Tɔ́m Bíya Kʊ́bɔnáa Kutoluú i

Tɔ́m Bíya Kʊ́bɔnáa Kutoluú

Áɖam: Ɩrʊ́ kaɖaa ńnɩ́ weení Ɩsɔ́ɔ waalá yɩ nɛ́ nbɩlɛ́. Tɛ́ɛ́dɩ gɛ Ɩsɔ́ɔ waajɩrɩ́ ɩlaná yɩ, ngɛ woovósi ɩnɩbɔ́ɔ́nɩ-daá naanɩ́ ɩbáázɩ weezí ɩcáŋ ɩbɩ́sɩ ɩrʊ́ weezuú-dʊ́ʊ. Áɖam ɩmʊ́ ɩdɛ́ɛ sɩnɖɛ́nɩ gɛ Ɩsɔ́ɔ waalɩzɩ́ ɩlaná alʊ́, ngɛ Áɖam waava yɩ yɩ́ɖɛ sɩsɩ Awááwʊ ɩlɛ́ ɩcáŋ ɩbɩ́sɩ ɩɖɛɛlʊ́. Ɩsɔ́ɔ waava wɛ yíko sɩsɩ Edɛ́ɛnɩ kárɔɔ́-daá lé waazɩ́ɩ wɛ nɛ́-dɛ́ɛ tɩ́ɩ́nɩ bíya rɩ́ŋa, bánbɩɩzɩ́ bɔtɔ́ɔ; amá tɩɩwʊ́ nakɩ́rɩ wɛ kárɔɔ́ kɛḿ kɔlɔwʊtáá, kɩlɛ́ kibíya gɛ weegiziná wɛ. Amá Áɖam na ɩɖɛɛlʊ́ Awááwʊ beegízi bodofu wentí Ɩsɔ́ɔ waazɩ́ɩ́zɩ wɛ tɩ nɛ́ bakʊrʊ́ bɔtɔ́ɔ tɩɩwʊ́ kɩḿ kibíya. Biiyele ná gɛ alaháácɩ́ na sɩ́m waazʊ́ʊ tɛ́ɛ́dɩ. Ngɛ Ɩsɔ́ɔ wɔɔɖɔ́ɔ wɛ kárɔɔ́ kɛḿ kadaá. Bɩdɩ́ŋa-rɔ gɛ ɩráa waabáázɩ alaháácɩ́ lám. Wasɩ́ɩ́ka kaɖaa ńga Pɔ́ɔlɩ waaŋmáa kɛ Korɩ́ntɩ ńba nɛ́ kadaá (1Ko 15.45), baayáa Yeésu Krísto gɛ sɩsɩ Áɖam kɛdɛɛzɩya ńnɩ́, káma, wɛɛlɛ́ɛ ɩráa ɩlɩzɩ́ wɛ bɛdɛ́ɛ alaháácɩ́wá-daá. Ńŋɩnáa Áɖam waalá alaháácɩ́ ngɛ bɩɩɖʊ ɩráa baaganáa basʊ́ʊ alaháácɩ́ lám, ngɛ bɩɩdára bána Ɩsɔ́ɔ bɔlɔwʊtáá nɛ́, Yeésu Krísto wɛɛlɛɛ ná wɛ ɩlɩzɩ́ wɛ bɛdɛ́ɛ alaháácɩ́wá‑daá bɩfa wɛ weezuú kɩ́falʊʊ́ wenkí kɩdaá bɩ́nnyɔɔzɩ́ bána Ɩsɔ́ɔ bɔlɔwʊtáá nɛ́.

Amí: Yahúúɖuwá-dɛ́ɛ kʊnʊm-daá nɛ́, «Amí» kutoluú gɛ sɩsɩ: «Bɩ́la ńŋɩnáa wenbí nyɔ́ɔ́dɔ́ nɛ́.» Bugutoluú ɖʊɖɔ sɩsɩ: «Wentí nyɔ́ɔ́dɔ́ nɛ́ kɛ́ɛ toovonúm gɛ.» Tɔ́m bú ɩmʊ́ gɛ bónbusí sʊlʊ́ńdɩwá-daá. Kɩwɩlʊʊ-dɛ́ɛ tákaraɖá-daá nɛ́, Yeésu gɛ baadáyáa ɖʊɖɔ sɩsɩ «Amí.» Wenbí bʊrɔ nɛ́, ɩmʊ́ gɛ Ɩsɔ́ɔ waalɩzɩ́ sɩsɩ ɩmʊ́ sɩ ɩlaná na wentí ɩmʊ́ Ɩsɔ́ɔ wooɖúu sɩ wánlám ɩdɛ́ɛ zamɔ́ɔ nɛ́ ikóódi.

Anɖébi: Anɖébi kɛ́ɛ ɩrʊ́ Ɩsɔ́ɔ wéndiríi yɩ nɛ́ gɛ. Ɩsɔ́ɔ tɩtɩŋa wándáa kʊ ɩlɩzɩ́ yɩ bɩka wánŋmatɩnáa Ɩsɔ́ɔ nɔɔ́. Anɖébiwá ɖabata waalɩɩná Yahúúɖuwá lɔwʊtáá gɛ. Ɩsɔ́ɔ wánbanáa wɛ bánlɩzɩ́ɩ wenbí sɩ bɩkɔ́nɩ bɩlá bɩɩzá-daá nɛ́ bánŋmatɩ́. A nɩgbamʊʊ́ fɔ́m-dɛ́ɛ tɔ́m gɛ bɩgɛ́ɛ ya, yáá wenbivɛɛzɩrɛ-dɛ́ɛ tɔ́m ya, yáá lɛ́ɛ́dɩ-dɛ́ɛ tɔ́m gɛ Ɩsɔ́ɔ sɔɔlɛ́ɛ ifééri ɩráa, anɖébi gɛ wánbanáa. Bɩ́nbɩɩzɩ́ bɩlá ɩrʊ́ kʊ́ɖʊḿ-jɔ́, nyazɩ wúro kʊ́bɔnɩ́ naárʊ bɩlɛ́ gɛ Ɩsɔ́ɔ waalɩzɩ́ anɖébi naárʊ wéndiríi. Badaá nɛbɛ́rɛ-dɛ́ɛ tɩmɛ́rɛ kɛ́ɛ sáa kʊ́ɖʊmʊ́ʊ-dɛ́ɛ tɩmɛ́rɛ gɛ, bɩka nɛbɛ́rɛ nɛ́, tɩmɛ́rɛ gɛ bɩgɛ́ɛ wɛ beweezuú rɩ́ŋa. Bɩɩga Keɖiyá kɩ́falɔɔ́-dɛ́ɛ anɖébiwá gɛ ɖááɖʊ́ sɩsɩ wenbá bánŋmatɩnáa Ɩsɔ́ɔ nɔɔ́ nɛ́.

Bɛlɩzebúuli: Sitáánɩ-dɛ́ɛ yɩ́ɖɛ neɖére ɖʊɖɔ nbɩlɛ́. Ɩgɛ́bɛɛŋ wentí baaŋmáa Sitáánɩ-rɔ nɛ́.

Bɛlɩ́ɩ: Yahúúɖuwá rɩ́ŋa ɩjaájaa gɛ Ibrahím. Ɩsɔ́ɔ na Ibrahím beeɖi keɖiyá nɛ́, Ɩsɔ́ɔ wɔɔdɔ́ yɩ gɛ sɩsɩ íyéle bɛbɛlɩ́ yɩ, ɩ́na ibíya abaaláa, na bɛlɛ́ bebíya‑bíya rɩ́ŋa. A baalʊ́rʊ bú abaalʊ́, wɛ́ lutoozo wɩ́rɛ, asée bɛbɛlɩ́ yɩ gɛ. Keɖiyá kɛḿ kɛdɛ́ɛ seríya nbɩlɛ́. Bɩgɛ́ɛ Yahúúɖuwá ɖóóle gɛ sɩsɩ bɛ́bɛ́lɩ́ bíya abaaláa. Weení ɩrɩ́ŋa ɩzɔɔlɛ́ɛ ifu Yahúúɖuwá-dɛ́ɛ aɖííni nɛ́, asée ɖé gɛ iyéle bɛbɛlɩ́ yɩ. Bɛlɩ́ɩ wánwɩlɩ́ɩ kʊ sɩsɩ nyɔ́wɛ Ɩsɔ́ɔ-dɛ́ɛ zamɔ́ɔ-daá. Yahúúɖuwá-jɔ́ nɛ́, bɛlɩ́ɩ wɛná na kʊ fɔ́ɔ́zɩrɛ bɩkɩ́lɩ bɩrɩ́ŋa aɖííni-daá. Bʊrɔɔzɩ́ gɛ bɛbɛɛ́na wenbá bɛdɛbɛlɩ́ wɛ nɛ́ sɩsɩ alaháácɩ́-dɩnáa na kidaavééníti lanɖáa. Keɖiyá kɩ́falɔɔ́ waabáázɩ nɛ́, Yahúúɖuwá gɛ baabaazɩná Yeésu-dɛ́ɛ Laabáárʊ Kífeńgi feerím. Ngɛ Ɩsɔ́ɔ weedíri sɩ béfeeri kɩ ɖúúlínya laadásɩ rɩ́ŋa-dɛ́ɛ ɩráa. Ńna gɛ Yahúúɖuwá bɛlɛ́ sɩsɩ a yíriwá tɩɩganáa-dɛ́ɛ ɩráa sɔɔlɛ́ɛ babɩ́sɩ Yeésu-dɛ́ɛ ńba (Krísto ńba), asée bɛbɛlɩ́ wɛ gɛ, bɩka bɔtɔ́ wɛ bofu Múúsá-dɛ́ɛ Mará. Amá, Yeésu-dɛ́ɛ tɩndɩnáa tetísi bɛdɛ́ɛ tɔ́m tɩḿ. Bʊrɔ gɛ Pɔ́ɔlɩ waaŋmáa Galasíi ńba wasɩ́ɩ́ka ifééri wɛ sɩsɩ a ɩrʊ́ sɔɔlɛ́ɛ ɩbɩ́sɩ Krísto ńnɩ́, tɔ́m kʊ́ɖʊńtɩ kóŋ́ wɛ ná, tɩlɛ́ gɛ sɩsɩ bʊdʊ́ʊ ɩkpɔ́ɔ ɩdɩ ɖetéḿ icéle Krísto.

Bɩsaagɛ́rɛ́ŋɛ, bɩsaagɛ́rɛ́ɛ́zɩ: Bɩsaagɛ́rɛ́ɛ́zɩ kɛ́ɛ wenbí Tem-daá bánÿaá sɩsɩ kɛ́rɛ́ɛ́zɩ nɛ́ gɛ. Amá, bɩsaagɛ́rɛ́ŋɛ nɛ́, bɩdɛkɛ́ɛ tɛ́ɛ́dɩ gɛ bánmanáa, cáńfáná ɖáázɩ na káázɩ nyazɩ Tem-daá. Yahúúɖuwá-dɛ́ɛ nɛ́, bɩsáánɩ na taapóoliwá gɛ bánlanáa sɩ. A bɩɩmɔ́ɔ ɩrʊ́ gɛ ɩzɔɔlɛ́ɛ sɩ ɩkɛ́ɛ ɖɩdáarɛ, wɛ́ngbɛzɩ́ɩ kɛ gɛ ibó ikózuu lénlé waabɩ́sɩ nɛ́.

Cɛ́lɛ bɩná: Bánÿaá kɩ ɖʊɖɔ sɩsɩ tulaarɩ́. Bɩgɛ́ɛ tɩɩwʊ́ nakɩ́rɩ-dɛ́ɛ cɩrɩ́m bɩɩjɔ́ɔ bikíi nɛ́ gɛ. Nimíni aŋmalá-rɔ gɛ bánɖʊ́ʊ kɩ bánvʊʊdɩ́ kɩ Ɩsɔ́ɔ-dɛ́ɛ Ɖaána kʊ́bɔńga-daá sarásɩ lám alɩwáátɩ bɩka kɩdɛ́ɛ nyɔ́ɔ́zɩ wángbáa ɩsɔ́ɔ́dáá bínvoorí. Bánlanáa kɩ sɔ́ɔ́zɩwá ɖabata. Baalʊ́rʊ Yeésu na tɩlɩ́ɖa túbu-dɩnáa bɛɛgbɛ́lɛŋ wɩlásɩ-dɛ́ɛ boɖé nɛ́ wɔɔgɔ́nɩ sɩ bɛsɛ́ɛ bú áfʊ́lʊḿ bɩka bokúu yɩ tɛ́ɛ́dɩ nɛ́, baagáɖʊ́ cɛ́lɛ bɩná bɛdɛ́ɛ kʊjɔ́ɔ́nɩ bɔɔgɔná yɩ tɩ nɛ́ tɩdaá.

Cɛnɩ́tɩ, Cɛnɩŋa: Cɛnɩ́tɩ kʊdɔḿ bánŋmatɩ́ kɩdɛ́ɛ tɔ́m Ɩsɔ́ɔ-dɛ́ɛ Tɔ́m Tákaraɖá-daá nɛ́, kɩ́na kɩndɩ na cɛnɩ́tɩ wentí ɖányɩ tɩ ɖɛ́dɛ́ɛ cé nɛ́. Kʊdɔḿ báa wenkí gɛ kɩɩgba ɩrʊ́ gɛ kɩɩlá kpatarásɩ ɩdɔnʊʊ́-rɔ nɛ́ gɛ baayáa sɩsɩ cɛnɩ́tɩ. Múúsá waaɖʊ ɩdɛ́ɛ Mará tákaraɖá-daá sɩsɩ weení ɩrɩ́ŋa cɛnɩ́tɩ waagba yɩ nɛ́, bʊdʊ́ʊ igúti ɩvɛ́yɩ́ ɖacɩrɩ‑cɩrɩ nbɩlɛ́. Bɩɩbɔ́ɔ́zɩ balɩzɩ́ yɩ tɛ́ɛ́dɩ ɩkɔ́jɔ́ɔ ɩlaná ɩráa bolíni. Wɩ́rɛ wenɖé wánwaá nɛ́, Ɩsɔ́ɔ-dɛ́ɛ sarásɩ lanɖʊ́-jɔ́ gɛ wɔ́ngɔnɩ́ ɩlɛ́ ɩlá yɩ ɖacɩrɩ‑cɩrɩ lám-dɛ́ɛ sɔ́ɔ́zɩ bɩwɩ́lɩ sɩsɩ waawáa ɩlá ɖacɩrɩ‑cɩrɩ. Ńna nɛ́, wángabɩsɩ́ ɩráa-daá.

Ɖacɩrɩ-cɩrɩ: Yahúúɖuwá-dɛ́ɛ nɛ́, a ɩrʊ́ sɔɔlɛ́ɛ ɩ́na Ɩsɔ́ɔ bɔlɔwʊtáá bɩjɔɔ́ɔ ɖéyí‑ɖéyí, báa ngbetíi wónboɖé kazɔ́ɔ, bɩɩbɔ́ɔ́zɩ bʊdʊ́ʊ cɔɔ́ɔ ɖacɩrɩ‑cɩrɩ, báa nabʊ́rʊ fɛ́yɩ́ ɩrɔ bɩdakazɔ́ɔ nɛ́. Ngʊ́ kpɩná ɖabata fʊnwɛ ná, (ɩrʊ́ itekiná ɩsɩɖʊ́, yáá cɛnɩŋa, yáá nabʊ́rʊ Ɩsɔ́ɔ wɔɔdɔ́ sɩsɩ bɩvɛ́yɩ́ ɖacɩrɩ‑cɩrɩ nɛ́, yáá alʊ́ ásɔ́ɔ́nʊ́ʊ ɩdala tá irodúu nɛ́, yáá ɩrʊ́ weení ɩdɛkɛ́ɛ Yahúúɖu nɛ́, na natɩ́rɩwá ɖʊɖɔ), bɩ́nlɩzɩ́ɩ yɩ ɖacɩrɩ‑cɩrɩ-dɛ́ɛ cɔwʊrɛ-daá. A bɩɩlá gaḿ weedekiná bɩdaá nabʊ́rʊ, naanɩ́ ɩtálaḿ ɖacɩrɩ‑cɩrɩ nɛ́, aséé wɛ́ńɖɛ́ɛ́ Ɩsɔ́ɔ-dɛ́ɛ sarásɩ lanɖʊ́ ɩlá yɩ sɔ́ɔ́zɩ naanɩ́. Amá, Keɖiyá kɩ́falɔɔ́-daá nɛ́, Yeésu waawɩ́lɩ sɩsɩ lomaazɛ́ adakazɔ́ɔ ángalɩɩnáa ɩrʊ́ wenbiré-daá nɛ́, wánlɩzɩ́ɩ kʊ yɩ ɖacɩrɩ‑cɩrɩ-dɛ́ɛ cɔwʊrɛ-daá (Mrk 7.1-23).

Ɖáwʊɖa: Ɖáwʊɖa kɛ́ɛ Israyɛ́ɛlɩ laadɔ́ɔ-dɛ́ɛ wúro gɛ. Ɖoo wúrowá baazɩ́ ɖíi Israyɛ́ɛlɩ laadɔ́ɔ-daá, wúro Sawúuli gɛ kaɖaa ńnɩ́. Sawúuli ɖíi wɔ́rɔ́ gɛ Ɖáwʊɖa weeɖi. Wúrowá rɩ́ŋa beeɖi Israyɛ́ɛlɩ laadɔ́ɔ-daá nɛ́ badaá, naárʊ tɛcɛzɩ́ wúro Ɖáwʊɖa. Ɩdɛ́ɛ kowúrɔ́ɔ waabá kelééri bɩcɛzɩ́ baaganáa rɩ́ŋa. Ɩdɛ́ɛ kowúrɔ́ɔ ɖíi wɔ́rɔ́, bɩɩlá nyazɩ bɩ́ɩ́zɩ mííli (1.000) naanɩ́ Yeésu ɩkɔ́nɩ. Waaŋmaa ná Ɩsɔ́ɔ-dɛ́ɛ Tɔ́m Tákaraɖá-daá yéńdiwá ɖabata. Ɩsɔ́ɔ waavʊ́ńbaná anɖébiwá ɩŋmátɩ sɩsɩ wéngediríi weení sɩ ɩkɔ́nɩ ɩlɛ́ɛ ɩdɛ́ɛ zamɔ́ɔ nɛ́, ngɛ Ɖáwʊɖa kutoluú bíya-daá gɛ bʊdʊ́ʊ sɩ ɩlɩɩná. Bú ɩmʊ́ gɛ Yeésu bɩlɛ́, bʊrɔɔzɩ́ gɛ bánÿaá Yeésu sɩsɩ «Ɖáwʊɖa Biyaalʊ́.»

Ɖɛ́nɩ abɛlɩ́ akɔ́ɔ: Róóma ńba-dɛ́ɛ nɛ́, a ɩrʊ́ waalá kidaavééníti natɩ́rɩ bɩcɛzɩ́na seríya, nyazɩ ɩrʊ́ ɩkʊrʊ́na gómínantɩ bɩlɛ́ wánjáádɩ sɩ ɩyɔ́ kɩ, ɖɛ́nɩ abɛlɩ́ akɔ́ɔ-rɔ gɛ bángʊ́ʊ yɩ. A baavɩ́ɩ́zɩ yɩ ɖɛ́nɩ ɩmʊ́ ɩrɔ, na ɩwaláɖɩ ɩnʊ́ʊ́zɩ, ilósi ɩnʊvɔ́ baká nyɩmɛ́; na bakpáázɩ yɩ ɩ́na ɖɛ́nɩ ɩmʊ́ bɩlɛ́ bosúu. Bɩdɛ́ɛ ɩráa tánzɩḿ ɖasam, amá, bánbá bana nʊŋásɩ gɛ páá naanɩ́ basɩ́. Yahúúɖuwá bɛlɛ́ bɔjɔ́ nɛ́, sɩ́m tɩtɛ ńbɩ bɩ́nwɩlɩ́ɩ sɩsɩ Ɩsɔ́ɔ waalá bɩdɛ́ɛ ɩrʊ́ láálɩ́ nɛ́ gɛ bɩgɛ́ɛ. Ńŋɩnáa bɩlɛ́ bɩdɛ́ɛ sɩ́m gɛ Yeésu waazɩná. A sɩ bakʊ ɩrʊ́ ńŋɩnáa bɩlɛ́, bɔ́nvɔkɩ́ bʊdʊ́ʊ ɖóóle gɛ ɩfɔɔ́lɩ ɖɛ́nɩ weení ɩrɔ sɩ bakʊ yɩ nɛ́ hálɩ ɩkádála bɩdɛ́ɛ ɖɩdáarɛ. Yeésu wɔɔdɔ́ sɩsɩ a weení ɩzɔɔlɛ́ɛ sɩ ifu ɩmʊ́ nɛ́, bʊdʊ́ʊ ɩ́fɔ́ɔ́lɩ ɩdɛ́ɛ ɖɛ́nɩ abɛlɩ́ akɔ́ɔ bɩka ɩtɩ́nɩ ɩwɔ́rɔ́ nɛ́, wɔɔzɔ́ɔ́lɩ sɩ ifééri ɩráa gɛ sɩsɩ asée ɩrʊ́ weedísi ɩmʊ wahála na nʊ́ʊ́zɩ nasɩ́lɛ, ɩsɔɔná ɩdɩ ɩgazɔ́ɔ, na ɩbɩ́ɩ́zɩ ɩlá Ɩsɔ́ɔ bɔwʊtá.

Elíya: Elíya fʊngɛ́ɛ Ɩsɔ́ɔ-dɛ́ɛ anɖébi kʊ́bɔnɩ́ naárʊ gɛ. Ɩmʊ́ waazʊlʊ ná Ɩsɔ́ɔ sɩsɩ tɛ́ɛ́wʊ ɩ́kanɩ́ɩ Israyɛ́ɛlɩ laadɔ́ɔ‑rɔ, ngɛ Ɩsɔ́ɔ waagba tɛ́ɛ́wʊ kɩdanɩ́ɩ hálɩ bɩ́ɩ́zɩ nasúdoozo na irodunáa loɖo. Ngɛ waadásʊ́lʊ́ sɩsɩ kɩ́nɩ́ɩ, ngɛ kɩɩbáázɩ nɩɩ́. Anɖébi Elíya tasɩ́, bɩɩlɩzɩ́ yɩ gɛ bɩkpáázɩ hálɩ ɩfɛ́lɛ ɩsɔ́ɔ́dáá ŋmɩ́ndɩ bacáa yɩ bawɩ́ɩ. Yahúúɖuwá fʊnɖamáa sɩsɩ Elíya wángabɩsɩ́ naanɩ́ Mesíya bánÿaá yɩ sɩsɩ Lɛɛrʊ́ nɛ́ ɩkɔ́nɩ. Ngɛ hálɩ na sinje, bɛdɛɛzɩwɛ baɖamáa yɩ. Bʊrɔ gɛ badaá ɖabata tafa toovonúm sɩsɩ Yeésu náábɩlɛ́ Mesíya Lɛɛrʊ́, na bɩrɩ́ŋa ɩlɛ́ weevééri wɛ sɩsɩ Yaayá náábɩ́lɛ́ Elíya weení ɩkábɩsɩ nɛ́.

Elizabɛ́ɛtɩ: Elizabɛ́ɛtɩ waalʊrʊ ná Yaayá weení wɛɛgɛ́dɛ́ Yeésu nɩ́bááwʊ ɩkɔ́nɩ ilíri ɩráa lɩ́m-daá ɩsɔ wɛ túúbá lɩ́m nɛ́. Sarásɩ lanɖáa rɩ́ŋa-dɛ́ɛ kʊ́bɔnɩ́ Árʊ́ʊ́na bíya‑bíya-daá alíya gɛ ɩgɛ́ɛ. Ɩvʊngɛ́ɛ kaalʊrʊya gɛ naanɩ́ Ɩsɔ́ɔ ɩnɩ́ɩ ɩdɛ́ɛ kʊnyɔḿ ɩfa yɩ bú ɩdɛ́ɛ ábɔńdɩ-daá.

Eróodi: Eróodiwá waalá nɔɔ́náázá baaŋmátɩ bɔdɔ́m Ɩsɔ́ɔ-dɛ́ɛ Tɔ́m Tákaraɖá-daá nɛ́. Kaɖaa ńnɩ́ gɛ bánÿaá sɩsɩ Eróodi Kʊ́bɔnɩ́. Ɩlɛ́ weeɖi ná kowúrátɩ Yahúúɖuwá-dɛ́ɛ laadɔ́ɔ rɩ́ŋa-rɔ. Ɩmʊ́ waajaa ná sɩ ɩkʊ Yeésu sáátɩ wenkí baalʊ́rʊ yɩ nɛ́. Waazɩ́ nɛ́, Yeésu tala tá kʊ́bɔnɩ́. Waalʊ́rʊ bíya bʊɖɔ́ɔ. Ɩzɩ́m wɔ́rɔ́ nɛ́, Róóma ńba waadára ɩdɛ́ɛ kowúrɔ́ɔ bʊrɔ nabʊ́náázá, ibíya-daá noódoozo iɖi fɔɔlʊʊ́ báa wenkí-rɔ, bɩka wúro naárʊ ɩdɛkɛ́ɛ ɩdɛ́ɛ bú nɛ́ ɩlɛ́ iɖi naaza ńgɩ-rɔ.

Faríizi ńnɩ́, Faríizi ńba: Yahúúɖuwá-dɛ́ɛ aɖííni-daá, tarɩ́ɩ waazʊ́ʊ nɛbɛ́rɛ ɩlɩɩná badɩ. Bɔwʊ́ɖɛ kʊ́bɔńɖɛ gɛ bánÿaá sɩsɩ Faríizi. Neɖére gɛ Sadusée. Faríizi ńba ɩbá bɔɖɔ́kɩná Múúsá-dɛ́ɛ Mará gɛ páá, bɩka banyɩ yɛ kazɔ́ɔ. Bánwɩlɩ́ɩ ɩráa gɛ sɩsɩ bófú yɛ kazɔ́ɔ. Amá, wentí nɛ́ gɛ sɩsɩ bónzuurí caájaanáa-dɛ́ɛ taáɖɛ-dɛ́ɛ sɔ́ɔ́zɩwá ɖʊɖɔ, bɩka bɛbɛɛ́na badɩ sɩsɩ bɛḿ bovóo na kʊ Ɩsɔ́ɔ kazɔ́ɔ bɩkɩ́lɩ ɩráa rɩ́ŋa. Baabá bánwɩlɩ́ɩ badɩ gɛ, bɩka bʊrʊkɔɔnɩ́tɩ na munááfíísi wɛ bɔjɔ́. Wentí bánwɩlɩ́ɩ ɩráa sɩsɩ bála nɛ́, bɛḿ badɩtɩŋa bádánlaḿ tɩ. Bɛdɛ́ɛ kʊ́bɔnáa tabá bacáa Yeésu-dɛ́ɛ tɔ́m báa cʊ́kɔ. Biiyéle baabá bacáa nɩ́báánɩ sɩ bakʊ yɩ.

Fée, Fée-bú: Fée gɛ bándayaá ɖɛ́dɛ́ɛ Tem bíya-dɛ́ɛ bʊ́ʊ fáráńdɩ́ sɩsɩ féwu; a tɩɩɖɔ́ɔ, bánÿaá sɩsɩ fééni. Yahúúɖuwá ɖʊɖɔ fʊnwɛná fééni gɛ nyazɩ Tem-daá ɩráa wɛná fééni nɛ́. Hálɩ bɛlɛ́ babá badɩmɛ́rɛ gɛ fʊ́ńdɩ kpɩná cɛlɩ́ɩ. Yahúúɖuwá-dɛ́ɛ, ɩrʊ́ kʊ́ɖʊḿ-dɛ́ɛ fééni waabá gɛ tɩɖɔ́ɔ. Ketirú wɔ́ngbɔwʊ́ʊ tɩ nɛ́, wánzʊʊ́ fɔɔ́ gɛ iboná tɩ lénlé nyɩ́ɩ́dɩ ɩbá tɩwɛ kazɔ́ɔ nɛ́ tɩ́ndɔwʊ́ʊ. Béngetí gɛ nyazɩ Fɩ́landɩ ńnɩ́ wéngetí náánɩ nɛ́. Báa ketirú weení wéngetí ivééni gɛ, bɩka bɩgɛ́ɛ yɩ ɖóóle sɩsɩ ɩbá ɩtɩlɩ́ tɩ kazɔ́ɔ. A fée kʊ́ɖʊḿ wɛɛdɛlɛ́ŋ, asée waajáa yɩ hálɩ ɩkáná yɩ. Tɩwɛná tɩdɛ́ɛ kárɔɔ́ lé tínɖóm nɛ́ gɛ. A wɩ́sɩ waabá sɩkpa ɖóni gɛ bɩbá bɩjɔɔ́ɔ fifíni, wánzʊʊnáa tɩ tɩdɛ́ɛ kárɔɔ́-daá gɛ bɩka ɩmʊ́ ɩzɩ́ŋɛ́ɛ kárɔɔ́-dɛ́ɛ wɔnɔɔ́ na fɔɔ́-daá fʊ́ńdɩ kpɩ́nɖɛ ɩ́kɔkɔ́nɩ ɖɩkpa tɩ ɖɩtɔ́ɔ, yáá na ŋmɩɩlʊ́ ɩ́kɔkɔ́nɩ ɩsʊ́ʊ ɩŋmɩ́ɩ́lɩ tɩ. A ŋmɩɩlʊ́ sɩ ɩkɔ́nɩ, kárɔɔ́-dɛ́ɛ na ɖeelí gɛ wánganyaanáa ɩsʊ́ʊ. Yahúúɖuwá wenbá baadálɩ Ɩsɔ́ɔ-dɛ́ɛ nɩ́bááwʊ nɛ́, Yeésu wɛ́ngɛɛzɩnáa wɛ fééni wentí tɩɩdɛlɛ́ŋ nɛ́ gɛ. Bɩɩga «Ɩsɔ́ɔ-dɛ́ɛ fée-bú» dɛ́ɛ tɔ́m nɛ́, ɖánbɩɩzɩ́ ɖɩkágála tɩ Laabáárʊ Kífeńgi Yʊháánɩ waaŋmáa kɩ nɛ́ kɩdaá: 1.19-36, na Kɩwɩlʊʊ-dɛ́ɛ ŋmáádɩ-daá: 5.6-12; 7.14-17; 13.8; 14.1-4. Fáráńdɩ́wá tɩḿ tɩdaá nɛ́, Yeésu gɛ bɛ́ngɛɛzɩnáa fée-bú. Yaayá waayáa yɩ sɩsɩ Ɩsɔ́ɔ-dɛ́ɛ Fée-bú nɛ́, wɛɛgɛɛzɩná yɩ fée-bú weení bángʊ́ʊ yɩ na fééni rɩ́ŋa iyuú alaafɩ́ya nɛ́ gɛ. Nɛbɛ́rɛ wɛ́ngɛɛzɩnáa Yeésu ɖʊɖɔ fée bángʊ́ʊ yɩ Fɛlɛ Nɖɛ́ɛ-dɛ́ɛ jíńgáárɩ́ nɛ́ gɛ. Bɩka ɖʊɖɔ, ɩrʊ́ weení ɩdabá ɩlá nabʊ́rʊ, waabá waasɩ natɩ́rɩ tɔ́m-daá gɛ baazʊ́ʊ yɩ mogoɖulúm nɛ́, bɛ́ngɛɛzɩnáa yɩ ɖʊɖɔ fée-bú gɛ.

Fɛlɛ nɖɛ́ɛ-dɛ́ɛ jíńgáárɩ́: Jíńgáárɩ́ kɩḿ kɩ́ndɔɔzɩ́ Israyɛ́ɛlɩ bíya nŋɩ́nɩ́ Ɩsɔ́ɔ waalá na ɩkálɩ́zɩ́ wɛ Mɩ́sɩra ńba nʊ́ʊ́zɩ-daá nɛ́ gɛ. Bavʊnwɛ Mɩ́sɩra nɛ́, bɛgɛ́ɛ yomáa gɛ, tɩmɛ́ waabá bɩ́nnɩɩ́ wɛ páá, bɩka bánnáa kʊnyɔḿ ɖabata. Ɩsɔ́ɔ wɔɔgɔ́nɩ sɩ ɩlɛ́ɛ wɛ nɛ́, wɔɔdɔ́ wɛ sɩsɩ ɖaána báa wenká ɩ́caa feevalʊ́ abaalʊ́ yáá agbɛzɛyɩ́ kiizúlu bɩ́nɩ bɩka kɩ́na kɩdɩ nɛ́ bakʊ. A baagʊ fʊ́ńdɩ kpɩ́nɖɛ ɖɩḿ, botóózi ɖɩdɛ́ɛ azimá betíi bɛdɛ́ɛ ɖaḿ wɔnásɩ-dɛ́ɛ tará ɖáázɩ. Bɩka ɩwɩ́lɩ wɛ nŋɩ́nɩ́táá sɩ bɔtɔɔ ná bɩdɛ́ɛ sɔ́m nɛ́. Bɩdɛ́ɛ nuvoowú nɛ́, ngɛ Ɩsɔ́ɔ-dɛ́ɛ malááyɩ́ka wɔɔgɔ́nɩ ɩkʊ lʊrʊ́ʊ-daá bíya abaaláa kaɖaa ńba rɩ́ŋa Mɩ́sɩra laadɔ́ɔ-daá, bɩkpɛdɩ́na fʊ́ńdɩ kpɩná-daá. Amá, Ɩsɔ́ɔ-dɛ́ɛ malááyɩ́ka ɩmʊ́ wánzʊʊ́ wánlɩɩ́ ɖɛ́ɛ́zɩ-daá wángʊ́ʊ bíya abaaláa kaɖaa ńba bɩlɛ́ nɛ́, a waadála lénlé gɛ waana azimá ɖaḿ wɔnɔɔ́-dɛ́ɛ tará ɖáázɩ-ɖɔ nɛ́, wɛ́nvɛlɩ́ɩ gɛ ɩɖɛ́ɛ, ɩ́dánzʊʊ ńna ɩkʊ naárʊ, ɩjáŋ ɩnyɩ sɩsɩ Israyɛ́ɛlɩ bíya-dɛ́ɛ ɖɛ́ɛ́zɩ nbɩlɛ́. Wɛ́nvɛlɩ́ɩ wɛ́nɖɛɛ́ bɩlɛ́ nɛ́ tɩɩná gɛ baava jíńgáárɩ́ kɩḿ yɩ́ɖɛ sɩsɩ «Fɛlɛ Nɖɛ́ɛ-dɛ́ɛ jíńgáárɩ́.» Sɩɩná bɩdɩ́ŋa gɛ Ɩsɔ́ɔ wɔɔdɔ́ wɛ sɩsɩ bɩ́nɩ báa weení, bɔ́tɔɔzɩ bʊrɔɔzɩ́. Bʊrɔ gɛ hálɩ na sinje, a bɩɩdála bɩdɛ́ɛ alɩwáátɩ, Yahúúɖuwá rɩ́ŋa wɔ́ngɔnɩ́ Yerusalɛ́ɛm, bɩkpɛdɩ́na wenbá barɩ́ŋa bɔgɔwɛ agbarawa nɛ́, Caáwʊ báa weení na ɩvʊ́ńdɩ kpɩ́nɖɛ na igoobíre, beɖi kɩ. Bándalɩ́ɩ nɛ́, Ɩsɔ́ɔ-dɛ́ɛ Ɖaána kʊ́bɔńga-daá gɛ bɔ́ngɔnáa fʊ́ńdɩ kpɩ́nɖɛ ɖɩḿ, na Ɩsɔ́ɔ-dɛ́ɛ sarásɩ lanɖáa ɩkʊ ɖɛ ńŋɩnáa wenbí bɩɩbɔ́ɔ́zɩ nɛ́, na becéle wɛ sɔ́m bɔkɔ́dɔ́ɔ koobíre-daá. Amá, Keɖiyá kɩ́falɔɔ́-daá nɛ́, Yeésu tɩtɩŋa gɛ Fɛlɛ Nɖɛ́ɛ-dɛ́ɛ jíńgáárɩ́-dɛ́ɛ fée-bú.

Fɛɛzɩrɛ wɩ́rɛ: Bɩgɛ́ɛ na wɩ́rɛ wenɖé Yahúúɖuwá wɛ́nvɛɛzɩ́ nɛ́. Wɩ́rɛ kʊ́bɔńɖɛ gɛ bɩgɛ́ɛ wɛ. Baaŋmáa Ɩsɔ́ɔ-dɛ́ɛ Tɔ́m Tákaraɖá-daá sɩsɩ Ɩsɔ́ɔ waaɖʊ wɛ́ loɖo gɛ ɩlá tɩmɛ́rɛ, ngɛ lʊbɛ wɩ́rɛ wɛɛdɛ́ ɩdɩmɛ́rɛ nɛ́, wɛɛvɛ́ɛ́zɩ. Ngɛ bʊwɔ́rɔ́ nɛ́, wɔɔdɔ́ sɩsɩ ɩrʊ́ ɩ́la tɩmɛ́rɛ wɛ́ loɖo bɩka lʊbɛ wɩ́rɛ nɛ́ ɩcɔ́ɔ ɩfɛ́ɛ́zɩ; ɩ́kalá nabʊ́rʊ. Wɩ́rɛ ɖɩḿ, Ɩsɔ́ɔ gɛ wánlám bɔwʊtá, káma, Ɩsɔ́ɔ-dɛ́ɛ fɛɛzɩrɛ wɩ́rɛ nbɩlɛ́. Bɩɩbɔ́ɔ́zɩ ɩrʊ́ báa weení ɩɖɔ́ɔ́zɩ ɖɛ. Yahúúɖuwá-dɛ́ɛ nɛ́, a bángalɩ́ɩ wɛ́-bíya, Fɛɛzɩrɛ wɩ́rɛ gɛ lʊbɛ ńɖɛ.

Ibrahím, Ɩbrám: Israyɛ́ɛlɩ ńba rɩ́ŋa caájaanáa ɩjaa nbɩlɛ́. Ɩnáábɩ́lɛ́ kaɖaa ńnɩ́ weení waanɩ́ɩ Ɩsɔ́ɔ nɔɔ́ iyéle ɩjaanáa-dɛ́ɛ sɔ́ɔ́zɩwá lám bɩka ifu Ɩsɔ́ɔ nɛ́. Ɩdanáábɩ́lɛ́ ɖʊɖɔ Ɩsɔ́ɔ weeɖi ná keɖiyá kaɖaa ńga, iɖúu sɩsɩ wánváa yɩ lʊrʊ́ʊ ɩlʊ́rʊ bʊɖɔ́ɔ páá naárʊ tánbɩɩzɩ ɩkála, bɩka iɖúu ɖʊɖɔ sɩsɩ wánváa laadɔ́ɔ ibíya iɖi kɛ tííbí. Naanɩ́ ɩ́na Ɩsɔ́ɔ beɖi keɖiyá nɛ́, bánvʊnÿaá yɩ gɛ sɩsɩ Ɩbrám. Keɖiyá ɖíi wɔ́rɔ́ gɛ Ɩsɔ́ɔ wɛɛgɛ́ɛ yɩ yɩ́ɖɛ ɩfa yɩ sɩsɩ Ibɩrahím. Nŋɩ́nɩ́ Ibrahím waava Ɩsɔ́ɔ toovonúm nɛ́, weeyéle Ɩsɔ́ɔ ɩbɩsɩná yɩ wenbá barɩ́ŋa ɩmʊ́ Ibrahím ɩwɔ́rɔ́, sɩ bɔkɔ́nɩ bafa Ɩsɔ́ɔ toovonúm nɛ́ bajaájaa. Ibrahím ɖɛɛlʊ́ gɛ Saráa. Bɛdɛ́ɛ ábɔńdɩ-daá gɛ Ɩsɔ́ɔ waava wɛ bú abaalʊ́, bafa yɩ yɩ́ɖɛ sɩsɩ Ɩsaáka. Ɩsaáka waabɩ́ɩ nɛ́, ngɛ ɩlɛ́ waalʊ́rʊ sikawá abaaláa, ɩfa kaɖaa ńnɩ́ yɩ́ɖɛ sɩsɩ Ísááwʊ, sɩɩlɛ ńnɩ́ Yaakúbu. Yaakúbu ɩlɛ́ waalʊ́rʊ bíya abaaláa fuú na nɔɔ́lɛ. Bɛlɛ́ baalʊrʊná bɩcáŋ bɩbɩ́sɩ zamɔ́ɔ kʊ́bɔńgɩ sinje ɖánÿaá kɩ sɩsɩ Yahúúɖuwá ɖɔ́ nɛ́ bɩlɛ́. Bíya bɛḿ badaá naárʊ gɛ bánÿaá sɩsɩ Léévi. Léévi-dɛ́ɛ bíya‑bíya-daá naárʊ gɛ bánÿaá Árʊ́ʊ́na. Árʊ́ʊ́na ɩmʊ́ gɛ Ɩsɔ́ɔ waalɩzɩ́ ɩbɩsɩná ɩdɛ́ɛ sarásɩ lanɖʊ́ kaɖaa ńnɩ́. Ɩsɔ́ɔ ɩcáŋ iɖúu ɩsɩ́ɩ sɩsɩ Árʊ́ʊ́na na igutoluú-dɛ bíya sɩ bala ná yɩ sarásɩ ɩdɛ́ɛ Ɖaána kʊ́bɔńga-daá.

Ínúusa: Ínúusa kɛ́ɛ anɖébi gɛ. Wɩ́rɛ Ɩsɔ́ɔ weedíri yɩ tɛ́ɛ́dɩ kʊ́bɔńdɩ natɩ́rɩ bánÿaá tɩ sɩsɩ Niníivi nɛ́ tɩdaá sɩsɩ íbo ɩbɔ́ɔ sɩsɩ bɩɩga wɛ́ náádoozo na bonúúdi tɛ́ɛ́dɩ na tɩdaá ɩráa rɩ́ŋa, káma baabá basʊ́ʊ kɩdaavééníti lám nɛ́-rɔɔzɩ́. Amá, Ínúusa tacáa sɩ ibó. Ngɛ woobó ɩsʊ́ʊ mɛ́ɛ́lɛ sɩ wɛ́nɖɛɛnáa tɛ́ɛ́dɩ natɩ́rɩ. Mɛ́ɛ́lɛ bamáa ɖɛɛ́ tenkú-rɔ gɛ Ɩsɔ́ɔ wɔɔgɔná fefelimá kʊ́bɔná naárɛ ánlʊwáa na mɛ́ɛ́lɛ kulúu. Wenbá bɔwɛ mɛ́ɛ́lɛ-daá nɛ́ baadɩlɩ́ sɩsɩ Ínúusa tɩɩná tɩ. Ńna gɛ ɩdɩtɩŋa wɔɔdɔ́ balɩzɩ́ yɩ bɔlɔ tenkú-daá, ngɛ ńna‑ńna, fefelimá waazála. Bɔɔlɔ yɩ bɩlɛ́ nɛ́, ngɛ tińɖe kʊ́bɔńɖɛ neɖére weelí yɩ. Ɩwɛ tińɖe lóódi-daá bɩlɛ́ nɛ́, ɩdasɩ́, amá ɩwɛ gɛ wánzám Ɩsɔ́ɔ, wɔ́nɖɔɔzɩ́ yɩ. Ngɛ wɔɔjɔ́ɔ bɩlɛ́ hálɩ ɩlá wɛ́ náádoozo nuvoowú na ɩdaawʊ́ tińɖe lóódi-daá. Ngɛ Ɩsɔ́ɔ weeyéle tińɖe ɩkɔ́nɩ ɖiwúu yɩ ɖɩlɔ tenkú-dɛ́ɛ kpaam-rɔ. Waagʊrʊ́ nɛ́, ngɛ wɛɛɖɛ́ɛ tɛ́ɛ́dɩ Ɩsɔ́ɔ wánvʊndiríi yɩ nɛ́ tɩdaá ikíli ɩbɔ́ɔ ńŋɩnáa Ɩsɔ́ɔ wɔɔdɔ́ yɩ nɛ́. Ngɛ tɛ́ɛ́dɩ tɩḿ tɩdɛ́ɛ ɩráa waalá mányɩ lé, babá bewíi, bacáŋ balá túúbá bɛkɛ́ɛ lakásɩ. Ngɛ Ɩsɔ́ɔ wɛɛjɛ́ wɛ bɛdɛ́ɛ alaháácɩ́wá, idokúti inúúdi bána bɛdɛ́ɛ́dɩ.

Ɩrʊ́ biyaalʊ́: Keɖiyá kɩ́bɩńga-daá gɛ nuvoowú nakɩ́rɩ, Ɩsɔ́ɔ waalɩzɩ́ nabʊ́rʊ ɩwɩ́lɩ ɩdɛ́ɛ anɖébi Danɩyɛ́ɛlɩ. Ngɛ ɩlɛ́ wɛ́ngɛɛzɩ́ wenbí waana nɛ́ sɩsɩ: «Mábamáa bɛɛŋ́ nɛ́, ngɛ mááná bɩjɔɔ́ɔ nyazɩ Ɩrʊ́ biyaalʊ́ bɩlɛ́, wánganʊŋ́ ŋmɩ́ńdɩ-rɔ wɛ́nɖɛɛnáa Kʊ́bɔnɩ́ fáráńdɩ́. Ngɛ booboná yɩ ɩlɛ́ waazá-daá. Ngɛ beejéle yɩ kowúrátɩ, yíko, na kʊ́bɔńdɩ, ngɛ laadásɩ rɩ́ŋa na yíriwá rɩ́ŋa-dɛ́ɛ ɩráa wánlám yɩ bɔwʊtá. Ɩdɛ́ɛ kowúrɔ́ɔ tɛ́ndɛŋ́ kɛtɛngɛrɛ. Tɔ́ɔ, Keɖiyá kɩ́falɔɔ́-daá, sáátɩ nakɩ́rɩ, a Yeésu wánŋmatɩ́, wánÿaá ɩdɩ gɛ sɩsɩ «Ɩrʊ́ biyaalʊ́.» Wánÿaá ɩdɩ bɩlɛ́ nɛ́, ɩzɔɔlɛ́ɛ gɛ sɩsɩ ɩráa ɩtɔ́ɔ́zɩ wenbí bɩɩlɩzɩ́ bɩwɩ́lɩ anɖébi Danɩyɛ́ɛlɩ nɛ́.

Ɩsɔ́ɔ ɖaazɛɛɖɛ́: Yahúúɖuwá-dɛ́ɛ tɛ́ɛ́dɩ báa wentí wɛná tɩdɛ́ɛ Ɩsɔ́ɔ ɖaazɛɛɖɛ́. Ɖaḿ gɛ bɩgɛ́ɛ, bɩka ɩráa wóndórodúúzi kɩdaá Fɛɛzɩrɛ wɩ́rɛ bángalɩ́ɩ Ɩsɔ́ɔ-dɛ́ɛ tɔ́m, bɛ́nzɛɛ́ Ɩsɔ́ɔ, bɩka bajáŋ bánwɩlɩ́ɩ ɩráa Ɩsɔ́ɔ-dɛ́ɛ tɔ́m. Sáátɩ nakɩ́rɩ bánvʊʊ́ tɔ́m ɖʊɖɔ ɖaḿ kɩḿ kɩdaá. Ɩsɔ́ɔ ɖaazɛɛɖɛ́ báa wenɖé wɛná ɖɩdɛ́ɛ nɩ́baadɛɛrʊ́.

Ɩsɔ́ɔ-dɛ́ɛ bɩsaagɛ́rɛ́ŋɛ: Bɩsaagɛ́rɛ́ŋɛ wenká Israyɛ́ɛlɩ bíya waalá kɛ tɛɛwʊ́lɔ́ɔ́-daá bɔtɔ́ sɩsɩ Ɩsɔ́ɔ-dɛ́ɛ ńga nɛ́ nbɩlɛ́. Bánÿaá kɛ ɖʊɖɔ sɩsɩ Ɩsɔ́ɔ na ɩráa baraagɛtɩɖɛ́-dɛ́ɛ bɩsaagɛ́rɛ́ŋɛ, yáá seríya-dɛ́ɛ bɩsaagɛ́rɛ́ŋɛ. Boozúu kɛ nɛ́, ngɛ baadára batára kadaá. Kɛdɛ́ɛ fɔɔlʊʊ́ nakɩ́rɩ gɛ bánÿaá sɩsɩ «ɖacɩrɩ‑cɩrɩ páá ɖɩdáarɛ», ńna gɛ baazɩ́ɩ Keɖiyá aɖákaá; fɔɔlʊʊ́ nakɩ́rɩ gɛ ɖacɩrɩ‑cɩrɩ ɖɩdáarɛ, kɩlɛ́ kɩdaá gɛ baazɩ́ɩ kíɖíídi-dɛ́ɛ sarásɩ ɖaalanɖɛ́ ɖɩdáarɛ, fɩtɩ́lawá, tulaarɩ́wá ɖaavʊʊdɩɖɛ́. Na wɩ́sɩ ɖaagalɩɩɖɛ́ fáráńdɩ́ gɛ baadʊlʊ́ kɛdɛ́ɛ ɖaḿ wɔnɔɔ́, bɩka bɛcɛ́ ɖɩdáarɛ bɩwála bɩlára bɩmɩlɩná kɛ. Ɖɩdáarɛ ɖɩḿ ɖɩdaá gɛ baama sarásɩ bɔ́nwɔ́m sɩ sɩnyɔ́ɔ nɛ́ sɩɖaalanɖɛ́, bɩka basɩ́ɩ tása baalaná kɩ nyɩɩrʊʊ́ kɩ́sɛɛmʊ́ʊ nɛ́ bɩjɔ́. Wenbí baalá bɩsaagɛ́rɛ́ŋɛ kɛḿ nɛ́ gɛ bɛɛbɛɛŋná bama Ɩsɔ́ɔ-dɛ́ɛ Ɖaána kʊ́bɔńga Yerusalɛ́ɛm tɛ́ɛ́dɩ-daá.

Ɩsɔ́ɔ-dɛ́ɛ Ɖaána kʊ́bɔńga: Ɩsɔ́ɔ-dɛ́ɛ Ɖaána kʊ́bɔńga kɛ́ɛ kʊ́ɖʊmɔ́ɔ gɛ ɖúúlínya rɩ́ŋa-daá. Yerusalɛ́ɛm tɛ́ɛ́dɩ-daá gɛ kɔwɛ, bɩka kadaá gɛ bánlám Ɩsɔ́ɔ sarásɩ ndɩ‑ndɩ. Bɩ́nɩ báa weení, Yahúúɖuwá rɩ́ŋa bɔwɛ Yudée laadɔ́ɔ-rɔ, yáá bɔgɔwɛ agbarawa nɛ́, bɩtasɩná wenbá barɩ́ŋa bɛdɛkɛ́ɛ Yahúúɖuwá ngɛ baalá túúbá bánlám Yahúúɖuwá-dɛ́ɛ aɖííni nɛ́, bɔ́ngɔnɩ́ Ɩsɔ́ɔ sʊjʊ́ɖa lám ɩdɛ́ɛ Ɖaána kʊ́bɔńga-daá.

Ɩsɔ́ɔ-dɛ́ɛ ńba, Ɩsɔ́ɔ-dɛ́ɛ ńbɩ: Wenbá Ɩsɔ́ɔ waalɩzɩ́ wɛ ɩsɩ́ɩ ɩdɩ, bɔjɔɔ́ɔ ɩjɔwʊ́ʊ bɩka bánlám yɩ bɔwʊtá nɛ́ gɛ bánÿaá bɩlɛ́. Kpɩná weená bádánlaná yɛ tɩmɛ́rɛ báa wenɖé asée Ɩsɔ́ɔ-dɛ́ɛ tɩmɛ́rɛ riké nɛ́, bɔ́ndɔ́m sɩsɩ agɛ́ɛ Ɩsɔ́ɔ-dɛ́ɛ ńbɩ, Ɩsɔ́ɔ waalɩzɩ́ yɛ ɩsɩ́ɩ sɩsɩ ɩdɩmɛ́rɛ gɛ báláná yɛ. Bɩjɔɔ́ɔ nyazɩ ɖánzʊʊ́ Ɩsɔ́ɔ-dɛ́ɛ ɖaána-daá sɩ ɖɩsɛ́ɛ Ɩsɔ́ɔ nɛ́, kpɩná weená awɛ ńna, báa wenɖé na ɖɩvɔ́ɔ́zɩrɛ Ɩsɔ́ɔ sɛ́ɛ́dɩ-daá nɛ́, alɛ́ gɛ ɖánbɩɩzɩ́ ɖɩyáa bɩlɛ́.

Keɖiyá: Bénɖíi keɖiyá gɛ. Ɩráa nɔɔ́lɛ wénɖíi keɖiyá nɛ́, báa weení wánŋmatɩ́ gɛ hálɩ iɖuuná Ɩsɔ́ɔ wenbí sɩ ɩlá ɩrɔwʊ́ nɛ́. Amá, a kʊ́ɖʊḿ kɛ́ɛ kʊ́bɔnɩ́ ɩkɩ́lɩ waaganáa, ɩlɛ́ wánŋmatɩ kʊ wenbí kúmuú mɔɔ́na ɩlá nɛ́. Naanɩ́ bɩbɩ́sɩ keɖiyá nɛ́, bángʊ́ʊ fʊ́ńdɩ kpɩ́nɖɛ gɛ barɩ́ŋa boyóózi bɔtɔ́ɔ. Ɩsɔ́ɔ weeɖi keɖiyá ɩ́na ɩráa nɛ́, ɩdɩtɩŋa waaɖʊ ná sɩsɩ wánlám wɛ kʊjɔ́ɔ́nɩ, bɩka ɩtɔ́ wɛ ɖʊɖɔ sɩsɩ básɩ́ŋ́ná ɩmʊ́ iriké bɩka bofu ɩdɛ́ɛ Mará. Ɩsɔ́ɔ na Anɖébi Núhum baaɖaaná keɖiyá ɖíi. Bʊwɔ́rɔ́ nɛ́, ɩ́na Ibrahím na ɩlɛ́ ibíya‑bíya beeɖi keɖiyá ɖʊɖɔ. Ɩsɔ́ɔ wooɖuuná Ibrahím sɩsɩ wánɖʊ́ʊ yɩ alɩbáráka, bɩka ɩfa yɩ lʊrʊ́ʊ bɩlʊ́rʊ bʊɖɔ́ɔ. Sɩsɩ ɩmʊ́ wénÿelíi Ibrahím kutoluú-dɛ bíya ɩkɔ́nɩ beɖi laadɔ́ɔ ɩmʊ́ sɩ ɩfa yɩ kɛ nɛ́ tííbí. Zamɔ́ɔ kɩḿ kɩɩbɩsɩná wenbá ɖánÿaá wɛ sɩsɩ Israyɛ́ɛlɩ ńba yáá Yahúúɖuwá nɛ́ bɩlɛ́. Ɩsɔ́ɔ waagálɩ́zɩ́ Israyɛ́ɛlɩ zamɔ́ɔ Mɩ́sɩra wɔ́rɔ́ nɛ́, waalɩzɩ́ ɩdɩ ɩwɩ́lɩ Múúsá, iɖi keɖiyá ɩ́na yɩ, na Israyɛ́ɛlɩ zamɔ́ɔ rɩ́ŋa; ɩsɩ́ɩ wɛ ɩdɛ́ɛ Mará, ɩtɔ́ wɛ sɩsɩ a boovu yɛ, baabɩ́sɩ ɩmʊ́ ɩdɛ́ɛ zamɔ́ɔ. Ngɛ Múúsá na zamɔ́ɔ rɩ́ŋa baagʊ fʊ́ńdɩ kpɩná balá Ɩsɔ́ɔ sarɔ́ɔ bɩwɩ́lɩ sɩsɩ bɛḿ beedísi. Amá, bɛdɛ́ɛ bodofu Mará amʊ́ weeyéle Ɩsɔ́ɔ ɩbaná anɖébi Yeremíya ɩŋmátɩ sɩsɩ ɩmʊ́ wénɖíi keɖiyá kɩ́falɔɔ́ ɩ́na ɩráa, na ɩŋmáa kɛlɛ́ kɛdɛ́ɛ mará bewenbé-daá. Bugutoluú sɩsɩ ɩmʊ́ wɛ́ngɛɛ́ bewenbé na babɩ́ɩ́zɩ bofu yɛ. Yeésu wɔɔgɔ́nɩ na ɩsɩ́ ɩráa rɩ́ŋa-dɛ́ɛ alaháácɩ́wá-rɔ nɛ́, ɩdɛ́ɛ azimá wánwɩlɩ́ɩ kʊ sɩsɩ keɖiyá kɩ́falɔɔ́ kɛḿ kɔɔjɔ́ɔ, bɩka kɔmɔ́ɔ Ɩsɔ́ɔ. Ɩsɔ́ɔ-tɔ́m tákaraɖá wɛná fɔɔlɩ́nɩ natɩ́lɛ gɛ: kaɖaa ńgɩ gɛ bánÿaá sɩsɩ Keɖiyá kɩ́bɩńga-dɛ́ɛ tákaraɖá. Fɔɔlʊʊ́ kɩḿ kɩ́nŋmatɩ́ Ɩsɔ́ɔ na ɩdɛ́ɛ zamɔ́ɔ Israyɛ́ɛlɩ bɛdɛ́ɛ keɖiyá-dɛ́ɛ tɔ́m gɛ. Fɔɔlʊʊ́ sɩɩlɛ ńgɩ gɛ bánÿaá sɩsɩ Keɖiyá kɩ́falɔɔ́. Kɩlɛ́ kɩ́nŋmatɩ́ keɖiyá kɩ́falɔɔ́ Ɩsɔ́ɔ weeɖi kɛ ɩ́na ɖúúlínya ɩráa rɩ́ŋa nɛ́-dɛ́ɛ tɔ́m.

Keɖiyá aɖákaá: Sáátɩ wenkí Israyɛ́ɛlɩ bíya wɛ tɛɛwʊ́lɔ́ɔ́-daá nɛ́, Ɩsɔ́ɔ wɔɔdɔ́ Múúsá ɩcáa tɩɩwʊ́ nakɩ́rɩ-dɛ́ɛ ɖáázɩ ɩká aɖákaá nakɩ́rɩ. Waagá kɩ bɩtɛ́ nɛ́, ngɛ Ɩsɔ́ɔ wɔɔdɔ́ yɩ ɩcáa siká ɩbɩ́rɩ kɩrɩ́ŋa kɩrɔ. Ngɛ wɔɔdɔ́ yɩ ɩkpɔ́ɔ bɔ́ náálɛ weená arɔ baaŋmáa ɩdɛ́ɛ Mará nɛ́ ɩtasɩná Árʊ́ʊ́na-dɛ́ɛ ɖɛ́nɩ, na máánɩ ɩɖʊ kɩdaá. Wenbí baaɖʊ aɖákaá kɩḿ kɩdaá nɛ́, kɛ́ɛ na kʊ Ɩsɔ́ɔ na ɩdɛ́ɛ zamɔ́ɔ bɛdɛ́ɛ keɖiyá-dɛ́ɛ seríya. Bʊrɔ gɛ bánÿaá aɖákaá kɩḿ sɩsɩ «Keɖiyá aɖákaá.» Bɩsaagɛ́rɛ́ŋɛ wenká kadaá Ɩsɔ́ɔ na ɩdɛ́ɛ zamɔ́ɔ bɛ́ngɛtɩ́ nɛ́ kadaá gɛ baazɩ́ɩ aɖákaá kɩḿ. Wúro Sulemáana wɔɔgɔ́nɩ ɩma Ɩsɔ́ɔ-dɛ́ɛ Ɖaána kʊ́bɔńga bɩtɛ́ nɛ́, ngɛ baalɩzɩ́ kɩ bɩsaagɛ́rɛ́ŋɛ-daá basʊʊná Ɩsɔ́ɔ-dɛ́ɛ Ɖaána kʊ́bɔńga-dɛ́ɛ ɖoo‑ɖoo bɩdaá lé bánÿaá sɩsɩ «ɖacɩrɩ‑cɩrɩ páá ɖɩdáarɛ» nɛ́ bakázɩ́ɩ. Aɖákaá kɩḿ kɩgɛ́ɛ gɛ nyazɩ Ɩsɔ́ɔ-dɛ́ɛ kowuro-gbelé. Kɩ́nwɩlɩ́ɩ kʊ sɩsɩ Ɩsɔ́ɔ wɛ ɩzamɔ́ɔ lɔwʊtáá wánlám tɩmɛ́rɛ. Amá, Babilɔ́ɔnɩ ńba wɔɔgɔ́nɩ boyóo Israyɛ́ɛlɩ ńba hálɩ bakpa Israyɛ́ɛlɩ ńba bɛɖɛɛná Babilɔ́ɔnɩ nɛ́, baajáa aɖákaá kɩḿ bawɩ́ɩ badana kɩ hálɩ na sinje kɩna.

Kezeŋa Ɖacɩrɩ‑cɩrɩ ńga: Kanáábɩ́lɛ́ bándayaá sɩsɩ Ɩsɔ́ɔ-dɛ́ɛ Kezeŋa. Kána Ɩsɔ́ɔ na Yeésu bɛgɛ́ɛ kʊ́ɖʊḿ gɛ. Bɩka kánzʊʊ́ wenbá baava Yeésu toovonúm nɛ́ badaá. Kénÿelíi kʊ ɩráa wándɩlɩ́ɩ wenbí bɩrɩ́ŋa bɩgɛ́ɛ toovonúm Yeésu-rɔɔzɩ́ nɛ́, na wenbí Ɩsɔ́ɔ sɔɔlɛ́ɛ nɛ́.

Krísto: Krísto na Mesíya, bɩgɛ́ɛ yɩ́ɖɛ kʊ́ɖʊńɖɛ gɛ. Gɩrɛ́ɛkɩ kʊnʊm-daá gɛ bánÿaá sɩsɩ «Krísto», bɩka Éburu kʊnʊm-daá, bánÿaá gɛ sɩsɩ: «Mesíya.» Bugutoluú gɛ sɩsɩ: «Weení baabɩ́rɩ núm ɩgʊjʊʊ́-rɔ nɛ́.» Yahúúɖuwá-dɛ́ɛ nɛ́, Ɩsɔ́ɔ tɩtɩŋa wánlɩzɩ́ɩ kʊ ɩrʊ́ ɩsɩ́ɩ yɩ Sarásɩ lanɖáa-dɛ́ɛ kʊ́bɔnɩ́, yáá wúro kʊ́bɔnɩ́, yáá anɖébi. Wánlɩzɩ́ɩ yɩ bɩlɛ́ nɛ́, na babɩ́rɩ núm ɩgʊjʊʊ́-rɔ. Núm bánbɩrɩ́ɩ ɩrʊ́ kʊjʊʊ́-rɔ bɩlɛ́ nɛ́ kɛ́ɛ sɔ́ɔ́zɩ gɛ. Bɩlɛ́ bɩ́nwɩlɩ́ɩ kʊ sɩsɩ Ɩsɔ́ɔ waalɩzɩ́ bʊdʊ́ʊ ɩsɩ́ɩ sɩsɩ ɩ́la ɩdɩmɛ́rɛ. Ɩsɔ́ɔ waavʊ́ńɖʊ́ʊ sɩsɩ ɩmʊ́ wɔ́ngɔnɩ́ ikédiri naárʊ ɩkɔ́nɩ ɩlɛ́ɛ ɩdɛ́ɛ zamɔ́ɔ Israyɛ́ɛlɩ, bɩka ɩsɩ́ɩ ɩdɛ́ɛ kowúrɔ́ɔ kɔcɔ́ɔ báa ngbeére bɩvɛ́yɩ́na tɛ́m. Ngɛ weeyéle anɖébiwá ɩŋmátɩ tɔ́m tɩḿ. Bɩdɛ́ɛ ɩrʊ́ ɩmʊ́ gɛ Yahúúɖuwá ɖamáa gɛ bɔ́ndɔ́m sɩsɩ baɖamáa Mesíya bɩlɛ́. Sáa wenkí Ɩsɔ́ɔ waazɩ́ɩ kɩ nɛ́ kɩɩdála nɛ́, ɩrʊ́ ɩmʊ́ wɔɔgɔ́nɩ, ɩnáábɩ́lɛ́ Yeésu bɩlɛ́. Amá na bɩrɩ́ŋa Yahúúɖuwá nɛbɛ́rɛ tafa toovonúm sɩsɩ Yeésu gɛ bɩgɛ́ɛ. Wenbá baava toovonúm nɛ́, bɛlɛ́ boovu ná yɩ. Bɩlɛ́ nɛ́, Krísto tɛkɛ́ɛ Yeésu-dɛ́ɛ yɩ́ɖɛ baalʊ́rʊ yɩ na bafa yɩ ɖɛ nɛ́. Amá, tɩmɛ́rɛ wenɖé waalá ɖɛ nɛ́ weeyele ná ɩwanbaaráa ɩtɩlɩ́ sɩsɩ ɩnáábɩ́lɛ́ weení Ɩsɔ́ɔ waalɩzɩ́ yɩ nɛ́-rɔ gɛ baajáŋ bánÿaá yɩ sɩsɩ Krísto.

Lɛ́ɛ́dɩ: Ɩsɔ́ɔ-dɛ́ɛ Tɔ́m Tákaraɖá-daá, baawɩ́lɩ sɩsɩ ɩráa rɩ́ŋa waalá alaháácɩ́, barɩ́ŋa baazʊ́ʊ Sitáánɩ-dɛ́ɛ nʊ́ʊ́zɩ-daá, ngɛ azáába nimíni ɩ́dánɖɩḿ kɛtɛngɛrɛ nɛ́ ɖamáa na wɛ. Amá, Ɩsɔ́ɔ ɩlɛ́ waabá ɩsɔ́ɔ́lɩ ɩrʊ́ gɛ, ngɛ ɩrʊ́-dɛ́ɛ kɛdɛɛzɩya ńŋɩnáa kana kadaká fɛ́yɩ́ Ɩsɔ́ɔ niíni. Bʊrɔɔzɩ́ gɛ weeyéle Ibiyaalʊ́ Yeésu ɩkɔ́nɩ ɩlá ɩdɩ sarɔ́ɔ, ɩsɩ́ ɖɛ́nɩ abɛlɩ́ akɔ́ɔ-rɔ ɩfɛ́rɛ ɩráa rɩ́ŋa-dɛ́ɛ alaháácɩ́wá-dɛ́ɛ kɩmɛ́rɛ, bɩka ɩlɩzɩ́ wɛ Sitáánɩ nʊ́ʊ́zɩ-daá iboná wɛ Ɩsɔ́ɔ-dɛ́ɛ ɖaána-daá. Bɩlɛ́ gɛ bánÿaá sɩsɩ «lɛ́ɛ́dɩ.» Bɩlɛ́ nɛ́, bɩɩbɔ́ɔ́zɩ gɛ sɩsɩ ɩrʊ́ ɩfa Yeésu toovonúm ifu yɩ na iyuú lɛ́ɛ́dɩ tɩḿ.

Malááyɩ́ka: Ɩsɔ́ɔ waala ná malááyɩ́kawá taká nyazɩ waalá ɩrʊ́ nɛ́. Amá, bɛvɛ́yɩ́na tɔnʊʊ́ nyazɩ ɩrʊ́ wɛná tɔnʊʊ́ nɛ́. Ɩsɔ́ɔ waalá wɛ gɛ ɩsɩ́ɩ wɛ ɩjɔ́ ɩsɔ́ɔ́dáá, bɩka wéndiríi wɛ ɩráa-jɔ́ béngeveerím wɛ wentí weevééri wɛ nɛ́. Bɔ́ngɔnɩ́ ɩráa-jɔ́ nɛ́, sáátɩ nakɩ́rɩ bɔ́ngbɔwʊ́ʊ ɩrʊ́-dɛ́ɛ tɔnʊʊ́ ɖʊɖɔ gɛ babɩ́sɩ ɩráa; sáátɩ nakɩ́rɩ nɛ́, ɖoozire-daá gɛ bánɖʊ́ʊ balɩ́ɩ ɩrʊ́-rɔ baŋmatɩná yɩ. Bɔwɛná bɛdɛ́ɛ kʊ́bɔnáa. Kʊ́bɔnáa bɛḿ badaá, nyánnáa malááyɩ́ka Mukááyilu, na malááyɩ́ka Jibiríílu. Ɩsɔ́ɔ-dɛ́ɛ Tɔ́m Tákaraɖá-daá, a bɔɔdɔ́ sɩsɩ «Ɩsɔ́ɔ-dɛ́ɛ malááyɩ́ka», bɩ́nbɩɩzɩ́ bɩgɛ́ɛ Ɩsɔ́ɔ tɩtɩŋa gɛ bɔɔdɔ́ bɩlɛ́.

Marɩyáma: Marɩyámawá wɔɔɖɔ́ɔ baaŋmátɩ bɔdɔ́m Keɖiyá kɩ́falɔɔ́-dɛ́ɛ tákaraɖá-daá nɛ́. Ɖánnáa Marɩyáma weení waalʊ́rʊ Yeésu nɛ́, Marɩyáma Maárɩtɩ na Lazáarɩ bogoobú, Marɩyáma weení waalɩɩná Magɩdaláa tɛɛbiiyá-daá nɛ́, Marɩyáma Yaakúbu ɩgɔɔ, na Marɩyámawá nɛbɛ́rɛ ɖʊɖɔ. Amá, Marɩyáma Yeésu ɩgɔɔ-dɛ́ɛ tɔ́m gɛ baabá baŋmátɩ bʊɖɔ́ɔ. Galilée laadɔ́ɔ-dɛ́ɛ tɛɛbiiyá nɛkɛ́rɛ gɛ bánÿaá sɩsɩ Nazarɛ́ɛtɩ. Tɛɛbiiyá kɛḿ kadaá gɛ Marɩyáma ɩmʊ́ ɩvʊnwɛ, bɩka báńváa yɩ Ísifu ɩlɛ́ sɩ ɩkpɔ́ɔ yɩ. Ísifu ɩmʊ́ ɩgɛ́ɛ kááfɩ́nta gɛ. Bɔdɔkpɔɔ tá yɩ ɩbɩ́sɩ Ísifu-jɔ́ gɛ Ɩsɔ́ɔ-dɛ́ɛ malááyɩ́ka wɔɔgɔ́nɩ ɩjɔ́ ifééri yɩ sɩsɩ wɛ́nÿɛɛ́ fuwá ɩlʊ́rʊ bú abaalʊ́ na ɩfa bú ɩmʊ́ yɩ́ɖɛ sɩsɩ Yeésu. Ɩ́na Ísifu bodoyóózi alʊ́ na abaalʊ́ naanɩ́ ɩyɛ́ɛ fuwá kɛḿ. Ɩsɔ́ɔ tɩtɩŋa-dɛ́ɛ maamááci gɛ bɩgɛ́ɛ. Wɛɛyɛ́ɛ fuwá kɛḿ wɔ́rɔ́ nɛ́, woobó ɩkɔ́jɔ́ɔ ɩbɛ́ɛ́ŋ Elizabɛ́ɛtɩ weení sáátɩ kɩḿ ɩyɛ́ɛ́na anɖébi Yaayá-dɛ́ɛ fuwá nɛ́. Elizabɛ́ɛtɩ ɩmʊ́ waayáa ná yɩ sɩsɩ «Mádʊ́ʊ ɩgɔɔ.» Sáátɩ wenkí Yeésu waabɩ́ɩ ngɛ sɩ balá hiije nakɩ́rɩ Kána tɛɛbiiyá-daá gɛ baayáa yɩ nɛ́, ɩgɔɔ Marɩyáma woobó kɩ ɩ́na yɩ. Baagá Yeésu ɖɛ́nɩ abɛlɩ́ akɔ́ɔ-rɔ nɛ́, Marɩyáma ɩmʊ́ ɩzɩ́ŋɛ́ɛ ná ɩdɛɛzɩ́. Yeésu waabɩ́sɩ ɩkpa ɩsɔ́ɔ́dáá wɔ́rɔ́ nɛ́, Marɩyáma ɩmʊ́ wɔɔgbɔ́ɔ ɩdɩ ɩtasɩná Yeésu-dɛ́ɛ wanbaaráa.

Máánɩ: Sáátɩ wenkí Israyɛ́ɛlɩ ńba waalɩ́ɩ Mɩ́sɩra ńba nʊ́ʊ́zɩ-daá yoḿti-daá nɛ́, tɛɛwʊ́lɔ́ɔ́-daá gɛ bɛɛɖɛ́ɛ bawalɩ́ hálɩ bɩ́ɩ́zɩ nɛɛ́lɛ (40). Bɔwɛ ńna bɩlɛ́ nɛ́, kíɖíídi fɛ́yɩ́, Ɩsɔ́ɔ tɩtɩŋa wánváa kʊ wɛ kíɖíím wɩ́rɛ báa wenɖé, Fɛɛzɩrɛ wɩ́rɛ riké gɛ ɩ́dánváa wɛ. Kíɖíím bɩḿ gɛ bánÿaá sɩsɩ «Máánɩ.»

Mesíya: Ɩgɛ́bɛɛŋ wentí ɖááŋmátɩ bɩgadamáána Krísto nɛ́, bɩnáábɩ́lɛ́ Mesíya ɖʊɖɔ.

Mɩ́sɩra: Mɩ́sɩra kɛ́ɛ laadɔ́ɔ kʊ́bɔńga Áfírika laadɔ́ɔ-dɛ́ɛ fúu ɩsɔ́ɔ́dáá gɛ. Mɩ́sɩra laadɔ́ɔ-dɛ́ɛ kowuro-yɩ́ɖɛ gɛ Farawʊ́na. Ɖoo Yaakúbu bándayaá yɩ ɖʊɖɔ sɩsɩ Israyɛ́ɛlɩ nɛ́ ibiyaalʊ́ Ísifu-dɛ́ɛ sáátɩ gɛ nyɔɔ́sɩ kʊ́bɔńzɩ nasɩ́rɩ waazʊ́ʊ tɛ́ɛ́dɩ, hálɩ biyéle Yaakúbu na igoobíre rɩ́ŋa bakágʊ́rʊ́ bɔkɔ́nɩ bosúu Mɩ́sɩra laadɔ́ɔ-daá Ísifu-jɔ́. Bɔɔjɔ́ɔ ńna hálɩ babá balʊ́rʊ babɩ́sɩ zamɔ́ɔ kʊ́bɔńgɩ. Bɩ́ɩ́zɩ kákpɩ́ɩ́zɩ nasɩ́lɛ (400) gɛ bɔɔjɔ́ɔ Mɩ́sɩra; Mɩ́sɩra ńba ɩkɔ́nɩ babɩsɩná wɛ bɛdɛ́ɛ yomáa. Baana kʊnyɔḿ páá hálɩ bɩtála sáátɩ wenkí Ɩsɔ́ɔ waalɩzɩ́ Múúsá sɩsɩ ɩkálɩ́zɩ́ wɛ Mɩ́sɩra ɩkɔná wɛ laadɔ́ɔ wenká waavʊ́ńɖuuná bajaájaanáa sɩsɩ wénÿelíi beɖi kɛ tííbí nɛ́ kadaá. Ɩsɔ́ɔ ɩmʊ́ ɩdɩtɩŋa wɛɛgɛ́dɛ́ná wɛ nɩ́bááwʊ, hálɩ ɩkpa tenkú kɩ́sɛɛmʊ́ʊ bánÿaá kɩ ɖʊɖɔ sɩsɩ ɖɩgɛrɛ́ tenkú nɛ́ kɩdɛ́ɛ lɩ́m bɩsɩ́ŋ fúu cé ná cé bɩka Israyɛ́ɛlɩ bíya ɩnʊ́ŋ bɛtɛ́sɩ wɩlɩ́ŋa-daá.

Núhum: Núhum-dɛ́ɛ alɩwáátɩ, ɩráa ɩbá gɛ bánlám kidaavééníti páá, bádánnɩɩná Ɩsɔ́ɔ. Núhum riké gɛ ɩrʊ́ weení ɩbá ɩzɩɩzɛ́ɛ bɩka wánnɩɩ́ Ɩsɔ́ɔ-dɛ́ɛ nɩdáárɛ nɛ́. Ɩráa-dɛ́ɛ kidaavééníti-rɔɔzɩ́, Ɩsɔ́ɔ waaɖʊ sɩsɩ wónnuudí ɩráa na wenbí bɩrɩ́ŋa waalá bɩ taká bʊwɛ ɖúúlínya-daá nɛ́, bɩka ɩbáázɩ ɖúúlínya kɩ́falʊʊ́ lám. Ngɛ weeyéle Núhum, ɩrʊ́ weení iriké ɩzɩɩzɛ́ɛ na kʊ nɛ́ ɩká mɛ́ɛ́lɛ kʊ́bɔńgɩ. Ɩlɛ́ waagá kɩ nɔ́ɔ́ ńŋɩnáa wenbí Ɩsɔ́ɔ waawɩ́lɩ yɩ sɩsɩ ɩ́la nɛ́. Ngɛ wɛɛdɛ́ nɛ́, wɔɔdɔ́ yɩ ɩsʊ́ʊ kɩdaá, ɩ́na ɩɖɛɛlʊ́ na ibíya toozóóní na bɛlɛ́ bɛɖɛɛlɩnáa; ɩwɩ́lɩ yɩ fʊ́ńdɩ kpɩná weená ɩ́ta ɩɖʊ kɩdaá nɛ́. Núhum waagbɩ́ɩ́rɩ bɩrɩ́ŋa bɩtɛ́ nɛ́, ngɛ Ɩsɔ́ɔ weeyéle tɛ́ɛ́wʊ kʊ́bɔńgɩ ɩnɩ́ɩ adɛ laadɔ́ɔ-rɔ lɩ́m isu bɩwáálɩ adɛ, bɩkpa hálɩ bɩcɛzɩ́ bʊ́ʊ́nɩ kʊ́bɔńdɩ. Ɩráa, fʊ́ńdɩ kpɩná ɖaána ńná na fɔɔ́-daá ńná, siḿsi, tɩ́ɩ́nɩ, na wenbí bɩrɩ́ŋa bínweezí bʊwɛ adɛ laadɔ́ɔ-rɔ nɛ́, bɩrɩ́ŋa bɩɩzɩ́. Tɛ́ɛ́wʊ waanɩ́ɩ kɩcɛ́ nɛ́, bɩɩgbɔ́ɔ irodunáa ɖabata naanɩ́ lɩ́m ɩsɔ́ɔ bɩ́nnáa adɛ. Ngɛ Núhum na wenbá barɩ́ŋa baazʊ́ʊ mɛ́ɛ́lɛ-daá nɛ́, baalɩ́ɩ. Núhum waazá Ɩsɔ́ɔ, káma wɛɛlɛ́ɛ wɛ iyéle balɩɩ ná alaafɩ́ya nɛ́ bʊrɔ, ngɛ waalá yɩ sarɔ́ɔ. Ngɛ Ɩsɔ́ɔ wooɖuuná Núhum sɩsɩ ídéndeyelí lɩ́m inúúdi adɛ laadɔ́ɔ ɖʊɖɔ. Ngɛ waalɩzɩ́ kééwúré ɩtɔ́ sɩsɩ wentí ɩmʊ́ wooɖuuná nɛ́-dɛ́ɛ seríya nbɩlɛ́.

Olivíyée: Olivíyée kɛ́ɛ tɩɩwʊ́ gɛ. Yahúúɖuwá wánlanáa kɩdɛ́ɛ bíya núm. Bɩka kɩdɛ́ɛ núm kɛ́ɛ núm kazɔ́ɔ ńbɩ gɛ. Bénɖináa bɩ kíɖíím, bɩka bánɖʊ́ʊ bɩ kpɩná ɖabata-daá. Yahúúɖuwá tabá bamʊʊzɩná núm bɩḿ bɩdɔ́m. Olivíyée tɩɩwʊ́ ɩbá kínleerí gɛ, kɩ́dánzɩḿ ɖasam. Bʊ́ʊ nakɩ́rɩ wɛ Yahúúɖuwá-dɛ́ɛ ńna, bánÿaá kɩ sɩsɩ «Olivíyée tɩ́ɩ́nɩ bʊ́ʊ.» Tɩ́ɩ́nɩ tɩḿ tɩbá tɩwɛ ńna gɛ bʊɖɔ́ɔ, biiyéle bánÿaá bʊ́ʊ kɩḿ bɩlɛ́.

Sadusée ńba: Yahúúɖuwá-dɛ́ɛ aɖííni-dɛ́ɛ bɔwʊ́ɖɛ neɖére nbɩlɛ́. Bánwɩlɩ́ɩ ɩráa Ɩsɔ́ɔ-dɛ́ɛ tɔ́m ńŋɩnáa Faríizi ńba wánlám nɛ́. Babá bánjáádɩ gɛ sɩsɩ bofu Múúsá-dɛ́ɛ Mará ńŋɩnáa bɩɩbɔ́ɔ́zɩ nɛ́. Bádánjaa Faríizi ńba-dɛ́ɛ tɔ́m káma bɛlɛ́ bónzuurí caájaanáa-dɛ́ɛ taáɖɛ-dɛ́ɛ sɔ́ɔ́zɩwá Mará-daá. Bɔlɔwʊtáá, Ɩsɔ́ɔ-dɛ́ɛ sarásɩ lanɖáa ɩbá gɛ bɔwɛ bʊɖɔ́ɔ. Bánwɩlɩ́ɩ badɩ bɩka munááfíísi wɛ bɔjɔ́ ńŋɩnáa Faríizi ńba. Sadusée ńba wánwɩlɩ́ɩ sɩsɩ a ɩrʊ́ waazɩ́ bɩɩdɛ́ nɛ́ bɩɩdɛ́ gɛ, bugúti bɩvɛ́yɩ́ sɩsɩ wɩ́rɛ neɖére, wɔ́ngɔnɩ́ ifé; sɩsɩ sɩ́m wɔ́rɔ́, weezuú kɩ́falʊʊ́ nakɩ́rɩ tɛfɛ́yɩ́ ɖʊɖɔ. Bɩka bánwɩlɩ́ɩ ɖʊɖɔ sɩsɩ malááyɩ́kawá fɛ́yɩ́.

Samarɩ́ya: Yahúúɖuwá-dɛ́ɛ fáráńdɩ́ nakɩ́rɩ-dɛ́ɛ yɩ́ɖɛ nbɩlɛ́. Samarɩ́ya laadɔ́ɔ wɛ Yudée na Galilée bɔlɔwʊtáá gɛ. Aɖííni-dɛ́ɛ nɩ́bááwʊ-daá nɛ́, Múúsá-dɛ́ɛ tákaraɖáwá nʊʊwáánɩ́ ɖánÿaá tɩ sɩsɩ Tawʊráatɩ nɛ́ riké gɛ Samarɩ́ya ńba ɖɔ́kɩná sɩsɩ Ɩsɔ́ɔ-dɛ́ɛ tɔ́m. Bɩɩgɔ́nɩ sáátɩ nakɩ́rɩ Samarɩ́ya ńba-dɛ́ɛ abaaláa wɔ́ngbɔwʊ́ʊ yíriwá natɩ́rɩ-dɛ́ɛ aláa. Biiyéle Yahúúɖuwá baaganáa bɛɛ́na wɛ sɩsɩ bɛdɛkɛ́ɛ Yahúúɖuwá tɩtɩŋa, bɩka bɛ́ngbɛɛnáa wɛ hálɩ bʊɖʊ báɖáárɛ bɔlɔwʊtáá.

Sarásɩ ɖaalanɖɛ́: Ɖoo nɛ́, Yahúúɖuwá wángaá bɔ́ gɛ buwóro bɩka bɩwála nyazɩ kpɩndɩnʊʊ́ bɩlɛ́ bánlám Ɩsɔ́ɔ sarásɩ kɩrɔɔzɩ́. Sarɔ́ɔ báa wenká na kaɖaalanɖɛ́: fʊ́ńdɩ kpɩná-dɛ́ɛ sarɔ́ɔ ɖaalanɖɛ́ wɛ, fɔɔ́-daá kíɖíídi-dɛ́ɛ sarɔ́ɔ ɖaalanɖɛ́ wɛ, bɩlɛ́ ɖʊɖɔ gɛ tulaarɩ́wá-dɛ́ɛ sarɔ́ɔ ɖaalanɖɛ́ ɖʊɖɔ wɛ.

Sarásɩ lanɖʊ́: Yahúúɖuwá fʊnwɛná wenbá bánlám Ɩsɔ́ɔ sarásɩ nɛ́. Ɩsɔ́ɔ-dɛ́ɛ Ɖaána kʊ́bɔńga-daá gɛ bánlám sɩ. Bɔwɛná bɛdɛ́ɛ kʊ́bɔnɩ́. Ɩlɛ́ gɛ bánÿaá sɩsɩ sarásɩ lanɖáa rɩ́ŋa-dɛ́ɛ kʊ́bɔnɩ́. Léévi kutoluú-dɛ bú Árʊ́ʊ́na bíya‑bíya-daá gɛ bánlɩzɩ́ɩ bɩdɛ́ɛ ɩrʊ́. Kʊ́ɖʊńbɩ kóŋ́ gɛ Ɩsɔ́ɔ-dɛ́ɛ sarásɩ lanɖáa rɩ́ŋa-dɛ́ɛ kʊ́bɔnɩ́ wánzʊʊ́ Ɩsɔ́ɔ-dɛ́ɛ Ɖaána kʊ́bɔńga-daá lénlé bánÿaá sɩsɩ Ɖacɩrɩ‑cɩrɩ páá ɖɩdáarɛ nɛ́ ɩlá Ɩsɔ́ɔ alaháácɩ́wá cɛ́m-dɛ́ɛ sarɔ́ɔ, ɩdɩtɩŋa na zamɔ́ɔ rɩ́ŋa-rɔɔzɩ́.

Sinayíi: Bʊ́ʊ nakɩ́rɩ-dɛ́ɛ yɩ́ɖɛ nbɩlɛ́. Bʊ́ʊ kɩḿ kɩrɔ gɛ Ɩsɔ́ɔ waalɩzɩ́ ɩdɩ ɩwɩ́lɩ Múúsá. Kɩrɔ ɖʊɖɔ gɛ Ɩsɔ́ɔ weejéle Múúsá ɩdɛ́ɛ Mará.

Sitáánɩ: Sitáánɩ kɛ́ɛ Ɩsɔ́ɔ-dɛ́ɛ báɖaa gɛ. Zííniwá rɩ́ŋa-dɛ́ɛ wúro nbɩlɛ́. Wɛ́nbɛlɩ́ɩ ɩráa bʊbɔ́tɩ gɛ wénÿelíi bánlám wenbí bidaavé nɛ́. Ɩdɛ́ɛ yɩ́ɖɛ neɖére ɖʊɖɔ gɛ Bɛlɩzebúuli.

Siyɔ́ɔnɩ: Yahúúɖuwá-dɛ́ɛ laadɔ́ɔ-daá buurásɩ-daá nɛkɛ́rɛ-dɛ́ɛ yɩ́ɖɛ gɛ Siyɔ́ɔnɩ. Buurɔɔ́ kɛḿ kɔrɔɔzɩ́ gɛ Yerusalɛ́ɛm tɛ́ɛ́dɩ wɛ. Bʊrɔ gɛ Yahúúɖuwá-dɛ́ɛ, a ɩrʊ́ sɩ ɩɖɛ́ɛ Yerusalɛ́ɛm, wɔ́ndɔ́m gɛ sɩsɩ wángbáa Yerusalɛ́ɛm. Buurɔɔ́ kɛḿ kɔrɔ ɖʊɖɔ gɛ baama Ɩsɔ́ɔ-dɛ́ɛ Ɖaána kʊ́bɔńga. Yahúúɖuwá-jɔ́ nɛ́, Siyɔ́ɔnɩ kɛ́ɛ na ɖacɩrɩ‑cɩrɩ ɖɩdáarɛ lé Ɩsɔ́ɔ wɛ nɛ́. Siyɔ́ɔnɩ waabɩ́sɩ ɖʊɖɔ Yerusalɛ́ɛm tɛ́ɛ́dɩ-dɛ́ɛ yɩ́ɖɛ neɖére ɖʊɖɔ gɛ. Bɩka Ɩsɔ́ɔ-dɛ́ɛ Tɔ́m Tákaraɖá-daá, a sɩ baŋmátɩ bɔtɔ́ sɩsɩ Yerusalɛ́ɛm ɩsɔ́ɔ́dáá ńgɩ, yáá sɩ bayáa ɩsɔ́ɔ́dáá lénlé Ɩsɔ́ɔ wɛ nɛ́, Siyɔ́ɔnɩ gɛ bɔ́ndɔ́m.

Sulemáana: Wúro Ɖáwʊɖa biyaalʊ́ nbɩlɛ́. Ɖáwʊɖa sɩ́m wɔ́rɔ́ nɛ́, ɩlɛ́ weeɖi ná. Wúro Sulemáana waama ná Ɩsɔ́ɔ-dɛ́ɛ Ɖaána kʊ́bɔńga kaɖaa ńga.

Tɛɛwʊ́lɔ́ɔ́: Ɩsɔ́ɔ-dɛ́ɛ Tɔ́m Tákaraɖá-daá, faɖáma wenkí kɩdaá Múúsá na Israyɛ́ɛlɩ bíya bɔɔjɔ́ɔ bɩ́ɩ́zɩ nɛɛ́lɛ nɛ́ gɛ baayáa bɩlɛ́. Ńna gɛ Ɩsɔ́ɔ weeɖi keɖiyá ɩ́na ɩdɛ́ɛ zamɔ́ɔ. Faɖáma kɩḿ kɩdaá gɛ Ɩsɔ́ɔ-dɛ́ɛ bʊ́ʊ kʊ́bɔńgɩ bánÿaá kɩ sɩsɩ Sinayíi nɛ́ wɛ.

Tikée mʊʊrʊ́, Tikée mʊʊráa: Róóma ńba wooyóo Yahúúɖuwá beɖi wɛ nɛ́, baabɩsɩ ná Yahúúɖuwá-dɛ́ɛ laadɔ́ɔ-rɔ bɛɛŋɩráa. Bɔ́ngbɔwʊ́ʊ tɛ́ɛ́dɩ-bíya tɩmɛ́rɛ bɩka bɔ́nbɔɔzɩ́ bogoobíya Yahúúɖuwá lanpóo, bɩka ɖʊɖɔ bánmʊ́ʊ wɛ tikée kɩyáánɩ-daá, na kpɩná ndɩ‑ndɩ-rɔɔzɩ́. Wenbí nɛ́ basɩŋná wenbí baaɖʊ wɛ sɩsɩ bámʊ́ ɩráa-jɔ́ nɛ́, boogúti gɛ bónzuurí bánzɩɩ́ badɩ. Biiyéle Yahúúɖuwá tánbá bacáa wenbá bánlám tɩmɛ́rɛ ɖɩḿ nɛ́. Káma bánlám báɖaa bɔwʊtá, bɩka bánŋmɩɩlɩ́m tɛ́ɛ́dɩ-bíya.

Tɩndʊ́ʊ, tɩndɩnáa: Wanbaaráa fuú na nɔɔ́lɛ wenbá Yeésu waalɩzɩ́ wɛ ɩ́na wɛ bɔwɛ, bɩka wéndiríi wɛ Ɩsɔ́ɔ-dɛ́ɛ kowúrɔ́ɔ-dɛ́ɛ Laabáárʊ Kífeńgi feerím nɛ́ gɛ bánÿaá sɩsɩ Tɩndɩnáa.

Víinyi: Víinyi kɛ́ɛ fɔɖɔɔ́ gɛ, bɩka kánɖʊ́ʊ bíya. Sʊlʊ́m gɛ bánlanáa kɛdɛ́ɛ bíya. Yahúúɖuwá ɩbá bánvarɩ́m kɩ páá, bɔ́nnyɔɔzɩ́ kɛ gɛ na kabá kaɖʊ kazɔ́ɔ.

Wenbí bɩzɩɩzɛ́ɛ nɛ́: Wenbí bɩrɩ́ŋa Ɩsɔ́ɔ ɩzá-daá, bɩmɔɔ́ɔ, bɩjɔɔ́ɔ ɖéyí-ɖéyí, bɩgɛ́ɛ toovonúm nɛ́ sɩɩzɛ́ɛ na kʊ. Ɩrʊ́ igunááɖam-dɛ́ɛ cɔwʊrɛ, na ɩlakásɩ, na ilomaazɛ́-daá, nabʊ́rʊ fɛ́yɩ́ bɩzɩɩzɛ́ɛ Ɩsɔ́ɔ ɩzá-daá nɛ́ (Róm 3.9-18.) Krísto weení ɩvɛ́yɩ́na alaháácɩ́ nɛ́, waamʊ ɩráa-dɛ́ɛ alaháácɩ́wá ɩsʊ́ʊ ɩdɩ ɩsɩ́ bɛdɛ́ɛ sɩ́m ɖɛ́nɩ abɛlɩ́ akɔ́ɔ-rɔ, na ɩlɩzɩ́ wɛ alaháácɩ́-daá. Biiyéle weení ɩrɩ́ŋa waava Krísto toovonúm nɛ́ iriké gɛ Ɩsɔ́ɔ bɛɛ́na sɩsɩ ɩzɩɩzɛ́ɛ waazá-daá.

Yanɛ́ɛsɩ na Yanbɩrɛ́ɛsɩ: Ɩráa bɛḿ bɛlɛ́ɛ́nɩ́ bavʊngɛ́ɛ síhíri-dɩnáa gɛ Mɩ́sɩra wúro Farawʊ́na-dɛ́ɛ ɖaána-daá. Ngɛ baagʊrʊ́na anɖébi Múúsá. Yahúúɖuwá-jɔ́ nɛ́, ɩráa bɛḿ bɛlɛ́ɛ́nɩ́ baabɩ́sɩ gɛ nyazɩ anɖébiwá bʊbɔtɩnáa ɩgɔɔ na bajaa. Ɖoo Yahúúɖuwá ɩjaájaanáa-jɔ́ gɛ bánvʊnmaazɩ́ sɩsɩ baalá lɔ́nɩ basʊ́ʊ Israyɛ́ɛlɩ bíya lɔwʊtáá ngɛ baajáa nɩ́báánɩ ndɩ‑ndɩ sɩ bɛtɛlɛ́sɩ wɛ. Bɩdɛ́ɛ nɩ́bááwʊ-daá gɛ beeyéle bacáa siká bofóózi balá naabiiyá sɩsɩ Israyɛ́ɛlɩ bíya ikúu kɛ tɛ́ɛ́dɩ.