యేసుఙ్ మని అతికారం వందిఙ్ వెన్‍బాజినిక
20
1-2 ఉండ్రి నాండిఙ్ దేవుణు గుడిఃదు యేసు లోకురిఙ్ నెగ్గి కబ్రు వెహ్సి బోదిసి మహాన్.
అయావలె పెరి పుజెర్‍ఙుని యూదురి రూలుఙ్ నెస్పిస్నికార్,
పెద్దెల్‍ఙు కూడ్ఃజి వన్ని ముస్కు కలబడ్ఃజి వాతారె,
“నీను ఇని అతికారమ్‍దాన్ యా పణిఙ్ కిజిని?
నిఙి యా అతికారం సితికాన్ ఎయెన్?
మఙి వెహ్అ”,
ఇజి వన్నిఙ్ వెన్‍బతార్.
3 అందెఙె వాండ్రు,
“నానుబ మిఙి ఉండ్రి మాట వెన్‍బాన. అక్క నఙి మర్‍జి వెహ్తు.
4 యోహానుఙ్ బాప్తిసం సీని అతికారం దేవుణు బాణిఙ్ వాతాదా?
లోకుర్ బాణిఙ్ వాతాదా?”
ఇజి వరిఙ్ వెన్‍బతాన్.
5 అయావలె వారు,
“మాటు 'దేవుణు బాణిఙ్ వాతాద్' ఇజి వెహ్తిఙ,
'మరి ఎందన్నిఙ్ మీరు వన్నిఙ్ నమిఇదెర్?
' ఇజి వెహ్నాన్.
6-7 మాటు 'లోకుర్ బాణిఙ్ వాతాద్' ఇజి వెహ్తిఙ,
లోకుర్ విజెరె మఙి పణ్కణిఙ్ డెఃయ్‍నార్.
ఎందన్నిఙ్ ఇహిఙ యోహాను దేవుణు ప్రవక్త ఇజి లోకుర్ విజెరె నమిజినార్ ఇజి వరి లొఇ వారు ఒడిఃబితారె,
అక్క ఎమెణిఙ్ వాతాదొ మాపు నెస్ఎప్”,
ఇజి వన్నిఙ్ వెహ్తార్.
8 అందెఙె యేసు,
“ఎమెణి అతికారమ్‍దాన్ యా పణి కిజినానొ నానుబ మిఙి వెహ్ఎ”,
ఇజి వెహ్తాన్.
పాల్లి సితి రయ్‍తు వందిఙ్ వెహ్సినిక
9 అయావలె వాండ్రు లోకురిఙ్ ఉండ్రి కత వజ ఈహు నెస్‍పిస్తాన్,
“ఒరెన్ ఉండ్రి ద్రాక్స టోట ఉణుసి,
అక్క రయ్‍తుర్‍ఙ పాల్లి సితాండ్రె,
వాండ్రు ఆఇ దేసెం సొహాండ్రె సేన కాలం మహాన్.
10 ద్రాక్స పట్కు కొయ్‍ని కాలం వాతిఙ్,
వాండ్రు నఙి వాని వాట లొసి తగ ఇజి వన్ని పణిమన్సిఙ్ పాల్లి సితి వరి డగ్రు పోక్తాన్.
గాని అయా పాల్లి కిజి మహికార్ వన్నిఙ్ డెఃయ్‍జి వహి కీదాన్ పోక్తార్.
11 అందెఙె వాండ్రు మరి ఒరెన్ పణిమన్సిఙ్ వరి డగ్రు పోక్తాన్.
గాని వన్నిఙ్‍బ డెఃయ్‍జి,
సిగ్గు కూత్సి వహి కీదాన్ పోక్తార్.
12 మరిబ వాండ్రు మరి ఒరెన్ పణిమన్సిఙ్ పోక్తాన్.
వారు వన్నిఙ్‍బ సిద్లు డెఃయ్‍జి వెల్లి నెక్త పొక్తార్.
13 అయావలె ద్రాక్స టోట ఎజుమాని 'యెలు నాను ఇనిక కిదెఙ్?
నాను ప్రేమిసిని నా సొంత మరిన్‍దిఙ్ పోక్న.
ఒకొ వేడః వన్నిఙ్ తప్ఎండ వారు గవ్‍రం సీనార్' ఇజి ఒడిఃబితాన్.
14 గాని అయా పాల్లి కిజి మహికార్ వన్నిఙ్ సుడ్ఃతారె, 'అవిలోన్ మా ఎజుమాని మరిసి. రదు, యా ఆస్తి విజు మాది ఆనిలెకెండ్ వన్నిఙ్ సప్నాట్' ఇజి ఒరెన్ వెట ఒరెన్ వర్గితార్. 15 అందెఙె వన్నిఙ్ ద్రాక్స టోటదాన్ వెల్లి నెక్సి ఒసి సప్తార్. 'అహిఙ అయా ద్రాక్స టోట ఎజుమాని వరిఙ్ ఇనిక కినాన్? 16 వాండ్రు వాజి వరిఙ్ సప్నాండ్రె అయా టోట ఆఇ వరిఙ్ పాల్లి సీనాన్'” ఇజి వెహ్తాన్.
అందెఙె వారు అక్క వెహారె,
“అయావజ ఆమాకిద్”, ఇజి వెహ్తార్.
17 యేసు వరిఙ్ సుడ్ఃజి,
“అహిఙ, 'ఇల్లు తొహ్నికార్ పణిదిఙ్ రెఎద్ ఇజి నెక్తి పొక్తి పణుకు పునాదిదు మూల పణుకు ఆతాద్a' ఇజి దేవుణు మాటదు రాస్తి మని దన్ని అర్దం ఇనిక?
18 యా పణుకు ముస్కు అర్ని విజెరె ముక్కెఙ్ ఆజి సిద్లినార్.
గాని యా పణుకు ఎయె ముస్కు అర్నాదొ వరిఙ్ గుండ గుండ కినాద్”,
ఇజి వెహ్తాన్.
కయ్‍సరుఙ్ పన్ను తొహ్తెఙ్ ఆనాదా ఇజి వెన్‍బాజినిక
19 అయావలె పెరి పుజెర్‍ఙుని యూదురి రూలుఙ్ నెస్పిస్నికార్ వీండ్రు మా వందిఙె యా కత వజ వెహ్తాన్ ఇజి నెస్తారె,
వెటనె వన్నిఙ్ అస్తెఙ్ ఇజి సుడ్ఃతార్.
గాని వారు లోకురిఙ్ తియెల్ ఆతార్.
20 ఎందన్నిఙ్ ఇహిఙ వారు యేసుఙ్ తపు అస్ని వందిఙ్ ఎద్రు సుడ్ఃజి మహార్.
అందెఙె సిక్స సీదెఙ్ అతికారం మని అతికారిఙ్ ఒప్పజెప్తెఙ్ ఇజి,
వాండ్రు వెహ్సిని మాటెఙ లొఇ ఇనికబ తపు అస్ని వందిఙ్ మాపె నీతి నిజాయితిదికాప్ ఇజి తోరె ఆని గుట్టు లాగ్ని వరిఙ్ వన్ని డగ్రు పోక్తార్.
21 వారు వన్ని డగ్రు సొహారె,
“ఓ బోదకినికి,
నీను నాయమ్‍దాన్ వెహ్సి బోదిసిని.
నీను ఎయెఙ్‍బ ఇజ్రికార్ పెరికార్ ఇజి తేడః సిల్లెండ నిజం వెహ్సి దేవుణు ఇస్టం ఆతి బత్కు వందిఙ్ బోదిసిని ఇజి మాపు నెస్నాప్.
22 అహిఙ,
మాపు కయ్‍సర్‍ఙు పన్ను తొహ్నిక నాయమ్‍నా?
అనాయమ్‍నా?”
ఇజి వన్నిఙ్ వెన్‍బతార్.
23-24 నస్తివలె వాండ్రు వరి సెఇ బుద్ది నెస్తాండ్రె వరిఙ్,
“ఉండ్రి వెండి రూపాయ్ నఙి తోరిస్తు.
దిని ముస్కు రాస్తి మని రాత బొమ్మ ఎయెది?”
ఇజి వెన్‍బతిఙ్,
వారు, “కయ్‍సర్‍వి”, ఇజి వెహ్తార్.
25 అందెఙె వాండ్రు,
“అయా లెకెండ్ ఇహిఙ కయ్‍సర్‍వి కయ్‍సరుఙ్ సీదు.
దేవుణువి దేవుణుదిఙ్ సీదు”,
ఇజి వెహ్తాన్.
26 వారు అయా జెనం ఎద్రు వన్ని మాటెఙ తపు అస్తెఙ్ అట్ఎతార్. అందెఙె వాండ్రు మర్‍జి వెహ్సి మహిఙ్ బమ్మ ఆజి అల్లెత మహార్.
ఏడుఃగురుదిఙ్ పెన్లి ఆతి బోదెల్ వందిఙ్ వెహ్సినిక
27 అయావలె సాతికార్ మర్‍జి నిఙ్ఎర్ ఇజి నమిని సద్దుకయుర్ యేసు డగ్రు వాతారె ఈహు వెన్‍బతార్.
28 “ఓ బోదకినికి,
ఒరెన్ పెన్లి ఆజి కొడొఃకొక్ర ఆఎండ సాతిఙ,
వన్ని ఆడ్సిఙ్, వన్ని తంబెరి దన్నిఙ్ ఇడ్డె ఆజి సాతి వన్ని కుటుం నిల్‍ప్తెఙ్ ఇజి మోసేఙ్ సితి రూలుదు మా వందిఙ్ రాస్త మనాద్b.
29 అహిఙ,
ఉండ్రి కుటుమ్‍దు ఏడుఃగురు దాత్సితంబెర్‍సిర్ మహార్.
తొల్‍సూర్‍దికాన్ ఉండ్రి బోదెల్‍దిఙ్ పెన్లి ఆతాండ్రె,
కొడొఃర్ సిల్లెండ సాతాన్.
30 వెన్కా నడిఃపిదికాన్ దన్నిఙ్ ఇడ్డె ఆతాండ్రె వాండ్రుబ సాతాన్.
అయావెన్కా కొగ్రి నడిఃపిబ దన్నిఙ్ ఇడ్డె ఆజి వాండ్రుబ సాతాన్.
31 అయావజనె ఏడుఃగురుబ ఉండ్రె దన్నిఙ్ ఇడ్డె ఆజి కొడొఃర్ సిల్లెండనె సాతార్.
కడిఃవేరి ఆ బోదెలిబ సాతాద్.
32 అహిఙ,
సాతికార్ మర్‍జి నిఙ్‍నివలె అయా ఏడుఃగురు లొఇ అది ఎయెఙ్ ఆడుః లెకెండ్ మంజినాద్?
33 అది ఏడుఃగురుదిఙ్‍బ ఆడ్సి లెకెండ్ మహాద్ గదె?”
ఇజి వెన్‍బతార్.
34 అందెఙె యేసు వరివెట,
“యా లోకమ్‍దు మని లోకుర్ పెన్లి ఆనార్.
పెన్లి కిదెఙ్ సీనార్.
35 గాని సాతివరిబాణిఙ్ మర్‍జి నిఙ్‍దెఙ్ తగ్గితికార్,
దేవుణు మంజిని బాడ్డిదు పెన్లి ఆఎర్.
పెన్లి కిదెఙ్ సిఎర్.
36 ఎందన్నిఙ్ ఇహిఙ వారు సావుదాన్ మర్‍జి నిఙితికార్.
అందెఙె వారు దేవుణు దూతెఙ్ లెకెండ్,
దేవుణు మరిసిర్ వజ మంజి,
వారు ఎసెఙ్‍బ సావు సిల్లెండ మంజినార్.
37-38 సాతికార్ మర్‍జి నిఙ్‍నార్‍లె ఇజి మోసేబ కసిమహి తుప్పదుc రుజుప్ కితాన్.
అబ్బె ‘అబ్రాహాము దేవుణు,
ఇస్సాకు దేవుణు,
యాకోబు దేవుణు’ ఇజి మోసే దేవుణు ఆతి ప్రబు వందిఙ్ వెహ్సినాన్.
వీరు ముఎర్ సాత సొహార్.
గాని దేవుణు ఎద్రు బత్కిజినార్.
అందెఙె వాండ్రు బత్కిజిని వరిఙె దేవుణు.
గాని సాతి వరిఙ్ దేవుణు ఆఎన్”,
ఇజి వెహ్తాన్.
39-40 నస్తివలె వారు మర్‍జి ఇనికబ వెహెతార్. అందెఙె యూదురి రూలుఙ్ నెస్పిస్ని వరి లొఇ సెగొండార్, “ఓ బోదకినికి, నీను నెగెండ వెహ్తి”, ఇజి వన్నివెట వెహ్తార్. 41 యేసు వరివెట,
“క్రీస్తు దావీదు మరిసి ఇజి వారు ఎనెట్ వెహ్సినార్?
42-43 ‘నాను నీ పగ్గది వరిఙ్ ఓడిఃసి
నీ పాదమ్‍క అడ్గి ఉండ్రి పీట వజ ఇడ్ని దాక,
నీను గొప్ప గవ్‍రం మని నా ఉణెర్ పడఃక బసి మన్అ’ ఇజి
‘యెహోవ నా ప్రబు వెట వెహ్తాన్d’ ఇజి
కీర్తన పుస్తకమ్‍దు దావీదునె వెహ్సినాన్.
44 దావీదునె క్రీస్తుఙ్ ప్రబు ఇజి కూక్తిఙ మరి వాండ్రు ఎనెట్ దావీదుఙ్ మరిన్ ఆనాన్?”
ఇజి వెహ్తాన్.
45 లోకుర్ విజెరె వెంజి మహిఙ్ యేసు,
“మీరు యూదురి రూలుఙ్ నెస్పిస్ని వరి వందిఙ్ జాగర్త మండ్రు.
వారు నిరి సొక్కెఙ్ తొడిఃగిజి బూలాదెఙ్ ఇస్టం ఆతికార్.
46 సత్త నడిఃమి పెరికార్ ఇజి మాడిఃసె ఆదెఙ్ ఇజి,
యూదుర్ మీటిఙ్ కిని ఇండ్రొ పెరికార్ బస్ని బాడ్డిఙ బస్తెఙ్ ఇజి,
విందుదు నెగ్గి బాడ్డిదు బస్తెఙ్ ఆస ఆనార్.
47 వారు రాండి బోదెక ఇల్కాఙ్ మనికెఙ్ అనాయమ్‍దాన్ లాగె ఆనార్.
మహి వరిఙ్ ఇంక నెగ్గికాప్ ఇజి తోరె ఆని వందిఙ్ నిరి పార్దనం కినార్.
దేవుణు వరిఙ్ మరి ఇంక ఒద్దె సిక్స సీనాన్”,
ఇజి సిస్సుర్ వెట వెహ్తాన్.