12
1 యేసు,
సావుదాన్ వాండ్రు బత్కిస్తి లాజరు మని బేతనియ ఇని నాటొ పస్కా పండొయ్‍దిఙ్ ఆరు రోస్కు ముఙల్‍నె వాతాన్.
2 వారు బాన్ వన్నిఙ్ విందు ఎర్‍పాటు కితార్.
మార్త సేవ కిజి వన్నిఙ్ సాయం కితాద్.
అయావలె వన్నివెట ఉండెఙ్ బస్తి మహి వరి లొఇ లాజరు ఒరెన్.
3 నస్తివలె మరియ జట్టమాంసి ఇని నండొ విల్వ మని నూనె తసి,
యేసు పాదమ్‍కాఙ్ రాసి దన్ని బుర్రది కొప్పుదాన్ వన్ని పాదమ్‍కు తేలితాద్.
అయావలె ఆ ఇల్లు నెగ్గి వాసనమ్‍దాన్ నిండ్రితాద్.
4-5 అయావలె వన్ని సిస్సుర్ లొఇ ఒరెన్ ఇహిఙ వన్నిఙ్ ఒప్పజెప్ని ఇస్కరియోతు యూదా,
ఎందన్నిఙ్ యా జట్టమాంసి ఇని నండొ విల్వ మని నూనె మూండ్రి వందెఙ్ వెండి రూపాయ్‍ఙ పొర్సి అయా డబ్బుఙ్ బీదది వరిఙ్ సిఇతి ఇజి వెహ్తాన్.
6 వాండ్రు యా లెకెండ్ వెహ్తిక బీదది వరి ముస్కు నెగ్గెణ్ సుడ్ఃజిని వందిఙ్ ఆఎద్.
గాని వాండ్రు డొఙరి ఆజి మంజి వరి సేవ పణి వందిఙ్ లోకుర్ సీజిని డబ్బు ఇడ్ని ససి వన్ని డగ్రు మహాద్.
వాండ్రు అబ్బెణి డబ్బుఙ్ వన్ని సొంత కర్సు వందిఙ్ డొఙ కిజి మహాన్.
అందెఙె వాండ్రు ఆహు వెహ్తాన్.
7 అందెఙె యేసు,
“నఙి దూకిదు ముస్నిదాక అక్క దన్నిబాన్ ఇడ్జి మనిద్.
8 బీదదికార్ ఎసెఙ్‍బ మీ వెటనె మంజినార్.
గాని నాను ఎల్లకాలం మీ వెట మన్ఎ”,
ఇజి వెహ్తాన్.
9 అయావలె యూదుర్‍లొఇ మంద లోకుర్,
యేసు బేతనియదు మనాన్ ఇజి నెస్తారె అబ్బె వాతార్.
వారు యేసుఙ్ సుడ్ఃదెఙ్ ఇజినె ఆఎండ,
వాండ్రు సావుదాన్ బత్కిస్తి లాజరుఙ్‍బ సుడ్ఃదెఙ్ వాతార్.
10-11 వన్నిఙ్ జర్గితి దన్ని వందిఙ్ సుడ్ఃజి యూదుర్‍లొఇ నండొండార్ వరి పెద్దెల్‍ఙ డిఃసి యేసు ముస్కు నమకం ఇట్తార్.
అందెఙె పెరి పుజెర్‍ఙు లాజరుఙ్‍బ సప్తెఙ్ ఇజి ఒడిఃబితార్.
12 మహ్సనాండిఙ్ ఆ పండొయ్‍దిఙ్ వాతి నండొ జెనం,
యేసు యెరూసలేమ్‍దు వాజినాన్ ఇజి వెహార్.
13 అందెఙె వారు ఈత రెమ్మెఙ్ అసి,
వన్నిఙ్ ఎద్రు సొహారె,
ఓసనా,
ప్రబు సిత్తి అతికారమ్‍దాన్ ఇస్రాయేలు లోకురిఙ్ ఏలుబడిః కిదెఙ్ వాజిని రాజు పొగ్‌డెః ఆపిన్ ఇజి డట్టం డేల్సి వెహ్తార్.
14-15 “ఓ సియొను గాడ్సి తియెల్ ఆమ,
ఇదిలో నీ రాజు గాడ్ఃదె పిల్ల ముస్కు ఎక్తాండ్రె వాజినాన్”,
ఇజి దేవుణు మాటదు రాస్తి మన్ని లెకెండ్,
యేసు ఉండ్రి గాడ్ఃదె పిల్ల సుడ్ఃతాండ్రె,
దన్ని ముస్కు ఎక్తాండ్రె వాజినాన్.
16 అయావలె వన్ని సిస్సుర్ యా సఙతి వందిఙ్ ముఙల అర్దం కిదెఙ్ అట్ఎతార్.
గాని యేసు సాజి మరి మర్‍జి బత్కిజి దేవుణు మంజిని బాడ్డిదు వన్నివెట గొప్ప జాయ్‍దు మండ్రెఙ్ వన్నిఙ్ దేవుణు ఒతివలె,
అక్కెఙ్ వన్ని వందిఙ్ దేవుణు మాటదు ముఙలె రాస్త మనార్ ఇజి నెస్తారె,
అందెఙె వారు వన్నిఙ్ అయా లెకెండ్ కితార్ ఇజి అర్దం కితార్.
17 వాండ్రు లాజరుఙ్ దూకిఙ్‍దాన్ కూక్సి,
మరి మర్‍జి బత్కిస్తిక సుడ్ఃతి లోకుర్ ఆ సఙతి వందిఙ్ సాసెం వెహ్సి సాటిసి మహార్.
18 అందెఙె వాండ్రు బమ్మ ఆని పణి కితాన్ ఇజి లోకుర్ వెహారె,
వన్నిఙ్ దసుల్ ఆదెఙ్ జి సొహార్.
19 అయావలె పరిసయుర్ ఒరెన్‍దిఙ్ ఒరెన్,
ఇదిలో నండొ లోకుర్ విజెరె వన్నివెట సొన్సినార్.
గాని వరిఙ్ మాటు అడ్డు కిదెఙ్ అట్ఎతాట్ ఇజి వెహె ఆతార్.
యేసు వన్ని సావు వందిఙ్ వెహ్సినిక
20 నస్తివలె పస్కా పండొయ్ కినివలె దేవుణుదిఙ్ పొగ్‍డిఃజి మాడిఃస్తెఙ్ యెరూసలేమ్‍దు వాతి వరి లొఇ సెగొండార్ యూదుర్ ఆఇ గ్రీసుదేసెమ్‍దికార్ మహార్.
21 వారు గలిలయ ప్రాంతమ్‍ది బేత్‍సయిదా పట్నమ్‍ది పిలిపు డగ్రు వాతారె,
ఓ బాబు మాపు యేసుఙ్ సుడ్ఃదెఙ్ ఆస ఆజినాప్ ఇజి వెహ్తార్.
22 అయా సఙతి వందిఙ్ పిలిపు వాతాండ్రె,
అంద్రెయ వెట వెహ్తాన్.
మరి అంద్రెయ పిలిపు కూడ్ఃజి సొహారె యేసుఙ్ వెహ్తార్.
23 అందెఙె యేసు, వరివెట ఈహు వెహ్తాన్, “లోకుమరిసి దేవుణువెట జాయ్‍దు మండ్రెఙ్ ఒని వేడః డగ్రు ఆత మనాద్. 24 నాను మీ వెట నిజం వెహ్సిన. గోదుము గింజెఙ్ బూమిదు అర్సి సాఎండ మహిఙ అక్క ఉండ్రెనె మంజినాద్. గాని ఆ గింజ సాతిఙ నండొ ఆనాద్.
25 ఎయెన్‍బ వన్ని సొంత పాణమ్‍దిఙ్ నండొ ప్రేమిస్తిఙ,
ఎల్లకాలం దేవుణువెట బత్కిని బత్కుదు వాండ్రు మన్ఎండ వన్ని పాణం సొన్‍పె ఆనాన్.
గాని ఎయెన్‍బ యా లోకమ్‍దు బత్కినివలె,
వన్ని సొంత పాణమ్‍దిఙ్ నండొ ప్రేమిస్ఎండ మహిఙ,
ఎల్లకాలం దేవుణువెట బత్కిని బత్కుదు వాండ్రు వన్ని పాణం కాపాడ్ఃనాన్.
26 ఎయెన్‍బ నఙి సేవ కితిఙ వాండ్రు నా సిస్సుడుః ఆదెఙ్‍వలె,
నాను ఎమె మంజినానొ అబ్బె నఙి సేవ కినికాన్‍బ మంజినాన్.
నఙి సేవ కిని వన్నిఙ్ నా బుబ్బ గవ్‍రం సీనాన్.
27 యెలు నా పాణం నండొ బాద ఆజినాద్.
నాను ఇనిక ఇండ్రెఙ్?
ఒబ్బా,
నఙి వాని యా కస్టమ్‍దాన్ తప్రిస్అ.
అహిఙబ యా కస్టమ్‍కు ఓరిస్ని వందిఙె నాను వాత మన.
28 ఒబ్బా నీ పేరు లోకుర్ నడిఃమి గొప్ప పెరిక ఇజి తోరె ఆపిద్ ఇజి వెహ్తాన్.
అయావలె,
“నాను గొప్ప పెరికాన్ ఇజి నీను కిత్తి పణిఙాణిఙ్ తోరె ఆత మన్న.
నీను సాజి మరి బత్కినివలెబ నాను అక్క తోరె ఆనాలె”,
ఇజి ఆగాసమ్‍దాన్ ఉండ్రి జాటు వాతాద్.
29 నస్తివలె అబ్బె నిహిమహి నండొ జెనం అయాక వెహారె,
అయా జాటు ఆగాసమ్‍దాన్ దీడిఃతిక ఇహార్.
మరి సెగొండార్ దేవుణు దూత ఒరెన్ వన్నివెట వర్గితాన్ ఇహార్.
30 అందెఙె యేసు,
“యెలు మీరు జాటుదాన్ వెహి మాటెఙ్ దేవుణు నఙి పోక్తాన్ ఇజి మీరు నెస్ని వందిఙె వాతె,
నా వందిఙ్ ఆఎద్.
31 యెలు యా లోకమ్‍దిఙ్ తీర్‍పు జర్గిజినాద్.
యెలు లోకమ్‍దిఙ్ అతికారి ఆతి సయ్‍తానుఙ్ వన్ని అతికారమ్‍దాన్ వెల్లి నెక్న పొక్నాన్‍లె.
32 నఙి బూమి ముస్కు సిల్వదు ఎకిస్నివలె విజు దేసెమ్‍కాణి లోకురిఙ్ నా డగ్రు తపిస్అలె”,
ఇజి వెహ్తాన్.
33 వాండ్రు సిల్వ ముస్కు ఎనెట్ సానాన్‍లెనొ అక్క నెస్ని వందిఙె యా మాటెఙ్ వెహ్తాన్.
34 అయావలె ఆ నండొ జెనం,
క్రీస్తు ఎల్లకాలం మంజినాన్ ఇజి దేవుణు మాటదు వెహాప్‍గదె.
లోకుమరిసిఙ్ సిల్వ ముస్కు ఎకిస్నాన్‍లె ఇజి నీను వెహ్సిని సఙతి ఇనిక?
లోకుమరిసి ఆతి వీండ్రు ఎయెన్?
ఇజి వన్నిఙ్ వెన్‍బతార్
35 అందెఙె యేసు,
“జాయ్ మీ వందిఙ్ ఇంక సెగం కాలమ్‍నె మీ వందిఙ్ మంజినాద్.
అందెఙె సీకటి వాని ముఙల,
మిఙి జాయ్ మనివలెనె నడిఃదు.
సీకటిదు నడిఃనికాన్ వాండ్రు ఎమె సొన్సినాండ్రొ వన్నిఙె తెలిఎద్.
36 అందెఙె మీరు జాయ్ ఆతి నా కొడొఃర్ ఆని లెకెండ్,
మిఙి జాయ్ మనివలెనె జాయ్ ఆతి మని నఙి నమకం ఇడ్‍దు ఇజి వరిఙ్ వెహ్తాన్.
37 యేసు, యా మాటెఙ్ వెహ్సి, వరిబాణిఙ్ సొహాండ్రె వరిఙ్ తోర్ఎండ డాఙిత మహాన్.వాండ్రు వరి ఎద్రు నస్సొ బమ్మ ఆని పణిఙ్ కితిఙ్‍బ యూదుర్‍లొఇ నండొ లోకుర్ వన్నిఙ్ నమిఎండ ఆతార్.
38 ప్రబు మాపు వెహ్తి మాటెఙ్ ఎయెర్ నమితార్?
దేవుణు వన్ని సత్తు ఎయెరిఙ్ తోరిస్తాన్?
ఇజి
యెసయ ప్రవక్త వెహ్తి మాట పూర్తి ఆని వందిఙె యాక జర్గితాద్.
39-40 ఎందన్నిఙ్ ఇహిఙ,
వారు కణ్‍కాణిఙ్ సుడ్ఃజి,
వరి గర్బమ్‍దు నెసి మన్సు మారిసి,
నా బాణిఙ్ నెగ్గెణ్ ఆదెఙ్ అట్ఎండ,
వాండ్రు వరి కణుకు గుడ్డి కిజి,
వరి మన్సు గట్టి కితాన్ ఇజి యెసయ ప్రవక్త
మరి ఉండ్రిబాన్ వెహ్తాన్. అందెఙె వారు నమిదెఙ్ అట్ఎతార్.
41 యెసయ ఎందన్నిఙ్ యా లెకెండ్ వెహ్తాన్ ఇహిఙ,
యేసు,
గొప్ప పెరికాన్ ఇజి వాండ్రు సుడ్ఃత మహాండ్రె, వన్ని వందిఙ్ యా మాటెఙ్ వెహ్తాన్.
42 అహిఙబ అతికారిఙ లొఇ నండొండార్ యేసు ముస్కు నమకం ఇట్తార్.
గాని యూదుర్ మీటిఙ్ కిని ఇండ్రొణిఙ్ వెల్లి కినార్‍సు ఇజి పరిసయురిఙ్ తియెల్ ఆజి లోకుర్ ఎద్రు ఒప్పుకొడ్ఃఎతార్.
43 ఎందన్నిఙ్ ఇహిఙ దేవుణు వరిఙ్ పొగ్‍డిఃని దన్ని ముస్కు,
లోకుర్ వరిఙ్ పొగ్‍డిఃదెఙ్ ఇజినె వారు నండొ ఆస ఆతార్.
44 నస్తివలె యేసు,
“డట్టం ఈహు వెహ్తాన్.
నా ముస్కు నమకం ఇట్తికాన్ నఙినె ఆఎద్. నఙి పోక్తి మని వన్ని ముస్కు నమకం ఇడ్‍జినాన్.
45 నఙి సుడ్ఃజినికాన్ నఙి పోక్తి మని వన్నిఙ్‍నె సుడ్ఃజినాన్.
46 నా ముస్కు నమకం ఇడ్‍జినికాన్ సీకటిదు నిల్‍సి మన్ఎండ నాను యా లోకమ్‍దు జాయ్ లెకెండ్ వాత మన్న.
47 ఎయెన్‍బ నా మాటెఙ్ వెంజి అయా లెకెండ్ నడిఃఎండ మహిఙ వరిఙ్ నాను తీర్‍పు కిఎ.
నాను లోకమ్‍దిఙ్ తీర్‍పు కిదెఙ్ రెఎ.
గాని లోకమ్‍దు మని వరిఙ్ రక్సిస్తెఙె వాత మన్న.
48 నఙి నెక్సిపొక్సి నా మాటెఙ్ నమిఇ వన్నిఙ్ తీర్‍పు కిదెఙ్ ఒరెన్ మనాన్.
నాను వెహ్తి మాటెఙ్‍నె ఆకార్ దినమ్‍దు వన్నిఙ్ తీర్‍పు మంజినాద్.
49 ఎందన్నిఙ్ ఇహిఙ నఙి నానె యాక వర్గిదెఙ్ సిల్లె.
నాను ఇనిక వెహ్తెఙ్‍నొ,
ఇనిక వర్గిదెఙ్‍నొ దన్ని వందిఙ్ నఙి పోక్తి బుబ్బనె నఙి ఆడ్ర సిత మనాన్.
50 వాండ్రు సిత్తి ఆడ్రెఙ్ లొఙినికాన్ ఎల్లకాలం బత్కిని బత్కు సీనాద్ ఇజి నాను నెస్న.
అందెఙె నాను వెహ్ని సఙతిఙ్ బుబ్బ నా వెట వెహ్తి లెకెండ్‍నె నాను వెహ్సిన”, ఇజి వెహ్తాన్.