Núhum waazʊ́ʊ mɛ́ɛ́lɛ-daá
7
1 Ngɛ Ɖádʊ́ʊ Ɩsɔ́ɔ wɔɔdɔ́ Núhum sɩsɩ:
«Núhum,
kpɩɩrɩ nyána nyɛ́dɛ́ɛ zamɔ́ɔ ɩsʊ́ʊ mɛ́ɛ́lɛ-daá;
káma,
mɛ́ɛ́bɛ́ɛ nɛ́,
hálɩ na sinje,
nyɛ́dɛ́ɛ sáátɩ ɩráa rɩ́ŋa-daá,
nyériké nyázɩ́ɩ́zɛ́ɛ na kʊ máázá-daá.
2 A sɩ nzʊ́ʊ,
kpɛdɩ́na fʊ́ńdɩ kpɩná bánlanáa yɛ sarásɩ nɛ́ adɛ́ɛ aláa na abaaláa lʊbɛ-lʊbɛ;
weená adɛkɛ́ɛ sarásɩ ńná nɛ́,
alʊ́ na abaalʊ́ kʊ́ɖʊńɖɛ‑kʊ́ɖʊńɖɛ;
3 bɩɩga siḿsi nɛ́,
kpɔɔ sɩlɛ́ ɖʊɖɔ sɩdɛ́ɛ aláa na abaaláa lʊbɛ-lʊbɛ,
na bʊcɔ báa kpɩ́nɖɛ wenɖé-dɛ́ɛ kutoluú ɩcɔ́ɔ adɛ laadɔ́ɔ-rɔ.
4 Sinje bɩɩga wɛ́ lʊbɛ,
ménÿelíi tɛ́ɛ́wʊ ɩnɩ́ɩ wɛ́ nɛɛ́lɛ nuvoowú na ɩdaawʊ́,
bɩlɛ́ gɛ sɩ malá na monúúdi weezíni-dɩnáa rɩ́ŋa máálá wɛ adɛ laadɔ́ɔ-rɔ nɛ́.»
5 Ngɛ Núhum waalá wenbí Ɖádʊ́ʊ Ɩsɔ́ɔ wɔɔdɔ́ yɩ nɛ́ nɔ́ɔ́.
Tɛ́ɛ́wʊ kʊ́bɔńgɩ waanɩ́ɩ lɩ́m isu adɛ laadɔ́ɔ rɩ́ŋa
6 Tɛ́ɛ́wʊ waabáázɩ nɩ́ɩ́dɩ wɩ́rɛ wenɖé bɩlɛ́ nɛ́,
Núhum-dɛ́ɛ bɩ́ɩ́zɩ kákpɩ́ɩ́zɩ nasúdoozo (600) nbɩlɛ́.
7 Na lɩ́m íkeɖi wɛ nɛ́,
mɛ́ɛ́lɛ-daá gɛ ɩ́na ɩɖɛɛlʊ́ na ibíya na bɛɖɛɛlɩnáa baazʊ́ʊ.
8-9 Fʊ́ńdɩ kpɩná ɖʊɖɔ:
weená bánlanáa yɛ sarásɩ nɛ́,
na weená bádánlaná yɛ nɛ́,
siḿsi,
kigbeemásɩ na adɛ‑gaalɩɖáa,
arɩ́ŋa bɩlɛ́,
ná-náálɛ gɛ aagɔ́nɩ báa wenɖé na ɖɩɖɛɛlʊ́ asʊ́ʊ ńŋɩnáa Ɩsɔ́ɔ wɔɔdɔ́ nɛ́.
10-11 Biizúlu wɛ́ lʊbɛ nɛ́,
ngɛ lɩ́m bʊwɛ adɛ nɛ́,
bɩɩbáázɩ kagám,
ngɛ tɛ́ɛ́wʊ waabáázɩ nɩɩ́.
Núhum-dɛ́ɛ bɩ́nɩ kákpɩ́ɩ́zɩ nasúdoozo ńnɩ́ wɔ́rɔ́ irodúu sɩɩlɛ ńnɩ́-dɛ́ɛ wɛ́ ákɩzaalʊʊ́ na náálɛ wɩ́rɛ gɛ lɩ́m waabáázɩ kagám adɛ bɩka ɩsɔ́ɔ́dáá ńbɩ ɖʊɖɔ ɩkádʊ́lʊ́ bɩlɛ́.
12 Ngɛ tɛ́ɛ́wʊ kɩḿ kɩɩnɩ́ɩ nuvoowú na ɩdaawʊ́ hálɩ wɛ́ nɛɛ́lɛ.
13 Tɛ́ɛ́wʊ baazɩ́ nɩɩ́ wɩ́rɛ gɛ Núhum na ɩɖɛɛlʊ́ na ibiyaalɩnáa Sɛ́ɛmɩ,
Háamɩ na Yafɛ́ɛtɩ na iwoolináa toozóóní
14 na fɔɔ́-daá fʊ́ńdɩ kpɩná ndɩ‑ndɩ;
ɖaána ńná ndɩ‑ndɩ,
siḿsi ndɩ‑ndɩ,
kigbeemásɩ ndɩ‑ndɩ na adɛ‑gaalɩɖáa ndɩ‑ndɩ baazʊ́ʊ mɛ́ɛ́lɛ-daá.
15 Kpɩná amʊ́ sɩ asʊ́ʊ nɛ́,
nánnáálɛ gɛ aazʊ́ʊ Núhum-jɔ́;
16 báa wenɖé-dɛ́ɛ alʊ́ na abaalʊ́,
ńŋɩnáa wenbí Ɩsɔ́ɔ waavʊ́ńdɔḿ Núhum nɛ́.
Baazʊ́ʊ bɩtɛ́ nɛ́,
ngɛ Ɖádʊ́ʊ wɔɔdɔ tará bɔrɔ.
17 Lɩ́m bamáa súu adɛ laadɔ́ɔ-rɔ hálɩ wɛ́ nɛɛ́lɛ.
Sáátɩ wenkí biizu bɩkpa ɩsɔ́ɔ́dáá nɛ́,
ngɛ bɩɩgbáázɩ mɛ́ɛ́lɛ kʊ́bɔńgɩ kɩḿ kɩdɛlɛndɛ́ɛ lɩ́m-rɔ.
18 Lɩ́m wɛ bɩbamáa kpáa hálɩ mɛ́ɛ́lɛ ibulú ɖɛɛ́.
19 Lɩ́m waagba gɛ bɩwáálɩ bʊ́ʊ́nɩ tiiwóro nɛ́ tɩrɩ́ŋa tɩrɔ ɖúúlínya rɩ́ŋa-daá.
20 Bukúti bisu bɩfɛ́lɛ tɩ nyazɩ nʊ́ʊ́zɩ ákɩzaalʊʊ́ bɩlɛ́.
21-23 Tɔ́ɔ,
bɩlɛ́ gɛ Ɩsɔ́ɔ waalá inúúdi wenbí bɩrɩ́ŋa bʊwɛ adɛ laadɔ́ɔ-rɔ bínweezí nɛ́:
bɩɩlá bɩ ɩráa,
ɖaána na fɔɔ́-daá fʊ́ńdɩ kpɩná,
siḿsi,
adɛ‑gaalɩɖáa;
bɩdaka nabʊ́rʊ.
Wenbí bɩrɩ́ŋa kpátáá bʊwɛ adɛ laadɔ́ɔ-rɔ bínweezí nɛ́,
bɩrɩ́ŋa bɩɩzɩ́.
Asée Núhum na ɩdɛ́ɛ ńba na wenbí bɩrɩ́ŋa bʊwɛ mɛ́ɛ́lɛ-daá nɛ́ beriké gɛ bɩɩga weezíni-dɩnáa.
Núhum waalɩ́ɩ mɛ́ɛ́lɛ-daá
24 Ngɛ lɩ́m waagba bɩwáálɩ adɛ laadɔ́ɔ-rɔ bɩlɛ́ hálɩ wɛ́-bíya nɩɩ́nʊ́wá na nɛɛ́saaláa (150).