Lawar Israyilawu kaɍangi lardu Kan'anayero kǝnsioye
4
14 Kadesnin Musa kǝngayamba mai lardu Yedombero kikkunodo.
(Yedombudǝ kaduwu Yesau tiro Yedom caniye.
Yesaudǝ yeiya Yakuba tiro Israyila caniye.)
Musa cunode mai Yedombero:
«Mana durranǝm Israyilawuye kǝrne.
Leiya yaiyena sammaa nonǝmma.
15 Kaariyande kure Masarro lejane jamande nadǝn kǝrwu ngǝwuro napcana.
Masarwu andi-a kaariyande-aa basarsana.
16 Kǝmandea banaro kiworiyendea,
sonde fanje andiro malaiya juwasagane Masarnin settuluwo.
17 Akkonde,
andi ku Kadesnin kaɍangi lardunǝmben.
Kolsane lardunǝmben koniyo!
Kulo bi jǝrwu inabbero ngayiyewawo.
Ingi baramndoyema yaiyewawo.
Jawal kuradǝn yessiyewawo,
cǝkko tia gaiye har lardunǝm kolliye.»
18 «Larduniyen konuwwawo.
Adǝ gǝnia,
nayiro kǝriwu njakkadǝkki.»
19 «Barganǝmnin,
kolsane jawal kuradǝmaa gaiyo koniyo.
Andi-a lǝmannande-a ingi kiaiyea,
tamannju rǝmbiye.
Lardunǝmben kodu basso kajia,
awimaro nia njuworiyewawo.»
20 «Konuwwawo!»
daji sojiyanju tǝrǝm ngoje isane Israyilawuro lardudǝyen kodu dapkeyera.
21 Israyilawudǝ jawal gade ngoyera.
22 Jama Israyilawuye samma Kadesnin cijane kaɍangi Yedomben kau For canidǝro leyera.
23 Nadǝn Kǝmande Musa-a Haruna-aro:
24 «Haruna tussiwawo bawoje amwurawando sanunadǝa najiyi.
Lardu Israyilawuro yikkidǝro si cakkiwawo,
dalilnjudǝ na ingi Meribayen nayi yindi manani ngonuwwi nangaro.
25 Ni Musa,
Haruna-a tadanju Yeliyasar-a ngone kau Forrero taddowo.
26 Harunaye kajǝmunju nanɍimannedǝa tuluwe tadanju Yeliyasarro luwune.
Haruna na adǝn bawoji.»
27 Musa awo Kǝmande tiro wuljǝgǝnadǝa kido.
Fuwu jama sammayen tayi yakku toɍi kau Forredǝro tatkera.
28 Musa kajǝmu nanɍimanne Harunaye cuttuluwe Yeliyasarro luyeyeno.
Haruna kǝla kaudǝyen bawoje,
daji Musa-a Yeliyasar-a jǝpkera.
29 Jama Israyilawuye Haruna bawojǝnaro asuyeranniya,
kawu fiakkuro lagaran kedo.
34 Israyilawu kau Forlan cijane lardu Yedombe diriduro jawal bǝrǝm Maliaye keda.
Kǝla jawallen jama kanadinambu cade
35 Ala-a Musa-an casirǝne:
«Awi nangaro andia Masarnin sattuluwe karaa adǝn nuiye?
Burodi ye bawo,
ingi ye bawo.
Kǝmbo kuttu Ala sadi adǝ kǝlanden njǝn culuwuna!»
36 Daji Kǝmande jamadǝro kadiya dawia juwajiye am ngǝwu cacaljane bawoyera.
37 Jama na Musayero isane:
«Nawi Musa,
ni-a Kǝmande-anin yiriye biwu ngoniyena.
Kǝmandea lowone,
kadi ania kuruwuro cado!»
Musa Kǝmandea jama nangaro lowoyenniya,
38 Kǝmandeye:
«Musa,
kadi suye kare,
kǝla kaɍauji kuruwu laayero rogǝne!
Kam duwon kadi caljǝnamadǝ tia curuiya,
ronju cǝkkayi.»
39 Musa kadi su kulloye cǝgare kaɍaujiro royeyeno.
Tǝn sadǝyen kam kadi caljǝnadǝ kadi su kulloye adǝa curuiya,
ronju cǝkkaana.
40 Ngawo adǝyen Israyilawu bǝrǝm Arnon cani kaɍangi lardu Amoriwuyero kadira.
41 Kǝngayamba canode Sifon mai Amoriwuyero:
42 «Barganǝmnin,
kolsane lardunǝmben koniyo.
Jawalnin luwiye kuloro bi jǝrwu inabbero ngayiyewawo.
Ingi baramndoyema yaiyewawo.
Jawal kuradǝmaa gaiye lardunǝmben koniye.»
43 Amma Mai Sifon Israyilawuro lardunjuyen kodu dapkeyeno.
Sojiyanju sammaa capce karaanin Israyilawua kapkeyenniya,
na Yaas canilan tayia kǝriwuro kida.
44 Israyilawu Mai Sifon-a sojiyanju-aa kǝriwunin jawune lardunju ngaa kemowo.
25 Bǝrni kura Mai Sifonne Hesbon cani-a bǝlawanju gapcǝna-a sammaa camoye napkera.
53 Daji Israyilawu jawal faljane jawal lardu Bashan caniye keda.
Og mai lardu Bashanne-a sojiyanju samma-a caluwune na Yedǝrei canidǝn Israyilawuro kǝriwu kekkado.
54 Kǝmandeye:
«Musa,
bare Mai Ogga rinǝmmi.
Ti-a sojiyanju-a lardunju-a sammaa mukkonǝmbo yakkǝkki.
Awo Sifon mai Amoriwuyero yiddǝmmadǝa ti yero yiddǝmi.»
55 Israyilawu ti-a tadawanju-a sojiyanju samma-a falma koljanniro ceyese lardudǝa kemowo.
Israyilawu cijane lejane sawada lardu Mowabben,
adinnam ci bǝrǝm Jordaniye kaɍangi lardu Kan'anayen napkera.