యెహోసు 24

యెహోసువ, దేవుణు కితి మేలుఙ్ ఇస్రాయేలురిఙ్ వెహ్సినిక

1 అయావలె యెహోసువ ఇస్రాయేలు తెగ్గది నెయ్‍కిరిఙ, వరి కులమ్‍ది పెద్దెల్‍ఙ, తీర్‍పు కిని అతికారిఙ సెకెముదు కూక్పిస్తిఙ్, వారు వాతారె దేవుణు ఎద్రు నిహార్. 2 నస్తివలె యెహోసువ వరి విజెరి వెట ఈహు వెహ్తాన్, “ఇస్రాయేలు లోకురిఙ్ దేవుణు ఆతి యెహోవ వెహ్సినిక ఇనిక ఇహిఙ, ‘సేన పంటెఙ్ ముందల మీ అన్నిగొగొర్ ఇహిఙ అబ్రాహాము, నాహోరు విరి అపొసి తెరహుబ ఉప్రటిస్ గడ్డదిఙ్ తూర్‍పు పడఃకాద్ బత్కిజి మహార్. వారు ఆఇ దేవుణుకాఙ్ మాడిఃసి పూజ కిజి మహార్. 3 గాని నాను ఉప్రటిస్ గడ్డ పడఃకదాన్ మీ అన్నిగొగొ ఆతి అబ్రాహాముఙ్ కూక్‍సి తసి, కనాను దేసెం విజు తోరిసి వన్ని కుటుమ్‍దిఙ్ సెద్రిస్త. ఆహె వన్నిఙ్ ఇస్సాకుఙ్ సిత. 4 మరి ఇస్సాకుదిఙ్ యాకోబు, ఏసావు ఇని రిఎర్ మరిసిరిఙ్ నాను సిత. ఏసావుదిఙ్ సేయీరు గొరొన్ ప్రాంతమ్‍కు సొంతం కిబె ఆఅ ఇజి వన్నిఙ్ సిత. గాని యాకోబుని, వన్ని మరిసిర్ బత్కిదెఙ్ డిగ్గు మని అయ్‍గుప్తు దేసెమ్‍దు సొహార్.

5 వెన్కా నాను, మోసేదిఙ్‍ని ఆరోనుదిఙ్ అయ్‍గుప్తుదు పోకిసి, బాణికార్ బమ్మ ఆని లెకెండ్ బాదెఙ్ వరివెట కిబిస్త. అయావెన్కా నాను మిఙి వెల్లి కూక్‍సి తత. 6 నాను అయ్‍గుప్తుదాన్ మీ అన్నిగొగొరిఙ్ కూక్‍సి తతివలె, వారు ఎర్రని సమ్‍దరం డగ్రు వాతిఙ్, అయ్‍గుప్తుదికార్ రద్దం బండిఙ్‍దాన్, గుర్రమ్‍కుదాన్ మీ అన్నిగొగొరిఙ్ ఎర్రని సమ్‍దరం దాక ఉల్‍ప్‍సి తతార్. 7 అందెఙె యెహోవ ఆతి నఙి వారు బత్తిమాల్‍తిఙ్, నాను మిఙిని అయ్‍గుప్తుది వరిఙ్ నడిఃమి సీకటి కిబిసి సమ్‍దరం వరి ముస్కు రప్పిసి, వరిఙ్ ముడ్ఃక్త పొక్త. అయ్‍గుప్తు దేసెమ్‍దు నాను కితి దన్నిఙ్ మీరు కణుకు నిండ్రు సుడ్ఃతిదెర్. అయావెన్కా మీరు నండొ కాలమ్‍కు బిడిఃమ్ బూమిదునె బత్కితిదెర్’”.

8 “అయావలె యెహోవ ఆతి నాను మిఙి అమోరీయురి దేసెమ్‍దు కూక్‍సి తత. యాక యొర్దాను గడ్డదిఙ్ తూర్‍పు దరిఙ్ మనాద్. వారు మీ వెట ఉద్దం కితార్ గాని మీరు వరిఙ్ ఓడిఃస్ని లెకెండ్ ఒప్పజెప్త. అయావలె మీ ఎద్రు నాను వరిఙ్ సప్తిఙ్, యా దేసెం సొంతం కిబె ఆతిదెర్. 9 అయావెన్కా మోయాబుదు రాజు ఆతి సిప్పోరు మరిసి బాలాకు, వీండ్రు ఇస్రాయేలు లోకుర్ వెట ఉద్దం కిదెఙ్ రడిః ఆతాండ్రె, బెయోరు మరిసి ఆతి బిలాము మిఙి సాయిప్ సిపిన్ ఇజి బాలాకు వన్నిఙ్ కూక్‍పిస్తాన్. 10 గాని నాను, బిలాము మాట వెన్ఎత. అందెఙె బిలాము మిఙి దీవిసినె వాతాన్. వన్ని కియుదాన్ నానె మిఙి కాపాడిఃత.

11 అయావెన్కా మీరు యొర్దాను గడ్డ డాట్‍సి, యెరికో డగ్రు వాతిదెర్. యెరికో పట్నమ్‍దికార్ మీ వెట ఉద్దం కితార్. ఆహె అమోరీ, పెరిజ్జి, కనాను, హిత్తీ, గెర్గసీ, హివ్వీ, యెబూసీ జాతిదికార్‍బ మీ వెట ఉద్దం కితార్. గాని వరిఙ్ మీరు ఓడిఃస్ని లెకెండ్ నాను కిత. 12 మరి నాను మిఙి ఇంక ముఙల టేకెర్ వీంజెఙ పోక్త. అక్కెఙ్ వరిఙ్‍ని అమోరీయది రిఎర్ రాజురిఙ్‍బ మీ డగ్రుహాన్ ఉల్‍ప్‍తె. అందెఙె మీరు కూడఃమ్‍కు, బల్లెమ్‍కు అస్ఎండనె దేసెం సొంతం కిబె ఆతిదెర్. 13 మీరు కస్టబడిఃజి తొహ్ఇ పట్నమ్‍కు మిఙి సిత మన. మీరు బాన్ బత్కిజినిదెర్. మీరు ఉణుస్ఎండ ద్రాక్స టోటది పట్కుని, ఒలీవ టోటది పట్కు తింజినిదెర్”, ఇజి వెహ్తాన్.

14 అందెఙె యెహోసువ, “మీరు యెహోవాదిఙ్ తియెల్ ఆజి బక్తిదాన్ మండ్రు. వన్నిఙ్ మన్సు పూర్తిదాన్, నీతి నిజాయితిదాన్ నమిజి మండ్రు. మీ అన్నిగొగొర్ ఉప్రటిస్ గడ్డ అతహి పడఃకాద్‍ని అయ్‍గుప్తుదు మాడిఃసి మహి దేవుణుకాఙ్ డిఃసి సీజి, యెహోవాదిఙె మాడిఃస్తు. 15 ఒకొవేడః యెహోవాదిఙ్ మాడిఃస్తెఙ్ మీ కణకదు సెఇక అన్పిస్తిఙ మీరు ఎయెరిఙ్ మాడిఃస్నిదెరొ నేండ్రు కోరుకొండు. సిల్లితిఙ గడ్డ అతహి పడఃకదు మీ అన్నిగొగొర్ మాడిఃస్తి దేవుణుకాఙ్ మాడిఃస్నిదెరొ, సిల్లితిఙ కనాను దేసెమ్‍దు బత్కితి అమోరీయురి దేవుణుకాఙ్ మాడిఃస్నిదెరొ నేండ్రె మీరు కోరుకొండు. మీరు ఎయెరిఙ్ మాడిఃస్తిఙ్‍బ గాని, నానుని, నా కుటుమ్‍తికాప్ మాత్రం యెహోవాదిఙె మాడిఃస్నాప్”, ఇహాన్.

16 అయావలె లోకుర్ ఈహు ఇహార్, “యెహోవాదిఙ్ మాడిఃస్తెఙ్ డిఃసి సీజి, ఆఇ దేవుణుకాఙ్ ఎసెఙ్‍బా మాడిఃస్ఎపు. 17 ఎందన్నిఙ్ ఇహిఙ, అయ్‍గుప్తు దేసెమ్‍దు మాటు వెట్టిపణిఙ్ కిజి మహిఙ్ మఙిని, మా అన్నిగొగొరిఙ్ వెల్లి కూక్సి తతికాన్ మా దేవుణు ఆతి యెహోవనె. మా కణక ఎద్రునె గొప్ప బమ్మ ఆని పణిఙ్ వాండ్రు కితాన్. మాటు నడిఃజి వాతి సరి విజుబాన్, మాటు సొహి ప్రాంతమ్‍క లోకుర్ నడిఃమి, మఙి కాపడిఃతి మా దేవుణు యెహోవనె. 18 యెహోవ యా దేసెమ్‍దు బత్కిజి మహి జాతిఙ విజెరిఙ్, అమోరీయురి లోకురిఙ్‍బ ఓడిఃస్ని లెకెండ్ మఙి సాయం కితాన్. అందెఙె మాపు వన్నిఙె మాడిఃస్నాప్. వాండ్రె మా దేవుణు”, ఇజి వెహ్తార్.

19 అందెఙె యెహోసువ, “యెహోవ పరిసుద్దమాతి దేవుణు, రోసం మని దేవుణు, వాండ్రు మీ సెఇ పణిఙ, మీ పాపమ్‍కాఙ్ సెమిస్‍ఇకాన్, మీరు వన్నిఙ్ మాడిఃస్తెఙ్ అట్ఇదెర్. 20 మీరు యెహోవాదిఙ్ డిఃసి సీజి ఆఇ దేవుణుకాఙ్ మాడిఃస్తిఙ, వాండ్రు వన్ని మన్సు మారిసి మిఙి ఆని కినాన్. నిసొడుః కాలమ్‍కు మిఙి మేలు కితాన్. గాని మీరు వన్నిఙ్ వెతిరెకమ్‍దాన్ కీడు కితిఙ వాండ్రు మిఙి నాసనం కినాన్”, ఇహాన్. 21 గాని వారు, “అహు సిల్లె, మాపు యెహోవాదిఙె మాడిఃస్నాప్”, ఇజి యెహోసువ వెట వెహ్తార్. 22 అయావలె యెహోసువ, “మీరు యెహోవెఙ్‍నె మాడిఃస్నాప్ ఇజి వన్నిఙ్ కోరితిదెర్. యా మాటదిఙ్ మీ వందిఙ్ మీరె సాక్సిఙ్”, ఇహాన్. వారు, “ఒఓ మాపె సాక్సిఙ్”, ఇహార్. 23 అందెఙె వాండ్రు, “అహిఙ మీ నడిఃమి మని ఆఇ దేవుణుకాఙ్ విసీర్జి, ఇస్రాయేలురిఙ్ దేవుణు ఆతి యెహోవాదిఙె, మీ పూర్తి మన్సుదాన్ మాడిఃస్తు”, ఇహాన్. 24 అందెఙె వారు, “మాపు మా దేవుణు ఆతి యెహోవాదిఙె మాడిఃస్నాప్. వన్ని మాటెఙ్‍నె వెనాప్”, ఇజి యెహోసువ వెట వెహ్తార్. 25 అయా నాండిఙ్‍నె యెహోసువ, ఆ లోకుర్ వెట సెకెముదు ఉండ్రి ఒపుమానం కిబిసి, పద్దతిఙ్, ఆడ్రెఙ్ కితాన్. 26 యెహోసువ యా మాటెఙ్ విజు, దేవుణు రూలుఙ్ గ్రందమ్‍దు రాస్‍పిస్తాన్. పెరి పణుకు ఉండ్రి తప్పిసి, యెహోవాదిఙ్ కేటకితి బాడ్డి డగ్రు మని పెరి మర్రన్ అడ్గి ఆ పణుకు నిల్‍ప్తాన్.

27 అయావలె యెహోసువ, లోకుర్ విజెరి వెట ఈహు వెహ్తాన్, “ఇదిలో, మా వెట యెహోవ వెహ్తి మాటెఙ్ విజు, యా పణుకు వెహా మనాద్. అందెఙె అక్క మా ముస్కు సాక్సి లెకెండ్ మంజినాద్. మీరు మీ దేవుణుదిఙ్ నెస్ఎప్ ఇజి వెహ్తిఙ్‍బ అక్క మిఙి సాక్సి లెకెండ్ మంజినాద్”, ఇజి వెహ్తాన్. 28 అయావెన్కా యెహోసువ లోకుర్ విజెరిఙ్, “మీ ఇల్కాఙ్ సొండ్రు”, ఇజి వెహ్తిఙ్, వారు విజెరె వరి సొంత ఇల్కాఙ్ సొహార్.

యెహోసువ సాతిక

29 యా సఙతి జర్గితి వెన్కా యెహోవెఙ్ సేవపణిమన్సి ఆతి నూను మరిసి యెహోసువ 110 పంటెఙ్ బత్కితాండ్రె సాతాన్. 30 యెహోసువాదిఙ్ తిమ్నాత్ సెరహు ఇని వన్ని సొంత బాడ్డిదునె దానం పర్‍స్తార్. యాక గాయసు గొరొణ్‍దిఙ్ ఉస్సన్ దరిఙ్ మని ఎప్రాయిం ప్రాంతమ్‍ది సంది గట్టుదు మనాద్. 31 యెహోసువ బత్కితి కాలమ్‍దు ఇస్రాయేలు లోకుర్ యెహోవాదిఙ్ మాడిఃస్తార్. యెహోసువ సాతి వెన్కాబ వారు యెహోవాదిఙ్ మాడిఃస్తార్. వరి పెద్దెల్‍ఙు బత్కితి మహి దాక, వారు యెహోవాదిఙ్ మాడిఃసి మహార్. ఇస్రాయేలు లోకురిఙ్ యెహోవ కితి వెన్కాఙ్ సుడ్ఃతికారె యా పెద్దెల్‍ఙు.

యోసేపు డుముకు సెకెముదు తతిక

32 ఇస్రాయేలు లోకుర్ అయ్‍గుప్తుదాన్ తతి యోసేపు డుముకు సెకెముదు ముస్తార్. సెకెముదిఙ్ అపొసి ఆతి హమోరు మరిసిర్‍బాన్, యాకోబు వంద వెండి రూపాయ్‍ఙు సీజి కొట్టి బూమిదునె దానం పర్‍స్తార్. యా బూమి యోసేపు పొట్టది కొడొఃర్‍ఙ సొంతం ఆతాద్. 33 మరి అహరోను మరిసి ఆతి ఎలియాజరుబ సాతాన్. విన్నిఙ్ గిబియాదు దానం పర్‍స్తార్. యాక ఎప్రాయిం గొరొన్ ప్రాంతమ్‍దు మనాద్. గిబియా పట్నం ఎలియాజరు మరిసి ఆతి పినెహాసుదిఙ్ సీటిఙ్ పొక్తిఙ్ వాతిక.