5 Daji Mai Balak kǝngayamba cunode boka kuro dioma laa Balaam cani karǝn bǝrǝm Yufaratten dǝganadǝa bowoduro leyeranniya:

«Boka,

ngo jama laa Masarnin caluwuna.

Lardu ngaa camowune isane karǝn lardunjuyen napcana.

6 Marne,

are jama adǝa baskune,

wua dunon kosana nangaro.

Waneye rangǝkke tayia kǝriwunin bukke lardunin dukki.

Nokkǝna kam barga dǝpkǝgǝmmadǝ barga cuwandi,

koro kam duwon barganju ngonǝmmadǝ barganju ngodi.»

7 Wurawa Mowabbuye-a Madiyanwuye-a Mai Balak cunodǝnadǝ timinja ngojane Balaambero lejane kawuɍi Mai Balakke wulyeranniya,

8 Balaambe:

«Na adǝn bonowo.

Baɍi jaawu Kǝma Israyilawuye wulsǝgǝnadǝa wulnjagakki.»

Daji fannjun boyera.

9 Ala na Balaambero ise:

«Balaam,

wunduso fannǝmnin jǝpcana ani?»

10 «Ala,

Balak mai Mowabbuye tayia cunode wuro:

11 Jama Masarnin caluwunadǝ lardua camoyi.

Are tayia baskune.

Waneye rakce tayia kǝriwun juwe duji yeno.»

12 «Bare tayia game lenǝmmi!

Bare jama bargaa adǝye barganja ngonǝmmi!»

13 Wayenniya,

suwa Balaam cije wurawa Mai Balak cunodǝnadǝro:

«Waldǝnowo lardundoro.

Kǝma Israyilawuye wuro nayia njaakke ledu damsǝgǝna.»

14 Wurawa Mowabbuye waldane isane Mai Balakko Balaam tayia jǝgane kǝnde wayeno yera.

15 Mai Balak koro kowonawa kǝngayamba burwoyedǝa nanngǝwu-a daraja-an kojana kinodo.

16 Balaambero isane:

«Boka,

Mai Balakke,

marne,

bare awima nanjuro kǝnde damnjǝgǝnni.

17 Niro daraja dama bawo nji,

awo wullǝmma sammaa cǝdi.

Kua are,

barga jama adǝye ngone yeno.»

18 «Mai Balakdǝ ɍiwulla-a dinar-a fannjun dasaana sammaa siman,

awo Kǝmani Ala wulsǝgǝnni dikkiwawo,

bi gana bi ngǝwu.

19 Na adǝn bonowo duwon,

awo Kǝma Israyilawuye koro wulsiyidǝa fakke.»

20 Curo buneyen Ala na Balaambero ise:

«Am ani nia njadomaro kadiraa,

cine kallo lenowo.

Amma awo wulnjǝgǝkki bas de!»

21 Wayenniya,

suwa Balaam cije koronju kasse kowonawa Mowabbua jǝgane leyera.

22 Amma lejidǝ nangaro Ala tiro gǝrgayeyeno.

Balaam kǝla koronjuyen wolodiya yindia ledu cǝdi duwon,

malaiya Kǝmandeyedǝ jǝpce jawalnju kalyeno.

23 Korodǝ malaiya Kǝmandeyedǝ kashagar mukkonna jawallan daada kirunniya,

yesse kulo laaro kǝrgawo.

Balaam koronjua kowoje jawallo kalakkeno.

24 Malaiya Kǝmandeyedǝ leje na jawal ngoɍombero ngaye katte garu yindiyen curo jǝrwu inabben kojiyen dayeno.

25 Korodǝ malaiya Kǝmandeyedǝa kirunniya,

sǝgǝrije garudǝro fattiye har si Balaambe cade cingeyeno.

Koro Balaam koronjua kowoyeno.

26 Koro malaiya Kǝmandeyedǝ tayia burwoje leje na laa jauro jǝkkanin daje na koduyema baworo kido.

27 Korodǝ malaiya Kǝmandeyedǝa kirunniya,

boyeno.

Balaam gǝrgaje tai daje koronjudǝa dǝdǝkkeno.

28 Kǝmande cakke korodǝ ci cuwande:

«Balaam,

awi njǝdǝkkoro har wua yakkuro kowosem?»

29 «Wua rusǝmma nangaro.

Ca kashagar takkǝnaa,

nia njejǝkkǝna.»

30 «Wu koronǝm kullum suwamidǝma,

gǝna?

Kure niro ngai njǝddǝkkǝna wa?»

«Ǝn!

Ǝn!»

31 Daji Kǝmande sim Balaambe kaje malaiya Kǝmandeyedǝ kashagar mukkonna dawu jawallen daada kiro.

Balaam tungurumje ngumnju cidin gǝnayeno.

32 Malaiya Kǝmandeyedǝye:

«Awiro koronǝmba yakkuro kowoyem?

Wuma diye isǝkke jawalnǝm kallǝkko,

bǝlawuro adǝ niro kuttanjiyiro tǝmayekko.

33 Korodǝ wua sure yakkuro fuwunin yeskeno.

Yessǝnnia,

kango nia njejǝkke tia roa kollǝkkǝna.»

34 «Biwu ngokkǝna,

ni kǝla jawallen fuwunin danǝmmaro nokkǝni.

Kǝrma bǝlawuro adǝa raammia,

fanniro waldǝkki.»

35 «Gai am ania!

Amma awo wulnjǝgǝkki bas wulgǝgǝne!»

Daji Balaam-a kowonawa Mai Balak cunodǝnadǝ-a leyera.

36 Mai Balak Balaam isi fangenniya,

tia bǝla Mowabbuye laa daduram lardunjuye kǝla kaɍangi bǝrǝm Arnonnedǝn kapkciye:

37 «Balaam,

burwoma am nia bowoduro nodǝkkǝna,

gǝna?

Awiro sadǝn naniro isǝmmidǝ?

Ra,

rangǝkke daraja njikkiwaworo tǝmayem?»

38 «Akko nanǝmbo isǝkkǝna.

Kǝrma awo karwuniye wa wullǝkki tǝmanǝm,

ra awi?

Ǝn!

Ǝn!

Awo Ala ciniro cakkidǝmaa wulnjǝgǝkki.»

39 Balaam Mai Balakka jǝgane bǝla laaro leyera.

40 Mai Balak dalo so,

ngǝlaro so sǝnǝmnju nangaro duwaje Balaam-a kowonawa-aro dagarnja keno.

41 Wayenniya,

suwa Mai Balak Balaamba ngoje kǝla kau kura laa na jama Israyilawuye laanjaa caruiro tatkera.

51 Balaambe:

«Barganǝmnin,

na adǝn kau camme wuro laya duwaduram tulur sǝttande,

koro dalo tulur-a ngǝlaro tulur-a mane!»

52 Mai Balak awo tiro Balaam wuljǝgǝna sammaa cǝde,

tayi yindi samma kǝla laya duwadurambe nguson dalo fal-a ngǝlaro fal-a Kǝma Israyilawuye nangaro duwajane rǝmǝs warjane buwuro kedo.

53 Balaambe:

«Barganǝmnin,

na Ala nangaro bu finǝmmadǝman dane duwon,

na gana kaskadaro lekke.

Waneye Kǝma jama Israyilawuye ise tadiye.

Awo isanosiyidǝa niro wulnjǝgǝkki.»

Daji toɍi kau kuradǝyero tatkeno.

54 Ala ise Balaam-a tade Balaambe:

«Ala,

laya duwaduram tulur tandǝkke kǝla finja yayeyen dalo fal-a ngǝlaro fal-a ni nangaro duwakkǝna.»

55 Daji Kǝmande ci Balaambero mana adǝa cakke:

«Walle na Mai Balakkero,

tiro adǝa wulgǝne.»

56 Balaam na Mai Balakkero walladanniya,

ti-a kowonawanju-a na bu fidarambedǝn daada najiye:

57 «Balak Mai Mowabbuye wuro:

"Are,

barga kaduwu Yakubaye Israyilawu canidǝye ngone tayia wusane!"

cǝne wua sakke kauwa kura kura adinnamben cikke kadikko.

Amma ndayinin Ala tayiye barganja ngojǝnnidǝ wu ngokki?

58 Ndayinin Kǝmanja tayia wusajǝnnidǝ wu tayia wusakki?

59 Jama adǝa wu toɍi kau kurayen rukkǝna.

Tayi jama runjan dasaana,

kǝlanja jama gade gairo ngojanni.

60 Wundu ngalte yaye nanngǝwu kaduwu Yakubaye komjǝna wo?

Nanngǝwunjadǝ cidi gai.

Ala,

karmoni ye karmo am jirewu aniye gairo waljo!»

61 Mai Balakke:

«Balaam,

awi attǝ wuro sǝddǝm?

Na adǝro kǝladowania baskune nangaro ngiwudǝkko duwon,

ni akkonǝm tayiro barga dama baworo dǝpkǝgǝmi.»

62 «Barganǝmnin,

mana dikki yaye,

kawuɍi Kǝmanja ciniro cakkǝnadǝa kokkiwawo!»

63 «Are,

na jama Israyilawuye sammaa ruiyero leniyo!

Na adǝn laanja gǝnia,

sammanjaa rumbawo.

Na todǝro leniyeya,

tayia baskune!»

Daji tia toɍi kau kura Fiska canidǝyero kiado.

64 Nadǝn koro laya duwaduram tulur cǝdande kǝla finja yayeyen dalo fal-a ngǝlaro fal-a duwaje:

65 «Barganǝmnin,

na Ala nangaro bu finǝmmadǝman dane duwon,

lekke tia na ton naakki.»

66 Kǝmande ise Balaam-a tade cinjuro mana adǝa cakke:

«Na Mai Balakkero waldǝne,

tiro adǝa wulgǝne.»

67 Balaam na Mai Balakkero walladanniya,

ti-a kowonawanju-a na laya duwaduramben daada nayeyeno.

Mai Balakke:

«Balaam,

awi Kǝmande wuljo?»

68 «Mai Balak,

wua kǝla hangallen kǝrsǝne.

69 Ala kam gai gǝni balle kattuwu kamji,

bi mana yindi cǝdi.

Ngalte yaye mana bowuye cǝdǝna wa?

70 Ngo wuro:

"Tayiro barga dǝpkǝgǝne!"

cǝnna.

Ala tayiro barga dǝpcǝgǝnadǝ wu rangǝkke barganja ngokkiwawo.

71 Curo kaduwu Yakubayen hau ye bawo,

kuttu ye bawo.

Kǝmanja Ala dawunjan dǝganaro wulwuɍi casakki ye,

kawa jajai ye.

72 Ala tayia Masarnin cuttuluwuna,

dunonja dalo karaaye gai.

73 Nanboka so,

kuro laa so kaduwu Yakubayero njǝddo yojiwawo,

sai ser Ala tayiro cǝddǝnadǝmaa wuldu.

74 Jama adǝ-a ngam kura-a camun wo.

Ngam cijiya,

lǝmanna ceje danja jǝgǝre bunja canni duwon,

walde bojiwawo.»

75 «Tayia baskunǝmbawoa,

bare tayiro barga dǝpkǝgǝmmi!»

76 «Barganǝmnin,

awo Kǝmanja wulsiyi sammaa dikki wulnjǝgǝkkǝna,

gǝna?»

77 «Are na gadero njadǝkke.

Waneye nadǝn Ala kasacce tayia baskunǝmi.»

78 Toɍi kau kura Fuwor canidǝro tia kiado.

Kau kura adǝn karaa sammaa kam curui.

79 Balaam caye baworo Mai Balakko na laya duwaduram tulur cǝdando,

koro dalo tulur-a ngǝlaro tulur-a majo yeno.

80 Mai Balak awo Balaam tiro wuljǝgǝnadǝa cǝde kǝla laya duwaduram finja yayeyen dalo fal-a ngǝlaro fal-a Kǝmande nangaro duwaje rǝmǝs warje buwuro kido.

81 Balaam Kǝmande jama Israyilawuyero barga dǝptuwu cǝraanaro asuyenniya,

burwoye cǝdǝnadǝ gai nanbokanju dioro waje kǝla karaanna suworgada.

82 Kǝla cǝsange jama Israyilawuye jiɍi jiɍin capkada kiro.

Daji Ruhu Alaye nanjuro ise cakke

83 mana adǝa kido:

«Ngo mana wu Balaam tada Buworre,

wu awi yaye kuromadǝ.

Ngo awo wullǝkkidǝ,

sa boɍiro yurǝkke simmi kadiya,

84 wu mana Alaye fanduma,

awo Ala martawama fǝlesiyi kuroma.

85 «Nayi jama Israyilawuye kaduwu Yakubayedǝ,

leimawando jaumaro shawa!

86 Nankuranja ngor kuruwu fet leyeno gai.

Tayidǝ jǝrwuwa ci bǝrǝmben gai,

koro kǝskawa Kǝmande ci ingiyen kokcǝna gai.

87 Nanngǝwu jama Israyilawuyedǝ kasuni curo jǝrwu ingi ngǝwuayen jǝjǝrgada gai.

Mainja mai kǝladowanjuyea kǝriwunin juwui.

Kǝrmainju ye duno cǝdi.

88 Ala Israyilawua Masarnin cuttuluwuna,

dunonja dalo karaaye gai.

Wup falnin jama tayiro kǝriwu cakkudǝnaa jawui.

Waduwunjaye silla nanamjai,

koro tayia kǝniwunin jajajai.

89 Tayi ngam kura bowada gai.

Wundu gǝle tayia rakce cǝsangi?

Nayi Israyilawudǝ,

kam nayiro barga dǝmnjaanadǝ barga cuwandi,

koro kam nayiye bargando ngojǝnadǝ ti ye barganju ngodi.»

90 Mai Balak Balaambo gǝrgajiye karwukuttaro mukko bakce:

«Kǝladowania baskune nangaro bowongekko.

Amma akko yakkuro tayiro barga dǝpkeyem.

91 Adǝgairo waljǝnadǝ,

waldǝne fannǝmbo!

Niro daraja dama bawo njo raakkǝna,

amma Kǝma jama Israyilawuye niro damnjǝgǝna.»

92 «Kǝngayamba wuro juwasǝgǝmmadǝro adǝgai wulgǝkkǝna,

gǝna?

93 "Mai Balakdǝ ɍiwulla-a dinar-a fannjun dasaana sammaa siman,

rawonin rangǝkke awo Kǝmanja wulsǝgǝnni dikkiwawo,

bi ngǝla,

bi diwi.

Awo Kǝmanja wuljidǝa wullǝkki,"

yekko.

94 Kǝrma jamaniyero waldǝkki.

Amma kawudǝro,

are awo jama adǝ jamanǝmbo fuwun caddidǝa wulnjǝgǝkke.»

95 Koro mana adǝa kido:

«Ngo mana wu Balaam tada Buworre,

wu awi yaye kuromadǝ.

96 Ngo awo wullǝkkidǝ,

sa boɍiro yurǝkke simmi kadiya,

wu mana Alaye fanduma,

Kǝma Samemaye asǝr noduma,

awo Ala Martawama fǝlesiyi kuroma.

97 Akkonju ngǝlamaro tia rukki,

amma jaman kǝrmaye gǝni.

Tia rukki,

amma jaman fuwuye.

Mai laa curo jama Israyilawuyen kaduwu Yakubaye kanju kǝrmaiye mukkonna culuwi.

Mowabbu sammaa kǝriwun juwui.

98 Lardu kǝladowanju Yedombuye Seyir canidǝa cǝmoyi.

Israyilawu nasardai.

99 Kaduwu Yakubaye adǝ kǝladowanjua cunodi.

Koro am bǝlanjaye gapcanadǝa baworo cǝdi.»

95 Adǝa wulyenniya,

daji Balaam jawal cǝdane lardunjuro wallada.

Mai Balak ye leyeno.