दईब होर तेउरे चुनी दे लोका
9
1 हांऊं मसीहा में सच बोला , झूठ नांई बोल्दअ , होर मरा मन भी पवित्र आत्मा री गुआही दिंदा । 2 की हांऊं बड़ेअ दुखी साहा , होर मेरा मन सदा दुखी हुंदा । 3 किबेकि हांऊं एडा चाहन्दा कतिही आपणे भाई ज़ोह मेरे शरीर संघे रिशतेदार साहा । हांऊं आपु ही मसीहा में शपित हुंदा । 4 त्याह इस्राएली साहा होर आपणे मसीहा संघे पाके हुणे रा हक होर महिमा होर बाचाएँ , होर व्यवस्था उपासना होर प्रतिज्ञा त्याही री साहा । 5 पूर्वज भी त्याही रे साहा , होर मसीहा भी शरीर भी त्याह ही रा साहा ज़ोह सभी रे उपर परम प्रभू युग- युग धन्य आसा आमीन। 6 पर यह नांही की दईब रअ बचन टलू, तेवा ज़ोह इस्राएला रे बंश साहा त्याह सबे इस्राएली नांई आंदे । 7 होर अब्राहमा रे बंशा हुणे रे कारण सबे तेउरे शोहरू होए , पर (लिखू दा साहा ) इसाहक का ही तेरअ बंश हुणअ ।" 8 मतलब शरीरा री संतान , दईबा री संतान नांई , पर प्रतिज्ञा री संतान बंश गीणने वै हुंदा । 9 किबेकि प्रतिज्ञा रे बचन यह साहा की हांऊं एउ टाईमा रे सावे ईंहंण होर सारीा रे एक शोहरू हुणअ। 10 होर सिर्फ यहे नांई होऊ कि, पर जैबा रिबका भी एकी का मतलब हमारे पिता इसाहाका का सह गर्भवती तिही । 11 होर एबरे तणी नाह तो तेसके शोहरू जनमु तिही होर त्याह नाई कुछ भला या बुरा करूदा तिही , तेवा कि दईवा री मनसा जोह तेऊ रे चुनने रे सावे साहा , कर्मा रे सावे नाई , पर बुलाने आल़े पर बणी रहे । 12 तेऊ बोलू ,जेठअ होछे रअ दास हुणअ । 13 जेड़ा लिखूद साहा , माईये याकुबा का प्रेम करू , पर एसाव् अप्रिय मानु। 14 तेवा हामें कैह बोला , कैह दईबा रे घरे न्याय साहा ? नांई कधी नांई । 15 किबेकि सह मूसा वै बोला , हांऊं जास कासी पेंदे दया करना चाहे , तेउ पेंदे दया करणी , होर जास कासी पेंदे कृपा करनी चाहे तेऊ पेंदे कृपा करणी । 16 तेवा यह ना चाहणे आल़े री होर नाह ठुरणे आल़े पर दया करण आल़े दईबा री गला साहा । 17 किबेकि पवित्र शशत्रे में फिरोना वै बोलू , मांईये तूह एतकी तणी खड़अ करूदअ साहा , कि ताह में आपणी सामर्थ रीहाऊ , होर मेरे ना रा प्रचार सारीी दुनिया में हो । 18 तेवा सह ,जासू चाहन्दा, तेउ पेंदे दया करे , होर जासू चाहन्दा , तेउ कठोर बणाऊंदा ।। दईबा रा रोष होर तेउ री दया
19 तेवा ताह माह वै बोलणाा , की सह तेवा भी दोष किबे लाउनदा ? कुण तेउरी इच्छ रा समान करदा । 20 हे मंशा भला तूह कुणअ साहा , ज़ोह दईबा रा समान करे ? कैह गढी होई बस्तु तेसा बनाऊणा आल़े का यह बोली सका की तेउये हांऊं एडअ किवै बणाउ ? 21 कैह कुमारा माटे पेंदे अधिकार नांई आंधा , कि एकी लोंदे में का एक भांडअ आदरा वै होर एक आदरा बै होर एक अनादर वै बनाए। 22 तेवा एता में कुण गला अचम्वै री साहा ? की दईबे आपण क्रोधा रिहाऊणे री तणी आपणी सामर्था प्रकट करणे री इच्छा रोषा रे भांडे ज़ोह बिनाशा री तणी बणई दे साहा , त्याह बड़ेे धीराजा का सही साहा । 23 होर दया रे भांडे में ज़ोह तेउये महिमा री तणी पहिले तैयार करीदे आपणी महिमा रे धन प्रकट करणे री इच्छा करी ? 24 मतलब हामा पेंदे जासुये , तेउये न यहूदियों में का पर अन्यजाति का भी आपु संघे शादी। 25 जेड़ा सह होशे री किताबा में भी बोलादा साहा , ज़ोह मेरी प्रजा मेरी नांई , त्याह वै मांह आपणी प्राजा बोलणाा , होर ज़ोह लोका मेरे प्यारे नांई , त्याह वै माह आपणे प्यारे बोलणाा । 26 होर एडा हुणा कि जासू जागाह , मांये तेऊ वै यह बोलू तिही , कि तमे मेरी प्रजा नांई आंदी तेसा जागाह त्याह जीबत दईबा री संतान हुणी 27 होर यशायाह इस्राएल रे बारे में पुकारी करे बोलू , चाहे इस्राएल रे शोहरू री गिनती समुन्दरा रे बोलू बराबर हो तेवा भी त्याह में थोड़े ही बचणे । 28 किबेकि दईबा आपण बचन धरती पेंदे पूरा करी करे धर्मा संघे छेकअ सह पूरअ करणअ 29 जेडा यशयाह पहिले भी बोलू , अगर सेनाओ रे दईबा हामा वै बंश नांई छाडल , तेवा हामा सदोमा जेह हुणे होर अमोरा जेह ठहराउणे ।
इस्राएला री वर्तमान परिस्थिति
30 तेवा हामे कैह बोलणाा ? की अन्यजाति ज़ोह धार्मिकता री खोज नांई करदे , पर जासु धार्मिकता त्या मना , सह धार्मिकता बुशाहे संघे ,साहा । 31 पर इस्राएली ज़ोह धार्मिकता री व्यवस्था खोज करदे तखे नांई पूजे । 32 किवै नांई पूजे , ? तेवा की त्याह बुशाह संघे नांई , पर कर्मे संघे तेत्की खोज करी , त्या तेउ ठोकरा रे पाथरा का ठोकरे खाई। 33 जेड़ा लिखूदा साहा हेरा , माह सियोना में एक ठोकरा लाऊण रा पाथर डाहणअ , होर ठोकर खाणे री एक चटान डाहणी होर ज़ोह तेता पेंदे बुशाह करलअ , सह लजित नांई हुणअ ।