Lawar aman namda Israyilawuye
1
Israyilawu Musa kǝla kau kuruwudǝyen duwan jǝpciwaworo kerunniya,
fuwu Harunayen captane:
«Haruna,
cine,
andiro sǝnǝm fuwunden ngoniye leji sakkare!
Musa andia Masarnin sattuluwunamadǝa awo cuwandǝna noniyende nangaro.»
2 «Sǝmola dinarre kamuwandoye-a tadawandoye-a ferowandoye-a tuluwowo,
wuro sukkudowo!»
3 Sadǝman Israyilawu samma dinar sǝmonjaye cattuluwune tiro kekkudo.
4 Haruna dinarra ania ngoje dalo dinarre kiyaro.
Daji Israyilawuye:
«Akko Alande andia Masarnin sattuluwunadǝ!»
5 Haruna adǝa kirunniya,
kau capce na laya duwadurambe cǝdande:
«Jama,
baɍi ngǝmǝri Kǝmande nangaro diye.»
6 Wayenniya,
suwa lǝp jama kǝla na laya duwadurambedǝn lǝmanna Kǝmande nangaro rǝmǝsso warjane buwuro walyera.
Koro laya jamamewurambo lǝmanna gade duwayera.
Daji napcane da jagare dibenso casane,
cijane bikke kerando.
7 Kǝmandeye:
«Musa,
cine jǝmme,
jamanǝm Masarnin tuluwumbadǝ bannadana.
8 Jawal tayiro fǝlegǝkkǝnadǝa duwama kolyera,
sǝnǝm daloye caarǝne fuwunjun sujada cadǝne ti nangaro bu fijane:
"Akko Alande andia Masarnin sattuluwunadǝ!"
canna nangaro.
9 Hal jama adǝye rukkǝna,
ansiro waljana.
10 Kǝrma wua kolsǝne,
jauro gǝrganǝkke tayi sammaa baworo dikki.
Amma kaduwunǝm yakkǝkke ngǝwujane jama kadaro waljai.»
11 Daji Musa Kǝmande Ala fassoro tia lowoje:
«Kǝmande,
awiro jama Masarnin kǝrmai dama bawonin tuluwumbadǝro gǝrgagǝmi?
12 Bare Masarwuye:
"Caman karwudiwiro Kǝmanja Israyilawua Masarnin kittuluwo.
Nianjudǝ caman kanji kauwa kuruwu kuruwuyen tayia njejo-a dunian baworo dio-aro kittuluwo,"
wuljanniro.
Kǝmande fasse,
masiwa jamanǝmbo nianǝmbadǝa kolle!
13 Ibrahim-a Isaku-a Yakuba-aa tange,
kattendon aman ndǝmmuwe kansi bume:
"Kaduwuwandoa sillowu gairo isangǝwuwukke lardu wullǝkkǝna adǝ sammaa tayiro tǝgǝmbo yikki,"
nǝmma.»
14 Daji Kǝmande jamanjuro masiwa cukkudi cǝnnadǝa njukkudo wayeno.
15 Musa allowa kauye yindi kǝlan bam wada amannea mukkon ngoje kau kuruwudǝn jǝpkeno.
Allowa aniye kanji yindi nguson bam wada amanne kurgada.
16 Allowadǝ-a ruwudǝ-aa Ala cǝdo.
17 Yushawu Musaa cadduwe kallo lejai duwon Yushawu jama kalala fijai fangenniya:
«Nawi Musa,
fane,
kalala kǝriwuye na jama dasaanalan!»
18 «Ǝn!
Ǝn!
Burwu kǝnnasarre ye gǝni,
kǝnnasarnambuye ye gǝni.
Aiya fakki.»
19 Na jama dasaanaa karǝngenniya,
Musa sǝnǝm daloyedǝ-a jama bikke farjai-a kiro.
Daji jauro gǝrgaje allowa kauye mukkon cǝdanadǝa fǝrdu kau kuruwudǝyen gǝpce tayia nanamgeno.
20 Sǝnǝm daloyedǝa cǝdane kannun warje,
kǝlwuro cǝde,
ingiro fijiye jamaro ce kesa.
21 Musaye:
«Haruna,
awi jama adǝ niro njaddo,
tayia yakkǝme biwu kura ngojana?»
22 «Kanadi tai!
Jama adǝ hal diwiaro nima nonǝmba.
23 Wuro:
"Andiro sǝnǝm fuwunden ngoniye leji sakkare,
Musa andia Masarnin sattuluwunamadǝa awo cuwandǝna noniyende nangaro,»
yera.
24 Wuye:
"Kam duwon dinar cǝdanamadǝ wuro sukkudowo!"
nǝkke kiworǝkko.
Daji sǝmolanja dinarre sakkude siyeyekkǝniya,
akko sǝnǝm daloyedǝ kiluwo.»
25 Musa jama adǝ ngistǝgǝnniro kiro.
Haruna tayia kolje awo karwunjaye cade,
har kǝladowanja tayia ruyera.
26 Daji Musa leje ci na jama dasaanayen daje:
«Am Kǝmandea jaanadǝ naniro isa!»
Kaduwu Lewiye isane fuwunjun capkadaraniya,
Musaye:
«Kǝmande Ala Israyilawuye:
"Wundundo yaye kashagarnju ngojo,
na jama dasaanaye ci falnin cijo todǝro lejo waldo,
koro kǝraminju so,
sawanju so,
kamanju so sammaa cejo!"
cǝnna.»
28 Kaduwu Lewiye mana Musaye ngojane,
yim adǝ am dǝwu yakku gai jama Israyilawuye ronja fucca.
29 Musaye:
«Kaduwu Lewiye,
tadando bi kǝramindodǝmaa lawalanuwwadǝ,
ku kidawu Kǝmandeyero walluwwa.
Adǝ nangaro ku nayiro Kǝmande barga dǝmnjagai.»