Lawar gǝmsu bǝɍin madaye
3
Tussǝna duwon,
sa Maiye karwu faskenniya,
biwu Basti cǝdǝnadǝ-a wada tia lejǝnadǝ-a takkeno.
2 Daji wolodiyanjuye:
«Barganǝmmin,
kasadde niro kǝlayakkuwa shawa shawa kwa nojanni manjaa.
3 Lardunǝm fi yayen am galane tayi sammaa capca,
Bǝrni Shushanno juwaja,
mairilan curo fado kamuwayen napca.
Hegai kowona kamuwanǝmbo kistuwuma tayiro kissuwo,
koro awo samduyeso tayia shawaro cadi co.
4 Daji fero karwunǝmbo ngaanadǝ na Bastiye cǝmowo,
gǝmsuro waljo!»
Daji Mai kǝji mana adǝye fanje ngai kido.
5 Bǝrni Shushannin yaudi laa Mordekai cani mbeji.
Ti tada Yayirre,
kaduwu Shimayiye,
koro Kisse,
fǝrdunja jiɍi Biniyaminiye.
6 Caman sa Nabukanaja mai Babilaye leje lardu Yahudaye kǝriwunin juwe mai larduma Yekonija canidǝa Bǝrni Jerujalemnin cǝdane ti-a amnju ngǝwu-a Babilaro cadǝnadǝn,
amwurawa Mordekaiyedǝ yea cǝdane kiado.
7 Fado Mordekaiyen fero rawanju Abihayille mbeji.
Cu feroyedǝ Hadasatu,
koro Esta.
Ngawo yanju-a bawanju-a bawojanayen,
Mordekai tia dapce nanjun wurayeno.
Estadǝ kǝlayakku jauro shawa.
8 Daji wada Maiyedǝa jamaro isanoyeyeranniya,
kǝlayakku kada capcane Bǝrni Shushanno casadǝne mukko Hegai kamuwa Maiyero kistuwumayero kesakko.
Esta yea ngojane Hegai tiro kissuworo mairiro keado.
9 Hegai tia jauro cǝraanadǝro,
tia ngurnoje awo samduyeso tia shawaro cadi-a kǝmbonju ngǝla ngǝla-a sammaa nagatto kikkudo.
Curo kirra mairiyedǝn tulur kǝreje tiro kǝljiye tayia curo fadowa kamuwaye ngalwodǝro kekko.
10 Kawu mairiro isidǝro,
Mordekai tiro mana kǝla fǝrdunju yaudiyen ambo njǝddo dapcǝgǝnadǝ gai,
Esta wundumaro wuljǝgǝnni.
11 Yim fi yaye lawar Estaye fanjoro,
Mordekai fuwu balballa fado kamuwayen dadaji.
12 Kǝlayakkuwa fado kamuwayen dasaanadǝ saa fallo awo tiyinja shawaro dioye kamuwaro tǝddidǝa tayiro caddi kasarga.
Kǝndawu arakkuro kǝndawu buwucci laan faidadaiya,
daji kǝndawu arakkuro fula samduyeso-a awo buwucci buwucci-an faidadai.
Sai saa dirije isiya duwon,
ci ciro na Maiyero lejai.
13 Sa kǝlayakku fi yaye fado kamuwayen cije fado Maiyero lejiya,
koljane awo cǝraana sammaa ngoji.
14 Kajiri leje na Maiyen bojiya,
wajiya suwa fado yindiye kamuwayero koje mukko Shashawa kirra Maiyero kistuwumayero casakki.
Gadero na Maiyero waldiwawo,
sai Maidǝ tia cǝraye bowojiya duwon.
15 Esta fero rawanju Abihayille Mordekai dapcǝnadǝa wundu yaye cǝraana.
Cinju na Maiyero leduye kidǝnniya,
awo Hegai kamuwa Maiyero kistuwuma ngojo cǝnna runjumaa ngojo.
16 Saa kǝntulurre kǝrmai Ahasarassea,
curo kǝndawu mewuye kǝndawu tebet canidǝyen,
Estaa nanjuro keadǝranniya,
17 Mai tia kamuwanju gademaa kojǝnaro kirawo.
Curo kǝlayakku sammayen timaa karwunju ngojo.
Kǝlanjuro jawa nangǝmsuye gǝnajiye na kamunju Bastiye kimowo.
18 Esta nangaro gomnawa larduwanjuye-a kowonawanju-a sammaro masǝna ngǝmǝriye kiddo.
Koro lardunju fi yayen jama samma tussa ngǝmǝri cado cǝne kare tǝrǝm tayiro dagaryeyeno.