Lawar nanga nankǝladoye Hamanne
5
Ngai duwon,
yim laa Mai Ahasaras kam laa Haman cani tada Hammedataye,
koro kaduwu Agagayedǝa jaumaro martawaaro cǝde tia wajiriro galayeno.
2 Wolodiya cinna mairiyen napkada samma wada Maiye jaane fuwu Hamannen tungurumjane ngujane ngumnja cidin gǝnajai.
Mordekai runjuma wajo.
3 Wolodiyadǝye:
«Awi nangaro wada Maiyedǝa gambawo?»
4 «Wu yaudi nangaro,
fuwunjun ngududǝ wuro jussǝnni.»
Kullum ngai wuljagaima,
fanjiwawodǝ,
daji Hamanno mana Mordekaiyedǝa wulyeyera,
Haman ngoji ra ngojiwaworo nojaro.
5 Haman Mordekai fuwunjun tungurumje ngujiwaworo asuyenniya,
fum gǝrgayeno.
6 Tiro Mordekai yaudi wuljaanadǝ,
karwunjun Mordekai runjua njejodǝ awima gǝni,
sai yaudiya cidi Mai Ahasarassen dasaana sammaa cejiya yeno.
7 Kǝndawu fi-a kǝngal fi-a awo niajǝnadǝro ngǝla wo nojoro,
Haman cakke fuwunjun wuɍi dǝmbu fida Furim canidǝa kedo.
Saa kǝnmewun yindinne Mai Ahasaras kǝrmai cǝdiyen,
kǝndawu burwoye,
kǝndawu nisan canidǝn,
wuɍi dǝmbu fida kedo.
Cadi cadi duwon,
korodǝ kǝla kǝndawu kǝnmewun yindinnero kikkuro,
kǝndawu adar canidǝ.
Ngawo adǝyen kawu kǝnmewun yakkunnero kikkuro.
8 Daji Hamanyero leje:
«Barganǝmmin,
jama laa jama gade-a gade mbeji,
amnjudǝ curo cidinǝm sammasoyen tatargada.
Tayi runjan kasarga.
Ada jagaidǝ ye jamanǝm gade jagai fallemaa camun gǝni,
koro wowomnǝm fimaa jagaiwawo.
Am ani faida bawoa,
tayia kollǝmia,
asar dimi.
9 Barganǝmmin,
kasaddǝmmaa,
marne wada ruwuja,
am ani sammaa sijaa!
Wu ye ɍiwulla kilo dǝwu yer yakku cuwuramnǝmsoro yikke ajaramnin gǝnaja.»
10 Mai kulumnju lambaa ngulondon cuttuluwe Haman tada Hammedataye koro kaduwu Agagaye kǝlado yaudiyayero ce:
11 «Ɍiwulladǝ-a jama adǝ-a mukkonǝmnin,
awo raamma de!»
12 Kǝndawu burwoye kawu mewun yakkunna,
Haman kakkadu ruwuduwu Maiye sammaa bowoyenniya,
mana wowombe wuljiye ruwujane wakkilla Mai Ahasarasse-a gomnawa larduwa cunodi sammaye-a fuwuwu jama sammaye-aro juwayeyera.
Kakkadu adǝ lardu fi yayero jiɍi ruwunjuyen,
koro jama fi yayero tǝlamnjulan ruwujane cu Mai Ahasarassen mukko casakke lamba kulumnjuye bakcagane juwayeyera.
13 Kǝngayamba casange kakkadu adǝa lardu fi yayero kesado.
«Wada Mai Ahasarassen:
Kǝndawu mewun yindinne,
kǝndawu adar canidǝ,
kawu mewun yakkunna yaudiya ngaa roro yejowo!
Yim adǝman kiari yen kal,
kǝmurjo yen kal,
kamu yen kal,
njuɍi yen kal,
yaudiya sammaa yejowo,
sulat baworo dewo,
lǝmannja mowowo.
14 Lardu fi yayen kakkadu adǝ naptu wowombe cǝdo,
yim adǝro wundu yaye dabbardoro jamaro kurukca.»
15 Mai Ahasaras cakke kǝngayambadǝ duwaduwan lejane,
wormaduwu ye wadadǝa Bǝrni Shushannin kurukkeranniya,
ti-a Haman-a diben kǝnjaro napkera.
Amma Bǝrni Shushannin bǝrniwuye hangalnja bojǝnni.