Pɩnzɩ kutoku kewiyaɣ tɔɔʋ tɔm
20
1 Pʋwayɩ lɛ, mana Ɛsɔ *tiyiyu nɔɔyʋ lɩnɩ ɛsɔdaa nɛ etiki. Ɛɖɔkɩ asayʋʋ pɔʋ nɔɔ ñɩmɩyɛ nɛ yoŋgbasɩ sɔsɔsɩ nasɩyɩ e-nesi taa. 2 Etiba lɛ, ewolo ɛkpa coojo nɛ ɛhɔkɩ-ɩ-sɩ se ɛwɛɛ mbʋ pɩnzɩ kutoku. Ɛnʋ lɛ ɖʋm kɩbɩnʋ weyi payaɣ se eleeu nɛ pɛtɛ patasɩ-ɩ se *Kañadʋ Satanɩ yɔ. 3 Ɛhɔkɩ-ɩ lɛ, ɛpɛɖɩ-ɩ asayʋʋ pɔʋ taa nɛ ɛɖɩɣ ɛ-yɔɔ nɛ ɛtaaɖɩ nɛ ɛñɩɣ nesi ɛ-yɔɔ se ɛtaatasɩ lɩʋ nɛ epeɣzi ajɛɛ taa ñɩma. Ɛwɛɣ peeye nɛ pʋkɔɔ pɩsɩnɩ alɩwaatʋ ndʋ pɩnzɩ kutoku ɖɛwa yɔ. Pʋwayɩ lɛ, pʋwɛɛ se patʋlɩ-ɩ nɛ pɛyɛɖɩ-ɩ alɩwaatʋ pazɩ.
4 Mana ɖɔɖɔ kewiyisi kpelisi nasɩyɩ: mba powokaɣ pacakɩ sɩ-yɔɔ yɔ, paha-wɛ ɖoŋ se pahʋnɩ ɛyaa tɔm. Ɖɔɖɔ lɛ, mana mba pɛsɛtɩ pa-ñʋŋ yɔ pa-ciyamnaa. Paakʋ-wɛ*fe*, mbʋ pʋyɔɔ yɔ, palɩzaɣ Yesu aseɣɖe nɛ posusuu Ɛsɔtɔm. Mba taaluŋni kpɩnɛ yaa ɖɩ-sɩʋ kpeleɣ pɛ-tɛɛ, patala pe-kila taa yaa pe-nesi yɔɔ ɖɩ-yʋsaɣ. Pefema nɛ pa nɛ Krɩstʋ pɔtɔɔ kewiyaɣ pɩnzɩ kutoku. \fm e \fr (20.4) \fk Mba paakʋ-wɛ yɔ: \f papɩzɩɣ pɛɖɛzɩ-tʋ ɖɔɖɔ se: mba palɩzaɣ Yesu aseɣɖe nɛ posusuu Ɛsɔtɔm yɔ nɛ mba potoluŋ kpɩnɛ yaa ɖɩ-sɩʋ kpeleɣ pɛ-tɛɛ nɛ pala pe-kila taa yaa pe-nesi yɔɔ ɖɩ-yʋsaɣ yɔ. 5 Mbʋ lɛ kajalaɣ fem. Piyele sɩɖaa lɛlaa yɔ, paafeŋ nɛ pʋkɔɔ pɩsɩnɩ alɩwaatʋ ndʋ pɩnzɩ kutoku ŋgʋ kɩtɛma yɔ. 6 Mba pefeŋ kajalaɣ fem mbʋ pɩ-taa yɔ, pɛkɛ Ɛsɔ ñɩma, pehiɣ pa-tɩ! Sɩm naalɛ ñɩmbʋ fɛyɩnɩ ɖoŋ pɔ-yɔɔ. Ɛlɛ, pɛkɛɣ Ɛsɔ nɛ Krɩstʋ pɔ-cɔjɔnaa nɛ pa nɛ Krɩstʋ ɛnʋ, pɔtɔɔ kewiyaɣ pɩnzɩ kutoku.
Pawabʋ *Kañadʋ Satanɩ yɔ
7 Pɩnzɩ kutoku ŋgʋ kʋkɔŋ kɩɖɛɛ lɛ, palɩzɩ *Kañadʋ Satanɩ nɛ ɛ-salaka taa. 8 Ɛlɩɣ lɛ, epeɣzi Gɔɔgɩ nɛ Maagɔɔgɩ, pʋ-tɔbʋʋ se kedeŋa kpeekpe yɔɔ ajɛɛ taa ñɩma. Ekpeɣliɣ-wɛ se pala you. Pɔɖɔ ɛzɩ teŋgu nɔɔ kañɩŋa yɔ. 9 Pɩkɛdaa lɛ, manaɣ palɩ kedeŋa kpeekpe yɔɔ nɛ pɔcɔʋ Ɛsɔ ñɩma pɩlʋʋ nɛ tɛtʋ kʋsɔɔlɩtʋ kondiko. Ɛlɛ, miŋ nɩɩyɩ lɩnɩ ɛsɔdaa nɛ etii enezi-wɛ. 10 Eleeu weyi epeɣzaɣ-wɛ yɔ, pɛpɛɖɩ-ɩ miŋ sɔsɔŋ weyi ɛ-taa nɛ tɩm yɔ ɛ-taa. Peeye kpɩnɛ nɛ weyi ɛcɛtɩɣ se ɛkɛ lɔɔyaɣ tʋ yɔ, pɛwɛɛ. Mbʋ panazɩɣ-wɛ wɩsɩ nɛ ɖoo pɩnzɩ ɛgbaŋ ɛgbaŋ.
Tɔm hʋʋ kɛtɛzaɣ ñɩmbʋ
11 Pʋwayɩ lɛ, mana kewiyaɣ kpelaɣ sɔsɔɔ kʋhʋlʋmaɣ nakɛyɛ nɛ weyi ɛcaɣ kɔ-yɔɔ yɔ. Ɛsɔtɔnʋʋ nɛ tɛtʋ pese ɛ-ɛsɩndaa, patatasɩ-wɛ naʋ. 12 Mana ɖɔɖɔ sɩɖaa: ɖoŋ tɩnaa nɛ ajamaa pasɩŋ kewiyaɣ kpelaɣ ŋga kɛ-ɛsɩndaa. Pukuli takayɩsɩ nasɩyɩ. Pukuli lɛɛka ɖɔɖɔ, ŋga lɛ wezuu takayaɣ. Mbʋ sɩɖaa laba yɔ, pʋ-tɔm paama takayɩsɩ nzɩ sɩ-taa, pʋ-yɔɔ pahʋnɩ-wɛ. 13 Teŋgu lɩzɩ sɩɖaa mba paawɛ kɩ-taa yɔ nɛ sɩm nɛ ɖenɖe sɩɖaa wɛɛ yɔ, paba ñɛcɛlɩ mba paawɛ pɔ-cɔlɔ yɔ nɛ pahʋnɩ paa weyi mbʋ ɛlaba yɔ pʋ-yɔɔ. 14 Pɛpɛɖɩ sɩm nɛ ɖenɖe sɩɖaa wɛɛ yɔ miŋ sɔsɔŋ taa. Miŋ sɔsɔŋ ɛnʋ lɛ: sɩm naalɛ ñɩmbʋ. 15 Weyi patana ɛ-hɩɖɛ wezuu takayaɣ taa yɔ, pɛpɛɖɩ-ɩ miŋ sɔsɔŋ taa.