16
1 అయావజ లేవి తెగ్గదికార్ దేవుణు మందసం పెట్టె అసి వాతారె, దావీదు తొహిస్తి టంబు గుడ్సాదు లొఇ అక్క ఇట్తార్. నస్తివలె వారు యెహోవెఙ్ సుర్ని సీని పూజెఙ్‍ని, సాంతి పూజెఙ్ సితార్. 2 అయా సాంతి పూజెఙ్‍ని సుర్ని సీని పూజెఙ్ సీజి వీస్తి వెన్కా దావీదు యెహోవ పేరు అసి లోకాఙ్ విజెరిఙ్ దీవిస్తాన్. 3 అయావలె వాండ్రు ఇస్రాయేలు లోకురి మందదిఙ్, మొగ్గ కొడొఃరిఙ్ అయ్‍లి కొడొఃకాఙ్ విజెరిఙ్, ఉండ్రిఉండ్రి రొట్టె, అంజురపు పట్కు, ద్రాక్స పట్కు, వహిస్తి ద్రాక్స పట్కు గెలెఙ్a వరిఙ్ సీబాజి సితాన్. 4 అయావెన్కా యెహోవ మందసం పెట్టె ఎద్రు సేవ కిదెఙ్, ఇస్రాయేలు లోకురిఙ్ దేవుణు ఆతి యెహోవదిఙ్, పాటెఙ్ పార్‍దెఙ్, మాడిఃసి పొగ్‌డిఃదెఙ్, లేవి తెగ్గిది వరిఙ్ సెగొండారిఙ్ దావీదు ఎర్‍పాటు కితాన్. 5 వరి లొఇ ఉండ్రి జట్టుది వరిఙ్ ఆసాపు అతికారి ఆత మహాన్. విండ్రు తాల్‍బిల్లెఙ్ డెఃయ్‍నికాన్. మరి ఉండ్రి జట్టుది వరిఙ్ జెకరియ అతికారి ఆత మహాన్. వరి లొఇ అజీయేలు, సెమీరామోతు, యెహియేలు, మత్తితయా, ఎలీయాబు బెనాయా, ఓబెద్ఎదొం యెమీయేలు ఇనికార్. బాజెఙ్ ఎస్నికార్. 6 బెనాయా, యహజీయేలు ఇని పుజెర్‍ఙు, వీరు రోజు దేవుణు ఒపుమానం కితి మందసం పెట్టె ఎద్రు జోడు బంకెఙ్ ఊక్నార్.7-8 అయా దినమ్‍దు దావీదు తొలిత యెహోవ వందిఙ్ పొగ్‌డిఃని పాట రాసి ఆసాపుఙ్‍ని వన్ని బందుగుల్‍ఙ కీదు అయా పాట సితాన్. అక్క ఎలాగ ఇహిఙ, “యెహోవదిఙ్ వందనమ్‍కు వెహ్సి పొగ్‌డిఃదు, వన్ని పేరు వందిఙ్, వాండ్రు కితి బమ్మ ఆతి పణిఙ వందిఙ్ సాటిస్తు,
9 వన్ని వందిఙ్ పాటెఙ్ పార్‍దు. వన్నిఙ్‍నె పొగ్‌డిఃజి పార్‍దు.
వాండ్రు కితి బమ్మ ఆతి పణిఙ్ వందిఙ్ వెహె ఆదు.
10 వన్ని పేరు పరిసుద్దం ఆతిక ఇజి వన్ని వందిఙె సర్ద ఆదు,
యెహోవదిఙ్ రెబానికార్ వరి మన్సుదు సర్దదాన్ మంజినార్.
11 యెహోవ బలం వందిఙ్, వన్ని సత్తు వందిఙ్, ఎద్రు సుడ్ఃజి మండ్రు,
ఎస్తినస్తి వలె వన్ని వందిఙ్ రెబాజి మండ్రు.
12 వన్నిఙ్ పణిమన్సిర్ ఆతి ఇస్రాయేలు కుటుమ్‍దికిదెరా.
వాండ్రు కేట కితి యాకోబు తెగ్గదికిదెరా.
13 వాండ్రు కితి బమ్మ ఆతి పణిఙ వందిఙ్ ఎత్తు కిదు.
వాండ్రు సూణి లెకెండ్ కితి ఒద్దె బమ్మ ఆతి పణిఙ్ వందిఙ్‍ని,
వన్ని వెయ్‍దాన్ వాని నాయం ఆతి తీర్‍పు వందిఙ్ ఎత్తు కిదు.
14 వాండ్రె మా దేవుణు ఆతి యెహోవ, వన్ని తీర్‍పుఙ్‍నె
యా లోకం విజు జర్గిజినె.
15 వాండ్రు వెహ్ని మాట వెయి పంటెఙ్ దాక ఒడిఃబిజి మంజినాన్.
అందెఙె అబ్రహాము వెట కితి ఒపుమానమ్‍దిఙ్,
16 ఇస్సాకు వెట కితి పర్మణమ్‍దిఙ్
వాండ్రు ఎసెఙ్‍బ పొస్ఎండ గుర్తు కిజినె మంజినాన్.
17-18 వాండ్రు అయా గుర్తు, యాకోబుఙ్ ఉండ్రి రూలు వజ సితాన్.
ఒపుమానం కితిక ఎల్లకాలం మంజిని వజ,
ఇస్రాయేలు లోకాఙ్ కనాను దేసెమ్‍దు
మని బూమి సొంతం ఆనిలెకెండ్ సీన.
19 అయా దేసెమ్‍దు కొకొండారె పయిదికార్ మంజినార్.
అయావెన్కా మీరు సులుదాన్ లెక్క కిదెఙ్ ఆనాద్.
20 నస్తివలె ఇస్రాయేలు లోకుర్ యా దేసెం డిఃసి
దేసెం, రాజెం డిఃసి రాజెం బూలజి మహి లోకురిఙ్,
21 నాను ఎర్‍పాటు కిజి దీవిస్త మన.
నిని వరిఙ్ ఎయెర్‍బ ఇనికబ కిదెఙ్ ఆఎద్.
నాను ఎర్‍పాటు కితి ప్రవక్తెఙ ఇని కీడు కిదెఙ్ ఆఎద్.
22 ఆహె ఎయెర్‍బ వరిఙ్ ఇనికబ కిదెఙ్
సరి సీమాట్ ఇజి రాజురిఙ్ దేవుణు ఆడ్ర సితాన్.
23 యా లోకామ్‍దు మని లోకురాండె!
యెహోవెఙ్ కొత్త పాట పార్‍దు,
వన్ని రక్సణ వందిఙ్ రోజు సాటిసి మండ్రు.
24 మీ పడఃక నాహ్కణి వరిఙ్‍బ వెహ్తు,
మరి పయి దేసెమ్‍కాణి వరిఙ్‍బ,
వాండ్రు కితి గొప్ప పణిఙ వందిఙ్ అర్దం ఆని వజ వెహ్తు.
25 యెహోవ గొప్ప పెరికాన్, వాండ్రె పొగ్‌డిఃదెఙ్ తగ్నికాన్,
యా బూమిద్ మని విజు వన్కాఙ్ ఇంక
వాండ్రె పెరికాన్. బుర్ర వక్సి గవ్‍రం సీదెఙ్ తగ్నికాన్.
26 ఎందన్నిఙ్ ఇహిఙ యెహోవనె ఆగాసం విజు తయార్ కితికాన్.
దేసెమ్‍ది దెయమ్‍కు విజు వహి బొమ్మెఙ్‍నె.
27 గవ్‍రం, సత్తు వాండ్రు మంజిని బాడ్డిదునె మంజినె.
బల్లం సర్ద వన్ని బానె మంజినె.
28 లోకమ్‍ది విజు జాతిఙాణి లోకురాండె!
యెహోవెఙ్ ఒప్ప జెపె ఆదు.
వాండ్రె గొప్ప సత్తుమనికాన్
బలం మనికాన్ ఇజి నండొ పొగ్‌డిఃదు.
29 యెహోవెఙ్ వన్ని పేరుదిఙ్ తగ్నిలెకెండ్ గవ్‍రం సీదు.
సుబ్బరం ఆజి నెగ్గి సొక్కెఙ్ పొర్‍పాజి,
వన్నిఙ్ తగ్గితి లెకెండ్ అగ్గం సీని సంద అసి వాజి
వన్ని గుడిఃదు ముణుకుఙ్ ఊర్జి మాడిఃస్తు.
30 లోకమ్‍ది విజు జాతిఙణి లోకురాండె!
వన్ని ఎద్రు లొఙిజి వణక్సి మండ్రు.
నస్తివలె యా లోకం కద్లిఎండ మంజినాద్.
31 యెహోవనె ఏలుబడిః కిజినాన్ ఇజి
విజు జాతిఙాణి వరిఙ్ సాటిస్తు,
ఆగాసం సర్ద ఆపిద్, బూమి సర్ద ఆపిద్.
32 సమ్‍దరం దన్ని లొఇ మనికెఙ్ విజు మొరొ ఆపివ్.
బూమిద్ మనికెఙ్ విజు సర్ద ఆపివ్.
33 బూమి ముస్కు మని లోకాఙ్ విజెరిఙ్
యెహోవ తీర్‍పు సీదెఙ్ ఎద్రు సుడ్ఃజినాన్.
అయావలె గొరొకాణి మర్రెక్ విజు నండొ డేడిఃసి సర్ద ఆనెలె.
34 యెహోవ గొప్ప నెగ్గికాన్ వన్నిఙ్ వందనమ్‍కు వెహ్సి పొగ్‌డిఃదు.
అందెఙె వన్ని ప్రేమ ఎల్లకాలం నిల్సి మంజినాద్.
35 వన్నిఙ్ ఈహు పొగ్‌డిఃదు, ‘మఙి రక్సిస్‍ని ఓ దేవుణు’
మఙి రక్సిఅ, నీ పరిసుద్దం ఆతి పేరు వందిఙ్
గవ్‍రం సీజి సర్ద ఆజి పొగ్‌డిఃని వందిఙ్,
ఆఇ జాతిఙాణి వరి బాణిఙ్ మఙి రక్సిఅ.
36 ఇస్రాయేలు లోకురిఙ్ దేవుణు ఆతి యెహోవ
ఎల్లకాలం పొగ్‌డెః ఆజి మనిన్ ఇజి వెహ్తిఙ్,
వారు విజెరె ‘ఆమెన్’ ఇజి వెహ్తార్.
అయావజ యెహోవెఙ్ పొగ్‌డిఃతార్”, ఇజి వెహ్తాన్.
37 యెహోవ మందసం పెట్టె ఇట్తి గుడ్సాదు, రోజు ఉండ్రి పద్దతిదాన్ సేవ కిని వందిఙ్, దావీదు రాజు ఆసాపుఙ్‍ని, వన్ని బందుగుల్‍ఙ ఇడ్డిస్తాన్. 38 ఆహె 68 మన్సి లేవి తెగ్గది వరిఙ్, ఎర్‍పాటు కిజి ఆసాపుని, వన్ని బందుగుల్‍ఙు వెట కూడ్ఃజి పణికిదెఙ్ ఇడ్డిసి, వరి లొఇ యెదూతూ మరిసి ఓబెద్ఎదొమ్‍దిఙ్‍ని, హోసాకు ఇని వరిఙ్ సర్దు కాపు ఇడ్డిస్తాన్. 39 అయావజనె గిబియోను గొరొన్ ముస్కు మని యెహోవ టంబు గుడ్సాదు, పుజెరి పణి కిజి మహి సాదోకుఙ్‍ని వన్నిఙ్ తోడు కిని పుజెరిఙ దావీదు కాపు ఇడ్డిస్తాన్. 40 నస్తివలె ఇస్రాయేలు లోకురిఙ్, యెహోవ రూలుఙ్ పుస్తకమ్‍దు వెహ్తి మహి వజ రోజు పద్దతిదాన్ సల్‍ది పొదోయ్ సూర్ని పూజెఙ్ సీని వరిఙ్, దావీదు ఎర్‍పాటు కితాన్. వారు అయా వజ కిజి మహార్. 41 ఎందన్నిఙ్ ఇహిఙ, యెహోవ కనికారం ఎల్లకాలం మంజిని వందిఙ్, హేమాను, యెదూతూ ఇని వరిఙ్‍ని, ఆహె మరి సెగొండారిఙ్ విరి వెటకూడిఃజి పాటెఙ్ పార్‍జి పొగ్‌డిఃదెఙ్ ఎర్‍పాటు కితాన్. 42 ఆహె జోడు బంకెఙ్ ఊక్ని వరిఙ్, పాటెఙ్ పార్ని వరిఙ్, బాజెఙ్ ఎస్ని వరిఙ్ ఎర్‍పాటు కితాన్. విరిఙ్‍బ హేమనుని, యెదూతూ ఇనికార్ సాయం కిజి మహార్. మరి యెదుతు మరిసిర్‍ఙ, సర్దు కాపు కిదెఙ్ ఎర్‍పాటు కితాన్. 43 అయావెన్కా లోకుర్ విజెరె ఎయె ఇండ్రొ వారు మర్‍జి సొహార్. దావీదుబ వన్ని ఇండ్రొణి వరిఙ్ దీవిస్తెఙ్ మర్‍జి సొహాన్.