Aseɣɖe tɩnaa naalɛ tɔm
11
1 Pʋwayɩ lɛ, pɛcɛlɩ-m kɩñɩŋgbaɖɛ nɖɩ ɖɩwɛ ɛzɩ ɖaʋ kɩmaɣzʋʋ yɔ nɛ peheyi-m se: “Kʋyɩ ŋmaɣzɩ Ɛsɔ ɖɩɣa nɛ tɩlaaɖɩ ɖɩhɔɖɛ nɛ ŋkalɩ mba poluŋuu Ɛsɔ tɛɛ ka-taa yɔ. 2 Ɛlɛ, taamaɣzɩ taɣ, yebi-kɛ nɛ hɔɔlʋʋ. Mbʋ pʋyɔɔ yɔ, peyebini-kɛ nɛ mba paañaŋ Ɛsɔ yɔ, mba kɔŋna yaɣʋ Ɛsɔ tɛtʋ naŋgbanzɩ fenasɩ nɩɩnaza nɛ naalɛ. 3 Meyeki nɛ ma-aseɣɖe tɩnaa naalɛ suu kutokiŋ nɛ pɛkɛ lɔɔyɩsɩ tɩnaa kɩyakɩŋ kutoku nɛ nasɩlɛ nɛ nɩɩnʋwa nɛ hiu.”
4 Mba lɛ somiŋ naalɛ nɛ kanɖʋnaa naalɛ mba pasɩŋ kedeŋa yɔɔ Kɩpaɣlʋ ɛsɩndaa yɔ. 5 Ye po-koyindinaa ɛcaɣ se palabɩ-wɛ kɩdɛkɛdɩm nabʋyʋ yɔ, miŋ nɩɩyɩ lɩɣnɩ pɔ-nɔsɩ taa nɛ enezi-wɛ. Toovenim lɛ, ye nɔɔyʋ ɛcaɣ se ɛlabɩ-wɛ kɩdɛkɛdɩm yɔ, pʋwɛɛ se pʋkʋ-ɩ mbʋ. 6 Lɔɔyɩsɩ tɩnaa mba, pɛwɛnɩ ɖoŋ se paɖɩɣ ɛsɔtɔnʋʋ nɛ tɛʋ ɛtaanɩɩ kɩyakɩŋ weyi ɩ-taa posusuu pɔ-tɔm yɔ. Pɛwɛnɩ ɖoŋ ɖɔɖɔ se papɩsɩ lɩm calɩm nɛ peyele kʋñɔmɩŋ ndɩ ndɩ tɩŋa sʋʋ kedeŋa yɔɔ alɩwaatʋ ndʋ pɩmaɣ-wɛ yɔ.
7 Pɔkɔŋ pɛtɛ pa-aseɣɖe lɩzʋʋ lɛ, kpɩnɛ nɖɩ ɖɩlɩɣnɩ asayʋʋ pɔʋ taa yɔ, ɖiyoni-wɛ nɛ ɖɩwabɩ-wɛ nɛ ɖɩkʋ-wɛ pasɩ. 8 Pe-pilima wɛɣ tɛtʋ sɔsɔtʋ ndʋ pamaɣzɩnɩ Sodom nɛ *Ejiptɩ nɛ payaa-tʋ mbʋ yɔ tɩ-habɛɛ yɔɔ. Peeye pakam pa-Kɩpaɣlʋ *kaamaŋkaɣ yɔɔ. 9 Samaɣ nɛ cejewee nɛ kʋnʋmɩŋ nɛ ajɛɛ pa-taa ɛyaa nabɛyɛ kɔŋ cɔnaʋ pe-pilima kɩyakɩŋ naadozo nɛ hɔɔlʋʋ. Paakɔŋ haʋ nʋmɔʋ se pepim-wɛ. 10 Kedeŋa yɔɔ ñɩma taa hʋlʋmʋʋnɩ lɔɔyɩsɩ tɩnaa naalɛ mba pa-sɩm nɛ pɛwɛɛ amaya yɔɔ. Pɔkɔŋ ɖama tiyinaʋ kʋjɔŋ, mbʋ pʋyɔɔ yɔ, pa-naalɛ panazaɣnɩ-wɛ. 11 Ɛlɛ, kɩyakɩŋ naadozo nɛ hɔɔlʋʋ ɩnʋ ɩ-wayɩ lɛ, wezuu kalɩzaɣ nakɛyɛ lɩnɩ Ɛsɔ cɔlɔ nɛ kasʋʋ sɩɖaa naalɛ mba pa-taa nɛ pakʋyɩ pasɩŋ pa-naŋgbanzɩ yɔɔ nɛ sɔɔndʋ kpa mba pɔcɔŋaɣnɩ-wɛ yɔ siŋŋ. 12 Peeye lɔɔyɩsɩ tɩnaa mba, panɩ puholuuni ɛsɔdaa se: “Ɩkpa cɩnɛ!” Ɛlɛ pɩkpazɩ-wɛ ɛsɔdaa yem nɛ pasʋʋ mɩndʋ, po-koyindinaa cɔŋaɣnɩ-wɛ. 13 Alɩwaatʋ ndʋ tɩ-yɔɔ tɛtʋ ñamsɩ sɔsɔm nɛ ye patayɩ tɛtʋ ndʋ tɩ-taa paawɛɛ yɔ tɔm hiu yɔ, hɔɔlʋʋ kʋɖʋmʋʋ yɔkaa. Ɛyaa kutokiŋ lʋbɛ sɩbɩnɩ asayʋʋ ŋgʋ kɩ-taa. Piyele sɔɔndʋ kpa mba palɩ kɩ-taa yɔ nɛ pasa Ɛsɔ weyi ɛwɛ ɛsɔdaa yɔ.
14 Kʋñɔŋ naalɛ ñɩŋgʋ ɖɛwa. Pɩkazɩ pazɩ, tozo ñɩŋgʋ kɔŋ.
Ɛsɔ *tiyiyu lʋbɛ ñɩnʋ hʋlʋʋ ɛgandɩyɛ yɔ
15 Pɩkɛdaa lɛ, Ɛsɔ *tiyiyu lʋbɛ ñɩnʋ hʋlɩ ɛgandɩyɛ nɛ puholuuni ɛsɔdaa kpaŋŋ kpaŋŋ se: “Pɛcɛlɩ kedeŋa kewiyaɣ ɖa-Kɩpaɣlʋ nɛ Weyi Ɛlɩzaa Yɔ. Ɛtɔkɩ-kɛ pɩnzɩ ɛgbaŋ ɛgbaŋ!” 16 Peeye *sɔsaa nɩɩlɛ nɛ naanza mba paacaɣ Ɛsɔ ɛsɩndaa pe-kewiyaɣ kpelisi yɔɔ yɔ, poluŋ ɛ-tɛɛ nɛ paka pɛ-ɛza nɛ tɛtʋ nɛ pasaŋ-ɩ se:
17 “Kɩpaɣlʋ Ɛsɔ, Ɖoŋ Tɩŋa Tʋ!
Ñɛwɛna, ñaawɛna,
ɖɩsaŋ-ŋ se ŋtɔɔ ñe-kewiyaɣ nɛ ño-ɖoŋ sɔsɔŋ.
18 Ajɛɛ taa ñɩma pana kakpawa,
lɛɛlɛɛyɔ ña-ñɩna ñakpawa!
Pɩtalaa se ŋhʋnɩ sɩɖaa:
ŋhɛyɩɣ ña-tʋmlaɖaa,
mba yɔ: lɔɔyɩsɩ tɩnaa
nɛ ña-ñɩma
nɛ mba pañaŋ-ŋ yɔ,
paa paakɛ ajamaa yaa ɖoŋ tɩnaa
nɛ piyele ŋkʋ mba paba wɛɛkɩɣ kedeŋa yɔ.”
19 Peeye Ɛsɔ ɖɩɣa ŋga kɛwɛ ɛsɔdaa yɔ, kɔ-nɔnɔɔ tʋlaa nɛ panaɣ ɛ-*nɔɔ haʋ aɖakaɣ ka-taa. Tɛʋ ñɩlɩzaa nɛ kɔkɔɖɛ ya nɛ tɛʋ nazɩ nɛ tɛtʋ ñamsɩ nɛ ɖɔmbɛɛ tɔlɩ siŋŋ.