రూతు 1

రూతు

ఎలీమెలెకుని వన్ని కుటుమ్‍దికార్ మోయాబు దేసెమ్‍దు సొన్సి బత్కిజినార్

1 ముట్ట దరుఙ్ ఏలుబడిః కిజిమహి కాలమ్‍దు, ఇస్రాయేలు దేసెమ్‍దు కరు వాతాద్. అందెఙె యూదా దేసెమ్‍ది బెత్లెహేము ఇని నాటొణిఙ్ ఒరెన్ వన్ని ఆడ్సిఙ్, వన్ని రిఎర్ మరిసిరిఙ్ వెట అసి మోయాబు దేసెమ్‍దు బత్కిదెఙ్ సొహార్. 2 వన్ని పేరు ఎలీమెలెకు, వన్ని ఆడ్సి పేరు నయోమి, వన్ని రిఎర్ మరిసిర్ పేర్కు మహ్‍లోను మరి ఒరెన్ వన్ని పేరు కిలియోను. వారు యూదా దేసెమ్‍దు ఎప్రాత ఇన్ని బెత్లెహేము నాటొణికార్. వీరు మోయాబుదు సొన్సి బాన్ బత్కిజి మహార్. 3 గాని నయోమి మాసి ఎలీమెలెకు సాతి వెన్కా అదిని, దన్ని రిఎర్ మరిసిర్‍నె బత్కిజి మహార్. 4 వారు మోయాబు దేసెమ్‍ది బోదెకాఙ్ పెన్లి ఆతార్. వన్కా లొఇ ఉండ్రి దన్ని పేరు రూతు మరి ఉండ్రి దన్ని పేరు ఓర్పా. 5 వారు అబ్బె డగ్రు పది పంటెఙ్ బత్కితి వెన్కా, మహ్‍లోను, కిలియోను ఇని రిఎర్ మరిసిర్‍బ సాతార్. అందెఙె అది కాస్తి మరిసిర్‍ని మాసి సిల్లితిఙ్ దిక్కు గత్తి సిల్లికాద్ ఆతాద్.

నయోమిని రూతు బెత్లెహేముదు మర్‍జి వాజినె

6 యెహోవ ఇస్రాయేలు వరిఙ్ బోజనం సీని వందిఙ్ వన్ని లోకురిఙ్ నెగ్గి పంట పండ్‍దెఙ్ సాయం కితాన్ ఇజి నయోమి వెహాదె ఇస్రాయేలు వరిబాణిఙ్ మోయాబు దేసెం డిఃసి దన్ని దేసెం మర్‍జి సొండ్రెఙ్ ఇజి అదిని, దన్ని కొడిఃయెసిక్ ఒడిఃబితె. 7-8 నస్తివలె అది మని దేసెమ్‍దాన్, అదిని దన్ని రుండి కొడిఃయెసిక్ సోసి యూదా దేసెమ్‍దు మర్‍జి సొండ్రెఙ్ ఇజి, సరి అసి నడిఃజి మహిఙ్ నయోమి దన్ని రుండి కొడిఃయెసిక్ దరిఙ్ సుడ్ఃజి, “మీరు మీ యాయెక ఇల్కాఙ్ మర్‍జి సొండ్రు. సాతిసొహి నా మరిన్‍క ముస్కు, నా ముస్కు మీరు నమకమ్‍దాన్ సుడ్ఃతి లెకెండ్ యెహోవ మీ ముస్కు నమకమ్‍దాన్ సుడిఃన్. 9 మీరు పెన్లి ఆజి వరి ఇల్కాఙ్ నెగ్రెండ సర్దదాన్ మంజిని లెకెండ్ దేవుణు మిఙి కిపిన్”, ఇజి వెహ్సి వన్కాఙ్ ముద్దు కితాద్. 10 నస్తివలె అవికు డేడిఃసి అడఃబజి, “నీ లోకుర్‍బాన్ నీ వెటనె వానాప్”, ఇజి దన్నిఙ్ వెహ్తె. 11 గాని నయోమి, “నా గాలుకండె మీరు నా మాట వెండ్రు. నా వెట మీరు ఎందన్నిఙ్ వాజినిదెర్? మిఙి పెన్లి ఆదెఙ్ నా పొట్టదు మరిన్‍కు సిల్లెర్. 12 నా బయికండె మర్‍జి సొండ్రు. నాను మొగ్గకొడొః వెట మండ్రెఙ్ అట్ఇ డొక్రి. నాను కొడొఃర్ కాస్తెఙ్ అట్‍న ఇజి నమితిఙ్‍బ గాని, పెన్లి ఆజి యా పొదొయ్ నా కుటుమ్‍ది వన్నివెట కొడొఃర్ కాస్తిఙ్‍బ, 13 వారు పెరికార్ ఆనిదాక వరి వందిఙ్ మీరు కాప్‍కిజి మంజినిదెరా? మీరు వరి వందిఙ్ కాప్‍కిజి పెన్లి ఆఎండ ఒరి ఒరిదెర్ మంజినిదెరా? నా బయికండె అయాక కూడ్ఃఎద్, దేవుణు నఙి పగ్గ వన్నిలెకెండ్ ఆతాన్. అయాక మఙి జర్గితి దన్నిఙ్ ఇంక నఙి మరి ఒదె లావు బాద మనాద్”, ఇజి వన్కా వెట వెహ్తాద్. 14 అవికు డేడిఃసి అడఃబజి, అయావలె ఓర్పా దన్ని మీమ్‍సిఙ్ ముద్దు కితాదె డిఃస్త సొహాద్. గాని, రూతు మీమ్‍సి వెటనె మహాద్. 15 మరి, “ఇదిలో నీ జాద్వ దన్ని లోకుర్‍బాన్ దన్ని దేవుణుబాన్ మర్‍జి సొన్సినాద్ దన్నివెట సొన్అ”, ఇజి వెహ్తాద్. 16 అందెఙె రూతు, “నా వెట రమ్మ ఇజి, నఙి డిఃసి సిఅ ఇజి నఙి బత్తిమాల్‍మ. నీను సొన్ని బాడ్డిదునె నానుబా వాన. నీను మంజినిబానె నానుబా మంజిన. నీ లోకునె నా లోకు. నీ దేవుణునె నా దేవుణు. 17 నీను సానిబానె నానుబా సాన. అబ్బెనె ముసె ఆన. సావు ఆఎండ మరి ఇనికబా నిఙి నఙి ఎర్లిస్తిఙ యెహోవ నఙి పెరి కస్టం సిపిన్”, ఇహాద్. 18 “నా వెట వాదెఙ్ మన్సు ఆతాద్”, ఇజి నయోమి నెస్తాద్. అందెఙె అయా మాట వందిఙ్ దన్నివెట వర్గిదెఙ్ డిఃస్తాద్. 19 అవికు బెత్లెహేముదు సొన్సి బాన్ అందితివలె, ఆ నాటొణికార్ విజెరె మంద కూడ్ఃజి వాజి, “ఇది నయోమి గదె?”, ఇజి వర్గిజి మహిఙ్, 20 అది, “విజు దన్ని ముస్కు సత్తు మనికాన్ నఙి నండొ బాద పుటిస్తాన్. నఙి నయోమి ఇన్‍మాట్ మారా ఇండ్రు”, ఇహాద్. 21 “నాను కుటుం వెట సొహా గాని దేవుణు నఙి ఉండ్రె దన్నిఙ్ మహ్సి పోకిస్తాన్. మీరు నఙి నయోమి ఇజి కూక్తెఙ్ ఆఎద్. యెహోవ నా ముస్కు నెగ్గి తీర్‍పు తీరిస్ఎతాన్. విజు దన్ని ముస్కు సత్తు మనికాన్ నఙి బాద కితాన్”, ఇజి వరివెట వెహ్తాద్. 22 అయా లెకెండ్ నయోమి, మోయాబు దేసెమ్‍ది రూతు ఇన్ని దన్ని కొడిఃయెసి వెట బాణిఙ్ బెత్లెహేముదు మర్‍జి వాతె. అవి రుండి గోదుము పంట కొయ్‍ని కాలమ్‍దు వాతె.