సొలొమోను దేవుణు గుడిః తొహిస్తెఙ్ ఆస ఆజినిక
5
1 అయావెన్కా తూరు దేసెమ్‍దు రాజు ఆతి హీరాము, “వన్ని అపొసి రాజెమ్‍దు సొలొమోను రాజు ఆతాన్”, ఇజి నెస్తాండ్రె, వన్ని సేవపణి కిని వరిఙ్, సొలొమోను డగ్రు పోక్తాన్. ఎందన్నిఙ్ ఇహిఙ హీరాముని దావీదు కూడెఃఙ్ లెకెండ్ మహార్.2-3 నస్తివలె సొలొమోను వరివెట, “మా బుబ్బ ఆతి దావీదుఙ్ పగ్గదాన్ మహి సుట్టు పడఃకది దేసెమ్‍కాఙ్, యెహోవ వన్ని పాదమ్‍క అడ్గి ఇడ్ని దాక, వరివెట ఉద్దం కిజి మహాన్. అందెఙె వన్ని దేవుణు ఆతి యెహోవెఙ్ పొగ్‌డిఃని వందిఙ్ గుడిః తొహ్‍తెఙ్ అట్ఎతాన్. యా సఙతి నీను నెస్ని. 4 గాని యెలు ఇహిఙ, నా దేవుణు ఆతి యెహోవ, నా రాజెమ్‍దిఙ్ సుట్టు పడ్ఃకెఙ మని నా పగ్గది వరిఙ్ అణిసి, ఇని గండెం సిల్లెండ కిత మనాన్. 5 అహిఙ మా బుబ్బ ఆతి దావీదు వెట, వన్ని దేవుణు ఆతి యెహోవ, ఉండ్రి పర్మణం కిత మనాన్. అక్క ఇనిక ఇహిఙ, ‘నీ వెన్కా నీ సిమసనం ముస్కు బసి ఏలుబడిః కిదెఙ్ నీ మరిన్‍దిఙ్ నాను రాజు వజ బస్సె కినాలె. వాండ్రె నా వందిఙ్ ఉండ్రి గుడిః తొహ్‍నాన్‍లె’ అయా గుడిఃదునె నా పేరుదాన్ ఇజి వెహ్తా మనాన్. 6 అందెఙె నీను లెబానోను గొరొతి దేవదారు మర్రెక్ కతిస్తెఙ్ నఙి సెల్వ సిద. నా లోకుర్‍ని నీ లోకుర్ కూడ్ఃజి పణి కిదెఙ్ ఇజి వరిఙ్ వెహ్అ. మీ పణిమన్సిరిఙ్ నీను ఎసొ కూలి సీదెఙ్ ఇజినిదొ, నసొ నాను వరిఙ్ సీన. మీ సీదోనుదికార్ మర్రెక్ కత్ని లెకెండ్, మా బాన్ ఎయెర్‍బ సిల్లెర్ ఇజి నీను నెస్ని”, ఇజి హీరాముబాన్ కబ్రు పోక్తాన్.
7 సొలొమోను పోక్తి కబ్రు హీరాము వెహాండ్రె, గొప్పఙ సర్ద ఆజి, “యా రాజెమ్‍దు ఏలుబడిః కిదెఙ్, గేణం మని మరిసిఙ్ దావీదుఙ్ సితి వందిఙ్, యెహోవెఙ్ వందనమ్‍కు”, ఇజి యెహోవెఙ్ పొగ్‍డిఃతాన్.
8 అయావలె హీరాము, సొలొమోనుఙ్, “నీను పోకిస్తి కబ్రు నఙి అందితాద్. నీను లొస్తి దేవదారు మర్రెక్‍ని సరల మర్రెక్ తప్ఎండ సీన. 9 నా పణిమన్సిర్ లెబానోను గొరొతి మర్రెక్ కత్సి, సమ్‍దరం ఒడ్డుదు తసి కొటు కినార్. బాణిఙ్ నాను మోప్కు తొహిసి నీను కోరితి బాడ్డిదు సమ్‍దరమ్‍దాన్ పోక్న. అయావలె నీను బాణిఙ్ ఒతెఙ్ అనాద్. గాని యెలు నాను నిఙి లొసినిక ఇనిక ఇహిఙ, నా బంగ్లదు మని వరి వందిఙ్ ఆజి తగ్గితి నసొ తిండి వస్తుఙ్ పోకిస్అ ఇజి నాను ఆస ఆజిన”, ఇహాన్.
10 అయావెన్కా హీరాము, సొలొమోనుఙ్ కావాలస్తి నసో దేవదారు మర్రెక్‍ని, సరల మర్రెక్ పోక్తాన్.
హీరాము రాజు దేవదారు మర్రెక్ యెరూసలేం పోకిసినిక (5:10)
13 గాని సొలొమోను రాజు, ఇస్రాయేలు లోకుర్ లొఇ బత్కిజి మహి ఆఇ జాతిది వరిఙ్ బల్‍మిసారం కిజి 30,000 మన్సిదిఙ్ వెట్టి పణి కిదెఙ్ ఎర్‍పాటు కితాన్. 14 విరిఙ్ మూండ్రి జట్టుఙ్ కితాండ్రె, వరి లొఇ ఉండ్రి ఉండ్రి జట్టుదు 10,000 మన్సి కిజి లెబానోను గొరొతు పోకిసి మహాన్. వారు లెబానోను గొరొతు ఉండ్రి నెల్ల పణి కిజి, ఇల్కాఙ్ రుండి నెల్లెఙ్ మంజి సొన్సి మహార్. వరి ముస్కు అతికారి వజ అదోనిరాముఙ్ ఎర్‍పాటు కిత మహాన్. 15 మరి వారు ఆఎండ గొరొకాఙ్ సొన్సి మర్రెక్ కత్సి తతెఙ్ 80,000 మన్సి మహార్. పణుకుఙ్ లాగ్జి, పిండ్‍ని తన్నికార్ 70,000 మన్సి సొలొమోనుఙ్ మహార్.
పణుకుఙ్ సెక్సినిక. (5:14)