Kááyinu na Abíilu bɛdɛ́ɛ tɔ́m
4
1 Áɖam na ɩɖɛɛlʊ́ Awááwʊ baadɩlɩ́ ɖamá,
ngɛ Awááwʊ wɛɛyɛ́ɛ fuwá ɩlʊ́rʊ bú abaalʊ́.
Ngɛ waava yɩ yɩ́ɖɛ sɩsɩ Kááyinu,
káma,
wɔɔdɔ́ sɩsɩ Ɖádʊ́ʊ Ɩsɔ́ɔ waazɩná ɩmʊ́ iyuú bú abaalʊ́.
2 Bʊwɔ́rɔ́ nɛ́,
waadásɩ ɩlʊ́rʊ Kááyinu wɔ́rɔ́ ńnɩ́ abaalʊ́;
bánÿaá ɩlɛ́ sɩsɩ Abíilu.
Bɛlɛ́ɛ́nɩ́ baabɩ́ɩ nɛ́,
Abíilu ɩlɛ́ waabɩ́sɩ fééni ketirú,
bɩka Kááyinu ɩlɛ́ ɩgɛ́ɛ faɖʊ́.
3 Bɩjɔɔ́ɔ‑bɩjɔɔ́ɔ nɛ́,
wɩ́rɛ,
Kááyinu wɔɔgɔ́gɔ́ná wenbí bɩrɩ́ŋa bɩgɛ́ɛ fɔɔ́-daá kíɖíídi nɛ́ ɩlá Ɖádʊ́ʊ Ɩsɔ́ɔ sarɔ́ɔ.
4 Ngɛ newúu ɩlɛ́ wɔɔgɔ́gɔ́ná ɩdɛ́ɛ fééni-daá bíya kaɖaa ńba bɔjɔɔ́ɔ núm nɛ́ ɩkʊ,
ngɛ waalɩzɩ́ núm ɖɩdáarɛ ɩlá Ɩsɔ́ɔ sarɔ́ɔ.
Ngɛ Ɖádʊ́ʊ Ɩsɔ́ɔ waamʊ newúu ɩ́na ɩdɛ́ɛ sarɔ́ɔ,
5 bɩka ɩdamʊ Kááyinu na ɩdɛ́ɛ ńga.
Ńna gɛ bɩɩwɩ́ɩ́zɩ yɩ,
ngɛ waajʊ́ʊ́rɩ.
6 Ngɛ Ɖádʊ́ʊ Ɩsɔ́ɔ wɔɔbɔ́ɔ́zɩ yɩ sɩsɩ:
«Kááyinu,
bɩyáásɩ́ gɛ bɩ́nwɩɩzɩ́ nya hálɩ nyánjʊʊrɩ́.
7 A nyáálá kazɔ́ɔ,
bɩ́nmɔɔnáa nya.
A ńdálá kazɔ́ɔ,
kidaavééníti cɔɔ́ɔ nyazɩ gúúní nyáɖáḿ wɔnɔɔ́ tɩ́njɔŋ́ sɩ tɩkpa nya.
Amá,
nyɔ́ɔ́ caarɩ nyádɩ nbɩ́ɩ́zɩ tɩ.»
8 Na bɩrɩ́ŋa Ɖádʊ́ʊ Ɩsɔ́ɔ wɔɔdɔ́ yɩ bɩlɛ́ nɛ́,
Kááyinu wɔɔdɔ́ inewú sɩsɩ:
«Ɖɩ́lɩɩ.»
Sáátɩ wenkí baadála fɔɔ́ lɔwʊ́rɛ nɛ́,
ngɛ weegbí inewú ɩkʊ.
9 Bɩɩdásɩ nɛ́,
ngɛ Ɖádʊ́ʊ Ɩsɔ́ɔ wɔɔbɔ́ɔ́zɩ yɩ sɩsɩ:
«Kááyinu,
nyénewú wɛ lé.»
Ngɛ woobúsi yɩ sɩsɩ:
«Máásɩ.
Mɔ́ɔ́ mɛ́nbɛɛŋ kʊ ménewú-rɔɔzɩ́ yáá wé.»
10 Ngɛ Ɖádʊ́ʊ Ɩsɔ́ɔ sɩsɩ:
«We gɛ nyáálá bɩlɛ́.
Mááná nyáágʊ́ nyénewú nɛ́,
bɩ́nbɔɔzɩ́ kɩvɛrɛwʊ.
11 Sinje tɩ́ŋa,
láálɩ́ wéndím nyɔ́rɔ́,
adɛ tándanɩɩná nya;
káma,
nyáágʊ́ nyénewú nbɩ́rɩ ɩdɛ́ɛ azimá kɔrɔɔzɩ́.
12 A nyáávára kɔrɔ,
kádándalaḿ kíɖíím.
Sɩ ngíli yéḿ gɛ,
nyɛ́dɛfɛ́yɩ́na ɖaána.»
13 Ɖádʊ́ʊ Ɩsɔ́ɔ wɔɔdɔ́ bɩlɛ́ nɛ́,
ngɛ Kááyinu woobúsi yɩ sɩsɩ:
«Mɛ́dɛ́ɛ nɩgbamʊʊ́ fɔ́m waagɩ́lɩ ma.
14 Ába,
sinje nyɔ́nɖɔwʊ́ʊ ma tɛ́ɛ́dɩ kazɔ́ɔ ńdɩ-rɔ sɩsɩ mókokúti madɩlɩná nya;
málɩɩ méngilím báa lé nɛ́,
a naárʊ waana ma,
ɩ́dángʊ́ʊ ma?»
15 Ngɛ Ɖádʊ́ʊ Ɩsɔ́ɔ woobúsi yɩ sɩsɩ:
«A naárʊ waagʊ nya,
bɩdɛ́ɛ lʊbɛ gɛ sɩ bɛfɛ́rɛ yɩ.»
Ngɛ Ɖádʊ́ʊ Ɩsɔ́ɔ waaɖʊ ɖaazɩ́tɩ Kááyinu-rɔɔzɩ́ sɩsɩ a naárʊ waana yɩ ɩ́kakʊ yɩ.
16 Ńna gɛ Kááyinu waalɩ́ɩ ɩlaná Ɖádʊ́ʊ Ɩsɔ́ɔ bolíni ɩɖɛ́ɛ Edɛ́ɛnɩ wɩ́sɩ ɖaagalɩɩɖɛ́ fáráńdɩ́ lénlé bánÿaá sɩsɩ Nɔ́ɔdɩa nɛ́ ɩkɔ́jɔ́ɔ.
Kááyinu bíya‑bíya
17 Kááyinu na ɩɖɛɛlʊ́ baadɩlɩ́ ɖamá,
ɩlɛ́ ɩyɛ́ɛ fuwá ɩlʊ́rʊ bú abaalʊ́.
Ngɛ baava yɩ yɩ́ɖɛ sɩsɩ Enɔ́ɔkɩ.
Bɩjɔɔ́ɔ nɛ́,
ngɛ waama hálɩ bɩlá tɛ́ɛ́dɩ;
ngɛ wɔɔgbɔ́ɔ ibú Enɔ́ɔkɩ-dɛ́ɛ yɩ́ɖɛ ɩfa tɩ.
18 Enɔ́ɔkɩ waabɩ́ɩ ɩkʊrʊ́ ɩlʊ́rʊ Iráadɩ;
Iráadɩ ɩlɛ́ ɩkʊrʊ́ ɩlʊ́rʊ Mehuyayɛ́ɛlɩ;
Mehuyayɛ́ɛlɩ ɩlɛ́ ɩkʊrʊ́ ɩlʊ́rʊ Metusayɛ́ɛlɩ;
Metusayɛ́ɛlɩ ɩlɛ́ ɩkʊrʊ́ ɩlʊ́rʊ Lamɛ́ɛkɩ.
19 Lamɛ́ɛkɩ waabɩ́ɩ nɛ́,
ngɛ ɩlɛ́ wɔɔgbɔ́ɔ aláa nɔɔ́lɛ.
Bánÿaá kʊ́bɔnɩ́ sɩsɩ Adáa,
kúmuú gɛ Siláa.
20 Ngɛ kʊ́bɔnɩ́ waalʊ́rʊ Yabáalɩ.
Ɩlɛ́ ɩgɛ́ɛ na kʊ ketiráa bónɖóm bɩsaagɛ́rɛ́ɛ́zɩb-dɛ nɛ́ bajaájaa.
21 Yabáalɩ wɔ́rɔ́ gɛ waadásɩ ɩlʊ́rʊ Yubáalɩ.
Ɩlɛ́ gɛ cɩmɩ́nɩ ɖuuráa na foyísi fʊlʊɖáa bajaájaa.
22 Alʊ́ kúmuú ɖʊɖɔ waalʊ́rʊ bú abaalʊ́;
bánÿaá ɩlɛ́ sɩsɩ Tubáalɩ-Kááyinu.
Ɩlɛ́ ɩgɛ́ɛ kóólúu gɛ wónlúm nyɩɩrɩ́tɩ.
Ɩwɛná bú aléeré ɖʊɖɔ,
bánÿaá ɩlɛ́ sɩsɩ Naamá.
23 Wɩ́rɛ bɩjɔɔ́ɔ nɛ́,
Lamɛ́ɛkɩ waabáázɩ yéńdi téédi wénveerím ɩɖɛɛlɩnáa sɩsɩ:
«Adáa na Siláa,
iwélesi ma cé,
mɩ́ɩ Lamɛ́ɛkɩ-dɛ́ɛ aláa,
ɩdʊlʊ́ mɩ́nɩgbamɩ́nɩ ɩnɩ́ɩ.
Naárʊ waamá ma nɛ́,
máágʊ́ yɩ!
Bú waaɖʊ ma féézi nɛ́,
máágʊ́ yɩ!
24 Ɖányɩ bɩlɛ́ sɩsɩ
a ɩrʊ́ waagʊ Kááyinu,
bʊrɔ lʊbɛ gɛ sɩ bɩfɛ́rɛ yɩ.
Sɩ mevééri mɩ́ɩ sɩsɩ
weení sɩ ɩkʊ mɔ́ɔ́ Lamɛ́ɛkɩ nɛ́,
bʊrɔ niídoozo na saaláa na lʊbɛ (77)
gɛ sɩ bɩfɛ́rɛ bʊdʊ́ʊ.»
25 Tɔ́ɔ,
Áɖam na ɩɖɛɛlʊ́,
bɛlɛ́ baadásɩ balʊ́rʊ bú abaalʊ́.
Ngɛ alʊ́ waava yɩ yɩ́ɖɛ sɩsɩ Sétic.
Káma,
wɔɔdɔ́ sɩsɩ:
«Kááyinu waagʊ móbú Abíilu nɛ́,
Ɩsɔ́ɔ waava ma bú abaalʊ́ mazɩ́ɩ ɩɖɩdáarɛ.»
26 Séti ɩlɛ́ waagʊrʊ́ ɩbɩ́ɩ ɩkpɔ́ɔ alʊ́,
balʊ́rʊ bú abaalʊ́,
bánÿaá yɩ sɩsɩ Enɔ́ɔsɩ.
Tɔ́ɔ,
bɩdɛ́ɛ sáátɩ gɛ ɩráa waadábaazɩ Ɖádʊ́ʊ Ɩsɔ́ɔ yɩ́ɖɛ yáádɩ bɛ́nzɛɛ́ yɩ!