22
1 Ɛsɔ *tiyiyu ɛnʋ, ɛwɩlɩ-m ɖɔɖɔ pɔɔ ŋga ka-taa lɩm haɣ wezuu yɔ. Lɩm mbʋ, pʋwɛ kele kele ɛzɩ ñɩnʋʋ yɔ. Pɩlɩɣaɣnɩ Ɛsɔ nɛ Heɣa pe-kewiyaɣ kpelaɣ tɛɛ. 2 Pɔɔ ŋga, kekpeŋaɣ tɛtʋ taa samaɣ ɖikpeɣliye hɛkʋ taa. Tɩŋ weyi ɩhaɣ wezuu yɔ, ɩɩwɛ ke-kidiilimiŋ yɔɔ nɛ ɩlʋlʋʋ pee tɔm hiu nɛ naalɛ pɩnaɣ taa. Ɩlʋlʋʋ tɔm kʋɖʋm fenaɣ taa. Pakpakɩɣ ɩ-hatʋ nɛ pawazɩɣnɩ ajɛɛ taa ɛyaa pa-kʋdɔmɩŋ. 3 Mbʋ Ɛsɔ wɩlɩ kpalʋʋ yɔ, pɩɩtasɩɣ wɛʋ tɩ-taa.
Ɛsɔ nɛ Heɣa pe-kewiyaɣ kpelaɣ wɛɣ tɩ-taa. Ɛ-tʋmlaɖaa kɔŋ ɛ-tɛɛ luŋuu. 4 Pɔkɔŋ naʋ ɛ-ɛsɩndaa nɛ ɛ-hɩɖɛ wɛɛ pe-kila taa. 5 Ɖoo ɛɛtasɩɣ yuu. Paatasɩɣ tɛɖʋʋ kanɖʋ ñalɩmɩyɛ yaa wɩsɩ ñɩnɖɛ, mbʋ pʋyɔɔ yɔ, Kɩpaɣlʋ Ɛsɔ ñalɩmɩyɛ kɔŋ pɔ-yɔɔ ñalʋʋ. Ɖɔɖɔ lɛ, pɔkɔŋ tɔɔʋ kewiyaɣ pɩnzɩ ɛgbaŋ ɛgbaŋ.
Yesu kɔm tɔm
6 Pʋwayɩ lɛ, Ɛsɔ *tiyiyu ɛnʋ, eheyi-m se: “Tɔm tʋnɛ, tɩkɛ toovenim, tɩlakɩ mbʋ. Kɩpaɣlʋ Ɛsɔ weyi ɛwɩlɩɣ lɔɔyɩsɩ tɩnaa ɛ-lɩmaɣza yɔ, etiyi e-tiyiyu se ɛwɩlɩ ɛ-tʋmlaɖaa mbʋ pʋwɛɛ se pala alɩwaatʋ pazɩ taa yɔ.”
7 Yesu tɔŋ se: “Na, pɩkazɩ pazɩ, mɔnkɔŋ! Weyi ɛɖɔŋ tɔm ndʋ tɩlɩnɩ Ɛsɔ cɔlɔ nɛ pama takayaɣ kanɛ ka-taa yɔ tɩ-yɔɔ yɔ, ehiɣ ɛ-tɩ!”
8 Ma Yohanɛɛsɩ, manɩnɩ wondu ndʋ tɩ-tɔm. Manɩ tɩ-tɔm nɛ mana-tʋ lɛ, mɔntɔlɩ Ɛsɔ *tiyiyu weyi ɛwɩlaɣ-m-tʋ yɔ ɛ-naŋgbanzɩ tɛɛ se moluŋ ɛ-tɛɛ. 9 Ɛlɛ, eheyi-m se: “Taala mbʋ! Mɛnkɛ Ɛsɔ tʋmlaɖʋ ɛzɩ ña nɛ ña-taabalaa lɔɔyɩsɩ tɩnaa nɛ mba pɔɖɔŋ takayaɣ kanɛ ka-taa tɔm yɔɔ yɔ. Ɛsɔ tɛɛ pʋwɛɛ se ŋluŋ!”
10 Ɛlɛ ɛtasɩ-m heyuu se: “Taamɛsɩ tɔm ndʋ tɩlɩnɩ Ɛsɔ cɔlɔ nɛ pama takayaɣ kanɛ ka-taa yɔ ña-taa. Mbʋ pʋyɔɔ yɔ, alɩwaatʋ ndʋ tɔm ndʋ tɩlakɩ yɔ, tɩwɩzɩ talʋʋ. 11 Weyi ɛtatʋʋzɩ yɔ, ɛwɛɛ mbʋ pɩtatʋʋzɩ yɔ pɩ-labʋ yɔɔ mbʋ nɛ azuluma tʋ ñɛwɛɛ ɛ-azuluma taa mbʋ. Ɛlɛ, weyi ɛtʋʋzaa yɔ, ɛlɛ ɛwɛɛ mbʋ pʋtʋʋzaa yɔ pɩ-labʋ yɔɔ nɛ weyi ɛlɛ wɛ cɩɖɩcɩɖɩ yɔ, ɛlɛ ñɛwɛɛ mbʋ!”
12 Yesu tɔŋ se: “Na! Pɩkazɩ pazɩ, mɔnkɔŋ! Mɛnkpɛnɖɩɣnɩ kɩhɛyʋʋ nɛ mɛhɛyɩ paa weyi mbʋ ɛlaba yɔ pʋ-yɔɔ. 13 Ma lɛ Nʋmɔɖɛyʋ nɛ Ɛɖɩɣyɛ, manpazɩnɩ pɩtɩŋa payɩ, mɛntɛzɩɣnɩ-pʋ. Ma ɖɔɖɔ lɛ Ɖɩpazɩyɛ nɛ Ɖɩtɛzɩyɛ. 14 Mba pɔcɔtʋʋ po-tokonaa se pɩha-wɛ waɖɛ nɛ pɔtɔɔ tɩʋ ŋgʋ kɩhaɣ wezuu yɔ ki-pee nɛ patɩŋnɩ nɔnɔsɩ nɛ pasʋʋ tɛtʋ taa yɔ, pehiɣ pa-tɩ! 15 Piyele kʋsɔɔtʋ laɖaa nɛ fadɩŋ laɖaa nɛ hayitu laɖaa nɛ ɛyaa kʋyaa nɛ agɔlɩma layaa nɛ mba pɔsɔɔlɩ cɛtʋʋ nɛ pɛcɛtɩɣ ɛyaa yɔ, paba ñɛwɛɣnɩ tɩ-wayɩ!
16 Ma Yesu lɛ, meheyi men-tiyiyu se ewolo ma-agbaa taa nɛ ɛlɩzɩ-mɩ aseɣɖe ɖɩnɛ. Mɛnkɛ Daaviidi liɖe taa tʋ, ma lɛ tɩmbalʋʋ ŋgʋ kɩñɩlɩzɩɣ yɔ.”
17 Ɛsɔ Kalɩzaɣ nɛ Halɩmvalʋ pɔtɔŋ se: “Kɔɔ!” Weyi ɛnɩɣ yɔ, ɛtɔ ɖɔɖɔ se: “Kɔɔ!”
Weyi lɔkɔtʋ ɖɔkɩ-ɩ yɔ, ɛkɔɔ: weyi e-liu wɛ wezuu lɩm yɔ, ecozi-pʋ falaa!
Kɛtɛzaɣ tɔm
18 Mankaŋ paa weyi ɛnɩɣ tɔm ndʋ tɩlɩnɩ Ɛsɔ cɔlɔ nɛ pama-tʋ takayaɣ kanɛ ka-taa yɔ ɛ-ñʋʋ taa se: ye nɔɔyʋ ɛsɔzɩ tɩ-yɔɔ yɔ, Ɛsɔ sɔzʋʋ mbʋ pɩtɛŋnɩ pʋdʋ yɔ pʋ-yɔɔ kʋñɔmɩŋ weyi pama ɩ-tɔm takayaɣ kanɛ ka-taa yɔ. 19 Ɖɔɖɔ lɛ, ye nɔɔyʋ ɛpasɩ tɔm ndʋ tɩlɩnɩ Ɛsɔ cɔlɔ nɛ pama-tʋ takayaɣ kanɛ ka-taa yɔ tɩ-yɔɔ yɔ, Ɛsɔ pasɩɣ tɩʋ ŋgʋ kɩhaɣ wezuu yɔ kʋ-hɔɔlʋʋ ŋgʋ kɩkɛ pʋdʋ ñɩŋgʋ yɔ nɛ ɛ-tɛtʋ hɔɔlʋʋ ŋgʋ kɩkɛ pʋdʋ ñɩŋgʋ yɔ pɔ-yɔɔ. Tɩʋ ŋgʋ nɛ tɛtʋ ndʋ pɔ-tɔm pama takayaɣ kanɛ ka-taa.
20 Yesu weyi ɛtɔm se tɔm tʋnɛ tɩkɛ toovenim yɔ, ɛtɔm se: “Ɛɛ, pɩkazɩ pazɩ, mɔnkɔŋ.” Pɩla mbʋ! Kɩpaɣlʋ Yesu, kɔɔ!
21 Kɩpaɣlʋ Yesu ɛla mɩtɩŋa payɩ lootiye!