शुकदे हाथा आलअ मणश ठीक करणअ
(मती 12:9-14; लुका 6-11)
3
1 सह भी देहुरे नाठअ , तखे एक मणश , जासका हाथ शुकअद , 2 होर त्याह तेउ पैंद दोषा लाउणे री ताका में , की भला एऊ स्ब्ता री धिहाडी यह ठीक करणअ या नांई ?। 3 तेउए शुकदे हाथा आल़े मणश वै बोलू , “मांजे खड़अ हो ।” 4 होर तेउ बोलू , “स्ब्ता (तुआरे ) री धिहाडी (भला )/ माडा करना ठीक की ( बुरा )माडा , प्राण बच़ऊणे की मारणे ?” पर त्याह चुप रही । 5 तेयुए त्याह री मना री कठोरता री तणी नराज़ होई करे , रोशे संघे चौऊ तरफा भालू , होर तेउ मणश वै बोलू , “आपण हाथ जेह कर।” तेउये हाथ जेह करू , होर तेउर हाथ ठीक होऊ । 6 तेवा फरीसी बागे नाशी करे हेरोदिया संघे तेउरे बिरोधा में साज़िश करदे लागे की यह केई साबे खत्म करण ।भीडा रा यीशु पीछे हुणा
7 यीशु आपणे चेले संघे सौरे (झीला ) फेरा वै नाठअ : होर गलीला कै एक बड़ेी भीड़ तेऊ पीछे होई ; 8 होर यह यहूदी या , होर यरुशलेमा , होर ईदुमािया , यरदना पार , होर सुर होर सैदा री ओरी पोरी क एक बड़ेी भीड़ यह शुणी करे की सह कई हेरानी आल़े काम करदा , तेउ नेणे आई । 9 तेउये आपणे चेले वै बोलू , “भीड़ा री बज़ा कै एक होछी जेई किशती माहे वै त्याह र डाहे कंई त्याह माह दबाई न सका े ।” 10 किबेकी तेउये खासे लोका ठीक करी दे , तेवा ज़थ्ररे लोका बीमार , त्याह तेउ छूणेे तणी तेउ पैंद पड़दे लागे , । 11 ओपरा भी , जेबा तेऊ भाला , तेवा तेउ ज़ेह पडा , होर करीगा पाई करे बोला , तू दईबा रे शोहरु साहा दअ । 12 होर तेउये त्याह वै चेताबनी की माह प्रकट नांई करे ।
बारह प्रेरेता छांटणा
(मती 10:1-4; लुका 6:12-16)
13 तेउकी सह ज़ोह ता वै नाठअ , होर जासु सह चाहन्दा , री त्याह आपु नेणे शयादी , होर त्याह तेउ नेणे आउऐ । 14 तेउकी तेउये बारह प्रेरिता छांटी की त्याह तेउ संघे रहे , होर सह त्याह भेज़े की त्याह प्रचार करे , 15 होर दुष्टात्मा काड़ने री सामर्थ डाहे । 16 त्याह या साहा द : शमाौन जासका ना तेउये पतरस डाऊ , 17 होर जब्दी र शोहरु याकूब होर तेउर भाई यहुना जासका ना तेउए बूअनरगिस जासका मातलब 'गरजना रा शोहरु ' डाऊ 18 होर अनिद्रयास होर फिल्पुस , होर बरतुल्मे , होर मती होर थोमा , होर हलफई र शोहरु याकूब , होर तदे होर शमाौन कनानी , 19 होर यहुदा एसा करीयोति जासू सह ढाकणे भज़याल़ू ।
यीशु होर बालजबूल
(मती 12:22-32; लुका 11:14-23; 12:10)
20 तेवा सह घरा वै आउय : होर एड़री भीड़ कठी होई की त्याह रोटी भी खाई नांई सका । 21 जेबा तेउये टबरे यह शुणू , तेवा त्याह तेउ डाकते निकदे , किबेकी त्याह बोला , की एयुरा दिमाग ठिक नांई आंदा । 22 शाश्त्री भी ज़ोह यरुशलेमा के आऊदे , एड़ा बोला , इयुमें "शैतान साहा दअ” "होर यह दुष्टात्मा रे मालिका री सहायता संघे ओपरे काड़ा ।” 23 तेवा तेउये त्याह नेड़ शादी करे त्याह वै कथा में खोजदअ लागअ , “ओपरा केई साबे ओपरे काड़ी सका दा ? 24 जेबा कासु देशे फूट(झगड़ा )पड़े , तेवा सह देशे कई साबे टेकी रहण ? 25 जेबा कासु घरे फूट पड़े तेवा सह घरे केई साबे बच़ण ? 26 जेबा शेतान हेरी आपणा बिरोधी होई करे आपु में फुट पाए , तेवा सह केई साबे बणी रहण ? सह तो खत्म हूणअ । 27 “पर कोइ मणश कासु बलबन्ता रे घरे नाशिकरे तेऊरे माल नांई लूटी सकते , ज़ेव्रे तणी सह तेउ बलबन्त बानी नांई लउले , तेवा सह तेउरे घरा लूटी सका ।” 28 “हाँऊं तमा कै सच- सच बोल्द की मणशा रे बच्चे रे सारीे पाप होर निन्दा ज़ोह त्याह करदा माफ़ हूणी , 29 पर ज़ोह कोई पवित्र आत्मा रे खिलाफ निन्दा करे दईबा री निन्दा , सह कदरी भी माफ़ नांई करेण : अखे तक सह की सह अनन्त पाप र अपराधी ठहराउण ।” 30 किबेकी त्याह एड़ा बोला , तेउ (यीशु ) में अशुद्ध आत्मा साहा दी ।
यीशु री आमार होर भाई
(मती 12:46-50; लुका 8:19-21)
31 तेवा तेउरी आमार होर तेउरे भाई तेउनेणे आउये , होर बागे खड़ी करे तेउवै बुलावा भेजू । 32 खासे लोका तेउ संघे बेठेदे , होर त्याह तेउवै बोलू की , "तेरी आमार होर तेरे भाई ता लोड़दे आऊदे ।” 33 तेउये त्याह वै बोलू , “मेरी आमा होर मेरे भाई कूण ?” 34 होर त्याह फेरा वै हेरी करे , ज़ोह तेउ सेटा बैठेदे , बोलू , “भाला , मेरी आमा होर भाई यहे साहा दे । 35 किबेकी ज़ोह कोई दईबा री मारजी पैंदे चलदा , त्याह मेरे भाई , होर भीण , होर आमा साहा ।”