నాయాది 13

సంసోను పుట్తిక

1 ఇస్రాయేలు లోకుర్ మరి యెహోవ ఎద్రు సెఇ పణిఙ్ కితిఙ్, యెహోవ వరిఙ్ 40 పంటెఙ్ పిలిస్తియది వరి కీదు ఒప్పజెప్తాన్.

2 అయా కాలమ్‍దు దాను తెగ్గదికాన్ ఒరెన్ జొరియా ఇని పట్నమ్‍దు బత్కిజి మహాన్. వన్ని పేరు మానోహ. వన్ని ఆడ్సి గొడ్డుదికాద్. అందెఙె దన్నిఙ్ కొడొఃకొక్రర్ సిల్లెండ మహార్. 3 అయావలె మానోహ ఆడ్సిఙ్ యెహోవ దూత తోరితాండ్రె, “ఓ బయి, నీను గొడ్డుదికి. నిఙి కొడొఃకొక్రర్ సిల్లెర్. గాని నీను ఒరెన్ కొడొఃదిఙ్ ఇడ్నిలె. 4 అందెఙె నీను జాగర్తదాన్ మన్అ. నీను కడుఃకుడుః ఆతిఙ్‍బ, ద్రాక్స ఏరు ఆతిఙ్‍బ సెఇక ఇనికబ ఉణ్‍మ. 5 ఎందన్నిఙ్ ఇహిఙ నీను పాత డిఃసి ఒరెన్ కొడొఃదిఙ్ ఇడ్నిలె. ఆ కొడొః పుట్తిబాణిఙ్ అసి వన్ని బుర్రది కొప్పు సిరిం కూడఃమ్‍దాన్ కత్రిస్ఎండ కేట ఆతి వన్ని వజ మంజినాన్‍లె. అందెఙె వన్ని కొప్పు కత్రిస్నిక ఆఎద్. వాండ్రు ఇస్రాయేలు లోకురిఙ్ పిలిస్తియది వరి కీదాన్ డిఃబిస్నాన్‍లె”, ఇజి దన్నిఙ్ వెహ్తాన్.

6 అయావలె అది దన్ని మాసి డగ్రు సొహాదె, “దేవుణుబాణిఙ్ ఒరెన్ నాబాన్ వాతాన్. వాండ్రు దేవుణు దూత లెకెండ్ బీకరమ్‍దాన్ తోరితాన్. వాండ్రు ఎమెణిఙ్ వాతాండ్రొ వన్నిఙ్ నాను వెన్‍బాదెఙ్ సిల్లె. వాండ్రు వన్ని పేరుబ నఙి వెహ్తెఙ్ సిల్లె. 7 గాని వాండ్రు నఙి ఈహు వెహ్తాన్, ‘ఓ బయి వెన్అ, నీను పాత డిఃసి కొడొఃదిఙ్ ఇడ్నిలె. నీను కడుఃకుడుః ఆతిఙ్‍బ, ద్రాక్స ఏరు ఆతిఙ్‍బ సెఇక ఇనికబ ఉణ్‍మ. ఎందన్నిఙ్ ఇహిఙ యా కొడొః పుట్తిబాణిఙ్ అసి, సాని దాక వన్ని బుర్రది కొప్పు సిరిం కూడఃమ్‍దాన్ కత్రిస్ఎండ కేట ఆతి వన్ని వజ మంజినాన్‍లె’ ఇజి నఙి వెహ్తాన్”, ఇజి దన్ని మాసి వెట వెహ్తాద్.

8 అందెఙె మానోహ, “ఓ ప్రబు, నీను పోకిస్తి నీ దూతదిఙ్ మరి ఉండ్రి దుమ్ మా డగ్రు పోకిస్అ. యెలు పుట్ని కొడొఃదిఙ్ ఎనెట్ పోస కిదెఙ్‍నొ మఙి నేర్‍పిస్అ ఇజి నీ దూతదిఙ్ వెహ్అ”, ఇజి యెహోవెఙ్ పార్దనం కితాన్. 9 అయా పార్దనం దేవుణు వెహాండ్రె, మానోహ ఆడ్సి మడిఃఙ బస్తి మహిఙ్, దన్ని డగ్రు ఆ దేవుణు దూత మరి వాతాన్. గాని దన్ని మాసి బాన్ సిల్లెతాన్. 10-11 నస్తివలె అది దన్ని మాసి డగ్రు గజిబిజి ఉహ్‍క్సి సొహాదె, “ఇదిలో, అయా నాండిఙ్ నా డగ్రు వాతి మహికాన్ మరి నఙి తోరితాన్”, ఇజి వన్నిఙ్ వెహ్తిఙ్ సరి, మానోహ నిఙితాండ్రె వన్ని ఆడ్సి వెట ఆ దేవుణు దూత డగ్రు సొన్సి, “నా ఆడుః వెట వర్గితికి నీనేనా?” ఇజి వన్నిఙ్ వెన్‍బాతిఙ్, వాండ్రు, “ఙుఙు, నానే”, ఇజి వెహ్తాన్. 12 అందెఙె మానోహ, “బాబు, నీను వెహ్తి లెకెండ్‍నె జర్గినాద్‍లె ఇజి నాను ఒడిఃబిజిన. గాని ఆ కొడొః బత్కు ఎనెట్ మంజినాదొ, వాండ్రు ఇని పణిఙ్ కినాండ్రొ అక్క వెహ్అ”, ఇజి ఆ దూతదిఙ్ వెన్‍బతాన్. 13 నస్తివలె యెహోవ దూత, “నాను నీ ఆడుఃఙ్ వెహ్తి లెకెండ్‍నె అది కిదెఙ్. 14 అది ద్రాక్స దొల్లుదాన్ వానిక ఇనికబ తినిక ఆఎద్. కడుఃకుడుః ఉణిక ఆఎద్. మరి సెఇక ఇనికబ తినిక ఆఎద్. నాను వెహ్తిక విజు అది కిదెఙ్‍వలె”, ఇజి వన్నిఙ్ వెహ్తాన్.

15-16 మానోహ యెహోవ దూత ఇజి నెస్ఎతాన్. అందెఙె వాండ్రు, “బాబు, నీను దయ కిజి ఇబ్బెన్ సడెఃం మన్అమె. నీ వందిఙ్ ఉండ్రి గొర్రె పిల్ల గుత్‌నాపె నిఙి వర్న సీనాప్”, ఇజి వన్నిఙ్ వెహ్తాన్. యెహోవ దూత, “నీను సీని తిండి నాను ఉణ్ఎ. ఒకొవేడః నీను ఇనికబ సీదెఙ్ ఇహిఙ సుర్ని పూజ సీనివలె యెహోవెఙ్ సిఅ”, ఇజి మానోహదిఙ్ వెహ్తాన్. 17 నస్తివలె మానోహ, “బాబు, నీ పేరు ఇనికదొ మఙి వెహ్సి మన్అ? ఎందన్నిఙ్ ఇహిఙ నీను వెహ్తి మని మాట వజ జర్గితిఙ, నీ పేరు అసి పొగ్‌డిఃదెఙ్ ఇజి మాపు ఒడిఃబిజినాప్”, ఇజి యెహోవ దూతదిఙ్ వెన్‍బతాన్. 18 అహిఙ ఆ దూత, “నా పేరు ఎందన్నిఙ్ వెన్‍బాజిని? నా పేరు వెహ్తెఙ్ అట్ఇ నసొ గొప్పదిక”, ఇజి వన్నిఙ్ వెహ్తాన్.

19 అయావలె మానోహ ఉండ్రి గొర్రె పిల్లదిఙ్ పణుకు ముస్కు ఒతాండ్రె యెహోవ వందిఙ్ అగ్గం పూజ సితాన్. నస్తివలె మానోహని వన్ని ఆడ్సి సుడ్ఃజి మహిఙ్‍నె యెహోవ దూత బమ్మ ఆని పణి కితాన్. 20 అయా పూజ బాడ్డిదాన్ సిస్సు నేగ్‌డిఃజి ఆగాసం ముస్కు సొన్సి మహిఙ్, యెహోవ దూత ఆ సిస్సుదాన్ ముస్కు సొహాన్. మానోహని వన్ని ఆడ్సి అక్క సుడ్ఃతారె బూమిదు ముణుకు ఊర్‍జి పడ్ఃగ్జి మాడిఃస్తార్. 21 అయావెన్కా మానోహ యెహోవ దూత ఇజి నెస్తాన్. గాని ఆ దూత మానోహదిఙ్‍ని వన్ని ఆడ్సిఙ్ మరి తోర్ఎతాన్.

22 అయావలె మానోహ, “మాటు దేవుణుదిఙ్ సుడ్ఃతాట్. అందెఙె మాటు సానాట్‍లె”, ఇజి వన్ని ఆడ్సిఙ్ వెహ్తాన్. 23 అహిఙ వన్ని ఆడ్సి, “యెహోవ మఙి సప్‍తెఙ్ సూణిక ఇహిఙ మాటు సితి సుర్ని పూజ, అగ్గం పూజ, వాండ్రు లాగె ఆఎతాన్‍మరి, వాండ్రు యాకెఙ్ విజు మఙి తోరిస్ఎతాన్‍మరి. యా కాలమ్‍దు నిన్ని సఙతిఙ్ మఙి వెహ్ఎతాన్‍మరి”, ఇజి దన్ని మాసిఙ్ వెహ్తాద్. 24 అయావెన్కా అది ఒరెన్ కొడొఃదిఙ్ కాస్తాదె, వన్నిఙ్ సంసోను ఇజి పేరు ఇట్తాద్. ఆ కొడొః పిరితివలె వన్నిఙ్ యెహోవ దీవిస్తాన్. 25 సంసోను జొరియా పట్నమ్‍దిఙ్‍ని ఎస్తాయోలు పట్నమ్‍దిఙ్ నడిఃమి మని మహనెదాను ఇని బాడ్డిదు మహివలె, యెహోవ ఆత్మ వన్నిఙ్ సత్తు సీదెఙ్ మొదొల్‍స్తాన్.