 होर सभी पेंदे यह गला प्रकाशित करू कि तेऊ भेदा रा प्रबन्ध कैह साहा ,ज़ोहे सभी रे सृजनहार दईबा में आदि का गुप्त तिही । 10 ताकि एबा कलीसिया रे दुआरा ,दईबा रा हर प्रकारा रा ज्ञान, त्याह प्रधाना होर अधिकारी पेंदे ,ज़ोहे स्वर्गीय ज़ाघा में साहा प्रगट करे । 11 तेऊ सनातन मनसा रे साबे ज़ोह तेऊ म्हारे प्रभु मसीहा में करी तिही । 12 ज़ासु में हामा तेऊ पेंदे बुशाह डाहणे रे सहास होर बुशाह का दईबा रे नेढ ईंहंणे रा अधिकार साहा । 13 एतकि तणी हाँऊं बिनती करा कि ज़ोहे क्लेश थारी तणी मांह हूँदे लागे दे , त्याह रे कारण सहास नांईं छाड़े , किबेकि त्याह में थारी महिमा साहा ।

मसीह रे प्रेम

14 हाँऊं एउ कारण तेऊ बापू रे सामने घुटने (ठुंग)टेका । 15 ज़ासु का स्बर्ग होर पृथ्बी पेंदे ,हर एकु घराने रा ना डाहंदा , 16 कि सह आपणी महिमा रे धना रे साबे तमा वै यह दान दे कि तमे तेऊ रे आत्मा का आपणे मितरी मनुष्यत्बा में सामर्थ्य पाई करे बलबन्त हूँदे रहा ; 17 होर बुशाह रे दुआरा मसीह थारे दिला में बसे कि तमे प्रेमा में ज़ड़ा ढाकी करे होर निब पाई करे , 18 सभी पबित्र लोका संघे भली भाँति समझणे री शक्ति पा ; कि तेऊ री चौड़ई ,होर लम्बाई होर ऊँचाई, होर गहराई केतरी साहा । 19 होर मसीह रे तेऊ प्रेम ज़ाणी सका ज़ोह ज्ञान का पुरे साहा कि तमे दईबा री सारी भरपूरी* तणी परिपूर्ण होआ । 20 एबा ज़ोह एढअ सामर्थी साहा , कि म्हारी बिनती होर समझा का कंईं ज्यादा कामा करी सका ,तेऊ सामर्थ्य रे साबे ज़ोह हामा में काम करा , 21 कलीसिया में, होर मसीह यीशु में तेऊ री महिमा पीढ़ी का पीढ़ी तणी हूँदी रहे ।आमीन ।