Ɩsɔ́ɔ-dɛ́ɛ seríya-dɩnáa lɛ́ɛ́nɩ́
11
1 Ngɛ beejéle ma ɖɩgɛrɛ́ ɖeníka kɔjɔɔ́ɔ nyazɩ ɖeníka bánmaazɩnáa nɛ́,
ngɛ bɔɔdɔ́ ma sɩsɩ:
«Kʊrʊ́ nmáázɩ Ɩsɔ́ɔ-dɛ́ɛ Ɖaána kʊ́bɔńga na sarásɩ ɖaalanɖɛ́,
bɩka ngála ɩráa wenbá bɔwɛ ńna bónguú Ɩsɔ́ɔ tɛ́ɛ́dɩ nɛ́.
2 Amá,
nkamáázɩ Ɩsɔ́ɔ-dɛ́ɛ Ɖaána kʊ́bɔńga-dɛ́ɛ kadɔ́ɔ asʊ ńga;
káma,
wenbá baasɩ Ɩsɔ́ɔ nɛ́ gɛ baadalɩná kɛ.
Bɛlɛ́ bénɖíi Ɩsɔ́ɔ-dɛ́ɛ tɛ́ɛ́dɩ,
bɩka banáázɩ tɩdɛ́ɛ ɩráa irodunáa nɛɛ́lɛ na nɔɔ́lɛ.
3 Méndiríi mɛ́dɛ́ɛ seríya-dɩnáa lɛ́ɛ́nɩ́,
bozóóna lííya kpɩná,
befééri ɩráa na mɔ́nɔ́ɔ́ wentí sɩ mevééri wɛ nɛ́ wɛ́-bíya mííli na kákpáŋa na niídoozoa (1.260).»
4 Seríya-dɩnáa bɛḿ gɛ olivíyée tiyísi lɛ́ɛ́nɩ́ na fɩtɩ́lawá lɛ́ɛ́nɩ́ tɩzɩ́ŋɛ́ɛ adɛ laadɔ́ɔ-dʊ́ʊ ɩzá-daá nɛ́.
5 A naárʊ sɔɔlɛ́ɛ sɩ ɩlá seríya-dɩnáa bɛḿ bɩdaavé nɛ́,
nimíni wánlɩɩ́ bɔnɔ́ɔ́zɩ-daá biɖe babáɖaanáa.
Bɩlɛ́ gɛ weení ɩzɔɔlɛ́ɛ ɩlá wɛ bɩdaavé nɛ́ sɩ ɩsɩ ná.
6 Bɔwɛná yíko bɔ́ndɔ́ɔ ɩsɔ́ɔ́dáá na tɛ́ɛ́wʊ ɩ́kanɩ́ɩ sáátɩ kɩḿ kɩrɩ́ŋa sɩ baŋmatɩná ɩráa na Ɩsɔ́ɔ nɔɔ́ befééri wɛ ɩdɛ́ɛ tɔ́m nɛ́.
Bɔwɛná yíko ɖʊɖɔ beyéle lɩ́m ɩbɩ́sɩ azimá,
bɩka bɔwɛná yíko bɔkɔná nbusúwá ndɩ‑ndɩ adɛ laadɔ́ɔ-rɔ ńŋɩnáa wenbí bɔzɔɔlɛ́ɛ nɛ́.
7 Amá,
a baalɩzɩ́ seríya bɩtɛ́,
fanaḿ weení waagálɩɩ bɔɔwʊ́ kʊ́bɔńgɩ bɔɔdɔ zííniwá kɩdaá nɛ́,
wónÿoó wɛ iɖi wɛ,
bɩka ɩkʊ wɛ.
8 Bánzɩɩ́ bɔdɔnɩ́nɩ asʊ,
báa weení bɛɛ́na tɩ tɛ́ɛ́dɩ kʊ́bɔńdɩ lé baagá Badʊ́ʊ ɖɛ́nɩ abɛlɩ́ akɔ́ɔ-rɔ nɛ́ tɩdaá.
Baava tɛ́ɛ́dɩ tɩḿ yɩ́ɖɛ gɛ bɛkɛɛzɩná Sodɔ́ɔmɩ,
yáá Mɩ́sɩra.
9 Laadɔ́ɔ báa wenká,
ɖugoré báa wenɖé,
kʊnʊm báa wenkí na yíri báa wenkí-dɛ́ɛ ɩráa wɔ́ngɔnɩ́ bɛbɛ́ɛ́ŋ bɔdɔnɩ́nɩ wɛ́ náádoozo na fɔɔlʊʊ́,
bɩka bekízi sɩsɩ békebí wɛ.
10 Bɛdɛ́ɛ sɩ́m wánlám adɛ laadɔ́ɔ-rɔ ɩráa rɩ́ŋa niíni babá beɖi jíńgáárɩ́ bafáárɩ,
bɩka balá ɖamá kʊjɔ́ɔ́nɩ,
káma,
anɖébiwá nɔɔ́lɛ bɛḿ beeyéle ɩráa ɩbá bɛyɛlɛ́m páá.
11 Amá,
wɛ́ náádoozo na fɔɔlʊʊ́ kɩḿ kɩwɔ́rɔ́ nɛ́,
weezuú waagálɩɩ Ɩsɔ́ɔ-jɔ́ kɩkɔ́nɩ kɩsʊ́ʊ wɛ,
ngɛ baagʊrʊ́ basɩ́ŋ.
Ńna gɛ nɩdáárɛ kʊ́bɔńɖɛ waazʊ́ʊ wenbá barɩ́ŋa bɛbɛɛ́na wɛ nɛ́.
12 Ngɛ anɖébiwá nɔɔ́lɛ bɛḿ baanɩ́ɩ lowú nakɩ́rɩ ɩsɔ́ɔ́dáá kɩɩgáŋmatɩná wɛ ɖóni sɩsɩ:
«Ɩgágbá cé.»
Ngɛ baagba ɩsɔ́ɔ́dáá ŋmɩ́ńdɩ-daá bɩka babáɖaanáa bɛɛ́na wɛ.
13 Bɩɩjáŋ bɩdɛ́ɛ alɩwáátɩ kɩḿ kɩdaá nɛ́,
ngɛ adɛ laadɔ́ɔ waabá keséle na ɖóni,
ɖɛ́ɛ́zɩ ɩsála.
A baadára tɛ́ɛ́dɩ bʊrɔ fuú,
ɖɛ́ɛ́zɩ sɩɩzála nɛ́,
sɩ́ndalɩ́ɩ bɩdɛ́ɛ fɔɔlʊʊ́ kʊ́ɖʊmʊ́ʊ.
Adɛ-dɛ́ɛ selíi bɩḿ bɩɩgʊ ɩráa mííli lʊbɛ (7.000) basɩ́.
Wenbá bɩɩga wɛ badasɩ́ nɛ́,
nɩdáárɛ kʊ́bɔńɖɛ waabá ɖɩsʊ́ʊ wɛ;
ngɛ bɔɔɖɔ́ɔ́zɩ Ɩsɔ́ɔ ɩwɛ ɩsɔ́ɔ́dáá nɛ́.
14 Nbusú sɩɩlɛ ńgɩ wɛɛɖɛ́ɛ;
amá,
bídénleeri toozo ńgɩ kɛrɛŋɛ.
Malááyɩ́ka lʊbɛ ńnɩ́ waavʊ́lʊ ɖɩgandɩ́rɛ lʊbɛ ńɖɛ
15 Ńna gɛ malááyɩ́ka lʊbɛ ńnɩ́ waavʊ́lʊ ɩdɛ́ɛ ɖɩgandɩ́rɛ.
Ngɛ lóóni wɔɔgɔ́vɔ́ ɩsɔ́ɔ́dáá na ɖóni tɩ́nŋmatɩ́ sɩsɩ:
«Lɛlɛɛɖɔ́ adɛ laadɔ́ɔ-rɔ kowúrɔ́ɔ waabɩ́sɩ Ɖádʊ́ʊ Ɩsɔ́ɔ na weení waazɩ́ɩ yɩ wúro nɛ́ banʊ́ʊ́zɩ-daá,
ngɛ kowúrátɩ tɩḿ tɩ́dɛ́ndɛŋ́ kɛtɛngɛrɛ.»
16 Ngɛ kʊ́bɔnáa ákoowú na nɔɔ́náázá bɔjɔɔ́ɔ bogowuro-gbelásɩ-rɔ Ɩsɔ́ɔ ɩzá-daá nɛ́,
waagá baɖʊná,
babá bɛnyɛ́ adɛ bokúu Ɩsɔ́ɔ tɛ́ɛ́dɩ
17 bánŋmatɩ́ sɩsɩ:
«Ɖádʊ́ʊ Ɩsɔ́ɔ yíko rɩ́ŋa-dʊ́ʊ,
nyɔ́ɔ́ weení nyávʊnwɛ ngɛ nyɔ́wɛ nɛ́,
ɖánzám nya ńŋɩnáa nyááwɩ́lɩ nyɛ́dɛ́ɛ yíko kʊ́bɔńgɩ
nbáázɩ kowúrátɩ ɖíi ɖúúlínya rɩ́ŋa-rɔ nɛ́.
18 Yíriwá waabá batáa bɔ́tɩ bakʊrʊ́ basɩ́ŋ na nya,
tɔ́ɔ,
lɛlɛɛɖɔ́ gɛ nyɔ́ɔ́ nyáábá ndáa bɔ́tɩ,
lɛlɛɛɖɔ́ gɛ sɩ nvʊʊná ɩsɩɖáa,
bɩka nvɛ́rɛ nyɛ́dɛ́ɛ bɔwʊtá-dɩnáa anɖébiwá,
na wenbá bɛgɛ́ɛ nyɛ́dɛ́ɛ ńba nɛ́,
na wenbá bénzewɔ́ɔ nya nɛ́,
na wenbá badayáa wɛ nabʊ́rʊ nɛ́,
na ɩráa yɩrá-dɩnáa.
Lɛlɛɛɖɔ́ gɛ sɩ nnúúdi wenbá bónnuudí adɛ laadɔ́ɔ nɛ́.»
19 Ńna gɛ Ɩsɔ́ɔ-dɛ́ɛ Ɖaána kʊ́bɔńga kɔwɛ ɩsɔ́ɔ́dáá nɛ́ kaadʊlʊ́,
bɩka bɩ́nnáa keɖiyá aɖákaá.
Ńna gɛ bɩɩbá bɩbáázɩ nyaláázɩ,
lóóni wángazɩ́ɩ,
kpálálayáawá wɔ́nvɔ́ɔ,
ngɛ adɛ weezéle bɩka ɖɔ́mbɔ́ kʊ́bɔná ɩlɩ́ɩ ɩsɔ́ɔ́dáá ánzalɩ́ɩ.