గొరొన్ ముస్కు కితి బోద వందిఙ్ వెహ్సినిక
5
1 అయావెన్కా యేసు ఆ మంద లోకురిఙ్ సుడ్ఃతాండ్రె ఉండ్రి మెట్ట ముస్కు సొన్సి బస్తిఙ్,
వన్ని సిస్సుర్ వన్ని డగ్రు వాతార్.
2 అయావలె యేసు ఈహు బోదిస్తెఙ్ మొదొల్‍స్తాన్.
సుక్కమ్‍దాన్ మంజినికార్ ఎయెర్ ఇజి వెహ్సినిక
3 “మన్సుదు గర్ర ఆఎండ దేవుణునె నఙి తోడుః ఇజి
తగ్గిజి బత్కినికార్ సుక్కం మనికార్ ఆనార్‍లె.
ఎందన్నిఙ్ ఇహిఙ దేవుణు ఏలుబడిఃదు వారు మంజినార్‍లె.
4 దుక్కం కిజినికార్ సుక్కం మనికార్ ఆనార్‍లె.
ఎందన్నిఙ్ ఇహిఙ దేవుణు వరిఙ్ ఓదరిస్నాన్‍లె.
5 నిపాతి గుణం మనికార్ సుక్కం మనికార్ ఆనార్‍లె.
ఎందన్నిఙ్ ఇహిఙ యా లోకం విజు వరి సొంతం ఆనాద్.
6 నీతి నిజాయితిదాన్ మండ్రెఙ్ ఇజి నండొ ఆస మనికార్
సుక్కం మనికార్ ఆనార్‍లె.
ఎందన్నిఙ్ ఇహిఙ వారు కోరితి ఆసెఙ్
మన్సు నిండ్రు ఆని లెకెండ్ దేవుణు తీరిస్నాన్‍లె.
7 కనికారం తోరిస్నికార్ సుక్కం మనికార్ ఆనార్‍లె.
ఎందన్నిఙ్ ఇహిఙ దేవుణు వరి ముస్కు కనికారం తోరిస్నాన్‍లె.
8 నెగ్గి మన్సు మనికార్ సుక్కం మనికార్ ఆనార్‍లె.
ఎందన్నిఙ్ ఇహిఙ వారు దేవుణుదిఙ్ సూణార్‍లె.
9 సమాదానం కినికార్ సుక్కం మనికార్ ఆనార్‍లె.
ఎందన్నిఙ్ ఇహిఙ వారు దేవుణు కొడొఃర్ ఇజి కూకె ఆనార్.
10 దేవుణు వెహ్తి లెకెండ్ బత్కిని దన్ని వందిఙ్
మాలెఙ్ ఓరిస్నికార్ సుక్కం మనికార్ ఆనార్‍లె.
ఎందన్నిఙ్ ఇహిఙ వారు దేవుణు ఏలుబడిః కిని బాడ్డిదు మంజినార్.
11 నా వందిఙ్ లోకుర్ మిఙి నిందెఙ్ మొప్సి,
మాలెఙ్ కిజి, మీ ముస్కు విజు రకమ్‍కాణి అబద్దమాతి సెఇ మాటెఙ్ వెహ్తిఙ్‍బ, మీరు దేవుణు సీని సుక్కం మనికిదెర్ ఆనిదెర్‍లె.
12 అందెఙె మీరు నండొ సర్ద ఆదు.
ఎందన్నిఙ్ ఇహిఙ దేవుణు మంజిని బాడ్డిదు మిఙి నండొ పల్లం మంజినాద్‍లె.
యా లెకెండ్ వారు మీ ముఙల బత్కితి దేవుణు ప్రవక్తరిఙ్‍బ మాలెఙ్ కితార్.
సోరు-జాయ్ వందిఙ్ వెహ్సినిక
13 మీరు యా లోకమ్‍దు సోరు వజ మనిదెర్.
సోరు రుసి సొహిఙ ఇని దనితాన్ దన్నిఙ్ రుసి తతెఙ్ ఆనాద్?
అక్క వెల్లి విసిర్‍జి లోకుర్ మట్‍సి పొక్తెఙ్‍నె పణిదిఙ్ వానాద్.
గాని మరి ఇని దన్నిఙ్ పణిదిఙ్ రెఎద్.
14 మీరు యా లోకమ్‍దిఙ్ జాయ్ ననికిదెర్.
గొరొన్ ముస్కు మని పట్నం తోర్ఎండ మన్ఎద్.
15 లోకుర్ ఎయెర్‍బ దీవ కసిసి తూము అడ్గి ముసి ఇడ్ఎర్.
గాని అక్క ఇండ్రొణి వరిఙ్ విజెరిఙ్ జాయ్ సీని వందిఙ్ దీవ కంతు ముస్కునె ఇడ్నార్.
16 అయా లెకెండ్‍నె మీ బత్కుబ విజెరిఙ్ జాయ్ సీనివజ మండ్రెఙ్ వలె.
నస్తివలె మీరు కిని నెగ్గి పణిఙ లోకుర్ విజెరె సుడ్ఃజి,
దేవుణు మంజిని బాడ్డిదు మని మీ బుబ్బెఙ్ పొగ్‍డిఃనార్.
దేవుణు మోసేఙ్ సితి రూలుఙ వందిఙ్ వెహ్సినిక
17 దేవుణు సితి రూలుఙ గాని,
దేవుణు ప్రవక్తరు వెహ్తి మాటెఙ్ గాని డెఃయ్‍జి పొక్తెఙ్ నాను వాత మన ఇజి మీరు ఒడిఃబిమాట్.
వన్కాఙ్ డెఃయ్‍జి పొక్తెఙ్ ఇజి వాదెఙ్ సిల్లె.
గాని అక్కెఙ్ పూర్తి కిదెఙ్‍నె నాను వాత మన.
18 బూమి,
ఆగాసం నిల్‍ని మంజిని దాక,
దేవుణు సితి రూలుదు మనికెఙ్ పూర్తి ఆనెండ బాన్ రాస్తి మనికెఙ్ ఉండ్రి అస్సరం ఆతిఙ్‍బ, ఉండ్రి సున్న ఆతిఙ్‍బ తప్‍సి సొన్ఉ”, ఇజి నాను మీ వెట నిజం వెహ్సిన.
19 ఎయెన్‍బ దేవుణు మాటదు మని ఆడ్రెఙ లొఇ ఇజ్రి మాట తప్‍సి సొన్సి,
మీరుబ అయా లెకెండ్ లొఙిజి మండ్రెఙ్ ఇజి లోకురిఙ్ నెస్‍పిస్తిఙ,
దేవుణు ఏలుబడిః కిని వరి లొఇ వన్నిఙ్ లావ్ ఇజ్రికాన్ లెకెండ్ ఇడ్నాన్.
గాని ఎయెర్‍బ దేవుణు మాటదు రాస్తిమని లెకెండ్ లోకురిఙ్ నెస్‍పిసి అయా లెకెండ్‍నె కిజి మహిఙ దేవుణు ఏలుబడిః కినివరి లొఇ వారు గొప్ప పెరికార్ ఆనార్.
20 అహిఙ పరిసయుర్‍ని యూదురి రూలుఙ్ నెస్పిస్నికార్ దేవుణుదిఙ్ ఇస్టం ఆని పణిఙ్ కిజినార్.
గాని వరిఙ్ ఇంక దేవుణుదిఙ్ లొఙిజి వన్నిఙ్ ఇస్టం ఆతి నెగ్గి పణిఙ్ కిజి మహిఙనె దేవుణు కిని ఏలుబడిఃదు మీరు సొండ్రెఙ్ అట్‍నిదెర్ ఇజి నాను వెహ్సిన.
లోకుదిఙ్ సప్నిక ఆఎద్ ఇజి వెహ్సినిక
21 లోకుదిఙ్ సప్‍మాట్a.
ఎయెన్‍బ ఒరెన్ లోకుదిఙ్ సప్తిఙ వన్నిఙ్ తప్ఎండ తీర్‍పు వానాద్‍లెb ఇజి పూర్బం మీ అన్నిగొగొరిఙ్ వెహ్తి మని మాట మీరు వెహి మనిదెర్ గదె?
22 అహిఙ యెలు నాను మిఙి వెహ్నిక ఇనిక ఇహిఙ,
ఎయెన్‍బ మరి ఒరెన్ వన్ని ముస్కు కోపం ఆతిఙ వన్ని ముస్కు తీర్‍పు వానాద్.
ఎయెన్‍బ మరి ఒరెన్ వన్నిఙ్ పణిదిఙ్ రెఇకి ఇజి వెహ్తిఙ వాండ్రు సన్‍హెద్రిc సఙం ఎద్రు దన్ని వందిఙ్ సమాదానం వెహ్తెఙ్‍వలె.
ఎయెన్‍బ మరి ఒరెన్ వన్నిఙ్ బుద్ది సిల్లికి ఇజి వెహ్తిఙ,
వాండ్రు ఎల్లకాలం సిస్సు మంజిని బాడ్డిదు సొండ్రెఙ్ తగ్గితికాన్ ఆనాన్.
23-24 అందెఙె నీను పూజ బాడ్డిదు దేవుణుదిఙ్ సంద సీదెఙ్ సొనివలె,
నీ ముస్కు నీ తంబెరి వెట ఇనికాదొ కోపం మనాద్ ఇజి అబ్బె నిఙి ఎత్తు వాతిఙ,
సంద సీదెఙ్ ఒతికెఙ్ అబ్బె ఇడ్‍జి,
వెటనె వన్నిబాన్ సొన్సి నీను వన్నివెట ముఙల రాజి ఆఅ.
అయావెన్కా మర్‍జి వాజి దేవుణుదిఙ్ సంద సిఅ.
25 నీ పగ్గదికాన్ కోర్టుదు సొని సర్దు మహివలెనె,
నీను వన్నివెట బేగి రాజి ఆదెఙ్ సుడ్ఃఅ.
సిల్లిఙ నీ పగ్గవాండ్రు నిఙి తీర్‍పు తీరిస్ని అతికారిబాన్ ఒప్పజెప్నాన్.
తీర్‍పు తీరిస్ని అతికారి నిఙి జమాన్‍దిఙ్ ఒప్పజెప్నాన్.
నస్తివలె వాండ్రు నిఙి జేలిదు ఇడ్నాన్.
26 నీను ఉండ్రి కాసుబ బాకి సిల్లెండ విజు మర్‍జి సీని దాక అబ్బెణిఙ్ వెల్లి వాదెఙ్ అట్ఇ ఇజి,
నాను నీ వెట నిజం వెహ్సిన.
రంకుబూలాని దన్ని వందిఙ్ వెహ్సినిక
27 ఆహె రంకుబూలామd ఇజి పూర్బం మీ అన్నిగొగొరిఙ్ వెహ్తి మని మాట మీరు వెహి మనిదెర్ గదె?
28 అహిఙ నాను మిఙి వెహ్నిక ఇనిక ఇహిఙ, ఎయెన్‍బ వన్ని మన్సుదు సెఇ ఆసదాన్ ఉండ్రి అయ్‍లి కొడొఃదిఙ్ బేస్తిఙ, వాండ్రు అయావలెనె దన్నివెట వన్ని మన్సుదు రంకుబూలాని వజ పాపం కితికాన్ ఆజినాన్.
29 ఆహె నీ ఉణెర్ కణ్క నిఙి తపు కిబిస్తెఙ్ సుడ్ఃతిఙ అక్క నీబాణిఙ్ లాగ్‌జి విసిర్అ.
నీ ఒడొఃల్ విజు ఎల్లకాలం సిస్సు మంజిని బాడ్డిదు సొన్సి అర్ఎండ,
నీ ఒడొఃల్‍దాన్ ఉండ్రి ముక్క సొహిఙ అక్కదె నెగెద్.
30 మరి నీ ఉణెర్ కియు నిఙి తపు కిబిస్తెఙ్ సుడ్ఃతిఙ,
అక్క కత్సి విసిర్అ.
నీ ఒడొఃల్ విజు ఎల్లకాలం సిస్సు మంజిని బాడ్డిదు సొన్సి అర్ఎండ,
నీ ఒడొఃల్‍దాన్ ఉండ్రి ముక్క సొనికదె నెగెద్ గదె.
31 ఆహె ఎయెన్‍బ వన్ని ఆడుఃఙ్ డిఃసి సీదెఙ్ ఇహిఙ, వాండ్రు దన్నిఙ్ ఉండ్రి విడిః కాగితంef రాసి సీదెఙ్ ఆనాద్ ఇజి వెహ్తి మనిక మీరు వెహి మనిదెర్ గదె?
32 అహిఙ నాను మీ వెట వెహ్నిక ఇనిక ఇహిఙ,
రంకుబూలాని దన్ని వందిఙ్‍నె ఆఎండ,
ఇని తపు సిల్లెండ వన్ని ఆడుఃఙ్ డిఃసి సీనికాన్ దన్నిఙ్ రంకుబూలాని దన్ని లెకెండ్ కిజినాన్.
అయావజనె మాసిఙ్ డిఃస్తి దన్నిఙ్ పెన్లి ఆనికాన్ దన్నివెట రంకుబూలానికాన్ ఆజినాన్.
ఒట్టు పొక్ని వందిఙ్ వెహ్సినిక
33 మరి ఇనిక ఇహిఙ,
“నీను ఒట్టు పొక్తిక అయా లెకెండ్ కిఎండ తప్తెఙ్ ఆఎద్.
నీను కితి ఒట్టు వజ దేవుణుదిఙ్ సీదెఙ్ ఇజి పూర్బమ్‍ది వరివెట వెహ్తి మాట మీరు వెహి మనిదెర్ గదె?
34 అహిఙ నాను మీ వెట వెహ్నిక ఇనిక ఇహిఙ ఇని దన్నిఙ్‍బ ఒట్టు పొక్‍మాట్.
ఆగాసం తోడుః ఇజి వెహ్‍మాట్.
అక్క దేవుణు బస్ని సిమసనం.
35 సిల్లిఙ బూమి తోడుః ఇజి వెహ్‍మాట్.
అక్క దేవుణు వన్ని పాదమ్‍కు ఇడ్ని పీట.
మరి యెరూసలేం తోడుః ఇజి వెహ్‍మాట్.
అక్క రాజురిఙ్ రాజు ఆతి దేవుణు మంజిని పట్నం.
36 మీ బుర్ర తోడుః ఇజి ఒట్టు కిమాట్.
ఎందన్నిఙ్ ఇహిఙ మీ బుర్రది కొపు ఉండ్రిబ తెల్లఙ్ గాని, కర్రిఙ్ గాని కిదెఙ్ అట్ఇదెర్.
37 మీ మాట,
ఒఒ ఇహిఙ ఒఒ.
ఆఎద్ ఇహిఙ ఆఎద్”,
ఇజినె వెహ్తెఙ్. వన్కాఙ్ మిస్తికెఙ్ విజు సయ్‍తాన్ బాణిఙ్ వాజినె.
కణ్కదిఙ్ బదులు కణ్క
38 ఆహె,
“కణ్కదిఙ్ బదులు కణ్క, పల్లుదిఙ్ బదులు పల్లుg”, ఇజి దేవుణు మోసేఙ్ సితి మని రూలుదు వెహ్తి మనిక మీరు వెహి మనిదెర్ గదె?
39 అహిఙ నాను మిఙి వెహ్నిక ఇనిక ఇహిఙ,
సెఇ వరిఙ్ ఎద్రిస్‍మాట్.
మిఙి ఎయెర్‍బ ఉణెర్ లెప్పద్ డెఃయ్‍తిఙ,
వన్నిఙ్ డెబ్ర లెప్పబ తోరిస్తు.
40 ఎయెర్‍బ మిఙి గొడ్బ కిజి మీ సొక్క లాగ్‌దెఙ్ సుడ్ఃతిఙ,
మీరు పిడ్ఃగ్ని సాల్వబ వన్నిఙ్ సీదు.
41 మరి ఎయెన్‍బ ఉండ్రి మయ్‍లు దూరం రఅ ఇజి నిఙి బల్‍మిసారం కితిఙ,
వన్నివెట రుండి మయ్‍లుఙ్ ఇడ్డి సొన్అ.
42 నిఙి లొస్ని వన్నిఙ్ సిఅ.
మరి నిఙి అపు లొస్ని వరిబాణిఙ్ నీ మొకొం మహ్‍మ.
నీ పగ్గది వరిఙ్ ప్రేమిస్అ ఇజి వెహ్సినిక
43 ఆహె,
“నీ పడఃకది వన్నిఙ్ ప్రేమిస్అ.
నీ పగ్గది వన్నిఙ్ నెక్సి పొక్అh ఇజి వెహ్తి మనిక మీరు వెహి మనిదెర్ గదె?
44-45 అహిఙ నాను మీ వెట వెహ్సినిక ఇనిక ఇహిఙ, దేవుణు బాడ్డిదు మంజిని మీ బుబ్బెఙ్ కొడొఃర్ ఆదెఙ్ ఇహిఙ. మీ పగ్గది వరిఙ్ ప్రేమిస్తు. మిఙి హిమ్‍సెఙ్ కిని వరి వందిఙ్ పార్దనం కిదు. వాండ్రు సెఇవరి ముస్కు ఆతిఙ్‍బ, నెగ్గివరి ముస్కు ఆతిఙ్‍బ ఎండ కిబిసినాన్. ఆహె నాయం మనివరి ముస్కుని నాయం సిల్లివరి ముస్కుబ పిరు రపిసినాన్. 46 మిఙి ప్రేమిస్ని వరిఙె మీరు ప్రేమిస్తిఙ,
దేవుణు మిఙి పల్లం సీనాన్ ఇజి ఒడిఃబిజినిదెరా?
పన్ను పెర్నికార్‍బ అయావజనె కిజినార్ గదె?
47 మీరు మీ కూడః వారాదిఙ్‍నె మాడిఃస్తిఙ మీరు ఆఇకార్ కిని దన్నిఙ్ ఇంక మిస్తిక ఇనిక కిజినిదెర్?
అయా లెకెండ్ యూదుర్ ఆఇకార్‍బ కిజినార్ గదె.
48 దేవుణు మంజిని బాడ్డిదు మని మీ బుబ్బ ఇని తపు సిల్లికాన్.
అందెఙె మీరుబ అయా లెకెండ్‍నె ఇన్ని తపు సిల్లెండ మంజినిదెర్”, ఇహాన్.