गलातियों 2

होरी चेले क पौलुस मन्यत

1 च़ोउदा साला बाद हाँऊं बरनबासे संघे यरूशलेमा बे नाठअ होर तितुस भी संघे निऊं । 2 होर मेरा नाहंणा दईबा री इच्छा रे साबे होऊ*, होर ज़ोह सुसमाचारा हाँऊं अन्यजाति में शुणाउंदा , सह माँईं त्याह बे खोजू ,पर एकान्ता में त्याही बे ज़ोह बड़े समझा तिही ,ताकि एढा नाह होए , कि मेरी एउ टाइमा री ,या पिछला हाँडणा फिरना ब्यर्थ होए । 3 पर तीतुस भी ज़ोह माँईं संघे तिही होर ज़ोह यूनानी साहा ; खतना कराऊणे वै मजवुर नांई करू । 4 यह त्याह झूठे भाई रे कारण होऊ, ज़ोह चोरी करे आए तिही की ज़ोह तेसा स्वतंत्रा का ज़ोह यीशु मसीह का हामे भेटी ,जाणी करे , हामा दास बणाए । 5 एक घड़ी त्याह रे अधीन हूँणे हामे नांई मनु तेवा की सुसमाचारा री सच्चाई तमा में बणी रहे । 6 तेहुकि ज़ासु लोका कुछ समझ तिही (त्या चाहे केड़े भी तिही मांह एता का किछ मतलब नांईं ; दईब कासी रा पक्षपात नांईं करदअ )त्याह में ज़ासु समझ तिही मांह त्याह का किछे नांईं भेटा । 7 पर तेऊ रे बिपरीत त्याहे हेरू कि जेढ़ा खतना करी दे लोका री तणी सुसमाचारा रा काम पतरसा बे सोंपू तिही तेडा ही खतनारहिता री तणी मांह बे सुसमाचार शुणाउणा सोंपू * । 8 किबेकि जूणी पतरसा का खतना करी दे मेंज़े प्रेरिताई का काम बड़े प्रभाबे संघे कराऊ ,तेहू मांह का भी अन्यजाति में प्रभाबशाली काम कराऊ 9 होर ज़ेबा त्याहे तेऊ अनुग्रेहा बे ज़ोह मांह भेटा तिही ज़ाणु तिही तेबा याकूब होर कैफा, होर युहन्ना ज़ोह कलीसिया रे थांबे समझा तिही मांह बे बरनबासा बे संगति र धुरअ हाथ देई करे संघ करू कि हामे अन्यजाति सेटा बे नाहें ,होर त्या खतना करी दे सेटा बे । 10 सीधी यह बोलू ,कि तमे कंगला री सुधि लए, होर एउ कामा करणे रा हाँऊं तमा भी यत्न करदअ तिही ।

पौलुसा दुआरा पतरसा रा बरोध

11 पर ज़ेबा कैफा अन्ताकिया में आउअ तेवा माँईं मुँहा में तेऊरा सामना करू, किबेकि सह दोषी तिही । 12 एतकि तणी कि याकूबा री ओरा का एखा लोका इहंणे का पहिले सह अन्यजाति संघे खांदा तिही ,पर जेबरे त्या आए तेवा खतने करी दे लोका का सह डरी करे पीछे हटू होर किनारे करदअ लागअ । 13 तेऊ संघे ज़ोह रही दे यहूदी भी कपट करू अखे तणी कि बरनबास भी त्याह रे कपटा में पढू । 14 पर ज़ेबा माँईं हेरू की त्या सुसमाचारा री सच्चाई पेंदे सीधी चाला में नांई चलदे , तेवा माँईं सभी रे सामने कैफा वै बोलू , "जब तूह यहूदी होई करे अन्यजाति रे बराबर चला ,होर यहूदी रे बराबर नांईं तेवा तूह अन्यजाति वै यहूदी रे बराबर चलने बे किबे बोला ।

बुशाह रे दुआरा धर्मी हुँणा

15 हामे ज़ोह जन्मा का यहूदी साहा ,होर पापी अन्यजाति मेंज़ा का नांई आंधे । 16 तेवा भी यह ज़ाणी करे कि मणश व्यवस्था रे कामा संघे नांई , पर सीधी यीशु मसीह पेंदे बुशाह करी करे धर्मी हूँदा , हामे आपु भी यीशु मसीह पेंदे बुशाह करू हामे व्यवस्था रे कामे संघे धर्मी नांई पर मसीह पेंदे बुशाह डाही करे धर्मी होई ; तेवा की व्यवस्था रे कामे संघे कोई भी प्राणी धर्मी नांई हूँदअ । 17 हामे ज़ोह मसीहा में धर्मी हूँणे चाहंदा , अगर हामे ही पापी निखल़े , तेवा मसीह भी कैह पापी रे सेबक साहा ? नांई कधी नांई ! 18 किबेकि ज़ोह कुछ माँईं शोटू , अगर तेऊ भी बणाउंदा ,तेवा हाँऊं आपणे आपा वै अपराधी ठराहउंदा । 19 हाँऊं तो व्यवस्था रे दुआरा व्यवस्था री तणी मुअं ,कि दईबा री तणी जिऊ । 20 हाँऊं मसीहे संघे क्रुसा पेंदे चढ़ाऊ तिही, एबा हाँऊं जिउंदअ नांई रहू , पर मसीह मांह में जिउंदअ साहा : होर ज़ोह एबा हाँऊं शरीरा में जिउंदअ साहा ,तेबा सीधी तेऊ बुशाह का जिउंदअ साहा ,ज़ोह दईबा रे शोहरू पेंदे साहा ,ज़ासु माँईं संघे प्रेम करू ,होर मेरी तणी आपणे प्राण दिने । 21 हाँऊं दईबा रे अनुग्रह थोगे नांई ठहराऊ ; किबेकि अगर व्यवस्था संघे धार्मिकता हूँदी तेवा मसीहा रा मरना थोगे हूँदा ।