मत्ती 9

द्रांगा रे रोगी ठीक करने

1 तेहुकी सह किस्ती में चढ़ी करे पारा फेरा बे नाठअ , होर आपणे नगरा में आउअ । 2 होर हेरा , कई लोका द्रांगा रे एकु रोगी खाटा (माज़े) पैंदे चुआकी करे तेऊ सेटा बे आणु । यीशु तया रा बुशाह हेरी करे , तेऊ दरांगा रे रोगी बे बोलू , हे शोहरूआ , ढाढ़स बानहं ; तेरे पाप क्षमा होई ।” 3 एता में कई शास्त्री सोचु , “यह त दईबा री निन्दा करा ।” 4 यीशु तया रे मना री गला ज़ाणी करे बोलू , “ तमे लोका आपणे- आपणे मने बुरा बचार किबे करा ? 5 सहज कैह साहा ? यह बोलणाा , 'तेरे पाप क्षमा होई ' , या यह बोलणाा ' उठ होर हांड फिर । ' 6 पर एतकी तणी की तमे ज़ाणा कि मणशा र शोहरू पृथ्वी पैंदे पापा क्षमा करने रा अधिकार साहा । ” तेबा तेऊ दरांगा रे रोगी बे बोलू , “ उठ आपांणी खाट चुआक , होर आपणे घरा में नाहं ।” 7 सह उठी करे आपणे घरा बे नाठअ । 8 लोका यह हेरी करे डरी होर दईबा री महिमा करदे लागे जूणी मणशा बे एडा अधिकार दिंना दा साहा । मत्ती शादणअं 9 तखा का जेंह बढ़ी करे मत्ती ना र एक मणश महसूला री चौकी में बेठअद हेरू , होर तेऊ बोलू , “ मांह पीछे इच्छ ।” होर उठी करे श तेऊ पीछे नाठअ । 10 जेबा सह घरे रोटी खांदअ बेठअ तेबा बहू महसूला मांगण आल़े होर पापी इच्छी यीशु होर तेऊ रे चेले संघा रोटी खांदे बेठे । 11 यह हेरी करे फरीसी तेऊ रे चेले बे बोलू , “ थारअ गुरु महसूला मांगण आल़े होर पापी संघा किबे खांदा ।” 12 यह शुणी करे यीशु तया बे बोलू , “ बईद भले चांगे बे नाईं पर बमारा बे ज़रुरी साहा । 13 एतकी तणी तमे नाहीं करे एतका अर्थ सिखा : 'हाँऊं बलिदान नाईं पर दया चाहंदा ।' किबेकि हाँऊं धर्मी बे नाईं , पर पापी शाद्दअ आउअ साहा ।” उपबासा र प्रश्न 14 तेबा यूहना रे चेले तेऊ सेटा इछी करे बोलू , “कैह कारण साहा की हामे होर फरीसी एतरा उपबास करा , पर तेरे चेले उपबास नाईं करदे ?” 15 यीशु तया बे बोलू , “ कैह बरती , जेबरे तणी लाढअ तयाहे संघा साहा , शोक करी सका ? पर धियाड़े इहंणी जेबा लाढअ तया का अलग करनअं , तेऊ टाइमे तया उपबास करना । 16 कोरे कापडे र पैबन्द (टाली) पूराणे झिकड़े में कोहे नाईं लाउंदे , किबेकि सह पैबन्द तेऊ झिकड़े कुछ होर खींचा , होर सह ज्यादा चीरा 17 होर लोका नउंआ दाखरस पूराणी मशका में नाईं भरदे , किबेकि एडे करने में मशका फूटा , होर दाखरस बहंदा होर मशका नष्ट हुँदा ; पर नउंआ दाखरस नउंईं मशका में भरा होर दुहे बची रहंदा ।” मुंईंदी शोहरी होर बमार बेटढ़ी 18 सह तया संघे इया गला लागद कि भाला एकी सरदारे तेऊ वे नमस्ते करी मेरी शोहरी एब्ररे मुईदी साह परतू हांड़ी करे तेसा पेंदे आपण हाथ ढाहे तेवा सह जिउंदी हुणी । 19 यीशु उठी करे आपणे चेले संघे तिउ पीछे हांड़ी । 20 होर हेरा , एक बेटढ़ी जासु बारह बर्षा का लोहू बहणे रा रोग , पीछा का इच्छी करे तेऊ रे झिकड़े र पुंझ छुंहूँ । 21 किबेकि सह आपणे मने बोला , “ अगर हाँऊं तेऊ रे झिकड़े ही छुली तेबा हाँऊं ठीक हूँणी ।” 22 यीशु फिरी क्रुसा ह हेरी होर बोलू , “पुत्री ढाढ़स बान ; तेरे बुशाहे तुह ठीक करी । ” पर सह बेटढ़ी तेभरी ठीक होई । 23 जेबा यीशु तेऊ सरदारा रे घरे पुजू होर बाँसली बाज़ण आल़े होर भीड़ हुल्लड़ मचाउंदी हेरी , 24 तेबा बोलू , “ पीछे हटा , शोहरी मुंईं नाईं , पर सूती दी साहा ।” एता में तया तेऊ रे मज़ाका करदे लागे । 25 पर जेबा भीड़ काढी , तेबा तेऊ मितर नाहीं करे शोहरी र हाथ ढाकु होर सह जिउंदी होई । 26 होर एसा गला री चर्चा तेऊ सारीे देशे फैली । दुई काणे बे दृष्टिदान 27 जेबा यीशु तखा का जेंह बढ़े , तेबा दुहे काणे तेऊ पीछे यह पुकारदे चली , “ हे दाऊदा रे शोहरूआ , हामा पैंदे दया कर !” 28 जेबा सह घरे पुजु , तेबा तया काणे तेऊ सेटा बे आउए , होर यीशु तया बे बोलू , “ कैह तमा बुशाह साहा कि हाँऊं यह करी सका ?” तयाहे तेऊ बे बोलू , “ उओह दईबा !” 29 तेबा तेऊ तया री आछी छुहीं करे बोलू , “ थारे बुशाह रे साबे तमा बे हो । ” 30 होर तया री आछी खुली । यीशु तया बे चिताई करे बोलू , “साबधान , कोहे भी एसा गला नाईं ना ज़ाणे ।” 31 पर तयाहे निखल़ी क्रुसा ारे देशे तेऊरा यश फैलाऊ । एक कालअ ठीक करणअं 32 जेबा तया बागे नाहंदे , तेबा हेरा , लोका एकु काले जासु में दुष्टात्मा भी , तेऊ सेटा बे आणे ; 33 होर जेबा दुष्टात्मा काढी , तेबा कालअ बोलदअ लागअ । एता में भिड़े (लोके) परशान होई करे बोलू , “ इस्राएला में एढा कधी नाईं हेरू । 34 पर फरीसी बोलू , “ यह त दुष्टात्मा रे सरदारा री सहायता का दुष्टात्मा काढा ।” मजदूर थोड़े साहा 35 यीशु सभी नगरे होर ग्राएं फिरदअ रहू होर तयारे आराधनालय में करदअ होर राज्य रा सुसमाचारा प्रचारा करदअ होर हर प्रकारा री बमारी होर दुर्बलता दूर करदअ रहू । 36 जेबा तेऊ भीड़ हेरी तेबा तेऊ लोका पैंदे तरस आउआ , किबेकि तया तयाह भेडा बराबर साहा जासकअ कोई रखबालअ नाईं आंधअ , ब्याकुल होर भटकी दे साहा । 37 तेबा तेऊ आपणे चेले बे बोलू , “पाके खेच टी बहू साहा पर मजदूर थोड़े साहा । 38 एतकी तणी खेचा रे मालका बे बिनती करा कि सह आपणे खेचा काटणे बे मजदूर भेज़ ।”