ఆడుఃఙ్ డిఃసి సీదెఙ్ నాయమ్‍నా ఇజి వెన్‍బజినిక
10
1 యేసు కపెర్‍నహుముదాన్ సోతాండ్రె దస్సన్ దరిఙ్ మని యూదయ ప్రాంతమ్‍దుని యొర్దాను గడ్డదిఙ్ తూర్పు దరిఙ్ మని ప్రాంతమ్‍కాఙ్ సొహాన్. అయావలె నండొ జెనం వన్ని డగ్రు కూడ్ఃజి వాతార్. వాండ్రు వన్నిఙ్ మని అలవాటు వజ వరిఙ్ బోదిసి మహాన్. 2 నస్తివలె పరిసయుర్ వన్ని డగ్రు వాతారె, వన్నిఙ్ పరిస కిదెఙ్ ఇజి, “ఒరెన్ మొగ్గకొడొః వన్ని ఆడ్సిఙ్ డిఃసి సీదెఙ్ నాయమ్‍నా?” ఇజి వన్నిఙ్ వెన్‍బతార్. 3 అందెఙె యేసు, “మోసే మిఙి ఇనిక ఇజి ఆడ్ర సిత మనాన్?” ఇజి వరిఙ్ వెన్‍బతాన్. 4 వారు, “ఉండ్రి విడిః కాగితం రాసి సీజి, దన్నిఙ్ డిఃసి సీదెఙ్ ఆనాద్ ఇజి మోసే ఆడ్ర సిత మనాన్”, ఇజి వెహ్తార్.5 అయావలె యేసు, “మీ గర్ర మన్సు వందిఙ్‍నె మోసే అయా ఆడ్ర మిఙి రాస్త సితాన్. 6 గాని దేవుణు లోకమ్‍దిఙ్ తయార్ కితివలె మొగ్గకొడొః ఇజి, అయ్‍లికొడొః ఇజి వరిఙ్ తయార్ కితాన్. 7 దిన్ని వందిఙె మొగ్గ కొడొః వన్ని అయ్‍సి అపొసిఙ్ డిఃసి సీజి, వన్ని ఆడ్సి వెట కూడ్ఃజి బత్కినాన్a. 8 వారు రిఎర్ ఉండ్రె ఒడొఃల్ వజ మంజినార్. అందెఙె వారు రిఎర్ వేరె వేరె మన్ఎండ ఉండ్రె ఒడొఃల్ లెకెండ్ బత్కినార్. 9 అందెఙె దేవుణు జత్త కుడ్ఃప్తి వరిఙ్ లోకు ఎర్లిస్నిక ఆఎద్”, ఇజి వరివెట వెహ్తాన్. 10 వారు ఇండ్రొ వాతివలె సిస్సుర్ మరి ఉండ్రి సుట్టు యా సఙతి వందిఙ్ యేసుఙ్ వెన్‍బతార్. 11 అందెఙె యేసు, “వన్ని ఆడుఃఙ్ డిఃసి సీజి మరి ఉండ్రి దన్నిఙ్ ఇడ్డె ఆతిఙ, వాండ్రు డిఃస్తి సితి దన్ని వందిఙ్ రంకుబూలానికాన్ ఆజినాన్. 12 అయాలెకెండె అయ్‍లికొడొః దన్ని మాసిఙ్ డిఃసి సీజి మరి ఒరెన్ వన్నిఙ్ పెన్లి ఆతిఙ అయా అయ్‍లికొడొః రంకుబూలానికాద్ ఆజినాద్”, ఇజి వరివెట వెహ్తాన్.
యేసు ఇజ్రి కొడొఃరిఙ్ దీవిసినిక
13 నస్తివలె సెగొండార్ వరి ఇజ్రి కొడొఃరిఙ్ ముటిన్ ఇజి యేసు డగ్రు వరిఙ్ తసి మహార్. అహిఙ ఇజ్రి కొడొఃరిఙ్ కూక్సి తసి మహి వరిఙ్ సిస్సుర్ గస్రితార్. 14 యేసు అయాక సుడ్ఃజి కోపం ఆతాండ్రె, “యా ఇజ్రి కొడొఃరిఙ్ నా డగ్రు వాదెఙ్ సరి సీదు, వరిఙ్ అడ్డు కిమాట్. ఎందన్నిఙ్ ఇహిఙ యా లెకెండ్ మంజినికారె దేవుణు కిని ఏలుబడిఃదు మంజినార్. 15 నాను మీ వెట నిజం వెహ్సిన. యా ఇజ్రి కొడొఃర్ లెకెండ్ దేవుణుదిఙ్ నమినికార్ దేవుణు కిని ఏలుబడిఃదు మంజినార్. నమిఇకార్ మండ్రెఙ్ అట్ఎర్”, ఇజి వెహ్తాన్. 16 నస్తివలె అయా ఇజ్రి కొడొఃరిఙ్ ఎత్సి పొంబితాండ్రె వరి ముస్కు వన్ని కిక్కు ఇడ్‍జి దీవిస్తాన్.
ఆస్తి మనికాన్ యేసు డగ్రు వాజి వెన్‍బజినిక
17 యేసు సోతాండ్రె అయా సరి సొన్సి మహిఙ్ ఒరెన్ ఉహ్‍క్సి వాజి వన్ని ఎద్రు ముణుకుఙ్ ఊర్‍జి, “ఓ నెగ్గి బోదకినికి, దేవుణు వెట ఎల్లకాలం మంజిని బత్కుదు బత్కిదెఙ్ ఇహిఙ నాను ఇనిక కిదెఙ్?” ఇజి వన్నిఙ్ వెన్‍బతాన్. 18 నస్తివలె యేసు, “నాను నెగ్గికాన్ ఇజి ఎనెట్ వెహ్సిని? దేవుణు ఒరెండ్రె నెగ్గికాన్. మరి ఎయెన్‍బ నెగ్గికాన్ ఆఎన్. 19 రంకుబూలామ, లోకుదిఙ్ సప్‍మ, డొఙ కిమ, అబద్ద సాసెం వెహ్‍మ, మోసెం కిమ, నీ యాయ బుబ్బెఙ్ గవ్‍రం సిఅ ఇజి మోసేఙ్ దేవుణు సితి ఆడ్రెఙ్ నీను నెస్నిగదె”, ఇజి వన్నివెట వెహ్తాన్. 20 అందెఙె వాండ్రు, “ఓ బోదకినికి, నాను ఇజ్రి వలెహాన్ అసి అక్కెఙ్ విజు లొఙిజిన”, ఇజి వెహ్తాన్. 21 యేసు వన్నిఙ్ సుడ్ఃజి, “వన్నిఙ్ ప్రేమిసి నీను ఉండ్రి పణి కిదెఙ్ మనాద్. నీను సొన్సి నిఙి మనిక విజు పొర్సి అయా డబ్బు సిల్లిసాతి వరిఙ్ సిఅ. అయావలె నిఙి దేవుణు మంజిని బాడ్డిదు ఆస్తి మంజినాద్. వెన్కా నీను నా వెట రఅ”, ఇజి వెహ్తాన్. 22 అయా మాటెఙ్ వాండ్రు వెహాండ్రె ఇజ్రి మొకొం కిజి బాద ఆజి సొహాన్. ఎందన్నిఙ్ ఇహిఙ వాండ్రు నండొ ఆస్తి మనికాన్. 23 నస్తివలె యేసు, సుట్టుల సుడ్ఃజి, “ఆస్తి మనికార్ దేవుణు కిని ఏలుబడిఃదు మండ్రెఙ్ ఎసొనొ కస్టం”, ఇజి వన్ని సిస్సుర్ వెట వెహ్తాన్. 24 వన్ని మాటెఙ సిస్సుర్ నండొ బమ్మ ఆతార్. అందెఙె యేసు మరి వరివెట ఈహు వెహ్తాన్. “కొడొఃరండె, వరి ఆస్తి ముస్కు నమకం ఇడ్నికార్, దేవుణు కిని ఏలుబడిఃదు మండ్రెఙ్ ఎసొనొ కస్టం. 25 ఆస్తి మనికాన్ దేవుణు కిని ఏలుబడిఃదు సొని దన్నిఙ్ ఇంక, దొబ్బనం బొరొదు ఊంటు డుఃగ్‌దెఙ్ ఎసొనొ సుల్లు”, ఇహాన్. 26 అందెఙె వారు నండొ బమ్మ ఆజి, “అహిఙ ఎయెన్ దేవుణు మంజిని బాడ్డిదు మండ్రెఙ్ అట్‍నాన్?” ఇజి వెన్‍బతార్. 27 యేసు వరిఙ్ సుడ్ఃజి, “యాక లోకు కిదెఙ్ అట్ఇకాదె. గాని దేవుణు కిదెఙ్ అట్ఇకెఙ్ ఇనికబ సిల్లు. ఎందన్నిఙ్ ఇహిఙ దేవుణు విజు కిదెఙ్ అట్‍నాన్”, ఇజి వెహ్తాన్.
28 నస్తివలె పేతురు, “ఇదిలో మాపు విజు డిఃస్తాపె నీ వెట వాతాప్”, ఇజి వెహ్తాన్. 29-30 అందెఙె యేసు, “నా వందిఙ్‍ని నెగ్గి కబ్రు వందిఙ్ వన్ని ఇల్లు జొల్లు ఆతిఙ్‍బ దాదతంబెర్‍ఙ ఆతిఙ్‍బ, బీబితఙికాఙ్ ఆతిఙ్‍బ, యాయ బుబ్బరిఙ్ ఆతిఙ్‍బ, కొడొః కొక్ర ఆతిఙ్‍బ, బూమి పుట్ట విజు డిఃస్తి సితి వన్నిఙ్ యెలు యా లోకమ్‍దు బాదెఙ్ వానె. గాని దేవుణు రాజు లెకెండ్ వానివలె వంద వంతుఙ్ ఇల్కుని దాత్సితంబెర్‍సిర్, బీబితఙిక్, యాయెక్, కొడొః కొక్ర, బూమి పుట్ట, అక్కదె ఆఎండ వన్నిఙ్ ఎల్లకాలం మంజిని బత్కు దొహ్‍క్నాద్ ఇజి మీ వెట నిజం వెహ్సిన. 31 మొదొహికార్ విజెరె కడెఃవెరిదికార్ ఆనార్. కడెఃవెరిదికార్ మొదొహికార్ ఆనార్”, ఇజి వెహ్తాన్.
యేసు మరి ఉండ్రి సుట్టు వన్ని సావు వందిఙ్ వెహ్సినిక
32 వారు పయ్‍నం కిజి యెరూసలేం సొన్సి మహార్. యేసు వరిఙ్ ముఙల నడిఃజి మహిఙ్ వారు బమ్మ ఆతార్. వన్ని వెన్కా సొన్సి మహికార్ తియెల్ ఆతార్. నస్తివలె వాండ్రు పన్నెండు మన్సి సిస్సురిఙ్ కూక్తాండ్రె వన్నిఙ్ జర్గిని సఙతి వందిఙ్ వరిఙ్ వెహ్తెఙ్ మొదొల్‍స్తాన్. 33 “ఇదిలో, మాటు యెరూసలేమ్‍దు సొన్సినాట్. లోకుమరిసి పెరి పుజెర్‍ఙని యూదురి రూలుఙ్ నెస్‍పిస్ని వరిఙ్ ఒప్పజెపె ఆనాన్‍లె. వారు వన్నిఙ్ సావుదిఙ్ తీర్‍పు కిజి, వన్నిఙ్ యూదుర్ ఆఇ వరి కీదు ఒప్ప జెప్నార్‍లె. 34 వారు వన్నిఙ్ వెక్రిసి, వన్ని ముస్కు పూసి కొర్‍డ్డెఙణిఙ్ డెఃయ్‍జి సప్నార్‍లె. వాండ్రు మూండ్రి దినమ్‍దు మరి మర్‍జి నిఙ్‍నాన్‍లె”, ఇజి వెహ్తాన్.
యాకోబుని యోహాను యేసుఙ్ వెన్‍బజినిక
35 నస్తివలె జెబెదయి మరిసిర్ ఆతి యాకోబుని యోహాను యేసు డగ్రు వాతారె, “ఓ బోదకినికి, మాపు లొస్తికెఙ్ విజు నీను మఙి సీదెఙ్‍వలె”, ఇజి వెహ్తార్. 36 అయావలె యేసు, “నాను మిఙి ఇనిక కిదెఙ్?” ఇజి వరిఙ్ వెన్‍బతాన్. 37 వారు, “నీను రాజు వజ ఏలుబడిః కినివలె ఒరెన్ వన్నిఙ్ నీ ఉణెర్ పడఃక, మరి ఒరెన్ వన్నిఙ్ నీ డెబ్ర పడఃక బస్ని లెకెండ్ మఙి సాయం కిఅ”, ఇజి వెహ్తార్. 38 నస్తివలె యేసు, “మీరు ఇనిక లొసినిదెరొ మిఙినె తెలిఎద్. నాను ఓరిస్తెఙ్ మని బాదెఙ్‍ని నాను లాగె ఆని బాప్తిసం మీరు లాగె ఆదెఙ్ అట్‍నిదెరా?” ఇజి వరిఙ్ వెన్‍బతిఙ్, “మాపు అట్‍నాప్”, ఇజి వెహ్తార్. 39 అయావలె యేసు, “నాను ఓరిస్ని బాదెఙ్ ఓరిస్నిదెర్, నాను లాగె ఆని బాప్తిసం లాగె ఆనిదెర్. 40 గాని నా ఉణెర్ పడఃకని నా డెబ్ర పడఃక బసె కిదెఙ్ నా కీదు సిల్లెద్. అక్క ఎయెఙ్ ఎర్‍పాటు కితాండ్రొ వరిఙ్‍నె అక్క దొహ్‍క్నాద్”, ఇజి వరివెట వెహ్తాన్. 41 మహి పది మన్సి సిస్సుర్ అయా మాట వెహారె, యాకోబు యోహాను ముస్కు కోపం ఆతార్. 42 యేసు వరిఙ్ వన్ని డగ్రు కూక్సి వరివెట ఈహు వెహ్తాన్, “యూదుర్ ఆఇవరి లొఇ అతికారి ఇజి ఎర్‍పాటు ఆతి మనికార్ వరి ముస్కు ఏలుబడిః కినార్. వరి లొఇ పెరికార్ ఇజి కూకె ఆనికార్ వరి ముస్కు అతికారం తోరిసి అణ్‍సు తిగ్‌నార్ ఇజి మీరు నెస్నిదెర్. 43 మీరు వరి లెకెండ్ మంజినిక ఆఎద్. మీ లొఇ ఎయెన్‍బ పెరికాన్ ఆదెఙ్ ఇహిఙ, వాండ్రు మిఙి సేవ కిని వన్ని లెకెండ్ మండ్రెఙ్‍వలె. 44 మీ లొఇ ఎయెన్‍బ మీ ముస్కు నెయ్‍కి లెకెండ్ మండ్రెఙ్ ఇహిఙ, వాండ్రు విజెరిఙ్ పణిమన్సి లెకెండ్ మండ్రెఙ్‍వలె. 45 ఎందన్నిఙ్ ఇహిఙ లోకుమరిసి సేవ కిబె ఆదెఙ్ వాదెఙ్ సిల్లె. గాని సేవ కిజి విజెరి వందిఙ్ వన్ని పాణం సీజి, వరిఙ్ విజెరిఙ్ డిఃబిస్తెఙ్ వాత మనాన్”, ఇజి వెహ్తాన్.
యేసు బర్తిమయి ఇని గుడ్డిది వన్నిఙ్ నెగ్గెణ్ కిజినిక
46 నస్తివలె వారు యెరికో పట్నమ్‍దు వాతార్. యేసు వన్ని సిస్సుర్ వలె నండొ జెనం వెట యెరికోదాన్ సోతారె వాజి మహిఙ్, తీమయి మరిసి ఆతి బర్తిమయి ఇని గుడ్డివాండ్రు సరి పడఃకదు బస్తాండ్రె లొస్‍పాజి మహాన్. 47 నజరేతుది యేసు అయా సరి వాజినాన్ ఇజి వాండ్రు వెహాండ్రె, “ఓ యేసు, దావీదు మరిసి నా ముస్కు కనికారం తోరిస్అ”, ఇజి డేడిఃస్తెఙ్ మొదొల్‍స్తాన్. 48 “నీను అల్లెజి పల్లక్ మన్అ”, ఇజి నండొండార్ వన్నిఙ్ గస్రితార్. గాని వాండ్రు మరి ఒద్దె, “ఓ దావీదు మరిసి నా ముస్కు కనికారం తోరిస్అ”, ఇజి డేడిఃస్తాన్. 49 నస్తివలె యేసు నిహాండ్రె, “వన్నిఙ్ కూక్సి తగాట్”, ఇజి వెహ్తిఙ్, వారు ఆ గుడ్డి వన్నిఙ్ కూక్తారె, “దయ్‍రమ్‍దాన్ నిల్అ. వాండ్రు నిఙి కూక్సినాన్”, ఇజి వెహ్తార్. 50 వెటనె వన్ని సొక్కెఙ్ విసిర్‍తాండ్రె, లిట్‍నె నిఙ్‍జి యేసు డగ్రు వాతాన్. 51 నస్తివలె యేసు, “నాను ఇనిక కిదెఙ్ ఇజి నీను ఒడిఃబిజిని?” ఇజి వెన్‍బతిఙ్, అయా గుడ్డి వాండ్రు, “ఓ బోదకినికి, నాను బేస్ని లెకెండ్ కిఅ”, ఇజి వన్నివెట వెహ్తాన్. 52 అందెఙె యేసు, “నీను సొన్అ. నీ నమకమ్‍నె నిఙి నెగ్గెణ్ కితాద్”, ఇజి వెహ్తాన్. వెటనె వాండ్రు బేస్తాండ్రె యేసు వెట అయా సరి సొహాన్.