1 Korɩ́ntɩ ńba 9

Wenbí bɩɩva nɩ́bááwʊ sɩsɩ tɩndʊ́ʊ ɩ́la nɛ́

1 Bɩlɛ́ nɛ́,

mɔ́ɔ́ mɛ́vɛ́yɩ́ na mádɩ yáá wé.

Mɔ́ɔ́ mɛ́dɛkɛ́ɛ tɩndʊ́ʊ?

Mɔ́ɔ́ mádáná Ɖádʊ́ʊ Yeésu?

Bɩdɛkɛ́ɛ mɩ́nyɔ́ɔ́ mɩ́gɛ́ɛ na wenbí tɩmɛ́rɛ mánlám Ɖádʊ́ʊ nɛ́ waalʊ́rʊ nɛ́?

2 Báa ɖoo baaganáa tánjaa betísi sɩsɩ mɛ́gɛ́ɛ tɩndʊ́ʊ,

máálá tamɔ́ɔ sɩsɩ mɩ́nyɔ́ɔ́ mɩ́jɔ́ nɛ́,

tɩndʊ́ʊ gɛ mɛ́gɛ́ɛ.

Káma,

mɩ́nyɔ́ɔ́ mɩ́gɛ́ɛ na mɛ́dɛ́ɛ tɩndɩ́ɩ́dɩ-dɛ́ɛ ɖaazɩ́tɩ,

bɔwʊtá mánlám Ɖádʊ́ʊ nɛ́ kɩdaá.

3 Bɛɛ wentí mónbusí wenbá bánvʊʊnáa ma nɛ́;

mónbusí wɛ gɛ sɩsɩ:

4 Ɖɔ́ɔ́ ɖɔ́dɔmɔ́ɔ́ná ɖiɖi ɖɩnyɔ́ɔ tɩmɛ́rɛ ɖánlám ɖɛ nɛ́ ɖɩrɔɔzɩ́?

5 Bɩdafa ma wɛ́ɖɛ a mɔ́wɛná alʊ́ Krísto ńnɩ́,

ifu ma ńŋɩnáa wenbí tɩndɩnáa baaganáa na Ɖádʊ́ʊ igoobíya na Pétro bánlám nɛ́?

6 Yáá mána Barɩnabáasɩ ɖériké ɖɔ́mɔɔ́na kʊ ɖɩlá tɩmɛ́rɛ na ɖánʊ́ʊ́zɩ na ɖiyuú ɖiɖi.

7 Mɩ́ńnɩ́ɩ́ wɩ́rɛ sɩsɩ sɔ́ɔ́jatɩ-daá,

sɔ́ɔ́ja wánlám bɔwʊtá nɛ́,

ɩdɩtɩŋa iliideé gɛ wánlanáa?

Mɩ́ńnɩ́ɩ́ sɩsɩ ɩrʊ́ wónɖuú tɩɩwʊ́ bɩka ídénnyeezi kibíya?

Yáá ɩrʊ́ wéngetí náánɩ bɩka ɩ́dɔ́nnyɔɔ tɩnaalɩ́m.

8 Bɩdɛkɛ́ɛ wenbí bɩ́nlám ɖúúlínya-daá nɛ́ biriké bɩdɔ́m gɛ mɛ́nbɛɛŋnáa gɛ mánŋmatɩ́.

Múúsá-dɛ́ɛ Mará wándaŋmatɩ́ bɩlɛ́ ɖʊɖɔ.

9 Káma,

baaŋmáa Múúsá-dɛ́ɛ Mará Tákaraɖá-daá sɩsɩ:

«Ńdɔ́nvɔkɩ nɔ́wʊ weení wánmasɩ́ kíɖíídi nɛ́ ɩnɔɔ́ sɩsɩ ɩ́kɔtɔ́ɔ.»

Bɩlɛ́ nɛ́,

náánɩ-rɔ gɛ Ɩsɔ́ɔ wénwií?

10 Bɩdɛkɛ́ɛ ɖɔ́ɔ́ ɩráa ɖɔ́rɔ́ɔ́zɩ́ gɛ Ɩsɔ́ɔ waaŋmátɩ bɩlɛ́?

Ɩɩ́n,

bɩlɛ́ gɛ bɩgɛ́ɛ,

ɖɔ́ɔ́ ɩráa ɖɔ́rɔ́ɔ́zɩ́ gɛ baaŋmáa tɔ́m tɩḿ.

Káma,

bɩmɔɔ́na weení wánvarɩ́m nɛ́,

wánvarɩ́m bɩka ɩjɔɔ́ɔ tamɔ́ɔ sɩsɩ ɩgɔ́nɩ ɩwɛná ɩdɛ́ɛ.

Bɩka weení wánmasɩ́ bilée nɛ́,

mɔɔ́na ɖʊɖɔ wánmasɩ́ bɩka ɩjɔ́ɔ tamɔ́ɔ sɩ wɔ́ngɔnɩ́ iyuú ɩdɛ́ɛ.

11 Bɩlɛ́ nɛ́,

ɖɔ́ɔ́gɔ́ná mɩ́ɩ Ɩsɔ́ɔ-dɛ́ɛ tɔ́m nɛ́,

a ɖáámʊ mɩ́jɔ́ wenbíwá mɩ́wɛná bɩgɛ́ɛ adɛ cé ńbɩ nɛ́,

ɖááyɩ́sɩ?

12 A nɛbɛ́rɛ wɛná bɩdɛ́ɛ yíko mɩ́rɔ́,

bɩ́nlám nŋɩ́nɩ́ na ɖɔ́ɔ́ ɖódónÿuú yíko kɩḿ bɩcɛzɩ́ bɛlɛ́.

Ngʊ́ yíko kɩḿ ɖɔ́wɛná kɩ mɩ́rɔ́ nɛ́,

ɖɔ́dɔ́kpɔ́ɔ kɩ ɖɩlaná tɩmɛ́rɛ.

Hálɩ ɖéédísi ɖádɩtɩŋa ɖánlám bɩrɩ́ŋa na bɩ́kɔkɔ́nɩ bɩtɔ Krísto-dɛ́ɛ Laabáárʊ Kífeńgi-dɛ́ɛ tɩmɛ́rɛ ɖánlám nɛ́.

13 Mɩ́nyɩ bɩlɛ́ sɩsɩ wenbá bánlám tɩmɛ́rɛ Ɩsɔ́ɔ-dɛ́ɛ Ɖaána kʊ́bɔńga-daá nɛ́,

kadaá gɛ begíɖíím wánlɩɩnáa.

Bɩka wenbá bánlám sarásɩ sarásɩ ɖaalanɖɛ́ nɛ́,

begíɖíím wándalɩɩnáa sarásɩ bánlám sɩ nɛ́ sɩdaá gɛ.

14 Bɩlɛ́ ɖʊɖɔ gɛ Ɖádʊ́ʊ waazɩ́ɩ́zɩ sɩsɩ wenbá bénveerím ɩráa Laabáárʊ Kífeńgi nɛ́,

íɖíná badɩmɛ́rɛ ɖɩḿ.

15 Amá,

mɔ́ɔ́ mɔ́dɔkpɔ́ɔ bɩdɛ́ɛ yíkowá tɩḿ bɩɩva ma nɛ́ tɩdaá nakɩ́rɩ mayáa nabʊ́rʊ.

Ngʊ́ bɩdɛkɛ́ɛ sɩ mánjáádɩ sɩ ɩ́kava ma nabʊ́rʊ-rɔ gɛ mánŋmaá bɩlɛ́.

Hálɩ a bɩlɛ́ bʊrɔ,

gaara mazɩ́.

Ngʊ́ naárʊ tánbɩɩzɩ ikiziná ma bɩlɛ́ bɩdɛ́ɛ kúúrí.

16 Bɩɩga Laabáárʊ Kífeńgi feerím-dɛ́ɛ tɩmɛ́rɛ mánlám ɖɛ nɛ́ ɖɩdaá nɛ́,

mɛ́vɛ́yɩ́ na kúúrí lám ɖɩdaá,

káma,

tɩmɛ́rɛ ɖɩḿ ɖɩgɛ́ɛ ma ɖóóle gɛ.

Ngɛ a bɩɩjɩ́ ma gɛ médefééri kɩ ɩráa,

nbusú ɖámáa na ma.

17 A mɔ́ɔ́ mádɩtɩŋa maraazɔɔlɩ ná sɩ mánlám tɩmɛ́rɛ ɖɩḿ,

ńná nɛ́,

máfʊ́nwɛná fɛrɩ́tɩ,

amá,

ńŋɩnáa bɔɔvɔ́kɩ ma ɖóóle sɩ mála ɖɛ nɛ́,

wenbí baaɖʊ ma sɩ mála nɛ́ gɛ mánlám.

18 Mɛ́vɛ́rɩ́tɩ gɛ wé.

Mɛ́vɛ́rɩ́tɩ gɛ sɩsɩ mevééri ɩráa Laabáárʊ Kífeńgi faala bɩka mɔ́dɔ́nbɔɔzɩ wenbí tɩmɛ́rɛ ɖɩḿ ɖɩdɛ́ɛ lám wɔ́nbɔɔzɩ́ sɩ balá ma nɛ́.

19 Na bɩrɩ́ŋa mɔ́wɛná mádɩ mɛ́dɛkɛ́ɛ naárʊ-dɛ́ɛ yóm nɛ́,

máábɩ́sɩ́ná mádɩ ɩráa rɩ́ŋa-dɛ́ɛ yoḿ na mabá moyuú badaá ɖabata bofu Yeésu.

20 A mána Yahúúɖuwá,

mánlám gɛ nyazɩ mɛ́gɛ́ɛ Yahúúɖu na moyuú wɛ bofu Krísto.

Na bɩrɩ́ŋa Múúsá-dɛ́ɛ Mará fɛ́yɩ́na yíko mɔ́rɔ́ nɛ́,

a mána wenbá bovóo Múúsá-dɛ́ɛ Mará nɛ́,

mánlám gɛ nyazɩ awɛná yíko mɔ́rɔ́,

na moyuú wɛ bofu Krísto.

21 Bɩlɛ́ ɖʊɖɔ gɛ a mána wenbá baasɩ Múúsá-dɛ́ɛ Mará nɛ́,

mánlám gɛ nyazɩ wenbí bɛlɛ́ bánlám nɛ́,

na moyuú wɛ bofu Krísto.

Ngʊ́ bɩdɛkɛ́ɛ sɩsɩ máraavóo Ɩsɔ́ɔ-dɛ́ɛ Mará,

káma,

Krísto-dɛ́ɛ Mará wɛná yíko mɔ́rɔ́.

22 A mána wenbá badabɩɩ tá Krísto-dɛ́ɛ nɩ́bááwʊ-daá nɛ́,

mánlám gɛ nyazɩ mádɩtɩŋa mádabɩɩ tá Krísto-dɛ́ɛ nɩ́bááwʊ-daá bɩlɛ́,

na moyuú wɛ bofu Krísto.

Wenbí ɩráa rɩ́ŋa cɔɔ́ɔ nɛ́,

bɩlɛ́ ɖʊɖɔ gɛ mánbɩsɩnáa mádɩ,

na bʊcɔ bɩrɩ́ŋa bɩdaá nɛ́,

moyuú mɛlɛ́ɛ badaá nɛbɛ́rɛ.

23 Laabáárʊ Kífeńgi-rɔ gɛ mánlám bɩlɛ́ bɩrɩ́ŋa,

na moyuú wenbí kiiɖúu kɩsɩ́ɩ ɖáa nɛ́.

24 Mɩ́nyɩ bɩlɛ́ sɩsɩ wenbá bánlám sewɔ́ɔ-dɛ́ɛ tɛ́tɛ́ nɛ́,

barɩ́ŋa bénzée kʊ,

amá,

kʊ́ɖʊḿ wénɖíi kʊ.

Ɩjáárɩ mɩ́dɩ ise bɩlɛ́,

mɩ́nyɔ́ɔ́ ɖʊɖɔ iɖi.

25 Seerú báa weení wángbɩɩrɩ́ ɩdɩ nɛ́,

wɛ́nbɛ́ŋ ɩdɩ bɩrɩ́ŋa gɛ.

Bánlám bɩlɛ́ gɛ na babɩ́ɩ́zɩ boyuú fulɔɔ́ bónvúu weení weeɖi nɛ́;

ngʊ́ fulɔɔ́ kɛḿ kánzɩ́m.

Amá,

ɖɔ́ɔ́ nɛ́,

fulɔɔ́ kádánzɩḿ kɛtɛngɛrɛ nɛ́-rɔ gɛ ɖánlám bɩlɛ́.

26 Bʊrɔ gɛ mɔ́ɔ́ ɖʊɖɔ ménzewɔ́ɔ mɛ́gɛbɛɛ́na wenbí mánjáádɩ nɛ́;

bʊrɔ gɛ mɔ́jɔɔ́ɔ nyazɩ weení wónÿoonáa kulumé nɛ́,

módónluḿ kulumé báa nŋɩ́nɩ́-nŋɩ́nɩ́.

27 Máábá mánváa mɔ́dɔ́nʊʊ́ fúkúḿsi gɛ páá,

bɩka mádanbá mava kɩ ɖáámá.

Mánlám bɩlɛ́ gɛ na bɩ́kɔkɔ́nɩ méévééri baaganáa Laabáárʊ Kífeńgi bɩtɛ́ nɛ́,

Ɩsɔ́ɔ ikízi mɔ́ɔ́ mádɩtɩŋa.