Lawar Nawi Ibrahim Isakuro kamu maduwuye
14
Ibrahim jaumaro kiarijǝna,
koro Kǝmande tiro awo samman barga dǝpcǝgǝna.
2 Yim laa Ibrahim kura wolodiyanjuye arsiyinjuro kistuwumaro:
«Are mukkonǝm dunoniro gǝnagǝne,
3 Ala Kǝma Cidi-a Same-ayen kansi bui,
bare fero Kan'anawu curonjan dǝgakkǝnadǝye tadaniro kamuro ngogǝmmiro!
4 Lenǝme lardu tambǝkkǝnalan na kǝramiyaniyen fero tadani Isakuro maamiro,
kansi sǝbbui!»
5 «Ferodǝ kasacce lardu adǝro wua ga wayenoa,
tadanǝmdǝa lardu ni isǝmmaro yadǝkko wa?»
6 «Ǝn!
Ǝn!
Bare tadani lardu todǝro yadǝmmi!
7 Ala Kǝma Sameye sakke larduni-a fado bawaniye-a kolyekko.
Wuro manasiye kansi sǝbbuye,
lardu Kan'anaye adǝa kaduwuwaniro ci cǝnna.
Tima malaiyanju fuwunǝmbo cakke,
rangǝme lenǝme lardu todǝn tadaniro fero maami.
8 Ferodǝ nia garo wayenoa,
kansi bummadǝ kǝlanǝmnin bawo.
Amma awi wakkaji yaye,
bare tadania lardu todǝro yadǝmmi!»
9 Daji wolodi mukkonjua duno Ibrahimbero gǝnajiye kǝla lamar adǝyen kansi giwo.
10 Curo kaɍimowayen mewu ngoje,
koro curo arsiyi Ibrahimben kare ngalwo ngalwodǝa kǝreje leyeno.
Harran bǝla Nahorre awaana Ibrahimbedǝye jawal kida.
11 Karǝn baram ngawo bǝlayedǝro kadinniya,
kaɍimowanju cukkeno.
Kajirijǝna,
sa kamuwa ingi ngodaro luwoye cǝdǝna.
12 Wolodidǝ Alaa cuwore:
«Kǝmande,
Ala bani ngimba Ibrahimbe,
kadunoni adǝ ku yojoye!
Ibrahimbo ser yiddeye,
mǝradunju galleye!
13 Akko wu karǝn baramben,
koro ferowa bǝlaye ingi gudoro caluwi.
14 Falnjaa bulenju fǝɍijo ingi yakkoro korǝkki.
Ala kasadde,
fero wuro:
"Yai,
koro kaɍimowanǝm yea yattǝkki,"
cǝnnadǝ,
tima kamu Isakuro yikkǝraammadǝro waljo!
Ngainin Ibrahimbo ser yiddǝme mǝradunju gallǝmmaro nokki.»
15 Manaje cerǝnnin,
fero laa bulenju ngawananna culuwe kadio.
Ferodǝ Rabeka,
fero Betuwelle.
Betuweldǝ,
tada Nahorre awaana Ibrahimbe.
16 Ferodǝ jauro kuroro shawa ye,
kongwa nojǝnni ye.
Barambo jǝpciye bulenju cǝmbǝɍe tattu ngǝskeno.
17 Wolodidǝ dǝgalje tia kapciye:
«Lowonjǝkkǝna,
ingi bulenǝmbe gana se yakke!»
18 «Malǝm,
yai!»
bulenju cǝsaye tiro ingi njaye
19 ce cane kerǝnniya:
«Dane,
ingi gudǝkke kaɍimowanǝm yattǝkke kulja.»
20 Ingi curo bulenjuyedǝa doidoiro dǝɍyi lǝman njattorambo fijiye,
cǝgase barambo walde,
ingi juwude kaɍimowa sammaa ketto.
21 Wolodidǝ gǝm cǝde tia curui,
Kǝmande cakke bǝlawuronju ngǝlajǝnaaro kǝlanjua cuwori.
22 Kaɍimowa casane kulyeranniya,
wolodidǝ kinjale dinarre nankurwowunju gǝram uwu-a mukkoram dinarre yindi gǝram mia mia-a ngoje tiro keno.
23 «Ni fero wunduye?
Marne,
fado bawanǝmben na wu-a am ngawoniye-a jǝmmiye mbejia,
wulsǝgǝne!»
24 «Wu fero Betuwelle,
koro diwu Nahorre.
25 Fannden kajim-a kanda-a ngǝwu menna,
na nayia sawoye ye menna.»
26 Wolodidǝ tungurumje ngumnju cidin gǝnaje Kǝmandero:
27 «Ala bani ngimba Ibrahimbe,
nia njungorǝkki,
aman kattendoye ngessǝmmi,
koro ser tiro njǝddo kollǝmmidǝ nangaro.
Curo bǝlawuroniyen wua na kǝramiyanjuyero sadǝm.»
28 Rabeka cǝgase leje yanjuro awo wakkajǝna sammaa wulyeyeno.
29 Yeiyanju kongwa ye mbeji,
cunju Laban.
30 Sa kinjale-a mukkoram-a cure,
koro awo kamdǝ kannanjuro wuljǝgǝnadǝa fangenniyama,
Laban jǝktiye culuwe,
kamdǝa kaptuwuro jawal barambe kida.
Kamdǝa gǝre kaɍimowanjuyen karǝn baramben daada najiye:
31 «Ni Kǝmando barga dǝmnjǝgǝnadǝ,
are fannden jǝmme!
Awiro na adǝlan danǝmi?
Jǝpturamnǝm yasakkǝna,
na kaɍimowanǝmbe ye dabbarnǝkkǝna.»
32 Wolodidǝ fannjaro ngaye kare kǝla kaɍimowayea kisawo.
Kajim-a kanda-a cawude,
koro ingi si tuldaye wolodi-a am ngawonjuye-aro kekkudo.
33 Awo kǝmboye ye tiro kekkudǝnniya:
«Bukkiwawo,
sai awo wulduye kudǝkkǝna adǝa wullǝkkiya duwon.»
«Wulle!»
34 «Wu wolodi Ibrahimbe.
35 Kǝmande jaumaro bani ngimbaro barga dǝpcǝgǝne,
kam jauro darajaaro waljǝna.
Tiro dimi so,
kani so,
fe so,
ɍiwulla so,
dinar so,
kaɍea so,
kir so,
kaɍimo so,
koro so sammaa cina.
36 Kamunju Saratu curo nankiarinjuyen tiro tada kongwa kikkambo.
Tadanju adǝro lǝman cǝdana sammaa keno.
37 Bani ngimba wua sakke kansi bukke,
bare tadanjuro kamuro fero Kan'anawu lardunjan dǝganaye ngogǝkkǝniro.
38 Wuro yeno:
"Kansi sǝbbui,
na kǝramiyaniyero,
na am bawaniyero lenǝme,
fero tadaniro maamiro."
39 Wuye tiro:
"Ferodǝ wua ga wayenoa,
nda?"
yekkǝnniya,
40 wuro:
"Kǝmande kullum gakkidǝ malaiya niro juwanjiye bǝlawuronǝm ngǝlaje,
tadaniro fero curo durra bawaniyen maane!
41 Na durraniyero lenǝmiya,
mǝraduni gallǝmma.
Ferodǝa damngeyera yaye,
kansidǝ kǝlanǝmnin bawo,"
yeno bani ngimbaye.
42 «Ku karǝn barambero kadikkǝniya,
Alaro:
"Kǝmande,
Ala bani ngimba Ibrahimbe,
yakke bǝlawuro dikki adǝ kǝnnasarraro waljo!
43 Akko wu karǝn baramben,
fero laa ingi gudoro isiya,
tia korǝkke wuro ingi bulenjuye sio yakki nǝkki.
Kǝmande,
kasadde,
44 fero wuro:
Yai,
koro kaɍimowanǝm yea yattǝkki cǝnnadǝ,
tima kamu tada Ibrahimbero yikkǝraammadǝro waljo!"
yekko.
45 «Kawu curo karwuniyen jandenǝkke yerǝkkimaro,
Rabeka bule ngawananna kadio.
Ise barambo jǝpciye ingi giwudǝnniya,
tia ingi njayero kiworǝkko.
46 Daji sadǝn bule ngawananjuye cǝsaye fǝɍije wuro:
"Yai,
koro kaɍimowanǝm yea yattǝkki,"
yeno.
Ingidǝa yakke kaɍimowani ketto.
47 Tiro:
"Ni fero wunduye?"
yekkǝnniya,
wuro:
"Wu fero Betuwelle,
koro diwu Nahorre,"
yeno.
Daji kinjale kinjanjuro yakkǝkke mukkoram mukkowanjuro kekkǝkko.
48 Fuwu Kǝmandeyen tungurummǝkke ngummi cidin gǝnayekko.
Ala Ibrahimbea yungorǝkke,
wua jawal ngǝlaro sekko,
diwu awaana Ibrahimbe tadanjuro kamu maakkoro.
49 Kǝrma bani ngimbaa gawwaa,
tiro awo ngǝla njǝddo rawuwwaa,
wuro wulsǝgǝnowo.
Ngai gǝnia,
wulsǝgǝnowo,
lekke na gaden makki.»
50 Laban-a Betuwel-aye:
«Kǝmando diye awo adǝa jawallo cakko.
Mana ngǝwu bawo.
51 Akko Rabeka fuwunǝmnin,
Kǝmando wulnjǝgǝnadǝ gai tia ngone lardundoro waldǝne.
Kamu tada Ibrahimbero waljo!»
52 Mananja fangenniya,
wolodidǝ tungurumje Kǝmandea wuseyeno.
53 Daji kare ɍiwullaye-a dinarre-a kajǝmuwa-a cuttuluwe Rabekaro keno.
Yeiyanju-a yanju-a yero jiye ngalwo ngalwo keno.
54 Wolodidǝ-a am ngawonjuye-a kǝmbo jawune ingi casane boyera.
Wajǝna suwa ciyeranniya,
wolodidǝ Rabekaye yeiyanju-a yanju-aro:
«Kolsǝnowo bani ngimbayero waldǝkki.»
55 «Ferodǝ kawu ganaro nanden napco.
Kawu mewu yayero napciya duwon,
lejo!»
56 «Kǝmande bǝlawuroni kǝnnasarraro cǝdǝna adǝ,
bare wua rosuwwi!
Kolsǝnowo bani ngimbayero waldǝkki.»
57 «Ferodǝa bowoniyo,
awo karwunjuye koriyo!»
58 Rabekaa bowojane:
«Kam adǝa ledu raamma wa?»
«Raakkǝna.»
59 Daji Rabeka-a kamu tia isawurajǝgǝna-a koljane wolodi-a am ngawonjuye-a leduro ciyera.
60 Kǝramiyanju Rabekaro barga dǝpcagane:
«Feronde,
ya am dǝwu kada kadamiyero Ala nia njǝdo!
Kaduwuwanǝm ye kǝrmai am tayia wajanaye camowo!»
61 Rabeka-a kirranju-a cijane kǝla kaɍimowayero jawane,
daji wolodi Ibrahimbe tayia ngoje leyera.
62-63 Yim laa Isaku kajiri karaaro dadaduro culuwuna duwon kǝla sapkenniya,
kaɍimowa isai kiro.
64 Sadǝn Rabeka ti ye kǝla sapkenniya,
Isakua cure kaɍimodǝn tǝrǝpce,
65 wolodidǝro:
«Wundu kam curo karaayen andia kamsagai adǝ?»
«Bani ngimba gana.»
Daji acca gawaranju ngoje fǝkkanju jakkeno.