TAKAYAƔ ŊGA PƆƆLƖ MA
EFƐƐZƖ ÑƖMA
YƆ
Sɛtʋ
1
1 Ma Pɔɔlɩ weyi pɩkɛdɩnɩ Ɛsɔ nɛ eyele se mɛnkɛ Krɩstʋ Yesu *tiyiyu yɔ, mamaɣnɩ takayaɣ kanɛ. Ɛsɔ ñɩma mba mɩ ɩwɛ Efɛɛzɩ nɛ ɩtɩŋɩɣ Krɩstʋ Yesu nʋmɔʋ yɔ mamaɣ-kɛ. 2 Mɛnsɛ-mɩ: ɖa-Caa Ɛsɔ nɛ Kɩpaɣlʋ Yesu Krɩstʋ palabɩ-mɩ lootiye nɛ pɛhɛzɩ mɩ-laŋa.
Pɔɔlɩ saŋʋʋ Ɛsɔ ɛ-camɩyɛ lakasɩ yɔɔ yɔ
3 Ɖɩsa Ɛsɔ! Ɛnʋ lɛ ɖa-Kɩpaɣlʋ Yesu Krɩstʋ Caa. Ɛtɩŋnɩ ɛ-Kalɩzaɣ yɔɔ nɛ ɛwazɩ-ɖʋ wazʋʋ tɩŋa payɩ ɖa nɛ Krɩstʋ ɖɛ-kpɛndʋʋ taa, ɛsɔdaa pɩtɩŋa payɩ pʋwɛɛ. 4 Kpɛndʋʋ mbʋ pɩ-taa Ɛsɔ lɩzɩ-ɖʋ se ɖɩkɛ ɛ-ñɩma nɛ pataana kɩwɛɛkɩm nabʋyʋ ɖɔ-yɔɔ. Ɛɛlɩzɩ-ɖʋ nɛ pʋcɔ ɛla kedeŋa. Ɛsɔɔlɩ-ɖʋ yɔɔ 5 ɛɖʋ ɖooo lɔŋ se ɛtɩŋɩɣnɩ Yesu Krɩstʋ yɔɔ nɛ eyele ɖɩkɛ e-piya. Mbʋ e-liu wɛɛ, pɩkɛdɩnɩ-ɩ. 6 Ɛlabɩ mbʋ se ɖɩsam-ɩ lootiye koboyaɣ ñɩnɖɛ nɖɩ ɛtɩŋnɩ ɛ-Pɩyalʋ kʋsɔɔlʋ yɔɔ nɛ ɛlabɩ-ɖʋ yɔ ɖɩ-yɔɔ.
7 Ɖa nɛ ɩ ɖɛ-kpɛndʋʋ taa Ɛsɔ tɩŋnɩ ɛ-calɩm yɔɔ nɛ eholi-ɖʋ kɩdɛkɛdɩm nesi taa nɛ ekpeɣ-ɖʋ ɖa-kɩwɛɛkɩm. Mbʋ wɩlɩɣna se e-lootiye fɛyɩ ɖaɣʋ. 8 Ɛtɩŋnɩ ɛ-lɔŋsɩnɖɛ nɛ ɛ-lɛɣtʋ pɔ-yɔɔ nɛ ɛlabɩ-ɖʋ-ɖɩ pɩtɩɩfɛyɩ. 9 Pɩkɛdɩnɩ-ɩ nɛ eyele nɛ ɖɩtɩlɩ mbʋ ɛɛɖʋwa se ɛlakɩ nɛ pʋwɛɛ mɛsaɣ tɛɛ yɔ. Ɛ nɛ Krɩstʋ pɛ-kpɛndʋʋ taa ɛɛɖʋwa se ɛlakɩ-pʋ. 10 Alɩwaatʋ talɩɣ lɛ, ɛlabɩ-pʋ: ekpeɣliɣ mbʋ pɩtɩŋa payɩ pʋwɛ ɛsɔdaa nɛ tataa yɔ wiyaʋ kʋɖʋm koŋ tɛɛ. Ɛnʋ lɛ Krɩstʋ.
11 Ɖa nɛ ɩ ɖɛ-kpɛndʋʋ taa Ɛsɔ ha-ɖʋ pɩtɩŋa payɩ. Pʋ-yɔɔ ɛɛlɩzɩ-ɖʋ ɖooo lɔŋ. Ɛlakɩ pɩtɩŋa payɩ ɛzɩ pɩkɛdɩnaʋ ɛ-maɣmaɣ nɛ ɛɖʋ yɔ 12 se ɖɩsa e-koboyaɣ. Mbʋ pʋyɔɔ yɔ, ɖa lɛ mba pata Krɩstʋ liu nɛ pʋcɔ ɛkɔɔ yɔ.
13 Mɩ nɛ ɩ mɩ-kpɛndʋʋ taa ɖɔɖɔ ɩnɩ toovenim tɔm. Ndʋ lɛ Laŋhɛzɩyɛ Tɔm ndʋ tɩyakɩ mɩ-ñʋʋ yɔ. Pɩ-taa ɖɔɖɔ Ɛsɔ ha-mɩ ɛ-Kalɩzaɣ alɩwaatʋ ndʋ ɩwɛnɩ lidaʋ ɛ-yɔɔ yɔ. Ŋga ɛɖʋwa se ɛhaɣ ɛ-ñɩma. Ŋga lɛ mayaɣ ŋga ɛñɩɣ mɩ-yɔɔ yɔ. 14 Ŋga wɩlɩɣnɩ ɖɔɖɔ se ɛhaɣ-ɖʋ ñɩm mbʋ ɛɛñɔɔzaa se ɛcɛlɩɣ-ɖʋ puwiye nɖɩ eholuu mba ehiɣa se pasa e-koboyaɣ yɔ.
Pɔɔlɩ tenduu Ɛsɔ yɔ
15 Mbʋ yebina nɛ kpaɣ kɩyakʋ ŋgʋ manɩ lidaʋ ŋgʋ ɩwɛnɩ Kɩpaɣlʋ Yesu yɔɔ yɔ nɛ sɔɔlɩm mbʋ ɩsɔɔlɩ Ɛsɔ ñɩma tɩŋa yɔ pɔ-tɔm lɛ, 16 ma ɖɔɖɔ mɛwɛɛ mansaŋ Ɛsɔ mɩ-yɔɔ alɩwaatʋ ndʋ mentendiɣ-i mɩ-yɔɔ yɔ. 17 Malakɩ mbʋ se ɖa-Kɩpaɣlʋ Yesu Krɩstʋ Ɛsɔ, Caa koboyaɣ tʋ ɛha-mɩ lɔŋsɩnɖɛ Kalɩzaɣ nɛ kawɩlɩ-mɩ pɩtɩŋa nɛ ɩtɩlɩ-ɩ. 18 Mentendiɣ-i ɖɔɖɔ se ekuli mɩ-lɩmaɣza yɔɔ nɛ ɩtɩlɩ mbʋ ɛya-mɩ se ɩɖaŋ kpam yɔ nɛ ɛzɩma mbʋ ɛ-ñɩm koboyaɣ ɖewa pɩtɩɩfɛyɩ yɔ. Mbʋ ɛsɩ ɛ-ñɩma. 19 Mentendiɣ-i ɖɔɖɔ se eyele nɛ ɩtɩlɩ ɛzɩma mbʋ e-ɖoŋ sɔsɔŋ weyi ɛfɛyɩ tɩnaɣ yɔ, ɛlakɩ mba ɖa ɖɩwɛnɩ lidaʋ ɛ-yɔɔ yɔ tʋmɩyɛ yɔ. 20 Ɛnʋ ɛlabɩnɩ tʋmɩyɛ Krɩstʋ taa nɛ efezini-i sɩɖaa taa nɛ ɛcaɣzɩ-ɩ ɛ-cɔlɔ lone kɩbanɖɛ taa ɛsɔdaa. 21 Mbʋ yebina nɛ ɛkɛ ɛsɔdaa ɖoŋ tɩŋa nɛ kewiyisi tɩŋa nɛ mbʋ pɩtɩŋa payɩ pɩpaɣlaa nɛ pɩ-hɩɖɛ sɛɛ kedeŋa yɔɔ cɩnɛ yɔ pʋ-ñʋʋ tʋ. Pɩtɛkɛ mbʋ pʋwɛ alɩwaatʋ tʋnɛ tɩ-taa yɔ pi-ɖeke pʋ-ñʋʋ tʋ ɛkɛnaa, ɛlɛ, pɩkpɛndɩnɩ mbʋ pʋkɔŋ wɛʋ cee wayɩ yɔ. 22 Ɛsɔ luzi pɩtɩŋa payɩ ɛ-tɛɛ nɛ eyele nɛ ɛkɛ ɛ-ɛgbɛyɛ taa ñɩma tɩŋa payɩ ñʋʋ tʋ pɩtɩŋa pɩ-taa. 23 Nɖɩ lɛ e-tomnaɣ. Ɖɩ-taa Krɩstʋ ɛnʋ ɛwɛɛ pilim: ɛlakɩ ɖɩ-taa ñɩma tɩŋa pɩtɩŋa payɩ. Ɛwɛ kedeŋa kpeekpe yɔɔ nɛ pɩtɩŋa payɩ pʋwɛɛ e-nesi taa.