मत्ती 17

यीशु रा रूपान्तर

1 छहा धियाड़े बाद यीशु पतरसा होर याकूब होर तेउ र भाई युहन्ना संघा आँणी , होर तया एकान्ता में कासु उछटे पहाडा बे नी । 2 तखे तया रे सामने तेऊ रा रूपान्तर होऊ , होर तेऊ र मुँह ध्याड़े बराबर चमकू होर तेउरे झिकड़े ज्योति (बाती झल़ा) रे बराबर प्रयाशा होऊ । 3 होर मुसा होर एलिय्याह तेऊ संघा करदे तया हेरी । 4 एता में पतरसे यीशु बे बोलू , “ हे दईबा , महारा अखे रहंणा ठीक साहा । अगर तेरी इच्छा साहा तेबा मांह अखे चीण मण्डप बणाऊं ;एक ताह बे , एक मुसा बे , होर एक एलिय्याह बे ।” 5 सह बोलदअ ही लागअद ही , कि एकु उजले बादले तया ढोपी , होर तेऊ बादल़ा का यह शब्द शुणु : “ यह मेरअ प्यारअ शोहरू साहा , जासू का हाँऊं खुश साहा एउरी शुणा ।” 6 चेले यह शुणी करे मूंहाँ रे बले पडी होर बहू डरी । 7 यीशु सेटा आउअ होर तया छुहीं , होर बोलू , “ उठा होर डरे नाईं ।” 8 तेबा तयाहे आपांणी आछी खोली होर यीशु त छाड़ होर कोहे नाईं हेरू 9 तेबा तया पहाडा का उतरदे , तेबा यीशु तयाहे बे आज्ञा दिंनी , “ जेबरे तणी मणशा र शोहरू मुएंदे मेज़ा का नाईं जिए , तेबरे तणी तमे ज़ोह कुछ हेरू कासु बे नाईं खोजे ।” 10 एता में तेऊरे चेले तेऊका पुछु , “ तेबा शास्त्री किबे बोला कि एलिय्याह रा पहिले इहंणा जरूरी साहा ?” 11 तेऊ उतर दिंना , “ एलिय्याह जरुर इहंणअं , होर सब कुछ सुधारना । 12 पर हाँऊं तमा बे बोला कि एलिय्याह इच्छी छेकू द , होर लोके सह नाईं पछेणु ;पर जेड़ा चाहू तेढा ही तेऊ संघा करू । एसी रीति संघा मणशा रे शोहरू भी तयारे हाथा का दुःख (चुआकणे) पड़ने । 13 तेबा चेले समझू कि तेऊ हामा बे युहन्ना बपतिस्मा दिहंण आल़े रे बिषय में बोलू । दुष्टात्मा ग्रस्त बालक ठीक करणं 14 जेबा तया भिड़ा सेटा पूजी , तेबा एक मणश तेऊ सेटा बे आउअ , होर घुटने टेकी करे बोलदअ लागअ , 15 “ हे दईबा , मेरे शोहरू पैंदे दया कर !किबे कि तेऊ मिर्गी इहंदा , होर तेऊ बहू दुःख हुँदा , होर भी- भी आगि में होर भी -भी पाणी में पड़ा । 16 माँईं सह तेरे चेले ेइ सेटा बे आणु , पर तया तेऊ ठीक नाईं करी सकी ।” 17 यीशु उतर दिंना , “हे अबिश्बासी होर हठीले लोको , मांह कधु तणी तमे संघा रहंणा ? केबरे तणी थारी सेहणी ? तेऊ अखे मांह सेटा बे आँणा ।” 18 तेबा यीशु दुष्टात्मा डाँटी , होर सह तेऊ का निकती ” होर शोहरू तेभरी ठीक होऊ । 19 तेबा चेले एकान्ता में यीशु सेटा इच्छी करे बोलू , “ हामे तेऊ किबे नाईं काढ़ी सकी ?” 20 तेऊ तया बे बोलू , “ आपणे बुशाह री घड़ी रे कारण , किबेकि हाँऊं तमा बे सच बोला , अगर थारा बुशाह राई रे दाणे रे भी बराबर होला , कि एउ पहाडा बे बोली सका , अखा का सिकी करे तखा बे नाहं ' तेबा तेऊ नाहंणा ; होर कोई भी गल तमा बे मुश्किल नाईं हूँणी । 21 पर यह जाति बिना प्रार्थना होर उपबासा रे नाईं निखलती । आपांणी मऊती रे बिषय री तेभरी भबिष्यदाणी 22 जेबा तया गलीला में , तेबा यीशु तया बे बोलू , “ मणशा र शोहरू मणशा रे हाथे ही ढ़ाकणे बझयाल़ण ; 23 तया सह मारणं , होर सह चिउणे ध्याड़े जिउंदअ हूँणअं ।” एता में भू नराझ होई । देहुरे रा कर 24 जेबा तया कफरनहूम पूजे , तेबा देहुरे रे करा माँगण आल़े पतरसा सेटा इच्छी करे पुछु , “कैह थारअ गुरु देहुरे रा कर नाईं दिंदअ ?” 25 तेऊ बोलू , “उअह , दिंदा ।” जेबा सह घरे आउअ , तेबा यीशु तेउरे पूछणे का पहिले ही तेउबे बोलू , “ हे शमौन तूह कैह सोचा ? पृथ्वी र राजा महसूल या कर कासु का माँगा ? आपणे शोहरू का या पराए का ?” 26 पतरसे तेउबे बोलू , “ पराए का ।” यीशु तेउबे बोलू , “ तेबा शोहरू बची । 27 तेबा भी एतकी तणी कि हामे तयाबे ठोकर ना खलाए तूह झिला रे कनारे नाहीं करे बंसी पा , होर ज़ोह माछी पहिले निखल़े , तेसकी खाखी खोलणे में ताह एक सिक्क भेटणं , तेहू नी करे मेरे होर आपणे बदल़े दे