मत्ती 10

यीशु रे बारह चेले

1 तेहुकी तेऊ आपणे बारह चेले आपु सेटा शादी करे , तया अशुद्ध आत्मा पैंदे अधिकार दिना कि तया काढ़े होर सभी प्रकारा री दुर्बलता दूर करे । 2 याह बारह प्रेरिता रे ना या साहा : पहिलअ शमौन , जासू बे पतरस बोला , होर तेऊ र भाई अन्द्रियास ;ज़ेबादी र शोहरू याकूब , होर तेऊ र भाई युहन्ना ; 3 फिलिप्पुस , होर बरतुल्मै , थोमा , होर महसूल माँगण आल़अ मत्ती , हलफई र शोहरू याकूब , होर तद्दै , 4 शमौन कनानी , होर यहूदा इस्करियोती जूणी सह ढाकणे बझयाल़ु । बारह प्रेरिता रा सेबा कार्य 5 याह बारह बे यीशु यह आज्ञा देई करे भेजी : “अन्यजाति फेरा बे नाईं नाहें , होर सामरिया रे कासु नगरे प्रबेश नाईं करे । 6 पर इस्राएला रे घराने री ही खहोई दी भेडा सेटा बे नाहें । 7 होर हाँडदे -2 यह प्रचार करा : 'सरग ा रा राज्य नेढ आउआ । ' 8 बमारी ठीक करा , मुंएं दे जिंउदे करा , कोढ़ी ठीक करा , दुष्टात्मा काढ़ा । तमे सें तमे ंत पाऊ , सें तमे ंत दुई साहा । 9 आपणे पटुकों में नाईं सुना , होर ना रूपा , होर ना चाँबा डाहे ; 10 बाता बे ना झोल़ी ड़ाहे , होर ना दुई कुरते , ना बूट होर ना डाहुल़अ , किबेकि मजदूरा बे तेऊ री रोटी भेटी लोढ़ी । 11 “जासू कासु नगरे होर ग्रांएं नाहाँ , तेबा पता ला कि तखे कुंण योग्य साहा । होर जेबरे तणी तखा का नाईं निखल़े , तेहू रे तखी रहा । 12 घरा में प्रबेश करदे ही तेऊ बे आशा ीष दे । 13 अगर तया घरा रे लोका योग्य होले तेबा थारा कल्याण तया पैंदे पूजणा , अगर तया योग्य ना हो तेबा थारा कल्याण तमा सेटा बे बापस इहंणा । 14 ज़ोह कोई तमा ग्रहण नाईं करे होर थारी गला नाईं शुणे , तेऊ घरे या नगरा का निखलते आपांणी ज़ाघा रे धुड़े ठुडके । 15 हाँऊं तमा बे सच बोला कि न्याय री धियाड़े तेऊ नगरा री दशा का सदोम होर अमोरा रे देशा री दशा ज्यादा सहणे योग्य हूँणी । इहंण आल़ाआ संकट 16 हेरा , हाँऊं तमा भेड़ा रे बराबर भेड़िया रे मझे भेज़ा , एतकी तणी तमे सर्पा बराबर बुदिमान होर कबुतरा रे बराबर भोले बणा । 17 पर मणशा का साबधान रहा , किबेकि तया तमे महासभा में सौंपणे , होर आपांणी पंचायता में तमा बे कोड़े बाहंणे । 18 तमे मांह बे न्यायधीश होर राजा रे बराबर तया पैंदे , होर अन्यजाति पैंदे गबाह हूँणे बे पजेरने । 19 जेबा तया तमे ढाकणे बझयाल़णे तेबा यह चिंता नाईं करे कि हामे कासु रीति का याह कैह बोलणाा , किबेकि ज़ोह कुछ तमा बोलणाा होला , तेबा तेसी घड़ी तमा बे खोजणा । 20 किबेकि बोलणा आल़े तमे नांई आंन्धे , पर थारे बापू री आत्मा तमा में बोला । 21 “भाई , भाई होर बापू शोहरू बे , घाती बे सौंपणे , होर शोहरू आमा बापू रे बिरोधा में उठी करे तया मराउंणे । 22 मेरे ना रे कारण सभी लोका तमे संघा बइर करना , पर ज़ोह अन्ता तणी ज़ोह धीरज डालअ तूह रा उदार हूँणा । 23 जेबा तमा एकु नगरा में सताए , तेबा दूजे बे ठुरे । हाँऊं तमा बे सच बोला , तमे इस्राएला रे सभी नगरा में नाईं फिरी छेकणे कि मणशा र शोहरू इहंणअं । 24 “ च़ेलअ आपणे गुरु का बढ़अ नाईं हूँदअ ; होर दास आपणे स्बामी का । 25 चेले रा गरु रे , होर दासा रा स्बामी रे बराबर हूँणा ही बहू साहा ।जेबा तयाहे घरा रे स्बामी बे शैतान बोलू तेबा तेऊ रे घरा आल़े बे कैह कुछ नाईं बोले ! कासु का डरे ? 26 “एतकी तणी मणशा का नाईं डरे ; किबेकि कुछ ढँका नाईं की ज़ोह खोलणा , होर ना कुछ गोझु दा साहा ज़ोह नाईं ज़णना । 27 ज़ोह कुछ हाँऊं तमा बे न्यारे बोला , तेऊ तमा बे प्रयाशे में बोला ;होर ज़ोह कानो कान शुणा , तेऊ तमे छता पैंदा का प्रचार करा । 28 ज़ोह शरीरा बे घात करा , पर आत्मा बे घात नाईं करी सकते , तया का नाईं डरा , ज़ोह आत्मा होर शरीरा दुही नरका में नष्ट करी सका । 29 कैह ढबे में दुई गौरैयें नाई बिकती ?तेबा भी थारे बापू री इच्छा रे बिना तया मेज़ा का एक भी जमीना पैंदे नाईं पड़ी सकतअ । 30 थारे मुंडेा री ज़टा भी सभे गिणी दी साहा । 31 एत्तकी तणी डरे नाईं ; तमे बहू गौरैयें का बढ़ क्रुसा हा । यीशु मनणे या नाईं मनणे 32 “ज़ोह कोई मणशा रे सामने मांह मनलअ , सह मांह भी आपणे स्बर्गीय बापू रे सामने मनणे । 33 पर ज़ोह कोई मणशा रे सामने मेरा नाईं करे , तेता में मांह भी आपणे स्बर्गीय बापू रे सामने नाईं करना । यीशु रे ईंहंणे रा परिणाम 34 “ यह नाईं समझा कि हाँऊं पृथ्वी में मिलापा कराउंदअ आउअ द साहा ; हाँऊं मिलापा कराउंदअ द नाईं , पर तलबरा चलाऊणे बझयाल़ने आउअ द साहा । 35 “ यह नाईं समझा कि हाँऊं पृथ्वी में मिलापा कराउंदअ आउअ द साहा ; हाँऊं मिलापा कराउंदअ द नाईं , पर तलबरा चलाऊणे बझयाल़ने आउअ द साहा । 36 मणशा रे बइरी तेहु रे घरा रे लोका ही हूँणे ।' 37 ज़ोह आमा होर बापू मांह का ज्यादा ज़ाणा , सह मेरे योग्य नाईं ; होर ज़ोह शोहरू या शोहरी मांह का ज्यादा ज़ाणा , सह मेरे योग्य नाईं; 38 होर ज़ोह आपणअं क्रुस नी करे मांह पीछे नाईं चले सह मेरे योग्य नाईं । 39 ज़ोह आपणे प्राण बचाउंदा , तेऊ सह खोऊणं ; होर ज़ोह मेरे कारण आपणे प्राण खोउंदा , तेऊ सह भेटणं । प्रतिफल 40 ज़ोह ताह ग्रहण करा , सह मांह ग्रहण करा ; होर ज़ोह मांह ग्रहण करा , सह मेरे भेजण आल़ेए ग्रहण करा । 41 ज़ोह भबिष्यदक्ता बे भबिष्यदक्ता ज़ाणी करे ग्रहण करे , तेऊ भबिष्यदक्ता रा बदल़ा पांउणा ; होर ज़ोह धर्मी बे धर्मी ज़ाणी करे , तेऊ धर्मी रा बदला पांउणा । 42 ज़ोह कोई याह होछे मेज़ा का एकु मेरे चेले ज़ाणी करे सीधी एक कटोरअ ठाडा पाणी पलाए , हाँऊं तमा बे सच बोला , तेऊ कासु भी रीति का आपणा प्रतिफल नाईं खोउणा ।”