Wɩlʋʋ 18

*Babilooni tɛtʋ tɔlʋʋ yɔ

¹ Pʋwayɩ lɛ, mana Ɛsɔ *tiyiyu lɛlʋ, ɛlɩnɩ ɛsɔdaa nɛ etiki. Ɛwɛnɩ ɖoŋ siŋŋ nɛ e-koboyaɣ ñalɩmɩyɛ ñalɩ kedeŋa yɔɔ. ² Eholaɣ ɖoŋ se: “Tɩtɔlaa! *Babilooni tɛtʋ sɔsɔtʋ tɔlaa! Tɩpɩsɩ alewaa ɖɩjaɣyɛ. Peeye kalɩzasɩ kɩdɛkɛdɩsɩ tɩŋa nɛ sumasɩ kɩdɛkɛdɩsɩ nɛ nzɩ ɛyaa ɛɛcaɣ kpem yɔ patɩŋa pɛwɛɛ. ³ Mbʋ pʋyɔɔ yɔ, ajɛɛ kpeekpe taa ɛyaa ñɔ tɩ-hayitu sʋlʋm nɛ pʋkʋʋ-wɛ. Tɩ nɛ kedeŋa yɔɔ awiya palabɩ hayitu nɛ kɔ-yɔɔ tadɩyɛ laɖaa hiɣ ñɩm tɩ-ajana kadadaɣyaɣ yɔɔ.”

⁴ Peeye mantasɩ nɩʋ nɔɔ lɛɛka nɛ ɛsɔdaa se: “Ma-ñɩma! Ɩlɩɩ tɩ-taa nɛ ɩtaakɔɔ ɩɖʋ mi-nesi tɩ-kɩwɛɛkɩm taa. Kʋñɔmɩŋ weyi ɩkɔŋ-tʋ talʋʋ yɔ, ɩ-taa nakʋyʋ ɩtaatalɩ-mɩ. ⁵ Mbʋ pʋyɔɔ yɔ, tɩ-kɩwɛɛkɩm ka huuye nɛ pɩkpa ɛsɔdaa nɛ Ɛsɔ na mbʋ tɩlaba nɛ pɩtatʋʋzɩ yɔ. ⁶ Mɩ lɛ, ɩlabɩ-tʋ ɛzɩ tɩlabʋ lɛlaa yɔ, ɩkpa-tʋ kɩmɩyɛ pʋ-tɔm naalɛ. Ɩpɩyɩ-tʋ sʋlʋm ɖoŋ ñɩmbʋ mbʋ pɩpɩyɩ lɛlaa se pʋkʋ-wɛ yɔ pʋ-tɔm naalɛ. ⁷ Ɩcɔzɩ-tʋ nɛ iyele tɩ-ɛza ñɩŋ tɔm ɛzɩma mbʋ tɩkʋndaa nɛ tɩsʋʋ ajana taa yɔ! Mbʋ pʋyɔɔ yɔ, tɩmaɣzɩɣ tɩ-taa se: ‘Weyi ma mɛnkɛ abiɖe yɔ, mancaɣnɩ cɩnɛ. Mɛntɛkɛ lelu, maakaɣ caɣʋ leɣa nakɛyɛ kaʋ.’ ⁸ Pʋ-yɔɔ tɩ-kʋñɔmɩŋ kaɣ kɔm kɩyakʋ kʋɖʋmʋʋ. Ɩnʋ lɛ: sɩm nɛ leɣa caɣʋ nɛ ñɔɔsɩ. Miŋ kɔŋ-tʋ ñaɣʋʋ, mbʋ pʋyɔɔ yɔ, Kɩpaɣlʋ Ɛsɔ weyi ɛhʋnɩ tɛtʋ ndʋ yɔ, ɛwɛ ɖoŋ.

⁹ “Kedeŋa yɔɔ awiya wena a nɛ tʋ palabɩ hayitu nɛ ajana yɔ, akɔŋ wiluu atɩŋa payɩ nɛ atɩmɩɣ tɩ-yɔɔ alɩwaatʋ ndʋ anaɣ miŋ weyi ɛñakɩ-tʋ yɔ ɛ-ñɔsɩ yɔ. ¹⁰ Kʋñɔŋ ŋgʋ kɩtalɩɣ-tʋ yɔ kʋ-sɔɔndʋ yɔɔ lɛ, pasɩŋɩɣ poliŋ nɛ pɔtɔŋ se: ‘Babilooni tɛtʋ sɔsɔtʋ, tɛtʋ ɖoŋ ñɩndʋ, pʋtɔɔ-ŋ! Pʋtɔɔ-ŋ! Pahʋnɩ-ŋ nɛ pakʋ ñɔ-tɔm yem kɛlɛʋ!’

¹¹ “Piyele kedeŋa yɔɔ tadɩyɛ laɖaa lɛ, pewiliɣ nɛ pacaɣ ti-leɣa. Mbʋ pʋyɔɔ yɔ, nɔɔyʋ ɛɛtasɩɣ po-wondu yabʋ. ¹² Mbʋ pɛpɛdaɣ yɔ lɛ: sika wondu nɛ ndʋ palabɩnɩ liidiye yɔ nɛ ñɩɣlɩm pɛɛ nɛ lɩtʋ nɛ pɩsaŋ fɛlɛ fɛlɛ ñɩŋ nɛ sotu ñɩŋ nɛ weyi iwobini sɛmɩŋ yɔɔ yɔ nɛ kɩsɛmɩŋ cɩɩɩ nɛ mbʋ pasaɣnɩ tɩŋ weyi ɩlɩɣ sɔzɩŋ yɔ nɛ weyi ɩwɛ liidiye yɔ nɛ mbʋ palabɩnɩ tu kela yɔ nɛ mbʋ palabɩnɩ ñɩɣyʋʋ kazɩnzɩŋa ñɩŋgʋ yɔ nɛ mbʋ palabɩnɩ ñɩɣtʋ yɔ nɛ mbʋ palabɩnɩ pɛɛ wena payaɣ se maarbɩɖɩ yɔ.ILLUSTRATION 30

¹³ Pɛpɛdaɣ ɖɔɖɔ mbʋ pacanɩɣnɩ ɖozi yɔ nɛ tɩlaaɖɩ ndɩ ndɩ nɛ ŋgʋ pɔhɔkɩ yɔ nɛ kɔyɛ nɖɩ payaɣ se miiri yɔ nɛ sʋlʋm nɛ num nɛ mʋlʋm nɛ mɩla nɛ naŋ nɛ heŋ nɛ kpaŋnaŋ nɛ lɔɔɖa wena kpaŋnaŋ hɔŋ yɔ nɛ yomaa nɛ ɛyaa lɛlaa. ¹⁴ Tadɩyɛ laɖaa mba, paba heyiɣ tɛtʋ ndʋ se: ‘Mbʋ pɩtɩŋa payɩ ñe-liu kɛwɛɛ kpem nɛ ŋwɛnɩ-pʋ yɔ, pʋmʋʋ ñɛ-tɛ. Ña-ñɩm tɩŋa payɩ nɛ ña-ajana peleba. Ŋŋtasɩɣ-wɛ naʋ kaʋ.’ ¹⁵ Tadɩyɛ laɖaa mba pɩtɩŋnɩ tɩ-yɔɔ nɛ pehiɣ ñɩm yɔ, tɩ-kʋñɔŋ sɔɔndʋ kɔŋ-wɛ kpaʋ nɛ pasɩŋ poliŋ nɛ pewili nɛ pacaɣ leɣa. ¹⁶ Pɔkɔŋ yɔɔdʋʋ se: ‘Pʋtɔɔ tɛtʋ sɔsɔtʋ! Pʋtɔɔ-tʋ! Tisu wondu fɛlɛ fɛlɛ ñɩndʋ nɛ ndʋ tiwobini sɛmɩŋ yɔɔ yɔ nɛ kɩsɛmtʋ cɩɩɩ nɛ tɩlɛɛ sika nɩŋgbacaɣlɩnaa nɛ ñɩɣlɩm pɛɛ nɛ lɩtʋ. ¹⁷ Ɛlɛ tɩ-ñɩm sakɩyɛ mbʋ, pʋmʋʋ yem alɩwaatʋ pazɩ taa.’

“Mɛlɛnaa sayaa tɩŋa payɩ nɛ pa-sʋyaa nɛ mba palakɩ tʋmɩyɛ pa-taa yɔ nɛ mba patɩŋa payɩ paba ñalakɩ tʋmɩyɛ teŋgu yɔɔ yɔ, pasɩŋ poliŋ ¹⁸ nɛ pamakɩ kubusi alɩwaatʋ ndʋ panaɣaɣ miŋ weyi ɛñakɩ-tʋ yɔ ɛ-ñɔsɩ yɔ se: ‘Tɛtʋ natʋyʋ taawɛɛ nɛ tɩtalɩ tɛtʋ sɔsɔtʋ tʋnɛ!’ ¹⁹ Pokuwaɣ mʋzʋʋ nɛ paɖʋʋ pa-ñʋŋ taa nɛ pewiliɣ nɛ pacaɣ leɣa nɛ pamakɩ kubusi se: ‘Pʋtɔɔ tɛtʋ sɔsɔtʋ! Pʋtɔɔ-tʋ! Tɩ-ñɩm yɔɔ pɩtɩŋaɣna nɛ mba patɩŋa payɩ pɛwɛnɩ mɛlɛnaa teŋgu taa yɔ, pehikiɣ ñɩm. Ɛlɛ tɩpɩsɩ yem alɩwaatʋ pazɩ taa!’ ”

²⁰ Pʋ-yɔɔ lɛ, meheyiɣ mba mɩ ɩwɛ ɛsɔdaa yɔ se mɩ-taa ɛhʋlʋmɩ! Mɩ Ɛsɔ ñɩma nɛ Yesu tiyiyaa nɛ lɔɔyɩsɩ tɩnaa mɩ-taa ɛhʋlʋmɩnɩ tɩ-yɔkʋʋ! Mbʋ pʋyɔɔ yɔ, Ɛsɔ hʋnɩ-tʋ nɛ eɖezi mɩ-tɔm.

²¹ Peeye Ɛsɔ *tiyiyu ɖoŋ tʋ nɔɔyʋ kpaɣ pɩyɛ nɖɩ ɖɩwɛ ɛzɩ namɩyɛ sɔsɔɖɛ yɔ nɛ ɛlɔ teŋgu taa nɛ ɛtɔ se: “Mbʋ pɔkɔŋ lɔʋ Babilooni tɛtʋ sɔsɔtʋ nɛ ɖoŋ nɛ paatasɩɣ-tʋ naʋ kaʋ. ²² Nɔɔyʋ ɛɛtasɩɣ nɩʋ tɩ-taa cɩmɩŋ maɖaa nɛ soo maɖaa nɛ hɩsɩ hʋlɩyaa nɛ agandɛɛ hʋlɩyaa pa-taŋ. Paatasɩɣ naʋ mba palakɩ nesi tʋma yɔ pa-taa nɔɔyʋ kaʋ. Paatasɩɣ nɩʋ ɖɔɖɔ se nɔɔyʋ naŋɩɣ. ²³ Kanɖʋnaa ñalɩmɩyɛ ɛɛtasɩɣ naʋ. Paatasɩɣ nɩʋ mba pakpaɣ ɖama fam nɛ fam yɔ pa-taŋ. Mbʋ pʋyɔɔ yɔ, tɩ-taa tadɩyɛ laɖaa kɛkɛnɩ sɔsaa kedeŋa yɔɔ. Ɖɔɖɔ lɛ, tiyili ajɛɛ tɩŋa payɩ nɛ ti-efeletu ²⁴ nɛ pana tɩ-taa lɔɔyɩsɩ tɩnaa nɛ Ɛsɔ ñɩma nɛ mba patɩŋa payɩ pɛcɛbɩ pe-liŋ tɛɛ kedeŋa yɔɔ cɩnɛ yɔ pa-calɩm.”