సంకియా 4

1-3 అయావలె యెహోవ మోసే ఆరోను వెట లేవి తెగ్గది కహతు కుటుమ్‍ది వరి లొఇ 30 పంటెఙ్‍దాన్ అసి 50 పంటెఙ్ దాక వయ్‍సు మని మొగ్గ కొడొఃర్ విజెరిఙ్ లెక్క కిబిస్అ. వారు యెహోవ డిగ్జి వాని టంబు గుడ్సాదు సేవ కినార్. కహతు మరిసిర్ కుటుమ్‍క వర్సదాన్ వరి లెక్కెఙ్ రాసిస్అ. 4 కహతు కుటుమ్‍దికార్ యెహోవ డిగ్జి వాని టంబు గుడ్సా లొఇ ఒద్దె నెగ్గి బాడ్డిదు మని వన్కాఙ్ నెగ్రెండ సుడెః ఆనార్. 5 ఆరోనుని వన్ని మరిసిర్ లోకుర్ పయ్‍నం కిని వలె, యెహోవ డిగ్జి వాని టంబు గుడ్సా లొఇ సొన్సి, అడ్డం డేఃల్‍ప్ని మంజిని డెర కుత్సి దన్నితాన్ మందసం పెట్టెదిఙ్ పిడిఃక్తెఙ్ వలె. 6 ఆహె సమ్‍దరమ్‍దు మంజిని జంతు తోలుదాన్ కితి పాత పిడిఃక్సి, దన్ని ముస్కు నీడిః బూడిఃది రంగుదాన్ కితి పాత పహ్సి, అయా పెట్టె పిండ్ని కోణెఙ్ గుండిఙ గుత్తెఙ్ వలె. 7 పిట్టమ్‍కు ఇడ్ని బెంసి బల్ల ముస్కు నీడిః బూడిఃది రంగు మంజిని పాత పహ్సి, దన్ని ముస్కు పల్లెరమ్‍కు, మండిఙ్, ద్రాక్స ఏరు ఇడ్ని గలాసిఙ్ ఇడ్‍దెఙ్ వలె. ఎస్తి నస్తివలె బెంసి బల్ల ముస్కు పిట్టమ్‍కు మండ్రెఙ్ వలె. 8 వన్కా ముస్కు ఎర్రన్ పాత పిడిఃక్సి, సమ్‍దరమ్‍దు మంజిని జంతు తోలుదాన్ కితి పాత పహ్సి, అక్క పిండ్ని గుండిఙ కోణెఙ్ గుత్తెఙ్ వలె. 9 నస్తివలెనె నీడిః బూడిఃది రంగుది పాత ఒసి దీవ కత్తిదిఙ్‍ని దీవ కత్తిదు మంజిని విజు దీవెఙ, దీవెఙ్ కసిస్ని నూనెదిఙ్ ఒసి పిడిఃక్తెఙ్ వలె. 10 దీవ కత్తిని, దన్నిఙ్ సమందిస్తి వస్తుఙ్ విజు సమ్‍దరమ్‍దు మంజిని జంతు తోలుదాన్ తయార్ కితి పాతదు సుటిసి పిండ్ని కోణెఙ గుత్తెఙ్ వలె. 11 మరి ఇని కల్‍తి సిల్లి బఙారమ్‍దాన్ తయార్ కితి పూజ బాడ్డి ముస్కు నీడిః రంగుది పాత పిడిఃక్సి, సమ్‍దరమ్‍దు మంజిని జంతు తోలుదాన్ తయార్ పాత పహ్సి, పూజ బాడ్డి పిండ్ని గుండిఙ కోణెఙ్ గుత్తెఙ్ వలె. 12 ఒద్దె నెగ్గి బాడ్డిదు ఇడ్ని వస్తుఙ్ విజు నీడిః పాతదు ఇడ్‍జి సమ్‍దరమ్‍దు మంజిని జంతు తోలుదాన్ తయార్ కితి పాత ననిక పిడిఃక్సి, అక్కెఙ్ విజు కోణెఙ్ గుత్తెఙ్ ఇడ్‍దెఙ్ వలె. 13 వారు పూజ బాడ్డి లొఇ మంజిని నీరు కెర్‍సి దన్నిఙ్ నీడిః బూడిఃది రంగు మంజిని పాత పిడిఃక్తెఙ్ వలె. 14 నస్తివలె పూజ బాడ్డిదిఙ్ సమందిస్తి వస్తుఙ్ విజు ఇహిఙ, నీరు తాడ్ని సట్టమ్‍కు, నీరు కెర్‍ని పెకెఙ్, నీరు ఒసి పొక్ని పల్లెరమ్‍క ముస్కు, సమ్‍దరమ్‍దు మంజిని జంతు తోలుదాన్ తయార్ కితి పాత పిడిఃక్సి, అక్కెఙ్ పిండ్ని గుండిఙ కోణెఙ్ గుత్తెఙ్ వలె.

15 లోకుర్ ఎంబెబ పయ్‍నం కిని వలె ఆరోనుని వన్ని మరిసిర్ యెహోవ డిగ్జి వాని టంబు గుడ్సా లొఇ ఒద్దె నెగ్గి బాడ్డిదు మంజిని వన్కాఙ్ వారు పిడిఃక్తెఙ్ వలె. వారు వన్కాఙ్ పిడిఃక్తి వీస్తివెన్కా కహతు కుటుమ్‍దికార్ అక్కెఙ్ పిండ్‍దెఙ్ వలె. వారు పిండ్ని వలె ఒద్దె నెగ్గి వన్కాఙ్ ముట్నిక ఆఎద్. ఒకొవేడః వారు ముట్‍తిఙ సానార్. వారునె ఒద్దె నెగ్గి బాడ్డిదు మంజినికెఙ్ విజు పిండ్నార్. 16 వన్కాఙ్ సుడెః ఆని బాజిత విజు ఆరోను మరిసి ఎలియాజరుది. ఆహె యెహోవ డిగ్జి వాని టంబు గుడ్సాదికెఙ్‍ని, ఒద్దె నెగ్గి బాడ్డిదు మంజినికెఙ్ ఇహిఙ, దీవ కసిస్ని వందిఙ్ నూనె, నెగ్గి వాసనం సీని మాయమ్‍కు, అగ్గం సుర్ని వందిఙ్ దూపం, దీవిస్ని వందిఙ్ నూనె మరి మంజిని విజు వన్కాఙ్ వాండ్రు బాజిత లాగె ఆదెఙ్ వలె ఇజి వెహ్తాన్.

17-18 మరిబ యెహోవ మోసే వెట, “కహతు కుటుమ్‍దికార్ లేవి తెగ్గదు సిల్లెండ ఆని లెకెండ్ మీరు మన్‍మాట్. 19 నెగ్గి వస్తుఙ సమందిస్తి సామనమ్‍కు కహతు కుటుమ్‍దికార్ పిండ్ని వలె, వారు సాఎండ మంజిని లెకెండ్ ఆరోనుని వన్ని మరిసిర్ ఒద్దె నెగ్గి బాడ్డిదు సొన్సి వరి లొఇ ఒరెన్ ఒరెన్ ఇని ఇనిక పిండ్‍దెఙ్‍నొ అక్క వరిఙ్ తోరిస్తెఙ్ వలె. వారు ఎసొ పిండ్‍దెఙ్ అట్‍నారొ నసొ బరునె వరిఙ్ పిండిస్తెఙ్ వలె. 20 గాని కహతు కుటుమ్‍దికార్ ఒద్దె నెగ్గి బాడ్డి సుడ్ఃదెఙ్ ఇజి తప్సి జార్‍జి లొఇ సొనిక ఆఎద్. ఒకొవేడః వారు లొఇ సొహిఙ తప్ఎండ సానార్”, ఇజి వెహ్తాన్.

21-23 అయావెన్కా యెహోవ మోసే వెట, “గెర్సోను కుటుమ్‍ది వరి లొఇ 30 పంటెఙ్‍దాన్ అసి 50 పంటెఙ్ దాక మని మొగ్గ కొడొఃర్ విజెరిఙ్ లెక్క కిబిస్అ. వారు యెహోవ డిగ్జి వాని టంబు గుడ్సాదు సేవ కినార్. వరి అన్నిగొగొరి కుటుమ్‍క వర్సదాన్ వరి పేర్కు రాసిస్అ. 24 యెహోవ డిగ్జి వాని టంబు గుడ్సాదు గెర్సోను తెగ్గదికార్ కిని పణి ఇనిక ఇహిఙ, 25 యెహోవ డిగ్జి వాని టంబు గుడ్సాదిఙ్ నెయ్‍ని డెరెఙ్, దన్ని ముస్కు పిడిఃక్తెఙ్ సమ్‍దరమ్‍దు మంజిని జంతు తోలుదాన్ తయార్ కిని పాత, టంబు గుడ్సాది దర్‍బందమ్‍దు మంజిని డెర, 26 యెహోవ డిగ్జి వాని బాడ్డిదిఙ్‍ని, పూజ బాడ్డిదిఙ్ సుట్టుల మంజిని డెరెఙ్, దన్ని దర్‍బందమ్‍దు మంజిని డెర, టంబు గుడ్సా బిగిసి తొహ్ని తాడ్కు, టంబు గుడ్సాదిఙ్ సమందిస్తి విజు వస్తుఙ్ వారు పిండ్‍దెఙ్ వలె. ఆహె అయా పణిదిఙ్ ఇనికెఙ్ అవ్‍సరమ్‍నొ అక్కెఙ్ విజు వారు పిండ్‍దెఙ్ వలె. 27 వారు కిని పణి వారు కిదెఙ్ వలె. ఆరోనుని వన్ని మరిసిర్ వెహ్ని లెకెండ్‍నె గెర్సోను కుటుమ్‍దికార్ వెండ్రెఙ్ వలె. వారు వెహ్ని లెకెండ్‍నె వెంజి బాజితదాన్ బరు పిండ్‍దెఙ్ వలె. వారు పిండ్ని నసొ బరునె వరిఙ్ నీను పిండిస్తెఙ్ వలె. 28 గెర్సోను కుటుమ్‍దికార్ యెహోవ డిగ్జి వాని టంబు గుడ్సాదు కిని పణి యాకాదె. వారు విజెరె నమకమ్‍దాన్ ఆరోను మరిసి ఈతామారు అడ్గి పణి కిదెఙ్ వలె”, ఇజి వెహ్తాన్.

29-30 ఆహె మెరారి కుటుమ్‍ది వరి లొఇ 30 పంటెఙ్‍దాన్ అసి 50 పంటెఙ్ దాక మని మొగ్గ కొడొఃర్ విజెరిఙ్ నీను లెక్క కిబిస్అ. వారు యెహోవ డిగ్జి వాని టంబు గుడ్సాదు సేవ కినార్. వరి అన్నిగొగొరి కుటుమ్‍క వర్సదాన్ వరి పేర్కు రాసిస్అ. 31 యెహోవ డిగ్జి వాని టంబు గుడ్సాదు వారు కిని పణి ఇనిక ఇహిఙ, టంబు గుడ్సాదిఙ్ సుట్టుల మంజిని బల్లెఙ్, అడ్డం పహ్‍ని పట్టెఙ్, నిల్‍ప్ని కొహిఙ్, 32 కొహిఙ మట్టుదు మంజిని దిమ్మెఙ్, యెహోవ డిగ్జి వాని టంబు గుడ్సాది డేవ్వ సుట్టుల మంజిని కొహిఙ్, కొహిఙ్ అడ్గి మంజిని దిమ్మెఙ్, కుట్టిఙ్, టాణిస్ని తాడ్కు మరి మంజిని సామనమ్‍కు వారు పిండ్‍దెఙ్ వలె. వరి కుటుమ్‍క వర్సదాన్ వారు పిండ్ని బరు వరిఙ్ ఒప్పజెప్అ. 33 మెరారి కుటుమ్‍దిఙ్ సెందితికార్ యెహోవ డిగ్జి వాని టంబు గుడ్సాదు యా పణినె కినార్. వీరు విజెరె ఆరోను మరిసి ఈతామారు అడ్గి మంజినార్.

34-35 ఆహె కహతు కుటుమ్‍ది వరి లొఇ 30 పంటెఙ్‍దాన్ అసి 50 పంటెఙ్ దాక మని మొగ్గ కొడొఃర్ విజెరిఙ్ మోసే, ఆరోను, లోకుర్ ముస్కు మని నెయ్‍కిర్ కూడిఃతారె లెక్క కిబిస్తార్. లెక్క కితి విజెరె యెహోవ డిగ్జి వాని టంబు గుడ్సాదు సేవ కినార్. కహతు కుటుమ్‍దు మని వరి అన్నిగొగొరి వర్సదాన్ పేర్కు రాస్పిస్తార్. 36 వరి కుటుమ్‍క వర్సదాన్ లెక్క కితి విజెరె రుండి వెయుఙ్ ఏడు వందెఙ్ ఎబయ్ మన్సి మహార్. 37 వీరు విజెరె కహతు కుటుమ్‍దిఙ్ సెందితికార్. వీరు యెహోవ డిగ్జి వాని టంబు గుడ్సాదు సేవ కినార్. యెహోవ మోసేఙ్ ఆడ్ర సితి లెకెండ్‍నె మోసే ఆరోను వరిఙ్ లెక్క కిబిస్తార్.

38 ఆహె గెర్సోను కుటుమ్‍దుబ వరి అన్నిగొగొరి వర్సదాన్ లెక్క కిబిస్తార్. 39-40 వరి లొఇ 30 పంటెఙ్‍దాన్ అసి 50 పంటెఙ్ దాక మహి మొగ్గ కొడొఃర్ విజెరె రుండి వెయుఙ్ ఆరు వందెఙ్ ముపాయ్ మన్సి మహార్. వీరు విజెరె యెహోవ డిగ్జి వాని టంబు గుడ్సాదు సేవ కినార్. 41 యెహోవ మోసేఙ్ సితి ఆడ్ర వజనె యెహోవ డిగ్జి వాని టంబు గుడ్సాదు సేవ పణి కిదెఙ్ గెర్సోను కుటుమ్‍ది వరిఙ్ ఆరోనుని మోసే వరి కుటుమ్‍క వర్సదాన్ లెక్క కిబిస్తార్.

42 ఆహె మెరారి కుటుమ్‍ది వరిఙ్‍బ వరి అన్నిగొగొరి వర్సదాన్ లెక్క కిబిస్తార్. 43-44 వరి లొఇ 30 పంటెఙ్‍దాన్ అసి 50 పంటెఙ్ దాక మహి మొగ్గ కొడొఃర్ విజెరె మూండ్రి వెయుఙ్ రుండి వందెఙ్ మన్సి మహార్. వీరు విజెరె యెహోవ డిగ్జి వాని టంబు గుడ్సా లొఇ సేవ కినార్. 45 యెహోవ మోసేఙ్ ఆడ్ర సితి లెకెండ్‍నె మోసేని ఆరోను వరి అన్నిగొగొరి వర్సదాన్ లెక్క కిబిస్తార్.

46-48 లేవి తెగ్గదు 30 పంటెఙ్‍దాన్ అసి 50 పంటెఙ్ దాక మహి మొగ్గ కొడొఃర్ విజెరె ఎనిమిది వెయుఙ్ అయ్‍దు వందెఙ్ ఎనబయ్ మన్సి మహార్. మోసేని ఆరోను, ఇస్రాయేలు లోకుర్ ముస్కు నెయ్‍కిర్ వజ మహికార్ కూడిఃతారె, వరి అన్నిగొగొరి వర్సదాన్ లెక్క కిబిస్తార్. వరిఙ్ విజెరిఙ్ యెహోవ డిగ్జి వాని టంబు గుడ్సాదు సేవ కిదెఙ్, దన్ని బాజిత విజు సుడెః ఆదెఙ్ ఎర్‍పాటు కితార్. 49 యెహోవ ఆడ్ర సితి లెకెండ్‍నె మోసే వరిఙ్ లెక్క కిబిస్తాన్. వరి లొఇ ఒరెన్ ఒరెన్ కిని పణి, పిండ్ని బరు వరి అన్నిగొగొరి కుటుమ్‍క వర్సదాన్‍నె పేర్కు రాసి ఇట్‍తార్. యాక విజు యెహోవ మోసేఙ్ ఆడ్ర సితి లెకెండ్‍నె జర్గితాద్.