Yaakúbu wánbasɩ́ ɖɔ́ɔ́lɛ-dɩnáa
5
1 Lɛlɛɛɖɔ́ nɛ́,
mɩ́nyɔ́ɔ́ liideé-dɩnáa,
iwélesi ma kazɔ́ɔ.
Iwíi,
ɩmá kebísi nbusúwá sɩ tití mɩ́rɔ́ nɛ́ tɩrɔɔzɩ́.
2 Mɩ́dɛ́ɛ ɖɔ́ɔ́lɛ waaɖazɩ́,
ngɛ siizeeyá wɔɔdɔ́ɔ mígúsúúdi.
3 Mɩ́dɛ́ɛ siká na mɩ́nyɩɩrɩ́tɩ kʊ́fʊlʊńtɩ waagba korɔ́ɔ,
ngɛ korɔ́ɔ kɛḿ sɩ kakʊ ná mɩ́dɔ́m,
kɔ́ndɔwʊ́ʊ mɩ́dɔnɩ́nɩ nyazɩ nimíni wénɖée ɩrʊ́ nɛ́.
Na bɩrɩ́ŋa ɖúúlínya wɛ́nɖɛɛ́ tɛ́m nɛ́,
mɩ́ɩ́gɔrɔ́sɩ ɖɔ́ɔ́lɛ ɩmáárɩ ɩsɩ́ɩ.
4 Tɩmɛlanɖáa baalɩzɩ́ mɩ́ɩ kíɖíídi mɩ́vásɩ-daá nɛ́,
míígízi mɩ́dɛ́fɛ́rɛ wɛ.
Bɛlɛ́ bɔwɛ bɛ́nmɛɛdɩ́.
Bɛdɛ́ɛ agogo waagádala Ɖádʊ́ʊ Ɩsɔ́ɔ yíko rɩ́ŋa-dʊ́ʊ.
5 Mɩ́ɩ́jɔ́ɔ adɛ laadɔ́ɔ-rɔ iɖi niíni,
ɩlá wenbí mílówú fáa bɩ nɛ́.
Mííɖí ɩlá núm nyazɩ fʊ́ńdɩ kpɩná tɩɖamáa wɩ́rɛ wenɖé sɩ bakʊ tɩ nɛ́.
6 Ɩráa badalá taalɩ́ nakɩ́rɩ nɛ́,
mɩ́ɩ́gʊ bɔdɔ́m,
ɩkʊrʊ́ ɩkʊ wɛ basɩ́,
badabɩ́ɩ́zɩ bakʊrʊ́ basɩŋná mɩ́ɩ.
Ɖádʊ́ʊ-dɛ́ɛ kabɩsɩ́ waajʊ́ʊ
7 Bɩlɛ́ nɛ́,
mogoobíya,
iɖi suúru hálɩ Ɖádʊ́ʊ ɩkɔ́nɩ.
Ɩbɛɛŋná faɖʊ́ wénɖíi suúru ɩɖamáa sɩsɩ ɩlɩzɩ́ ɩdɛ́ɛ kíɖíídi kazɔ́ɔ ńdɩ ɩvɔɔ́-daá nɛ́.
Wénɖíi suúru bɩlɛ́ gɛ tɛ́ɛ́nɩ kaɖaa ńdɩ ɩbáázɩ hálɩ kɛdɛɛzɩya ńdɩ ɩkɔ́nɩ tɩɖɛ́ɛ.
8 Mɩ́nyɔ́ɔ́ ɖʊɖɔ iɖi suúru bɩlɛ́,
bɩka iɖi zinbirí,
káma,
Ɖádʊ́ʊ-dɛ́ɛ wɩ́rɛ wenɖé sɩ ɩkɔ́nɩ nɛ́ ɖɩɩjʊ́ʊ.
9 Mogoobíya,
ɩ́kɛmɛ́ɛ́dɩ mínbuunáa ɖamá mɩ́dɔ́m na Ɩsɔ́ɔ ɩ́kɔkɔ́nɩ ɩkʊ mɩ́dɔ́m.
Ɩbɛ́ɛ!
Tɔmvʊʊrʊ́ wáńdáláná ɩzɩ́ŋɛ́ɛ ɖaḿ wɔnɔɔ́ bɩlɛ́!
10 Mogoobíya,
wahála na suúru-dɛ́ɛ tɔ́m-daá nɛ́,
ɩbɛɛŋná anɖébiwá baaŋmatɩná Ɖádʊ́ʊ nɔɔ́ nɛ́.
11 Mɩ́ɩ́ná sɩsɩ wenbá beeɖi zinbirí nɛ́,
ɖánÿaá wɛ sɩsɩ wenbi‑niíni-dɩnáa.
Mɩ́ɩ́nɩ́ɩ baaŋmátɩ Ayúúba-dɛ́ɛ suúru-dɛ́ɛ tɔ́m nɛ́,
bɩka mɩ́nyɩ wenbí Ɩsɔ́ɔ waava yɩ kegbiirinɔ́ɔ-dɛ́ɛ nɛ́.
Káma,
Ɖádʊ́ʊ ɩbá ɩgɛ́ɛ kʊnyɔnnɩɩrʊ́ na kazɔ́ɔ lanɖʊ́ gɛ.
12 Mogoobíya,
bɩrɩ́ŋa bɩdaá,
ɩ́kamʊná nabʊ́rʊ.
Ɩ́kamʊná ɩsɔ́ɔ́dáá yáá adɛ laadɔ́ɔ,
cáńfáná nabʊ́rʊ.
Amá,
mɩ́dɛ́ɛ ɩɩ́n ɩ́la ɩɩ́n;
mɩ́dɛ́ɛ aayɩ́ ɩlá aayɩ́,
na Ɩsɔ́ɔ ɩ́kafʊʊná mɩ́ɩ tɔ́m.
13 Mɩ́dáá naárʊ wɛ wahála-daá yáá wé.
Bʊdʊ́ʊ ɩ́sʊlʊ Ɩsɔ́ɔ.
Naárʊ wɛ niíni-daá?
Ɩlɛ́ ítee yéńdi ɩsá Ɩsɔ́ɔ.
14 Mɩ́dáá naárʊ wánnyaadɩ́?
Bʊdʊ́ʊ ɩ́yaa Krísto-dɛ́ɛ Koduuziya-dɛ́ɛ kʊ́bɔnáa bɔkɔ́nɩ batáa yɩ núm Ɖádʊ́ʊ-dɛ́ɛ yɩ́ɖɛ-daá bɩka basʊ́lʊ Ɩsɔ́ɔ ɩrɔɔzɩ́.
15 A bɩgɛ́ɛ baava Ɩsɔ́ɔ toovonúm bɛdɛ́ɛ sʊlʊ́ńdɩ-daá,
bɩlɛ́ bɩdɛ́ɛ sʊlʊ́ńdɩ wɛ́nlɛɛ́ kʊdɔndʊ́ʊ,
Ɖádʊ́ʊ wángʊsɩ́ yɩ;
bɩka a waalá alaháácɩ́wá,
Ɩsɔ́ɔ wɛ́njɛ́m yɩ tɩ.
16 Ivééri ɖamá alaháácɩ́wá mɩ́ɩ́lá tɩ nɛ́,
bɩka ɩsʊ́lʊ ɖamá-rɔ na Ɩsɔ́ɔ ɩwáázɩ mɩ́ɩ.
Ɩrʊ́ weení Ɩsɔ́ɔ weeɖéézi yɩ sɩsɩ ɩzɩɩzɛ́ɛ nɛ́-dɛ́ɛ sʊlʊ́ńdɩ wɛná yíko tɩ́nlám tɩmɛ́ kʊ́bɔná.
17 Elíya,
fʊngɛ́ɛ ɩrʊ́ gɛ nyazɩ ɖɔ́ɔ́ ɖádɩtɩŋa.
Waabá ɩsʊ́lʊ Ɩsɔ́ɔ páá sɩsɩ tɛ́ɛ́wʊ ɩ́kanɩ́ɩ adɛ laadɔ́ɔ-rɔ,
ngɛ tɛ́ɛ́wʊ waalá bɩ́ɩ́zɩ nasúdoozo na fɔɔlʊʊ́ kɩdanɩ́ɩ.
18 Ngɛ bɩlɛ́ bʊwɔ́rɔ́,
waadásʊlʊ Ɩsɔ́ɔ ɖʊɖɔ,
ngɛ Ɩsɔ́ɔ waava tɛ́ɛ́wʊ,
kíɖíídi ɩlá adɛ laadɔ́ɔ-rɔ.
19 Mogoobíya,
a mɩ́dáá naárʊ wɛɛdɛlɛ́ŋ ɩlaná toovonúm bolíni,
ngɛ naárʊ ɩlɛ́ waabɩ́ɩ́zɩ ɩkábɩsɩná yɩ,
20 ɩdɩlɩ́ sɩsɩ ɩrʊ́ weení waagálɩ́zɩ́ alaháácɩ́-dʊ́ʊ nɩ́bááwʊ kɩdaavé nɛ́-daá nɛ́,
waalɩzɩ́ yɩ sɩ́m-daá.
Bɩlɛ́ ɩmʊ́ bínÿelíi Ɩsɔ́ɔ ɩcɛ́ alaháácɩ́wá tuutúúma.