Galaatɩ 4

¹ Ndʋ mancaɣ yɔɔdʋʋ yɔ lɛ se: weyi ɛtɩɣyɩɣ ɛ-caa ñɩm yɔ, alɩwaatʋ ndʋ ɛtapaɣlɩda yɔ, ɛfɛyɩ ndɩ nɛ yom. Ɛlɛ, ɛnʋ kɔŋna tɩɣyʋʋ ɛ-caa ñɩm tɩŋa. ² Paa mbʋ yɔ, alɩwaatʋ ndʋ ɛwɛ pɩcatʋ taa yɔ, ɛyaa nabɛyɛ nesi taa ɛwɛɛ nɛ pɔcɔŋnɩ ɛ-yɔɔ nɛ pʋkɔɔ pɩsɩnɩ alɩwaatʋ ndʋ ɛ-caa kaɖʋwa yɔ. ³ Ɖa lɛ, mbʋ ɖɔɖɔ ɖɩɩwɛ alɩwaatʋ ndʋ ɖɩɩwɛ ɛzɩ piya yɔ. Ɖɩɩkɛ kedeŋa yɔɔ cɩnɛ ɖoŋ yomaa. ⁴ Ɛlɛ, alɩwaatʋ talaa lɛ, Ɛsɔ yele nɛ pɩtɩŋnɩ halʋ nɔɔyʋ yɔɔ nɛ palʋlɩ Ɛsɔ ɛnʋ ɛ-Pɩyalʋ nɛ Yuda ñɩma paɣtʋ wɛnɩ ɖoŋ ɛlɛ yɔɔ ⁵ se eholi mba tɩɩwɛnɩ ɖoŋ pɔ-yɔɔ ɖɔɖɔ yɔ. Mbʋ yekina nɛ ɖɩpɩsɩ Ɛsɔ piya.

⁶ Mbʋ pɩwɩlɩɣ se ɖɩkɛ e-piya siŋŋ yɔ lɛ se eyeba nɛ ɛ-Pɩyalʋ Kalɩzaɣ sʋʋ ɖa-taa nɛ kɔyɔɔdʋʋ se: “Man-Caa!” ⁷ Pʋ-yɔɔ lɛ, ŋtatasɩ kɛʋ yom, ɛlɛ, ŋpɩsɩ Ɛsɔ pɩɣa. Ŋpɩsɩ ɛ-pɩɣa yɔ, ɛhaɣ-ŋ ñɩm mbʋ ɛsɩwa se ɛhaɣ e-piya yɔ.

Mbʋ pɩcɛyɩɣ Pɔɔlɩ nɛ Galaatɩ ñɩma tɔm yɔ

⁸ Ɖooo lɛ, ɩtaasɩ Ɛsɔ nɛ ɩkɛ agɔlɩma yomaa. Ŋgʋ, atɛkɛ Ɛsɔ. ⁹ Ɛlɛ, lɛɛlɛɛyɔ, ɩsɩm Ɛsɔ nɛ halɩ ɛlɛ ñasɩm-mɩ. Pɩlabɩ ɛzɩma nɛ ɩcaɣ se ɩɖaɣnɩ pɩsʋʋ kedeŋa yɔɔ cɩnɛ ɖoŋ weyi ɩɩpɩzɩɣ pʋyʋ nɛ ɩɩwazɩɣ pʋyʋ yɔ ɩ-wayɩ se ɩpɩsɩ-mɩ yomaa? ¹⁰ Mɩ-ɛzɩyɛ kɩlɩɣ sɛnaʋ kɩyakɩŋ nɩyɩɩ nɛ fenasɩ nasɩyɩ nɛ alɩwaatʋ natʋyʋ nɛ pɩnzɩ nasɩyɩ! ¹¹ Mbʋ yebina nɛ sɔɔndʋ kpaɣ-m se tʋmɩyɛ nɖɩ ɖɩtɩŋa malabɩ mɩ-hɛkʋ taa yɔ, ɖɩtaakɔɔ ɖɩla aleɣwondu.

¹² Taabalaa! Mentendiɣ-mɩ se mɩ-wɛtʋ ɛwɛɛ ɛzɩ ma-ñɩndʋ yɔ, mbʋ pʋyɔɔ yɔ, ma ɖɔɖɔ mɛwɛ ɛzɩ mɩ yɔ. Ɩtalabɩ-m kɩdɛkɛdɩm nabʋyʋ. ¹³ Ɩtɔzɩ se kʋdɔŋ taa maawɛɛ yɔɔ mancalɩ-mɩ susuu Laŋhɛzɩyɛ Tɔm. ¹⁴ Alɩwaatʋ ndʋ pɩwɩɣaɣ-m mbʋ yɔ, ɩlabɩ kʋñɔŋ mɔ-yɔɔ siŋŋ, iteniɣzi-m yaa ɩtɔlɔ-m yem. Ɛlɛ, ɩmʋ-m ɛzɩ Ɛsɔ *tiyiyu nɔɔyʋ yɔ, halɩ ɩmʋ-m ɛzɩ Krɩstʋ Yesu maɣmaɣ yɔ. ¹⁵ Mɩ-taa kɛwɛ leleŋ pɩtɩɩfɛyɩ alɩwaatʋ ndʋ lɛ, pɩla ɛzɩma lɛɛlɛɛyɔ? Mɩ-tɔm taa lɛ, manpɩzaɣ mɔntɔ se: paa mɩ-ɛza yɔ, ɩpɩzaɣ se ɩhɔɔzɩ-yɛ nɛ ɩcɛlɩ-m. ¹⁶ Meheyiɣ-mɩ toovenim yɔɔ manpɩsɩ mi-koyindu naa we?

¹⁷ Ɛyaa mba, pɛ-ɛzɩyɛ sɛnɩ mbʋ palakɩ-mɩ yɔ, ɛlɛ, pɩfɛyɩ ɖeu. Mbʋ pʋyɔɔ yɔ, pañɩnɩɣ se ɩha-m siɣye nɛ ɩnɩnɩ pe-ɖeke. ¹⁸ Toovenim lɛ, pɩwɛ ɖeu se ɛyaa ɛzɩyɛ ɛsɛnɩ camɩyɛ lakasɩ tam yɔɔ. Pɩtaakɛ alɩwaatʋ ndʋ mɛwɛ mɩ-hɛkʋ taa yɔ, ti-ɖeke. ¹⁹ Men-piya! Mantasɩɣ nɩʋ siziŋ mɩ-yɔɔ ɛzɩ halʋ lʋlʋʋ yɔ nɛ pʋkɔɔ pɩsɩnɩ alɩwaatʋ ndʋ ɩtɛzɩ pɩʋ nɛ ɩwɛɛ ɛzɩ Krɩstʋ yɔ. ²⁰ Me-liu wɛɛ siŋŋ se mɛwɛɛ mɩ-cɔlɔ alɩwaatʋ tʋnɛ tɩ-taa nɛ mana ɛzɩma mbʋ maayɔɔdɩnɩ-mɩ yɔ. Mbʋ pʋyɔɔ yɔ, pɩcɛyɩɣ-m mɩ-tɔm taa!

Agaarɩ nɛ Saara pɔ-tɔm

²¹ Mba mɩ mi-liu wɛɛ se paɣtʋ ɛwɛnɩ ɖoŋ mɩ-yɔɔ yɔ, iheyi-m nɛ mana se ɩnɩ ndʋ paɖʋ tɩ-taa yɔ yaa ɩtanɩɩ? ²² Pama tɩ-takayaɣ taa se Abraham wɛnɩ piya naalɛ: halʋ weyi ɛkɛ yom nɛ payaɣ-ɩ se Agaarɩ yɔ, ɛlʋlɩnɩ lɛɛka nɛ weyi payaɣ se Saara nɛ ɛlɛ wɛ ɛ-tɩ yɔɔ yɔ, ɛlɛ ñalʋlɩ lɛɛka. ²³ Yom ñaalʋlɩ ɛ-pɩɣa ɛzɩ halaa tɩŋa lʋlʋʋ yɔ. Piyele weyi ɛwɛ ɛ-tɩ yɔɔ yɔ, Ɛsɔ ɖʋna nɛ ɛlɛ ñalʋlɩ ɛ-ñɩŋga. ²⁴ Tɔm tʋnɛ tɩwɩlɩɣ nabʋyʋ, mbʋ lɛ: *nɔsɩ naalɛ haʋ mbʋ Ɛsɔ ɖʋwa yɔ. Agaarɩ nɛ Saara pawɩlɩɣnɩ-sɩ. Yom Agaarɩ ñawɩlɩɣ nɔɔ haʋ mbʋ Ɛsɔ labɩ Sinayii pʋʋ ñʋʋ taa yɔ, e-piya lɛ yomaa. ²⁵ Ɛwɛ ɛzɩ Araabii pʋʋ ŋgʋ payaɣ se Sinayii yɔ. Ɛwɛ ɖɔɖɔ ɛzɩ tɛtʋ ndʋ tɩwɛ lɛɛlɛɛyɔ nɛ payaɣ-tʋ se Yeruusalɛm yɔ. Mbʋ pʋyɔɔ yɔ, tɩ nɛ tɩ-taa ñɩma tɩŋa pɛwɛ ɛzɩ yomaa yɔ. ²⁶ Ɛlɛ, Yeruusalɛm ŋgʋ kʋkʋ wɛ ɛsɔdaa yɔ kɩ-taa ñɩma lɛ mba pɛwɛ pa-tɩ yɔɔ yɔ, ŋgʋ wɛna ɛzɩ ɖo-ɖoo yɔ. ²⁷ Mbʋ pama Ɛsɔtɔm Takayaɣ taa se:

“Halʋ weyi ña ŋkɛ kaalʋlaɣ nɛ ŋtanɩɩ lʋlʋʋ siziŋ yɔ,

ña-taa ɛla leleŋ nɛ ŋtee hendu nɛ ŋmayɩ amaya!

Mbʋ pʋyɔɔ yɔ, halʋ weyi ña pekizi-ŋ yɔ,

ŋkɔŋ wɛnaʋ piya nɛ pɩkɩlɩ weyi ɛwɛ ɛ-walʋ cɔlɔ yɔ.”

²⁸ Taabalaa! Toovenim lɛ, Ɛsɔ ɖʋna nɛ ɩkɛ e-piya ɛzɩ ɛɖʋʋ ɖɔɖɔ nɛ palʋlɩ Izaakɩ yɔ. ²⁹ Izaakɩ ɛnʋ, paalʋlɩ-ɩ nɛ Ɛsɔ Kalɩzaɣ ɖoŋ. Piyele lɛɛka lɛ, palʋlɩ-kɛ ɛzɩ palʋlʋʋ ɛyaa lɛlaa yɔ. Kaawɛ Izaakɩ ɛnʋ ɛ-wayɩ kaŋ kaŋ. Mbʋ ɖɔɖɔ pʋwɛ sɔnɔ yɔ. ³⁰ Ɛlɛ, pama Ɛsɔtɔm Takayaɣ taa se we? Pamawa se: “Ɖɔɔnɩ halʋ weyi ɛkɛ yom yɔ nɛ ɛ-pɩɣa. Pɩtaha nʋmɔʋ se yom nɛ halʋ weyi ɛwɛ ɛ-tɩ yɔɔ yɔ pe-piya ɛkpɛndɩ patɩɣyɩ pa-caa ñɩm.” ³¹ Taabalaa! Ye mbʋ, ɖɩtɛkɛnɩ halʋ weyi ɛkɛ yom yɔ e-piya, ɛlɛ, weyi ɛwɛ ɛ-tɩ yɔɔ yɔ, ɛ-ñɩnzɩ ɖɩkɛnaa.