1 Korɩ́ntɩ ńba 2

Pɔ́ɔlɩ wénveerím ɩráa Krísto weení waazɩ́ ɖɛ́nɩ abɛlɩ́ akɔ́ɔ-rɔ nɛ́-dɛ́ɛ tɔ́m

1 Amá,

mɔ́ɔ́ nɛ́,

koobíya,

sáátɩ wenkí mɔ́ɔ́ móóbó mɩ́dɛ́ɛ sɩ mevééri mɩ́ɩ wenbí Ɩsɔ́ɔ waavʊ́ńɖʊ́ʊ sɩ wánlám bɩka naárʊ waafʊnzɩ bʊrɔ nɛ́-dɛ́ɛ tɔ́m nɛ́,

mádálá nyazɩ ŋmatɩrɛ-daá,

mɔ́ɔ́ máágɩ́lɩ ná,

cáńfáná maŋmátɩ wentí ɩráa bɛɛ́na tɩ sɩsɩ tɩgɛ́ɛ áséńsí tɔ́m nɛ́.

2 Káma,

mádacáa sɩ mɔgɔná mɩ́ɩ natɩ́rɩ bɩdɛkɛ́ɛ Yeésu Krísto-dɛ́ɛ tɔ́m nɛ́;

Yeésu Krísto baagá yɩ ɖɛ́nɩ abɛlɩ́ akɔ́ɔ-rɔ nɛ́ riké-dɛ́ɛ tɔ́m gɛ mɔ́ɔ́zɔ́ɔ́lɩ sɩ moboná mɩ́ɩ.

3 Bɩlɛ́ bibaasí,

mávʊnwɛ mɩ́lɔ́wʊ́táá nɛ́,

mávʊ́njɔɔ́ɔ gɛ nyazɩ mádafɩ́ya bɩlɛ́,

bɩka ɖʊɖɔ bɩvʊnbá bɩjɔɔ́ɔ ma nɩdáárɛ ménzelíi.

4 Mɛ́dɛ́ɛ ŋmatɩrɛ na wentí ménveerím ɩráa nɛ́ bɩdaá,

nabʊ́rʊ tatánlɩ́ɩ ɩráa-dɛ́ɛ áséńsí bánlám nooniíni sɩ beɖéézi wɛ nɛ́.

Amá,

Ɩsɔ́ɔ wánwɩlɩ́ɩ kʊ na ɩdɛ́ɛ Kezeŋa-dɛ́ɛ yíko sɩsɩ wentí mánŋmatɩ́ nɛ́ kɛ́ɛ toovonúm,

5 na bɩ́kalá toovonúm mɩ́ɩ́vá nɛ́,

ɩlɩɩná ɩráa-dɛ́ɛ áséńsí-jɔ́,

amá,

bɩlɩɩná Ɩsɔ́ɔ-dɛ́ɛ yíko-jɔ́.

Pɔ́ɔlɩ wánwɩlɩ́ɩ ɩráa Ɩsɔ́ɔ-dɛ́ɛ áséńsí

6 Ngʊ́ na bɩrɩ́ŋa,

áséńsí nakɩ́rɩ gɛ mánwɩlɩ́ɩ wenbá báńbɩ́ɩ́ Ɩsɔ́ɔ-dɛ́ɛ nɩ́bááwʊ-daá nɛ́.

Áséńsí kɩḿ kɩdɛkɛ́ɛ ɖúúlínya kɩna kɩdɛ́ɛ ńgɩ,

cáńfáná wenbíwá bʊwɛná yíko ɖúúlínya kɩna kɩrɔ,

bɩka bɔwɛ sɩsɩ wɩ́rɛ bɩ́ngɔnɩ́ binúúdi nɛ́ bɩdɛ́ɛ ńgɩ.

7 Ɩsɔ́ɔ-dɛ́ɛ áséńsí kɩvʊnmʊ́sɛ́ɛ bɩka ɩráa waasɩ kɩ nɛ́,

kɩdɛ́ɛ tɔ́m gɛ ɖɔ́ɔ́ ɖénveerím ɩráa;

naanɩ́ na Ɩsɔ́ɔ ɩlá ɖúúlínya nɛ́ gɛ waavʊ́ńɖʊ́ʊ sɩsɩ áséńsí kɩḿ kɩ́sʊ́ʊ́ná ɖáa ɩdɛ́ɛ ásícé-daá.

8 Wenbíwá bʊwɛná yíko ɖúúlínya kɩna kɩrɔ nɛ́,

bɩdaá báa nabʊ́rʊ fʊnvɛ́yɩ́na kɩ,

káma,

a ɖoo báfʊnwɛná kɩ,

bátaká weení ɩdɩɩná ásícé nɛ́ ɖɛ́nɩ abɛlɩ́ akɔ́ɔ-rɔɔzɩ́.

9 Amá,

baaŋmáa Ɩsɔ́ɔ-dɛ́ɛ Tɔ́m Tákaraɖá-daá sɩsɩ:

«Wenbí ɩrʊ́ ɩzɩ́rɛ tanáá ta kɛtɛngɛrɛ,

cáńfáná ɩnɩgbamʊʊ́ ɩnɩ́ɩ nɛ́;

wentí báa naárʊ tamaazɩ tá kɛtɛngɛrɛ nɛ́ gɛ

Ɩsɔ́ɔ waagbɩ́ɩ́rɩ ɩsɩ́ɩ wenbá bɔzɔɔlɛ́ɛ yɩ nɛ́.»

10 Ngʊ́ ɖɔ́ɔ́ gɛ Ɩsɔ́ɔ weeyéle ɩdɛ́ɛ Kezeŋa ɩlɩzɩ́ áséńsí kɩḿ kawɩ́lɩ.

Káma,

Ɩsɔ́ɔ-dɛ́ɛ Kezeŋa nyɩ bɩrɩ́ŋa,

bɩkpɛdɩ́na wenbí bɩgamʊ́sɛɛ ɖoo Ɩsɔ́ɔ tɩtɩndɩŋa-daá nɛ́.

11 A sɩ ɖɩbɛɛŋná ɩráa,

weení nyɩ ná wenbí bʊwɛ ɩrʊ́-daá nɛ́ a bɩdɛkɛ́ɛ ɩdɛ́ɛ kezeŋa.

Bɩlɛ́ ɖʊɖɔ gɛ naárʊ waasɩ wenbí bʊwɛ Ɩsɔ́ɔ-daá nɛ́,

asée Ɩsɔ́ɔ-dɛ́ɛ Kezeŋa riké.

12 Ɖɔ́ɔ́ nɛ́,

bɩdɛkɛ́ɛ ɖúúlínya-dɛ́ɛ kezeŋa gɛ baava ɖáa,

amá,

Ɩsɔ́ɔ-dɛ́ɛ Kezeŋa gɛ,

na ɖɩtɩlɩ́ kʊjɔ́ɔ́nɩ wentí Ɩsɔ́ɔ waalá ɖáa nɛ́.

13 Ɖánŋmatɩ́ kʊjɔ́ɔ́nɩ tɩḿ tɩdɔ́m nɛ́,

bɩdɛkɛ́ɛ na áséńsí ɩráa wánwɩlɩ́ɩ kɩ nɛ́ gɛ ɖánŋmatɩnáa,

amá,

na wenkí Ɩsɔ́ɔ-dɛ́ɛ Kezeŋa wánwɩlɩ́ɩ nɛ́ gɛ.

Bɩlɛ́ gɛ ɖánlɩzɩ́ɩ wenbá Ɩsɔ́ɔ-dɛ́ɛ Kezeŋa wéngetí wɛ nɛ́ wenbí bɩgɛ́ɛ kɛdɛ́ɛ ńbɩ nɛ́ bugutoluú.

14 Ɩrʊ́ tɩtɩŋa téndisi wenbí bɩgɛ́ɛ Ɩsɔ́ɔ-dɛ́ɛ Kezeŋa-dɛ́ɛ ńbɩ nɛ́,

bɩlɛ́ bɩgɛ́ɛ yɩ gɛ nyazɩ ɖijíńdi.

Ɩ́dánbɩɩzɩ ɩnɩ́ɩ bugutoluú;

káma,

na Ɩsɔ́ɔ-dɛ́ɛ Kezeŋa gɛ bándɩlɩ́ɩ na bɩ.

15 Amá,

weení ɩwɛná Ɩsɔ́ɔ-dɛ́ɛ Kezeŋa nɛ́ nyɩ wenbí bɩrɩ́ŋa bɩjɔɔ́ɔ kazɔ́ɔ nɛ́,

na wenbí bɩrɩ́ŋa bɩdaavé nɛ́,

bɩka naárʊ tánbɩɩzɩ ɩfʊʊná yɩ.

16 Káma,

baaŋmáa Ɩsɔ́ɔ-dɛ́ɛ Tɔ́m Tákaraɖá-daá sɩsɩ:

«Weení nyɩ ná Ɖádʊ́ʊ-dɛ́ɛ lomaazɛ́.

Weení wánbɩɩzɩ kʊ ɩwɩ́lɩ Ɖádʊ́ʊ natɩ́rɩ.»

Ngʊ́ ɖɔ́ɔ́ nɛ́,

wenbí Krísto wánmaazɩ́ nɛ́ gɛ ɖɔ́ɔ́ ɖʊɖɔ ɖánmaazɩ́.