Kɩwɩlʊʊ 4

Nŋɩ́nɩ́ bónguú Ɩsɔ́ɔ tɛ́ɛ́dɩ ɩsɔ́ɔ́dáá nɛ́

1 Bɩlɛ́ bʊwɔ́rɔ́ nɛ́,

ngɛ bɩɩdásɩ bɩlɩzɩ́ nabʊ́rʊ bɩwɩ́lɩ ma:

mááná baadʊlʊ́ ɖaḿ wɔnɔɔ́ nɛkɛ́rɛ ɩsɔ́ɔ́dáá.

Ngɛ lowú wenkí máávʊ́ńnɩɩ kɩ́nŋmatɩnáa ma kɩjɔɔ́ɔ nyazɩ ɖɩgandɩ́rɛ bɩlɛ́ nɛ́,

kɩɩdɔ́ ma sɩsɩ:

«Kagba mɔ́jɔ́ cé na mawɩ́lɩ nya wenbí bɩgɛgɛrɛŋɛ nɛ́.»

2 Ńna‑ńna gɛ bɩɩlá ma nyazɩ Ɩsɔ́ɔ-dɛ́ɛ Kezeŋa Ɖacɩrɩ‑cɩrɩ ńga waagba ma bɩlɛ́.

Ngɛ mááná kowuro-gbelé ɩsɔ́ɔ́dáá,

bɩka naárʊ cɔɔ́ɔ ɖɩrɔ.

3 Weení ɩjɔɔ́ɔ ɖɩrɔ nɛ́,

wénɖée nyazɩ bʊ́ʊ́rɛ kífenveńɖe bánÿaá ɖɛ yaásɩpɩ nɛ́,

na bʊ́ʊ́rɛ kífenveńɖe bánÿaá ɖɛ sarɩdʊ́wáanɩ nɛ́.

Ngɛ kééwúré waalára ɖɩmɩlɩná kowuro-gbelé ɖɩḿ;

kééwúré ɖɩḿ ɖínɖée nyazɩ bʊ́ʊ́rɛ kífenveńɖe bánÿaá ɖɛ emeróodɩ nɛ́.

4 Ngɛ baazɩ́ɩ kowuro-gbelásɩ ákoowú na nasɩ́náázá nasɩ́rɩ sɩlára sɩmɩlɩná kowuro-gbelé ɖɩḿ,

kʊ́bɔnáa ákoowú na nɔɔ́náázá cɔɔ́ɔ sɩrɔ bozóóna kpɩná kʊ́fʊlʊmá;

bɩka kʊ́bɔnɩ́ báa weení fóo na kowuro-vulɔɔ́ siká ńga.

5 Bɩɩbá bɩ́nnyaláázɩ bíngoó,

bɩka kpálálayáawá wɔ́nvɔ́ɔ bɩ́ngalɩɩnáa kowuro-gbelé fáráńdɩ́.

Fɩtɩ́lawá lʊbɛ cɔɔ́ɔ ɖɩɩzá-daá ńna tɩɩbá tínɖée,

fɩtɩ́lawá tɩḿ nɛ́,

Ɩsɔ́ɔ-dɛ́ɛ kezéézi lʊbɛ sɩḿ nbɩlɛ́.

6 Nabʊ́rʊ wɛ kowuro-gbelé ɩzá-daá bɩjɔɔ́ɔ nyazɩ lɩɩrɛ́ ɖɩdɛ́ɛ lɩ́m ɩbá bɩjɔɔ́ɔ kélé‑kélé nyazɩ gáráwʊ́ bɩ́nnáa kɩdaá na kɩwɔ́rɔ́ nɛ́.

Weezuú kpɩná nánásá,

waalára amɩlɩná kowuro-gbelé.

Báa wenɖé ɩzá-daá na ɖɩwɔ́rɔ́,

ɩzá bíya riké wɛ ná.

7 Weezuú kpɩ́nɖɛ kaɖaa ńɖɛ waalɩ́ɩ gúúní,

sɩɩlɛ ńɖɛ waalɩ́ɩ naavalʊ́ abaalʊ́,

toozo ńɖɛ ɩzá-daá waalɩ́ɩ ɩrʊ́,

bɩka naaza ńɖɛ waalɩ́ɩ siḿka keezíre kaagʊrʊ́ ɩsɔ́ɔ́dáá nɛ́.

8 Weezuú kpɩná nánásá amʊ́ adaá báa wenɖé wɛná kelíni loɖo.

Kelúu báa wenkí-rɔɔzɩ́ rɩ́ŋa na kɩdaá rɩ́ŋa,

ɩzá bíya wɛ.

Nuvoowú na ɩdaawʊ́,

bɩlɛ́ gɛ alaána ŋmatɩrɛ sɩsɩ:

«Ɖacɩrɩ‑cɩrɩ,

ɖacɩrɩ‑cɩrɩ,

ɖacɩrɩ‑cɩrɩ gɛ Ɖádʊ́ʊ Ɩsɔ́ɔ kɛ́ɛ,

ɩnáábɩ́lɛ́ Yíko rɩ́ŋa-dʊ́ʊ.

Ɩnáábɩ́lɛ́ weení ɩvʊnwɛ,

na weení ɩwɛ bɩka ɩdanáábɩ́lɛ́ weení ɩgɛgɛrɛŋɛ nɛ́!»

9 Báa sáátɩ wenkí gɛ weezuú kpɩná ana ánzám,

ánɖɔɔzɩ́ bɩka ánzɛɛ́ weení ɩjɔɔ́ɔ kowuro-gbelé-rɔ nɛ́ kɩzɛɛwʊ,

ɩmʊ́ weení ɩwɛ ɩvɛ́yɩ́ sɩ ɩsɩ́ nɛ́,

10 kʊ́bɔnáa ákoowú na nɔɔ́náázá bana bángám baɖʊná-rɔ waazá-daá gɛ bónguú ɩmʊ́ weení ɩwɛ ɩvɛ́yɩ́ sɩ ɩsɩ́ nɛ́ tɛ́ɛ́dɩ,

bɩka bónvulúu bogowuro-vulásɩ bɔ́nlɔ́ɔ kowuro-gbelé ɩzá-daá bánŋmatɩ́ sɩsɩ:

11 «Ɖádʊ́ʊ Ɩsɔ́ɔ,

nyɔ́mɔ́ɔ́na basá nya,

bɔɖɔ́ɔ́zɩ nya bɩka batɩlɩ́ sɩsɩ nyánáábɩ́lɛ́ yíko-dʊ́ʊ.

Káma,

nyáálá ná báa wenbí taká.

Nyɔ́ɔ́zɔ́ɔ́lɩ ná sɩ bɩcɔ́ɔ gɛ nyáálá bɩ taká.»