Kɩwɩlʊʊ i

Kɩwɩlɩwʊ

bɩɩlɩzɩ́ bɩwɩ́lɩ Yʊháánɩ nɛ́

Naanɩ́ na ɖɩbáázɩ nɛ́

Kɩwɩlɩwʊ Yeésu Krísto waalɩzɩ́ kɩ ɩwɩ́lɩ tɩndʊ́ʊ Yʊháánɩ nɛ́-dɛ́ɛ tákaraɖá kɩna,

Yʊháánɩ,

Yeésu Krísto ɩmʊ́ ɩdɛ́ɛ tɩndʊ́ʊ,

waaŋmáa ná kɩ.

Waaŋmáa kɩ nɛ́,

báńgbáa yɩ bɛɖɛɛná laadɔ́ɔ lɩ́m waalára bɩmɩlɩná kɛ,

bánÿaá kɛ sɩsɩ Patɩmɔ́ɔsɩ nɛ́ kadaá nbɩlɛ́;

káma,

waaŋmátɩ Ɩsɔ́ɔ-dɛ́ɛ tɔ́m bɩka ɩlɩzɩ́ seríya sɩsɩ Yeésu kɛ́ɛ na toovonúm nɛ́-rɔɔzɩ́.

Bɩdɛ́ɛ sáátɩ kɩḿ nɛ́,

Róóma wúro kʊ́bɔnɩ́ weení wénɖíi nɛ́,

ɩbá wánnaazɩ́ Krísto ńba páá,

káma,

bádánjaa bokúu yɩ tɛ́ɛ́dɩ nɛ́-rɔɔzɩ́.

Krísto ńba sɩ́ŋɛ́ɛ sɩsɩ Yeésu Krísto riké gɛ Lɛɛrʊ́ na Badʊ́ʊ nɛ́,

iriké gɛ bɩmɔɔ́na bokúu tɛ́ɛ́dɩ.

Tɩndʊ́ʊ Yʊháánɩ waaŋmáa kɩ gɛ sɩ ɩkpaazɩ ná wɛ ɖóni;

wándasɩ́ wɛ tɔ́m sɩsɩ na bɩrɩ́ŋa ɩráa wánnaazɩ́ wɛ Yeésu-rɔ nɛ́,

bɔ́ɖɔkɩ toovonúm baava Yeésu ɩmʊ́ nɛ́,

na tamɔ́ɔ bɔjɔɔ́ɔ na yɩ nɛ́ bɩcáárɩ.

Káma,

Yeésu wénɖíi ɩbáɖaanáa rɩ́ŋa bɩka ɩfa bɛḿ wenbá bovóo yɩ nɛ́ weezuú kɩ́dɛ́ndɛŋ́ nɛ́.

Wánvɩɩzɩ́ bɛdɛ́ɛ nzʊlʊ́m,

wɛ́nvɛɛzɩ́ bewenbé,

bɩka bána yɩ na Ɩsɔ́ɔ bɔcɔ́ɔ arɩjáńna-daá.

Bɔ́njɔwʊ́ʊ Yerusalɛ́ɛm tɛ́ɛ́dɩ kɩ́fatɩ-daá báa ngbeére bɩ́dɛ́ndɛŋ́,

bɩka ɩɖʊ ɩbáɖaanáa rɩ́ŋa nimíni ɩ́dánɖɩḿ kɛtɛngɛrɛ nɛ́ ɩdaá.

Ɩbáɖaanáa bɛḿ gɛ Sitáánɩ na ɩdɛ́ɛ malááyɩ́kawá rɩ́ŋa,

na wenbá beegízi Yeésu nɛ́.