దేవుణు దావీదుఙ్ ఒపుమానం కితిక
17
1 దావీదు రాజు వన్ని బంగ్లదు బత్కిజి మహివలె, నాతాను ప్రవక్తదిఙ్ కూక్‍పిస్తాండ్రె వన్నివెట ఈహు వెహ్తాన్, “నాను ఇహిఙ దేవదారు కల్పదాన్ తయార్ కిబిస్తి బంగ్లదు మన, గాని యెహోవ మందసం పెట్టె, టంబు గుడ్సాదు మనాద్, అయాక అబ్బె మండ్రెఙ్ నఙి ఇస్టం సిల్లెద్”, ఇజి వెహ్తాన్.a 2 నస్తివలె నాతాను దావీదు వెట, “దేవుణు నిఙి తోడు మనాన్. మరి నీ మన్సుదు ఇనిక కిదెఙ్ ఇజి ఒడిఃబిజినిదొ అక్క విజు పూర్తి కిఅ”, ఇజి రాజు వెట వెహ్తాన్. 3-4 గాని అయా పొదొయ్ యెహోవ నాతాను ప్రవక్తదిఙ్ వెహ్తిక ఇనిక ఇహిఙ, “నీను సొన్సి నా సేవ కిని దావీదు వెట ఈహు వెహ్అ, నాను మంజిని వందిఙ్ ఉండ్రి గుడిః తొహిస్ని ఇజినాన్ అక్క వన్ని వల్ల ఆఎద్. 5 గాని అయ్‍గుప్తుదాన్ ఇస్రాయేలు లోకురిఙ్ తత్తిబాణిఙ్ అసి నెహి దాక. నాను గుడిః లొఇ బత్కిదెఙ్ సిల్లె, టంబు గుడ్సాదు మంజి పయ్‍నం కిజి వాత. 6 నాను ఇస్రాయేలు లోకుర్ నడిఃమి మంజి పయ్‍నం కిజి వాజి మహివలె, నా లోకురిఙ్ నడిఃపిసి తత్తి అతికారిఙ లొఇ ఎయెరిఙ్‍బ దేవదారు కల్పదాన్ నా వందిఙ్ ఉండ్రి గుడిః తొహ్తు”, ఇజి వెహ్తెఙ్ సిల్లె. 7 అందెఙె యెలు నీను నా సేవ కిజిని దావీదుఙ్ ఈహు వెహ్అ, “సయ్‍నమ్‍క ముస్కు అతికారి ఆతి యెహోవ, నా లోకుర్ ఆతి ఇస్రాయేలు లోకాఙ్ నెయ్‍కి వజ మండ్రెఙ్ ఇజి గొర్రెఙ్ మేప్సి మహి బయ్‍లుదాన్ కూక్సి తత. 8 నీను ఎంబె సొహిఙ్‍బ నాను నిఙి తోడు మంజి నీ పగ్గది వరిఙ్ నీ ఎద్రు మన్ఎండ నాసనం కిత. యెలు లోకామ్‍దు పేరు పొందితి వరి లెకెండ్ నిఙిబ పేరు పొందిని లెకెండ్ కినాలె. 9 నా లోకుర్ ఆతి ఇస్రాయేలు లోకాఙ్ ఉండ్రి బాడ్డి ఎర్‍పాటు కిజి, వారు ఇతల్ అతల్ ఆఎండ బానె బత్కిని లెకెండ కినాలె. 10 పూర్బం నా ఇస్రాయేలు లోకుర్ ముస్కు నాయం కిని అతికారిఙ ఎర్‍పాటు కిత. గాని సెఇ బుద్ది మని లోకుర్ వరిఙ్ బాదెఙ్ కితార్. యెలు అయా లెకెండ్ బాదెఙ్ కిఎర్. నీ పగ్గతి వరి బాణిఙ్ నిఙి నిపాతి మంజిని లెకెండ కిజి, మరి నీ తెగ్గదాన్ రాజుర్ వాని లెకెండ్ కిన. 11 నీ దినమ్‍కు పూర్తి ఆతి వెన్కా నీ అన్నిగొగొర్ డగ్రు గుండం కిబె ఆనిలె, అయావలె నీ బదులు నీ సొంత కొడొఃర్‍ఙ లొఇ ఒరెన్ వన్నిఙ్ రాజు కిన. 12 వాండ్రె నా పేరు వందిఙ్ ఉండ్రి గుడిః తొహిస్నాన్. నస్తివలె నాను వన్ని రాజెం, వాండ్రు బస్ని సిమసనం ఎల్లకాలం నిని మంజిని లెకెండ్ కినాలె. 13 నానె వన్నిఙ్ బుబ్బ వజ మంజిన, వాండ్రు నఙి మరిన్ వజ మంజినాన్. వన్ని ముఙల ఏలుబడిః కితి రాజుదిఙ్, నా కనికారం దూరం కితి వజ నాను వన్నిఙ్ దూరం కిఎ. 14 నా గుడిః, నా రాజెం, ఎల్లకాలం కద్లిఎండ మంజిని వందిఙ్ వన్నిఙ్ ఎర్‍పాటు కిజి నిల్‍ప్ని, నస్తివలె వన్ని సిమసనం ఎల్లకాలం నిల్సి మంజినాద్”, ఇజి వెహ్తాన్. 15 యా వజ నాతాను ప్రవక్తదిఙ్ దేవుణు కల్లదు వెహ్తి మాటెఙ్ విజు దావీదుఙ్ సొన్సి వెహ్తాన్.దావీదు పార్దనం కితిక
16 అయావలె దావీదు, టంబు గుడ్సా లొఇ సొన్సి యెహోవదిఙ్ ఈహు పార్దనం కితాన్. “ఓ ప్రబు, ఓ యెహోవ, నిసొ గవ్‍రం మని ఓదాదు నఙి తతెఙ్ నాను ఏపాటిదికాన్? నా కుటుం ఏపాటిదికా. 17 యక నీ మన్సుదు ఇజ్రి పణినె, గాని నీను నీ పణిమన్సి ఆతి నా కుటుం వందిఙ్, వాని కాలమ్‍ది బత్కు వందిఙ్ నఙి నెస్‍పిస్తి. నీనె నఙి గొప్ప ఓదా మనివజ కితి. 18 నీ సేవ పణికినికాన్ ఆతి దావీదు ఇని నాను మరి నీ వెట ఇనిక ఇజి వెహ్తెఙ్ అట్‍నా. నీ సేవకినికాన్ ఆతి నఙి నీను నెస్ని గదె. 19 ఓ యెహోవ, నీ సేవ పణికినికాన్ ఆతి నా వందిఙ్ నిఙి ఇస్టం వాతి వజ యా పణి కితి, యా గొప్ప బమ్మ ఆతి పణిఙ్ నెస్‍పిస్తి. 20 నీ వందిఙ్ మాపు వెహిక విజు నిజమ్‍నె నిఙి మిస్తి దేవుణు సిల్లెన్. నీ నన్నికాన్ మరి ఎయెన్‍బ సిల్లెన్. 21 నీ లోకుర్ ఆతి ఇస్రాయేలు లోకుర్ ననికార్ యా బూమిదు ఎయెర్‍బ సిల్లెర్. అయ్‍గుప్తుదాన్ విడుదల కిజి తత్తివెలె. నీ లోకుర్ ఎద్రు ఎమేణి జాతిది లోకురిఙ్‍బ మన్ఎండ పేర్జి పొక్సి, నీ పేరుదిఙ్ గవ్‍రం వాని వజ, నీ సొంత లోకుర్ ఇజి నెస్తెఙ్ గొప్ప బమ్మాతి పణిఙ్ కిజి తత్తి, 22 నీనే ఇస్రాయేలు లోకురిఙ్ దేవుణు ఆతి మని, ఎల్లకాలం నీ సొంత లోకుర్ వజ కేట కితి మని”, ఇజి వెహ్తాన్.
23 ఓ యెహోవ, నీ సేవకినికాన్ ఆతి నా వందిఙ్ నా కుటుం వందిఙ్ నీను కితి ఒపుమానం ఎసెఙ్‍బ అర్సి సొన్ఎండ నిల్‍ప్అ. 24 నీను వెహ్తిలెకెండ్ నీ పేరుదిఙ్ ఎల్లకాలం గవ్‍రం వాని లెకెండ్ కిఅ. అయావలె లోకుర్ విజెరె సయ్‍నమ్‍కాఙ్ అతికారి ఆతి యెహోవ, ఇస్రాయేలు లోకురిఙ్ ఏలుబడిః కిని దేవుణు ఇజి పొగ్‌డిఃనార్. నస్తివలె నీ సేవ పణికిని దావీదు కుటుం నీ ఎద్రు ఎల్లకాలం నిల్సి మనిద్. 25 ఓ ప్రబు, నఙి రాజు కుటుం వజ కిన ఇజి నీ సేవ కినికాన్ ఆతి నఙి వెహ్తి మని, అందెఙె నిఙి లొఙిజి వెహ్ని దయ్‍రం నఙి వాత మనాద్. 26 ఓ యెహోవ, నీనే నా దేవుణు. నీ సేవ కినికాన్ ఆతి నా కుటుం ఎల్లకాలం నిల్సి మంజిని వజ దీవిస్తెఙ్, నీను ఇస్టం ఆతి మని. నీను యా కుటుమ్‍దిఙ్ దీవిస్తిఙ ఎల్లకాలం నిపాతి మంజినార్. 27 ఓ యెహోవ, నీనే నా దేవుణు, నీ సేవ కినికాన్ ఆతి నా కుటుం వందిఙ్ నీ గుడిఃదు ఎల్లకాలం మంజిని వందిఙ్ దీవిస్తెఙ్ నిఙి ఇస్టం ఆత మనాద్. నీను నా కుటుం వందిఙ్ దీవిస్అ. ఆ దీవెనం ఎల్లకాలం మంజినాద్.